Raneh Chitri Yik Aṅ Kòrin
4 Sā mameukṙen Kristū* hēk yōm chehen īhö tö lōn më tarik, öi tö kē-ěvkūö tö ngam Tēv tö ngam Töhet töt mikahkūö sin. 2 Hēk hōtu ngòh tö hěngtak yōm chehen, nö un aṅhavin tö ngam michūṙen. 3 Öt tö mötlö pöri angū-ö nö imat Chu tö Chu öich kahòkkaṙen tö yīö hēk yip tarik ichūök kamhôka, ötrēhěn chin Chū-ö kô inrē öich kahòkkenre. 4 Öt maheūku Chin tö vanāichöre, rö-ö pöri Chū-ö öich löktö in e öich hameuktu öich tölöök, pò Yāvē* nöng anga-aṅ tö mihôiṅ nö kahòkken Chu. 5 Lökten urēhěkūö ngam töhalēniṙen ṙētak tö ngö manah, asā ngam Mā nö öl nö yih, uh yī-ö sin öi kahôka. Pön anga-aṅ min lamöknyö el ngam sinngūlö kamënyen minë ṙô töhayūni nö chuh el ngam hanātö, hēk hameuknyö nup mufē ellōn tarik anga-aṅ ngaich ṙòkhöre min öi teūngen tö ineū-eure ikūö ngam Tēv.
6 Kahōlö, lōntö lanööken yīö Chin öich hachōḵ ṙôre tö inlahen ai, ai Apòlös öich ṙôten në ṙô, hòṅ yīö öi asīnken ai haköplu lök in ngih chööngö: “Un havāngngö röönre tö në tökūichi,” hòṅ yīö öt tööḵlö tö ngam tanāilölōn ngaich mötlö mat tö ngòh tö hěngtak tö ngam tahëng. 7 Asuh öp aṅ in meh töp lökten meh öm mööḵlö tö yip tahëng? Hēk asuh öp aṅ in meh öp töt taneūngen meh? Yēḵ meh öm teūngen ngaich kūö yòh më-eṅ öm eū-eure, öm sā töt teūngen tö e?
8 Ngaich ön nö teungtökūö minë maheūṅkkö meh? Ngaich öm löktökūö ing töngamuh öm kòlô? Ngaich hòng öm rultenre öm hayöng öm höng öt hōlu tö ih? Sööḵ öre yěm ngaich öm vī-ilre öm rācha öm rultenre öm hayöng, hòṅ ih öi vī-ilre öi rācha öi holṙen meh öm hayöng. 9 Pöich ngölōn chū-ö tö ngam Tēv, nö asīnten hī ayī-ö tanīnöṙô öi sā yip tarik tö vënyu sācha nö kumpaha hēk sā inlahen öp tarik tökēḵnyu nö manā-aṅ inmeuknyi nö el öp istēch chūök yip nyamamtô, pò hī ayī-ö töng hameuknyu öi ikūö ngih panam ikūö yip ma-ahānga hēk yip tarik inrē. 10 Chö-öinyten Kristū īhö öi kaheūkö öi töng kulō-ovö, kaheūköre pöri yī-ö öi tö akaha öi in Kristū, höng öt kalē-en īhö, tökalēḵ pöri yī-ö, tökirööngö minlēḵken yī-ö, öt tö milēkaṙen pöri īhö. 11 Söl ing töngamuh īhö öi höng ha-euk hēk haṙëhe nômö hēk lichôi,* fōho īhö* hēk höng öt kamngu inrē 12 mā-ainyre īhö öi la-evṙen öi aṅhtī tökëlre ngaich kētö inkôlò īhö yěi ötlēkaṙen, yēḵ ih öi hayëḵ-e ngaich holtö manööyöre īhö öi la-al u; 13 yēḵ ih öi sūöichka fālen ngaich holtö ṙanëmenre īhö* öi kētö sanapṙô u, söl ing töngamuh in öi sin-òkkūö ngih panam hēk sō-ovö öi i tökeuheūttöre.
14 Hö-ö Chin öich mumṙēḵngen yīö öich kūichten në ṙô, sā hanangenlōnre pöri tö kūönre öich mikahtö elnang yīö. 15 Lökten yěn pòrô öre nö 10,000 ṙôken yip mameukṙen* yīö in Kristū, sön yī-ö öt ṙōltak yöng; chū-ö pöri vamītöre öich yöng yīö öich löktö im tölöök inhānga in Kristū Yēsū. 16 Lökten Chin öich hòṅ aṙētu ṙô tö yīö öi asīnkö inchō-okūöre tö chu. 17 Angū-ö chö-öny Chu öich tīnten Timôtī ngam hanangenlōn nö im Mā hēk töt michūṙen nö nyīö, fēḵlen yīö min anga-aṅ tö nup tö nôlta inlahen chu öich la-evṙen in Kristū, minë haköptö Chu öich keuheūtngöre chūök öich el minë māṅ.
18 Ōtre yip tö tööḵlö tö tanāilöre nö in yīö, sāre yěich öt hēk min öich havan öich chuh in yīö. 19 Yēḵ e pöri nö kuilōn Yāvē* ngaich veūten min Chū-ö öich havan öich chuh in yīö, ngaich yip tarik tö tööḵlö tö tanāilölōnre, hö-ö Chū-ö min öi kën öich hang ṙô cha höng ngëichken cha pöri min chū-ö yěn aṅhavin tö ngam kumlēḵ ngam Tēv hēk hö-ö. 20 Pò ngam Pūlngö ngam Tēv nö öt löktö in minë ṙô, lökten in ngam kumlēḵ ngam Tēv pöri nö hameuktu. 21 Asuh öp lōn yīö? Kumtö tinluh hòng Chū-ö öich chuh in yīö, hēk holtö hanangenlōnre hēk inyāichngöre ṙöng öich chuh in yīö?