Inlahen La-en Yik Tanīnöṙô
14 Holröönre nā Pôl nā Parnapas nö chuh el chūök vinë-ekūötēv yik Yahūti nö i Ikônīöm, in e cha-a nö vāyö ṙô nö haköphöti, lökten yik tömaṙôngö Yahūti hēk yik ṙamô Krīk nö ṙatö-ellōnre. 2 Yik Yahūti pöri töt ṙamatö-ellōnre, halō-ongkūö yik tahëng mihëṅṙö cha-a ngaich vīhöt kumnyahlōn cha tö më prötör. 3 Lökten nā Pôl nā Parnapas nö vai rò-òten nö umuh ngaich holtö öt pinhë-eṅkūöre cha-a nö ahangkö ngam ṙô ngam Tēv kūöre nö kētu chööngö tö Yāvē,* hameuktö la-en pinngangkūö hēk minkahngö ngam Tēv nö löktö in cha, nö inmeuktö ngam inhangkö ngam tökiröng miṙēḵlōn ngam Tēv angū-ö nö ṙāma-ang in ò. 4 Ngaich pöri yik tarik aṅ ngam panam nö harēvöre, rīkre yik lamāritö yik Yahūti hēk rīkre yik lamāritö yik tanīnöṙô. 5 Holṙen yik mahayöng ngaich yik tahëng mihëṅṙö hēk tö yik Yahūti nö ötlēḵken nā Pôl nā Parnapas ngaich kulëhe cha nö aṅhtī tö ihong nö hòṅ fëlngen cha, 6 akahalōn pöri ngaich nā Pôl nā Parnapas tö inlahen e, lökten ngaich cha-a nö falngöre nö ṙā-ang in e ngaich chuh im panam Listra i Likôniā hēk Törpī tö minë tö röhta inrē kamngö in e. 7 In u ngaich cha-a nöng iṙūöhen nö ahangkö ngam tölöök inhānga.
8 Hěngtak ök tarik mi-i Listra töt kalē-en kalröön. Löktökūö finötnyöre anga-aṅ nöng töng karòk, öt hěng heuh röön inrē nö kiröön. 9 Chumkūöṙen anga-aṅ nö hangihtöre tö ṙô Pôl. Chumkūöṙen inrē ang Pôl nö ngëichken ò ngaich akahakūö anga-aṅ tö ngam tarik nö īnu tö ṙinatö-ellōnre hēk ṙinatu-ellōn inrē anga-aṅ min töre nö öthō nö ötlööken, 10 lökten ngaich ang Pôl nö pōitô nö ngö ṙô: “Hachiplöre man öm söklöre, öm löktö i kumlēḵ minë kalröönre.” 11 Hē yik tarik nö meuk ngih la-en Pôl, pōitô ngaich cha-a nö ayôṙa nö i ëlô Likôniā, nö ngö ṙô: “Yônti yin vē tēv nö sā inlahen tarik nö ihôi hī!” 12 Chiūs* ngö ṙô cha-a tö Parnapas, Hörmīs* ngö ṙô pöri tö Pôl, pön anga-aṅ tö pōyen ṙô yěn ṙò-òvö. 13 Ngaich ngam kūönṙô ngam Chiūs tempöl ngam lamākūö ngam panam nö yihtöre nö kumtö nuā hēk pūl neūmö* nö chuhkūö ngam inkūp, hòṅ kētö tökētu anga-aṅ nö holtö yik tarik nö ikūö nā Pôl nā Parnapas.
14 Hē nak tanīnöṙô pöri nā Parnapas nā Pôl nö hang inlahen e, tikachngö inyutre ngaich cha-a ngaich faltöre nö in yik tömaṙôngö ngaich ayôṙa nö ngö ṙô: 15 “Yī-ö tarik, kūö yòh öi kan ngatī inlahen? Töng sā yīö an āyö inrē ai töng tarika. Ngaich ahangtö nang yīö tö ngam tölöök inhānga, hòṅ yīö öi ṙāḵngen minë chehen töng chuhngöre ngaich yihtöre öi in ngam tö aṅ Tēv, ngam vamīlö ngam halīöngö, panam hēk tö ngam mai tö nup töng aṅkūö e inrē nö ṙòkhöre. 16 Höng hökngen minë taṙòkhöre anga-aṅ panam i nuk tö ngaichngen ṙētak nö lök el talöököre, 17 sön pöri anga-aṅ nö hameuktö neūkölōnre nö ikūö yīö ngaich ngatī inlahen nö vënyö inlahenre nö in yīö, kē-ěkūö yīö anga-aṅ tö kumṙah nö löktö el halīöngö, kētö minë tövai anga-aṅ kumföötö nö in yīö, hòṅ minë nyā-aṅkūö yīö nö sīöpö ṙòng, hòṅ yīö öi hatööḵngenre öi nyā-avkūö ngaich teūngen inrē tö ṙanamlōnre.” 18 Unôichrit cha nö ṙòten u, holtö kanihngenre cha-a nö asökngen yik tömaṙôngö nö kētö tökētu nö ikūö cha.
19 Höng yihtöre pöri yik Yahūti aṅ Anti-òk hēk Ikônīöm nöng umuh nö holtö tanāinyöre ngaich kēḵ yik tarik nö lāritö cha, lökten ngaich yik tarik nö aṅhtī tö ihong nö kulëhe Pôl ngaich tūöknyen ò nö lātunyī töm panam, pön ngaich anga-aṅ nö kapah tö lōn cha. 20 Hē yik mahaköp pöri nöng sökhak nö havīlen ò, choholre ngaich anga-aṅ ngaich kiröönngöre nö chuh el panam. Im tahëng sakāmö ngaich anga-aṅ nö holten Parnapas nö chuh Törpī. 21 Hē cha nö keuheūten nö ahangkö ngam tölöök inhānga nö im panam hēk vīten yip tarik inrē nö mahaköp, havan ngaich cha-a nö chuh Listra, Ikônīöm hēk Anti-òk inrē. 22 In e cha-a nö hangönkö alaha yik mahaköp ngaich ngö ṙô nö ṙūöhöl alaha cha nö hangönkö ngam ṙinatö-ellōnre: “Hòṅ holtö kanihngenre in yěi hòṅ kuhēthötre im Pūlngö ngam Tēv.” 23 Hěnghöre halēnlö yip minṙöinylen cha-a el minë māṅ, ahik hēk vë-ekūötēv inrē ngaich kēten më minṙöinylen cha-a nö eltī Yāvē,* ngam chūök ṙinatö-ellōn cha.
24 Ngaich lökngö in nup kamngö Pisitiā cha-a nö teung nö i Pömfūliā, 25 ngaich hē kinheūten cha nö ahangkö ngam ṙô nö i Pörka, chuh Attalia ngaich cha-a. 26 Lökngö in e ngaich cha-a nö yôklö nö el chōng nö chuh Anti-òk, angū-ö ön ngih chūök më prötör nö havëkö ngam tökiröng miṙēḵlōn ngam Tēv nö holtö ṙinatö-ellōnre, keuheūten ngaich cha-a tö ngam la-enre.
27 Hē cha nö teung nö i Anti-òk ngaich hamūl nup māṅ ngaich cha-a, ngaich vë-eny nang cha tö inlahen ngam Tēv nö sitih inlahen nö la-evṙen nö löktö in cha tī hēk sitih inlahen inrē nö löpnyökūö talöökö më tahëng mihëṅṙö nö ṙatö-ellōnre nö in ò. 28 Marò-òten cha-a nö kē-ěny ṙētakre nö in yik mahaköp nö umuh.