Inlahen La-en Yik Tanīnöṙô
13 Pōyen yik pròfět mahaköphöti nö el ngam māṅ i Anti-òk, cha-a yin vē, hē Parnapas, Sīmiōn ngam tösah* invëka, Lukīös ngam aṅ Kurēnī, Manahēm ngam tistrik rūlör ngam hamôl Heròt nö haköp hēk Sôl inrē. 2 Hē cha nö ahik hēk ṙònghöichṙen inrē nö löklōn Yāvē,* ngaich ngö ṙô ngam töhet kumlēḵ nö in cha: “Haköhngen nā Parnapas, nā Sôl nö in ngam la-en, ngam chö-öiny invëtö cha tö chu.” 3 Unôichrit inlahen cha nö ahik hēk vë-ekūötēv, ṙāḵtö eltīre ngaich cha-a nö in cha ngaich tīnngen cha.
4 Ngaich löktö i inchō-okūöre nā tarik tö ngam töhet kumlēḵ nö chuh Silūkiyā, ngaich lökngö in e nö yôklö nö el chōng nö kiröönngöre nö chuh in ök kun panam Saiprös. 5 Hē cha ngaich nö teung nö im kun panam im elpanam Sölmīs ngaich ahangkö ngam ṙô ngam Tēv cha-a nö el ngam chūök vinë-ekūötēv yik Yahūti, in cha inrē ang Yôhan* ngam töng örheūheu nö holṙen cha.*
6 Hē cha ngaich nö keuheūt chahūhure nö in ngam kun panam ngaich teung ngaich cha-a nö el ngam panam Pāfus, in e ngaich cha-a nö meukkūö ök tö hěngtak Yahūti ök tö Paryēsu minënyi, tö hěngtak ök nö tö milūönö hēk tö minyôiny pròfět inrē. 7 Mi-in ök mahayöng* anga-aṅ Sĕrkīös Pôlös, tö akaha ök Sěrkīös Pôlös nö tarik, havëten nā Parnapas, nā Sôl anga-aṅ nö in re pò ò nö töyal nö hang ṙô ngam Tēv. 8 La-al cha pöri ang Paryēsū ngam tö Ēlimas, ngam tö milūönö invëka (Ngam manah ngam Ēlimas tö milūönö) kalēḵ alaha anga-aṅ nö im mahayöng pön sōten ò nö hō-en ngam ṙinatö-ellōn cha. 9 Ngaich ang Sôl ngam tö Pôl minënyi inrē, tööḵlö anga-aṅ tö ngam töhet kumlēḵ ngaich höng haköpmatre nö ngëichken ò 10 ngaich ngö ṙô: “Ō më-eṅ kūön Satān, tö tööḵlö man tö ngam inchīlö hēk tö ngam ötlanöökö takô hēk tö kunyaha elmat tö nup tölöök, öl öm hòṅ ṙā-ang minyôiny-aṅre tö inlahen minë töchip talöökö Yāvē?* 11 Yěh meuk! Choholre an ngam kël Yāvē* nö la-al meh, ngaich öt meuk min më-eṅ, rahëichhangkūö inrē min öm öt meuk yanānga mat ngam tavūöi.” Im hē ngaich anga-aṅ nö sangūli maheuk hēk sā tökiröng ngam sinngūlö nö meūkö tö ò, lökten ngaich anga-aṅ nöng ṙēpkö holre pò ò nö hòṅ sarōkö kël. 12 Ngaich hē ök mahayöng nö meūkö e, ṙatö-ellōnre ngaich anga-aṅ, pò ò nö pingangkūö tö minë inköphöti aṅ in Yāvē.*
13 Unôichrit e ngaich ang Pôl hēk tö yik hol ò inrē nö ṙā-ang Pāfus nö lökngö el ngam mai nö teung nö chuh Pörka im panam Pamfūliā, in e ang Yôhan* nö ṙāngen cha ngaich havan nö chuh Yērūsalem. 14 Höng iṙūöhöröön pöri cha-a nö lökngö Pörka ngaich chuh im kamngö Pisitiā nö chuh im panam Anti-òk, ngaich chuh el chūök vinë-ekūötēv cha-a nö ūichngöre hē ṙētak ngam Haneūheu Töhet Sakāmö. 15 Hē cha nö vë-ekūö minë Chööngö hēk līpöre yik Pròfět nö lākūö yik tarik nö umuh, ngaich unôichrit e yik mākūö minë chūök vinë-ekūötēv nö havëken Pôl, tö yik hol ò, nö ngö ṙô: “Kahōlö, yěn ōt ṙô yīö öi hareuskö alaha më tarik ngaich ṙò-òv yī-ö.” 16 Choholre ngaich ang Pôl ngaich aṅhtī tö këlre nö tölṙô yik tarik nö un ṙënuṙô nö ngö ṙô:
“Hangihtöre yin, yī-ö aṅ Israel hēk yī-ö inrē tahëng tarik tö pa-ekūö tö ngam Tēv. 17 Katöllö yik muvöhngö hī an ngam Tēv Israel, ngaich hē cha nö i Aikup nö sā inlahen yip töt aṅ ngam panam ngaich hapōilen cha hēk kēnyen cha anga-aṅ nö ṙā-ang in e nö aṅhtī tö ngam tökalēḵ këlre. 18 Lohten anga-aṅ nö fën anai samyeūheu ṙò-òten nöng aminngenre nöng ngëichken minë tinrīken cha, hē cha nö el tönyalnyi. 19 Unôichrit inlahen ò nö ahetngen nuk tö sat pumnamö im panam Kanā-an ngaich kēten minë panam anga-aṅ nö amin më aṅ Israel. 20 Lohten angū-ö nö 450 samyeūheu ṙò-òten.
Ngaich unôichrit e ngam Tēv nö halēnlö kamhôka, söl in ök ṙētak pròfět Samuěl nuk ṙētak yik kamhôka. 21 Unôichngöre pöri yik Israel nö havëkö tö hěng rācha re ngaich vīlen Sôl ngaich ngam Tēv ök kūön Kis nö rācha, ngam lamökngörit in Penyamin, 40 samyeūheu ṙò-òten anga-aṅ nö rācha. 22 Unôichrit kinëngö ò, vīlen Tāvit ngaich anga-aṅ nö rācha, ngam tö vënyu inlahen tö ò nö ngö ṙô: ‘Teūngen chin tö Tāvit ngam kūön Yēsī, tö hěngtak anga-aṅ nö tarik tö ṙamlōn tī tö ngih ellōn chu, nup töng kuilōn chu hateungngen u min anga-aṅ.’ 23 Asā ngam kinlēḵngôre ngam Tēv misī nö tīnten ngòh tö hěngtak mahayööken yik Israel nö löktö im kūön* Tāvit, anga-aṅ ök Yēsū. 24 Urēhěkūö yanīhi Yēsū, ngaich ahānga ang Yôhan nö ikūö yik taṙòkhöre tarik aṅ Israel hòṅ cha nö kēḵ ngam vinôkö ngaich angū-ö min ngih minkahngö cha tö cha ngaich nö havöötö ellōnre. 25 Hē Yôhan pöri nö teungta nö in ngam manā-angrit ṙētakre nö in ngam la-enre ngaich ngö ṙô anga-aṅ: ‘Sitih lōn öi yī-ö, achīö öich chū-ö? Hö-ö chin chū-ö öich anga-aṅ. Yěh meuk pöri! Tö ò ngaich nö hòṅ yih nö unôichrit chu ngam tötkô nö luhnyu rehenkūö kunrööpö tö chu.’
26 Kahōlö, yī-ö kūön Aprahām hēk yī-ö inrē tarik tö pa-ekūö tö ngam Tēv, hangihtöre yin, tīntu an ngam ṙô inyööken nö in hī tö ngam Tēv. 27 Öt akahakūö yin më mi-iyöng Yērūsalem hēk tö më mākūö tinlööken cha* inrē tö ngam inyööken, ik ṙētak ò pöri nö kahòkkaṙen ngaich teungtakūö minë taṙòkhöre ṙô yik pròfět, minë tö vë-evkūö hē el ṙētak Haneūheu Töhet Sakāmö. 28 Rö-ö cha-a pön öt chööinyu nö fëlngen ò, sön pöri cha-a nö havëkö kūö Pailět tö kinëtö sācha ò nö kumpaha. 29 Ngaich hē cha nö keuheūten tö nuk inlahenre, nuk tö kūichi inlahen cha ngaich hayônten ò cha-a nö irōi ök chōn ngaich ṙāḵten ò nö el ök tö hěng anūlö. 30 Hachohlöng pöri anga-aṅ tö ngam Tēv nö ṙā-ang in yip tökapah 31 ngaich ṙōl sumkam anga-aṅ nö meūkö tö yik tarik, yik hamòlröön ò nö löktö Kelelī nö chuh Yērūsalem, cha-a yin töngamuh vamënyö inlahen ò nö ikūö yip taṙòkhöre tarik.
32 Lökten in öi vë-eny nang yīö tö ngam tölöök inhānga, inlahen ngam kinlēḵngô ngam Tēv nö in yik muvöhngö hī. 33 Ngaich an ngam Tēv nö hateungngö nuk kinlēḵngôre nö in yik kūönre, töpòkūö hī. Ngaich uroh anga-aṅ nö hachohlen Yēsū nö ṙā-ang in yik tökapah, sā ṙô nup tahëng līpöre Salmai: ‘Kūön chu më-eṅ, ngaich töngamuhten chū-ö öich yöng meh.’ 34 Ngaich an ngam Tēv nö hachohlen ò nö ṙā-ang in yip tökapah, ngaich öt hēk min anga-aṅ nö alaha tö alaha tarik nö kapah ngaich chahū-uyö. Tö hateūngi an ngaich ngih ṙô ngam Tēv nö ngö ṙô: ‘Hameukhömat yīö chin min tö ngam töt chanuhuvṙen hēk tökô-en hanangenlōn chu tö Tāvit, sā inlahen ngam kinlēḵngô chu öich in ò.’ 35 Lökten nö ngö ṙô hēk ngam tahëng Salmai: ‘Öt hökngen ngòh tö chiplö man tarik re nö chahū-uyö.’ 36 Yěi ngëichkö inlahen Tāvit pöri nö asā rò-òtö nômöre anga-aṅ nö la-en tö minë töhet la-en ngam Tēv.* Kapah ngaich anga-aṅ nö sā inlahen mahaṙòh ngaich lāpi nö in yik muvöhngöre ngaich chahū-uyö anga-aṅ. 37 Anga-aṅ pöri ngòh tö hachohlöng tö ngam Tēv nö ṙā-ang in yip tökapah, öt chahū-uyö ngam alaha ò.
38 Lökten kahōlö, akahalōn yin, tö yīö öi höng löktö in ò min öi teūngen tö inṙē-ěl minë tököölre ngaich angū-ö ngih vahënyö ih öi in yīö. 39 Ötkô nun minë chööngö Môsös nö vīten yīö öi tölöök, yip taṙòkhöre pöri ṙamatö-ellōnre nö in ò, kaheūkö min cha-a nö tölöök. 40 Lökten yin haṙēmngenre tö minë tökūichi aṅmat līpöre yik pròfět, nö un teungta nö in yīö. 41 ‘Yěh meuk yin yī-ö tö miyëḵ, pingangkūö yin hēk kapah inrē, pò chu min öich la-evṙen tö minë la-en in në sakāmö yīö, pòrô min nö ōt öp töpētngen nö vë-eny inlahen e, sön min yī-ö öt ṙatö-ellōnre in ò.’”
42 Unôichrit kinheūtṙô cha ngaich tö në ṙô, hē cha ngaich nö kunyī-inyre, ngaich hòṅ aṙēḵtu ṙô yik tarik nö hōten cha hēk min nö ahangtö nang cha ip yamih min hēk ṙētak ngam Haneūheu Töhet Sakāmö. 43 Hē kinheūten ngam manūlö pōyen yik Yahūti hēk yik vamītöre nö in ngam tinlööken Yahūti yik maha-öiny ngam Tēv, ngaich holröön nā Pôl, nā Parnapas cha-a nö kiröönngöre. Hareuskö alaha cha ngaich cha-a nö vë-ekūö cha hòṅ cha nö haköpngöre nö in ngam tökiröng miṙēḵlōn ngam Tēv.
44 Im yamih hēk Haneūheu Töhet Sakāmö höng hòṅ ṙòktöre minë panam nö mūl nö hang ngam ṙô Yāvē.* 45 Hē yik Yahūti nö meuk ṙôken yik tömaṙôngö tarik, tööḵlö ngaich cha-a tö ranānyngöre ngaich la-al ṙô Pôl nö hòṅ vënyö nuk ṙô ò nö tövaich ngaich ötlēkôre inrē. 46 Holtö öt pinhë-ekūöre nā Pôl, nā Parnapas nö ngö ṙô nö in cha: “Tö hòṅ uröören an ngam ṙô ngam Tēv nö urěh nö hòṅ ahangtu nö in yīö öi Yahūti ngaich hameuktöre pöri yī-ö öi öt hòṅ teūngen tö ngam nômö tö örheūheu-aṅ, lökten yěh meuk chuh in nup tahëng panam in öi kiröönngöre. 47 Ngih ön chööngö kahëtö Yāvē* nö in hī: ‘Vīten meh chin öm hanātö ngih panam hòṅ meh ahangkö ngam inyööken söl ip manā-angkūö ngih panam.’”
48 Hē yik tahëng mihëṅṙö ngaich nö hāngö e, kirööngen ṙanamlōn ngaich cha-a ngaich ha-öiny ngam ṙô Yāvē* hēk ṙòkhöre inrē yip tö hō nö köp nö teūngen tö ngam nômö tö örheūheu-aṅ, ṙatö-ellōnre cha-a. 49 Rö-ö nöng angū-ö pön keuheūtngöre chūök hināngö inrē ngam ṙô Yāvē* nö in minë tö röhta kamngö. 50 Ngaich pöri yik Yahūti nö halō-ongkūö yik tö akahka kikānö aṅ ngam panam, yik tö pa-ekūö tö ngam Tēv hēk yik tö akahka inrē tarik, sūöichlö fālen nā Pôl, nā Parnapas cha-a ngaich ahōngen cha nö ṙā-ang im panam cha. 51 Ngaich pitōngngö pitung röönre nā Pôl, nā Parnapas nö minkahngö angū-ö nö in cha ngaich kiröönngöre nö chuh im panam Ikônīöm. 52 Ngaich tööḵlö yik mahaköp tö ngam ṙanamölōn hēk töhet kumlēḵ inrē.