Inlahen La-en Yik Tanīnöṙô
12 Hē u anū-ö sakāmö ang rācha Heròt nö hakihten yik rīkre tarik aṅ el ngam māṅ. 2 Aṅhtī tö sanët anga-aṅ nö fëlngen Yāköp ök kahëm Yôhan. 3 Hē ò nö meuk yik Yahūti nö ṙamlōn tö inlahen e, ngaich hachēlhöt Pītör hēk anga-aṅ. (Sakāmö ngam paratīn Töt Aföhlöng Ròtī hē e angū-ö.) 4 Kē-ě Pītör ngaich ang Heròt ngaich chaphöt ò nö el chēl ngaich halēnlö yik tö fën tak anga-aṅ kumyung yik tö fën krup, hòṅ cha min nö kö haṙī-ire nö aṅhten ò, pön angū-ö kuilōn ò nö hameuknyen ò min nö ikūö yip tarik,* unôichrit ngam paratīn Pāska. 5 Hē Pītör nö el chēl ngaich holtö ellōnre yik aṅ el ngam māṅ nö vë-ekūötēv nö vë-elkui ò.
6 Hē ök sakāmö Heròt lang nö hameuknyen ò nö ikūö yik tarik, haṙòh ngaich ang Pītör nö elhôi nak tö nëttak amahati, nëtre inrē nuk kël ò nö halökiyö, aṅhtökūö inkūp ngam chēl inrē yik amahati nö lākūö inkūp ök chēl. 7 Chalô ngaich tök ma-ahānga Yāvē* nöng löö nöng söktöhëichṙen nö umuh, yāngö el ngaich ök uròhò chūök Pītör. Hachohlen Pītör ngaich ngam ma-ahānga nö pitepkö el ranôṙö ò, nö ngö ṙô: “Veūten man choholre!” Alököinykūö ngaich nuk inlök kël ò ngaich suktöre. 8 Ngö ṙô ngaich ngam ma-ahānga nö in Pītör: “Nyëklö ratre man hēk kunröplöre.” Ngatī inlahen ngaich anga-aṅ. Ngö ṙô hēk anga-aṅ nö in Pītör: “Kaṙumlöre man töm kinṙumre ngaich tömkörit chu.” 9 Kunyī-inyre ngaich anga-aṅ ngaich chūkörit ò, öt akahakūö pöri anga-aṅ tö inlahen ngam ma-ahānga yěn kô-en nö ngatī inlahen. Pön höng ngölōn anga-aṅ töre nöng meuk heūvö. 10 Hē cha nö chööḵngö ök raneh hēk innëtö amahati ngaich teung nö in ök vët inkūp, ök tö kū-ötö in ök panam nö löpnyörekūö, höng kahngenre ngam inkūp nö löpnyörekūö. Unôichrit cha ngaich nö kunyī-inyre, teung ngaich cha-a nö el talöökö, im hē e ngaich ngam ma-ahānga nöng ṙāngen ò. 11 Möl ngaich ang Pītör nö akahaiṙen tö ngam inlahenre nö kô-en, ngö ṙô ngaich anga-aṅ: “Möl Chin öich akahalōn tö Yāvē* nö tīntö ma-ahāngare nö laklen chu öich ṙā-ang eltī Heròt ngaich öt halöngten chu öich ötlēḵkaṙen nö sā mufē yik Yahūti nö in chu.”
12 Unôchrit e ngaich anga-aṅ nö chuh patī Mariā ök yöng Yôhan ök tö Mākös invëka inrē, pōyen yik mahaköp mahamūlöre nö in e nö vë-ekūötēv. 13 Hē Pītör nö kuröngkökūö ngam lamātunyī inkūp, hěngtak ngaich ök kikānö mahalanṙen kumnyī-inyre nö ngëichken ò, ök tö Rōtā minënyi. 14 Hē ò ngaich nö akaha elnang tö ṙô Pītör, keuheūtnyöre ngaich anga-aṅ tö ṙanamlōnre, höng öt löpnyökūö ök inkūp ngaich anga-aṅ, falhötre pöri nö chuh lātuhēt nö vë-eny nang cha nö ṙòkhöre tö Pītör nöng sökhak nö lātunyī nö ikūö inkūp. 15 Ngö ṙô ngaich yik mahaköp nö in ò: “Katūöyaṙen öm kan ngaich.” Kalēḵ-ěṙô pöri anga-aṅ nöng iṙūöhöṙô, nö ngö ṙô: “Kô-en öp kòl nö anga-aṅ.” Ngö ṙô ngaich cha-a: “Lohten öp kòl nö ma-ahānga ò.” 16 Höng iṙūöhöti pöri ang Pītör nö kuröngkökūö ngam inkūp nöng sökhaka. Hē cha ngaich nö löpnyökūö ngam inkūp ngaich pingangkūö cha-a nö meūkö ò. 17 Aṅhtī tö këlre pöri ang Pītör nö sōten cha nö ṙënuṙô ngaich keuheūtnyö ṙôre nö vë-eny inlahen tī Yāvē* nö kēnyen ò nö ṙā-ang el chēl, ngö ṙô ngaich anga-aṅ nö in cha: “Vënyen në ṙô pöich in Yāköp hēk in yip tahëng inrē prötör.” Unôichrit e ngaich anga-aṅ nö kunyī-inyre nö chuh lātunyī ngaich kiröönngöre nö chuh tahëng kamngö.
18 Im tahëng sakāmö ngaich yik amahati nö taṙōllöngṙen nö ngö ṙô, lök yih ök kan ngaich Pītör. 19 Tölṙô chinöhö ò ngaich ang Heròt ngaich hē ò nö öt kôtökūö, hatëkökūö yik amahati ngaich anga-aṅ hēk kētö chööngö nö hōten cha nö kē-ě ngaich kētu sācha, lökngö Yūta ngaich ang Heròt nö chuh Kaisarī ngaich haroh tum sumkam nö in e.
20 Kalēḵ-ě tanāinyö* ngaich ang rācha Heròt nö in yik tarik aṅ Tūrös hēk Sītōn inrē. Lökten ngaich cha-a nö hēngö ellōn nö ṙòkhöre nö chuh in ök mameukṙen patī ök rācha ang Plāstus, nö hōten ò nö vītö ngam lanāmö nö elhôi cha tö ngam rācha, pò cha nöng löktö in ngam panam ngam rācha nö teūngen tö nyā-aṅkūö më aṅ panamre. 21 Hěngheuh ngaich anga-aṅ ik ṙētak ök tökiröng sakāmö nö hayutlöre tö inyut rācha ngaich ūichngöre nö el chūök kamhôka ngaich kaknyöre nö kētö minkahten nö ikūö yik tarik. 22 Ayôṙa ngaich yik tarik, yik hamang ṙô ò, yik tö mūlhakṙen nö umuh ngaich ngö ṙô: “Hö-ö ön ngih nö ṙô tarik, pön ṙô ngam Tēv!” 23 Hē e ngaich ök ma-ahānga Yāvē* nö fëlngen Heròt, pò ò nö öt ha-öiny ngam Tēv, kamlöku alaha ngaich anga-aṅ ngaich kapah.
24 Iṙūöhöröön pöri ngam ṙô Yāvē* nö keuheūtngöre chūök ngaich pōyen yik tarik ṙamatö-ellōnre.
25 Havan ngaich nā Parnapas nā Sôl, hē kinheūten cha tö ngam la-en mineukṙen yik aṅ Yērūsalem, kumten Yôhan inrē cha-a ök tö Mākös invëka.