Raneh Chitri Yik Aṅ Kòrin
5 Rö-ö pöich hang inlahen öp tö hěngtak tarik mi-in yīö kamëken ngam tökööl chinô-òṅkānö,* ötrēhěn vē aṅkūö ngih panam nö ngatī kahëken tö tökööl nö sā ò, kēḵ ök pīhö ök yöngre anga-aṅ kikōnyö nö pīhöre. 2 Ineū-eu hòng angū-ö nö in yīö yěi ngatī inlahen? Öt hòṅ haṙivlōn hòng öre yī-ö tö ngam inlahenre ngaich kēnyen ngam tarik nö elhôi yīö ngam tö ngatī inlahen? 3 Öt ōt Chin umuh öich in yīö, höng ngam ellōn chu pöri tö ōt nö umuh, ngaich inrē öich kaheuk ngam tarik nö fāluṙen öich sā ṙēngen mu-umuh. 4 Hē yīö öi hamūlöre öi i minë-eny ngam Mā hī Yēsū ngaich höng sā tö akahalōn yī-ö tö Chu* öich in yīö öich löktö i kumlēḵ ngam Mā hī Yēsū, 5 ngaich kēten ngam tarik yī-ö nö eltī ngam Satān hòṅ ngam tökiröng ötlanöökö ngam tökööl ò nö hö-övö hēk löökö mufē më aṅ el ngam māṅ ip yanīhih ngam Mā.
6 Öt tölöng an ngam inlahen yīö öi tāilölōn. Öt akahakūö öi tö ngam tö rahëichyen inföh nö mihôiṅ nö keuheūtngöre tī tö ngam tökirāchö atta nö föhlö? 7 Kavalngen ngam töhötṙeh inföh hòṅ yīö öi vī-ingre tö tufömngöre tökirāchö atta, yěi ngëichkö inlahen yīö pöri öi töt aföhlöng, pò Kristū ngaich nö kētu nö sīṅp ngam Pāska hī. 8 Lökten ta-a ui holtö minë töhötṙeh inföh, ui rēhěn öi holtö minë töchōich hēk tötlöök inföh öi kēken ngam paratīn, holtö chaniplöre hēk kanô-enre pöri öi kēken ngam töt aföhlöng ròtī.
9 I mat ngih chitri re tī Chin kūichhöti tö yīö öi ṙāngenre öi hanôl yip chamô-òṅkānö,* 10 öt tö ngö manah ngih ṙô chu öich in yīö tö yīö ngaich öi höng hanôl yip tarik aṅkūö ngih panam yip chamô-òṅkānö,* yamikhānga, kamëngö kanòlô, hēk vamë-ekūö insātēv, pò yīö öi höng hòṅ ṙāngö ngih panam min yěi ngatī inlahen. 11 Ngaich pöri Chū-ö töngamuh öich kūichhöti öich in yīö, tö yīö öi ṙāngenre öi hanôl yip tarik yip töng prötör invëka nöng kēken ngam chinô-òṅkānö,* yinikhānga hēk vinë-ekūö insātēv, töt lamëkôre, mihiyōi-aṅ hēk kamëngö kanòlô yip tahëng, ui rēhěn öi nyā öi holkūö öp tarik tö ngatī inlahen. 12 Achīö öich Chū-ö kamhòkken yip tarik lamā-uk? Öt hòṅ kahòkken öp tarik hòng pöri yī-ö öp lamātuhēt nö in yīö, 13 kahòkken yip lamā-uk pöri ngam Tēv? “Kēnyen ngam tötlöök tarik yin nö ihôi yīö.”