Raneh Chitri Yik Aṅ Kòrin
6 Yěn la-alkūö höö nap tönët tak tarik nö elhôi yīö, ngaich kūö yòh yī-ö öi kēten cha öi chuh in yip tötlöök tarik ichūök kamhôka öi öt chuh in yip töhet tarik öi kahòkken cha? 2 Öt akahakūö öi tö yip töhet tarik min nö kahòkken ngih panam? Yēḵ yīö öi kahòkken ngih panam? Ngaich ötkô hòng yī-ö öi kēḵ fëslare öi inup töng rahëichnyen inlahenre? 3 Öt akahakūö öi tö hī ayī-ö öi kamhòkken yip ma-ahānga? Ngaich kūö yòh yī-ö ötkô öi kahòkken nup aṅ in ngih nômö? 4 Yēḵ yīö öi kēḵ fëslare i alaha ngam nômö ngaich kūö yòh yī-ö öi katöllen yip tarik töt kò-òre nö imat ngam māṅ nö kahòkken yīö? 5 Miṙēḵngen yīö Chin öich ngatī ṙô. Öt ōt hòng elhôi yīö tö akaha tarik tö mihôiṅ nö kahòkken më prötör? 6 Ngaich pöri ngam tö hěngtak prötör nö chuh kūö kamhôka nö kumten öp tahëng prötör nö ikūö yip töt ṙamatö-ellōnre!
7 Kô-en, nö angū-ö lökngen yīö öi öt mihôiṅ, pò yīö öi höng kö kahòkken höö. Ötkô öi hökngenre öi hayëḵ-eiṙen? Ötkô hòng më-eṅ öm hökngenre yěn michūṙen öp tahëng tö meh? 8 Rö-ö yīö, pöi höng kôten öi hayëḵ hēk hachīl yip holre prötör!
9 Öt akahalōn öi tö yip tarik min, yip töt lamök in nup töhet inchöngtenre tö ngam Tēv nö öt amīnu min tö ngam Pūlngö ngam Tēv? Un nyātölōn ötrēhěn chamô-òṅkānö,* vamë-ekūö insātēv, ma-asěha, tö ṙātu nöng chamò-òṅ kikōnyö nöng kikōnyö, 10 mu-ulāiya, yamikhanga, mihiyōi-aṅ, töt lamëkôre, ötrēhěn yip kamë inlānen holre min nö amīnu tö ngam Pūlngö ngam Tēv. 11 Ōtre yip in yīö tö ngatī la-en sin. Ngaich pöri yī-ö öi ahetlöng ngaich kaheūkö öi töhet öi löktö in ngam minë-eny ngam Mā hī Yēsū Kristū hēk löktö in ngam töhet kumlēḵ ngam Tēv öi kaheūkö öi tölöök.
12 Ṙòkhöre në ṙô nö töhō-ovö tö chu, öt ṙòkhöre pöri nö yöölen tī, ṙòkhöre nun në ṙô nö hō-ovö tö chu, öt halöngngenre pöri chū-ö öich haköövö* tö nup töng sitih chehen. 13 Chö-öinytö ngam aich an ngam nyā-aṅkūö, ngaich chö-öinytö ngam nyā-aṅkūö ngam aich nëtre pöri min anū-ö nö ahetiyö tö ngam Tēv. Hö-ö ön ngih alaha nö chö-öinytö ngam chinô-òṅkānö,* pön chö-öinytö ngam Mā ngaich ngam Mā nö chö-öinytö ngam alaha. 14 Löktö im kumlēḵre pöri ngam Tēv nö hachohlen ngam Mā nö ṙā-ang in yip tökapah hēk ngatī inlahen min anga-aṅ nö hachohlen hī.
15 Öt akahalōn öi tö minë alaha yīö nö tūmö alaha Kristū? Kēḵ minë tūmö alaha Kristū hòng Chū-ö öich vīten u nö tūmö alaha më mi-inyihköre kikānö? Hö-ö öt ngatī! 16 Öt akahakūö hòng yī-ö tö ngòh mahamūltöre nö in vē mi-inyihköre ngaich kaheūkö min cha-a nöng töng hēngö alaha? Pön ngö ṙô ngam Tēv “nëtre tak cha-a, nöng hēngö alaha.” 17 Ngòh mahamūltöre pöri nö im Mā hēngö ellōn ngaich anga-aṅ nö in ò. 18 Ṙūöhöngre yin tö ngam chinô-òṅkānö!* Ṙòkhöre nun nöng tökööl në kahëken ngòh tarik nö la-uk ngam alaha ò, ngòh töng örheūheu pöri nö kēken ngam chinô-òṅkānö tököölö fālen anga-aṅ nö im alahare. 19 Öt akahakūö öi tö ngam alaha yīö nö patī ngam töhet kumlēḵ, ngam lamātuhēt yīö hēk ngam tökētu tö ngam Tēv nö in yīö? Ngaich öt chööngu yī-ö öi in re, 20 pōyen ṙāi yin öi kē-ě. Lökten yin örheūheu ha-öiny ngam Tēv öi löktö im alahare.