Inlahen La-en Yik Tanīnöṙô
15 Rīkre yik tarik lamöktö Yūta nö chuh Anti-òk ngaich haköpten yik prötör cha-a nö ngö ṙô: “Yēḵ yīö öt tunyīnyiyö öi asā ngam chööngö Môsös ngaich öthō min yī-ö öi teūngen tö inyöökenre.” 2 Hē cha pöri ngaich nö kil ṙô nā Pôl nā Parnapas hēk la-alkūö cha inrē ngaich halēnlöngṙen sinöömngö ngaich nā Pôl nā Parnapas hēk tö yik tahëng inrē prötör, tö yik tanīnöṙô hēk tö më minṙöinylen nö chuh Yērūsalem.
3 Söömngö chanūhu cha ngaich yik aṅ el ngam māṅ ngaich lökngö Finikē hēk minë kamngö i Samariā vē prötör nö kiröönngöre ngaich keuheūtnyö ṙôre nö vë-eny nang yik prötör aṅ in e, tö inlahen yip tahëng mihëṅṙö nö halööktitre ngaich haköpngöre nö in ngam Tēv, keuheūtnyöre më prötör tö ṙanamölōnre hē cha nö hāngö e. 4 Hē cha ngaich nö teung nö i Yērūsalem ngaich holtö ṙanamölōnre yik aṅ el ngam māṅ hēk tö yik tanīnöṙô hēk tö yik minṙöinylen inrē nö ha-öiny tö yīhi cha. Vë-eny nang cha nā Pôl nā Parnapas tö ngam Tēv nö löktö in cha tī nö keuheūtngö minë taṙòkhöre la-en. 5 Rīkre pöri yik tarik tamömrit yik Feresī yik vamītöre ngaich nö ṙamatö-ellōnre söklöre cha-a nö im chūökre ngaich ngö ṙô nö in cha: “Hòṅ uröören ön ngam inlahen më tahëng mihëṅṙö nö ötkô nö öt tunyīnyiyö hēk hòṅ haköp nup chööngö Môsös inrē.”
6 Hamūlöre ngaich yik tanīnöṙô hēk tö yik minṙöinylen nö vë-ekūöre tö ngam inlahen. 7 Chumkūöṙen cha-a nö vë-ekūöre tö ngih inlahen ngaich marò-òtö ṙô nö kakken* e, unôichrit e ngaich ang Pītör nö söklöre ngaich ngö ṙô nö in cha: “Kahōlö, akahakūö yin tö ngam Tēv nö löktökūö raneh nö katöllen chu öich ihôi yīö hòṅ më tahëng mihëṅṙö nö hang ngam tölöök inhānga nö löknyö elvāng chu ngaich ṙatö-ellōnre. 8 Ngaich ngam Tēv ngam tö akahakūö tö ellōn tarik nö kēten ngam töhet kumlēḵre nö vë-enyre töre nö hō-en cha, sā inlahen ò nö hō-en hī. 9 Öt harīkngöre tī anga-aṅ nö in hī hēk in cha, asā ngam ṙinatö-ellōn cha pöri ngatī inlahen anga-aṅ nö ahetlö ngam ellōn cha. 10 Ngaich kūö yòh yī-ö öi kalah ngam Tēv, öi hakeunlen nup tölangan öi in yip mahaköp minë tötkô nö keūnö tö hī hēk tö yik muvöhngö hī inrē? 11 Ṙatö-ellōnre pöri tö hī öi teūngen tö ngam inyööken öi löktö im tökiröng miṙēḵlōn ngam Mā hī ang Yēsū, öi sā inlahen cha nö teūngen tö ngam inyööken.”
12 Ṙòkhöre ngaich cha-a nöng ötṙënuṙô hē cha nö hāngö e, ngaich hangihtö ṙô nā Parnapas nā Pôl cha-a tö ngam Tēv, nö sitih inlahen nö löktö in cha tī nö hameuktö minë tö pōyen pinngangkūö hēk minkahngö la-en nö in yik tahëng mihëṅṙö. 13 Hē kinheūt ṙô cha ngaich nö ṙò-òvö, kaknyöre ngaich ang Yāköp nö ngö ṙô: “Kahōlö, hangihtö ṙô chu yin. 14 Keuheūtnyö ṙôre ang Sīmiōn* nö vë-eny inlahen ngam Tēv nö sitih inlahen nö möl nö chumkūöṙen tö më tahëng mihëṅṙö hòṅ ò nö hamūl yip tarik ihôi cha yip tö akahka nö i minë-eny ngam Tēv. 15 Ngaich sāḵta inrē minë ṙô yik pròfět nö in ngih ṙô, sā kinūichngö e nö ngö: 16 ‘Havan chin min hēk hē kinheūten në ṙô ngaich asöklö ngam tö fukngö inrūkui* Tāvit hēk mānlen e inrē min ngaich asöklen e nö sā inlahen e ik urěh, 17 hòṅ yip chööḵ vē tarik nö holtö ellōnre nö holṙen më taṙòkhöre pumnamö nö chöhö Yāvē,* yip tö vënyu inlahen tö Yāvē* nö ngö ṙô, tö cha min nö töhavëka nö i minë-eny chu. Hēk ngam Tēv ngam töla-evṙen tö në taṙòkhöre la-en, 18 nö urěhangen tī nö halēnngö ellōnre misī nö ngatī inlahen.’ 19 Lökten ön ngih katöllö* chu tö yip tarik aṅ in më tahëng mihëṅṙö mahavöötö ellōnre nö in ngam Tēv ngaich uh ayī-ö öi hakihten cha, 20 kūichtö līpöre cha pöri nö ṙūöhöngre tö nup chehen tö nup töchōich, tö minë insātēv minë chinô-òṅkānö,* nyinā-aṅvkūö tö alaha minë töṙeūla töng hanlöiny hang likeun* hēk mahām inrē. 21 Lökten yik tö misī-iten tarik tö ngatī inlahen nö ahangkö ngam ṙô nö ikūö minë panam, ngam tökūichi nö imat līpöre Môsös ngaich örheūheu minë līpöre ò nö vë-evkūö nö el minë chūök vinë-ekūötēv hē el ṙētak Haneūheu Töhet Sakāmö.”
22 Holṙenre ngaich më aṅ el ngam māṅ tö yik tanīnöṙô hēk tö yik minṙöinylen nö katöllö ngam inlahen cha nö katöllö yip tarik ihôi cha nö hol nā Pôl nā Parnapas nö tīniyö nö chuh Anti-òk, tö sā Yūta ngam tö Pārsöpas invëka hēk Sailes inrē ök mahachō-okūö yik prötör. 23 Ngö tī ngaich cha-a nö kūichtö chitri kum më prötör:
“Yī-ö aṅ Anti-òk, Siriā, tö yip tahëng mihëṅṙö inrē holmaneuk ih mi-iyöng Kilikiā, sinlāmö ṙama-ang in ih öi holmaneuk yīö, öi tanīnöṙô hēk minṙöinylen inrē. 24 Hang inlahen yīö in tö yip rīkre tarik lamöktö in ih nö chuh in yīö nö ṙô tö nup ṙô tö haṙivlōn tī tö yīö, ngaich hòṅ hakūönngö ngam ṙinatö-ellōn yīö inrē, öi höng öt kētö chööngö cha nö ngatī ṙô nö in yīö, 25 lökten ṙòkhöre öi hēngö ellōn öi katöllen yip prötör nö tīntu nö hol minā hanangenlōn ih nā Parnapas nā Pôl nö chamuh in yīö, 26 cha-a nan tarik kamëngö nômöre nö chö-öinyten tö hī nö i minë-eny ngam Mā hī ang Yēsū Kristū. 27 Tīnten nā Yūta nā Sailes in inrē hòṅ cha nö hakôtenre nö vë-eny nang yīö tö në ṙô minkahtölōn. 28 Löktö i inyöökenre in tö ngam töhet kumlēḵ öi teungta öi ihih, öi öt hakeunlen yīö tö minë tölangan, höng minë tötṙanāngen pöri ṙô: 29 tö sā yīö öi hòṅ ṙūöhöngre tö nup tö kētu chehen öi ikūö insātēv, mahām, alaha töṙeūla tö hanlöiny hang likeun* hēk chinô-òṅkānö* inrē, yēḵ yīö min öi chumkūöṙen tö në ṙô öi örheūheu öi ṙūöhöngre tö u, ngaich höng yanöölen yīö min anū-ö. Kumchikṙen yēḵ nö in yīö!”*
30 Hē cha ngaich nö söömngörit vē tarik kiröönngöre ngaich cha-a nö chuh Anti-òk ngaich hamūl yik taṙòkhöre mahaköp ngaich kē-ěkūö cha tö minë chitri. 31 Reushlöre alaha cha-a nö vë-ekūö minë chitri keuheūtnyöre inrē cha-a tö ṙanamölōnre. 32 Pròfět nak nā Yūta nā Sailes ngaich pōyen nuk minkahten kahëtö cha nö hareuskö alaha më prötör hēk hangönken cha inrē. 33 Kē-ěny ṙētakre cha-a nö umuh ngaich söömngörit chanūhu më prötör aṅ muh, havan ngaich cha-a nö in yik prötör yik tamīnngen cha sin. 34* —— 35 Höngngöh pöri nā Pôl nā Parnapas nö i Anti-òk hēk holröön yip tö pōyen tarik nö ahangkö ngam tölöök inhānga ngam ṙô Yāvē* ngaich haköphöti inrē.
36 Unôichngöre ngaich ang Pôl nö ngö ṙô nö in Parnapas: “Ta-a* töi hēk havan chuh in nup panam nup chūök hāṅ sin ai ahangkö ngam ṙô Yāvē, chöhken yip prötör inrē mi-iyöng in e.” 37 Ngaich ang Parnapas nöng halēnngö ellōnre nö hòṅ ngô-òṅ Yôhan nö hol cha ök tö Mākös invëka. 38 Hö-ö pöri ang Pôl nö hòṅ keunngen ò nö hol cha, pò ò sin nö kiröönngöre nö ṙāngen cha nö i Pamfūliā ngaich öt holṙen cha nö in ngam la-en. 39 La-alkūöre ngaich nā Pôl nā Parnapas nö chö-öinyten ò, lökten ngaich cha-a nö köhngen tö höö, kumten Mākös ang Parnapas nö yôklö nö el chōng ngaich kiröönngöre nö chuh Saiprös. 40 Katöllen Sailes ang Pôl, vë-elkui Pôl ngaich më prötör hòṅ ngam tökiröng miṙēḵlōn Yāvē* nö köp nö in ò, kiröönngöre ngaich cha-a. 41 Ngaich lökngö Siriā hēk in nup kamngö i Kilikiā anga-aṅ nö hangönken nuk māṅ.