Ṙamölōn Pöi Möl Akahakūö Töm Tötmikahkūö Sin

Vënyu nang öm ṙung tö nup tötkô sin nö hāngö?—a Vë-eny nang hī ön ngam Paipöl töp töhĕng ‘töhet ötmikahkūö sin.’ Ṙën angu-ö nö kaheūkön töhet pô e nö aṅ im Tēv. Kaheūkö inrē nö ötmikahkūö sin pön öl nö hĕng tak sin tarik tö akahakūö tö e. Ötrĕhĕn inrē yip ma-ahānga nö akahakūö tö e. Hòṅ ṙūötö mikahkūö re öm tö e angu-ö tötmikahkūö sin?—

Inuk tö misī ṙētak, vīlö tö nët taka tarik ngam Tēv. Ātöm minë-eny ngam kikōnyö ngach Ēva minë-eny ngam kikānö. Kē-ĕkūö cha ngam Tēv tök tövai patī cha ngam panô-òṅ Ēten tö ṙô hī. Yĕn köp öre nā Ātöm nā Ēva nö hang chööngö ngam Tēv, ngach mihôiṅ cha-a tö më kūön cha inrē nö vīten ngih panam nö peretāis nö sā ök panô-òṅ. Ngach örheūheu cha-a nö iyöng kūö e. Sitih inlahen nak pöri nā Ātöm nā Ēva?—

Halôngen chööngö ngam Tēv nā Ātöm nā Ēva, töp lökten ngih panam nö öt köpsören nö peretāis. Vë-eny re pöri ngam Tēv nö hòṅ hēk min nö vīten ngih panam nö vai, hòṅ hī ṙòkhöre aṅ ikūö e öi ṙamölōn. Sitih tī pöri min anga-aṅ nö vīten e? Öl nö hĕng tak sin tö akahakūö tö e. Lökten e nö kaheukö nö tötmikahkūö sin.

Hē Yēsū pöri misī nö yih nö ing panam, ṙūötö mikahkūö yik tarik anga-aṅ tö ngam tötmikahkūö sin. Vënyen e anga-aṅ nö ngam pūlngö ngam Tēv. Tölṙô yik tarik anga-aṅ nö vë-ekūötēv nö havëkö yanīhih ngam Pūlngö. Pön angu-ö min chehetī ngam Tēv nö vīten ngih panam nö peretāis.

Ngach öm ṙamlōn pò meh möl akahakūö töm tötmikahkūö sin?— Köpölōn man, höng yip hamang chööngö Yāvē yip min tö aṅ nö ikūö öp Peretāis. Vënyu nang in töm Paipöl tö istori yik tarik hamang chööngö Yāvē. Hö-ö öm hòṅ haköp inlahen cha?— Ta-a töi haköp inlahen cha hòṅ hī asīnkö nuk tölöök inlahen cha.