Förvörī

Lōnu ön Yāvē tö yip tarik ò nö ṙamlōn. Röhta anga-aṅ nö in cha yēḵ cha nö haṙivlōn, ngaich chumkūöṙen anga-aṅ tö cha. (Sal. 145:18, 19) Ngëichkö ngam inchōḵ elmat Ĕlaicha. Yip tökirööng Mā aṅ Israël ṙòkhöre acha-a nö hakihten yip tarik Yāvē ngaich hòṅ fëlngen Ĕlaicha inrē acha-a. (1 Rā. 19:1, 2) Ngö ṙô lōn lohten ang Ĕlaicha töre nöng hěngtak nö pròfēt ngam Tēv nö ing panam Israel. (1 Rā. 19:10) Meuk ngam kanihngen ò ang Yāvē ngaich ilööṙen nö hayööken ò. Tīnten ök ma-aṅhāngare anga-aṅ öp kamëtö ṙinatö ellōn Ĕlaicha tö ò nö öt hěngtak—Pōyen yip aṅ Israel tö ṙònghaichṙen nö löklōn Yāvē! (1 Rā. 19:5, 18) Kilēḵngôre ök Yēsū nö in yip haköoptöre tö cha min nö teūngen tö öp tökirööng mikūönöre. Yip aṅ el ngam Maṅ yip min mikūönö cha. (Māk. 10:29, 30.) Kilēḵngôre ön Yāvē nö in yip lamöklōn ò nö öt ṙāngen cha min anga-aṅ.—Sal. 9:10. w21.06 pěch 8-9 përa 3-4

Pōyen yip töt hòṅ hang ṙô hī pön lökngörit ngam Paipöl nup inköphöti ṙô hī. Sā minë inköphöti ṙô yip yöngṙen tö yip tökapah nö ṙòkhöre nö chuh el halīöngö. Höng pinhëṅ-elkūö yip tarik cha-a tö minë inköphöti. Akahakūö pöri vē Vamënyen Yāvē töm Tēv nö Tēv hanangenlōn. Ōt tit nyin inrē öp ma-alaha ngòh tarik unôichrit kinpaha tö ṙô më yöngṙen cha. Ngaich yěn ngatī pöri ngam inköphöti ngaich höng yanëngen min ngam invanlö, kô-en pöri ngam Tēv nö öt kūichngö inlahen hī töp tö urěhngöre. Mihôiṅ pöri öi katöllöp lōnre talöökö yēḵ hī hòṅ löklōn ngam Tēv hēk yěi hö-ö. Asīöp ngam hanangenlōnre man töm kanô-en, ngaich hō-o nup inköphöti min më-eṅ nup tölöng, kēkö kaha u inrē. (Yôh. 8:45, 46) Hakööpöre im kanô-en um sō-en e tön sō an ngam Sī-ö töm kanô-en. (Yôh. 8:44) Hōten yip tarik re ngam Tēv nö “surīkhö töchōich” ngaich “hāngen pöri tö tölöök,” öm asīnken Yēsū.—Rōm. 12:9; Hep. 1:9. w21.05 pěch 10 përa 10-11

Hòṅ asuh öp inlahen hī hòn öt vönhöt in minë tönailö lōn hēk yinikhangö? Ngö ṙô öng Pôl yip “tö kē-ě nö aṅ” tö ngam Sī-ö ngaich mihôiṅ acha-a nö ṙā-ang el ngam tinngöp ò. (2 Tim. 2:26) Öt kò ayī-ö öi vachngö tö Yāvē nö kalēḵ tö ngam Sī-ö. Yēḵ hī kēḵ inyööken re in ò ngaich mihôiṅ min ayī-ö tö ngam Sī-ö. Maöinyre ayī-ö, öi ui vönhöt tö minë tinngöp tī ngam Sī-ö. Höng in Yāvē inyööken in mihiôṅ. Ngatī yip i sin tarik Yāvē tö inū tö minë tönailölōn hēk yinikhangö. Lökten ayī-ö hòṅ havëkö inyööken re in Yāvē, hòṅ hī öi ngëichkö ngam mufē re hēk la-en re. (Sal. 139:23, 24) Yēḵ hī ngö lōn tö re öi inū tö ngam tönailölōn hēk yinik hangö ngaich ilööṙen ayī-ö öi kavalngen u. Kööinyu samyeuheū ngam Sī-ö nö halò-ongkūö tarik. Röhten kinēngö pöri ngam Sī-ö. (Inm. 20:1-3, 10) Hökkö ngam tövai ṙētak in. Lökten ayī-ö öi hòṅ laklöre tö minë inyikhanga tö tī ngam Sī-ö hēk tö ngam tönāilölōn ngaich ṙūöngöre inrē tö u. Hòṅ iṙūöhen ayī-ö, “Harainyngö ngam Sī-ö pöri, ngaich falngöre min anga-aṅ tö yī-ö.” w21.06 pěch 19 përa 15-17

Ṙamölōn ang Yāvē yěn meuk yip tarik nö haköpmat ngam Paipöl ngaich vë-eny nang tahëng tö nup haköp re. (Inch. 23:15, 16) Iṙôkö ṙanamlōn ang pökeh Yāvē töngamuh nö meuk ṙôken yip tarik tö hôṅ haköp! Pòrô el ṙūngö ngam invah vahë ik 2020 nö 77,05,765 ṙôken yik tö kē-ě istötī, in cha yik tö 2,41,994 ṙôken kamëtöre nö löklōn Yāvē ngaich kēḵ ngam vinôkö. Cha-a min hēk vē tufömngöre mahaköp chamöh yip tarik tö hòṅ haköpmat Paipöl ngaich haköpten cha. (Lūk. 6:40) Mihôiṅ in ayī-ö inrē haṙamlōn Yāvē yēk hī haköptö tahëng tö mine ṙô ò. Kô-en nö öt lööṙen ngam inköptö tarik tö ṙôm Tēv, öt kihngen pöri ayī-ö yēḵ hī kēḵ inyööken re in Yāvē. Mihôiṅ in afēkö inlahen re öi kalah chöh töng hěng tak kahë istötī re? Ngaich hayööken hī min ang Yāvē öi chöh istötī re. w21.07 pěch 6-7 përa 14-16

Luvënyökūö ellōnre ang rācha Tāvit nö kētö nuk tö pōyen rupīö ṙāi minānlö ngam patī ngam Tēv. (1 Kin. 22:11-16) Yēḵ ngòh tököiny hol maneuk hī nö öt kô nö kētöre nö in ngam la-en minānö. Mihôiṅ pöri anga-aṅ nöng kētö minë tö kētu inyööken minānlö minë patī. Ngih inrē kò-òren inlahen cha nö hameuktöre nö luvë-akūö ellōn. Yěn haköptö më tö ayal tarik tö minë tö pōyen heuneū-en cha. Tö luvë-akkūö ellōn ök misī inrē Pôl. Lökten ò nö kē-ě Timôtī nö holröön ò nö im la-en ò misönörī. Kē-ěny ṙētak re anga-aṅ nö haköpten ò. (Inl. 16:1-3) Pön hōten ò nö tö heuveū-en nö ma-ahangköm tölöök inhānga, mahaköphöti inrē. (1 Kòr. 4:17) Nuk töng sitih haköp Timôtī nö in Pôl, haköptö yik tahëng inrē anga-aṅ tö u. w21.09 pěch 12 përa 14-15

Asuh öp mihôiṅ haköp hī in na Pôl tö Apòlös inrē? Tö akahakūö nak tö ṙô ngam töhēt līpöre. Tö akahka inrē tö yik tarik pön tö heuveū-en nö haköphötī. Pōyen yik mahaköp nö in cha öt hëngheuh pöri cha-a nö ṙainyngö tö höö. (Inl. 18:24) Unôichrit inlahen Apòlös nö ṙāngö Kòrin ngaich tīnngen ò ang Pôl nö havan nö chuh in e. (1 Kòr. 16:12) Asīöp heuneū-enre ang Apòlösnö im inhānga hēk im inreushkö alaha më prötör sistör. Tö yachö ellōn ök inrē Apòlös. Mihôiṅ öi ngatī ṙô pön ik sā nāṅ Prisilā nāṅ Akula nö “halööktö mikah ò tö talöökö ngam Tēv, nö ṙūöhtö mikahlōn ò,” ngaich öt līplö anga-aṅ. (Inl. 18:24-28) Akahakūö ök Pôl tö inlahen nuk tö vai la-en Apòlös. Öt höng fēkö inlahen ò pöri anga-aṅ tö ò min nö kūö urěh tö re. Ik sā ò nö kūich chitri yik aṅ Kòrin in e mikahkūö tö ò nö aṅhavin töm inyaichngö ngaich akah öp tölngö re inrē.—1 Kòr. 3:4-6. w21.07 pěch 18-19 përa 15-17

Tölngen re nak nā Ātöm nā Ēva nö kēken tökööl, lökten ang Yāvē nö ha-uknyen cha nö in ngam mikūönö re. Ngaich sitih inlahen pöri yip kūön cha? Hangenlōn ang Yāvē tö cha nö ṙòkhöre. Lökten ò nö kēngö ngam töng hěng maneuk Kūön re, hòṅ yip hamang chööngö nö nôlhöt nö el ngam mikūönö ò. (Yôh. 3:16; Rōm. 5:19) Lökten in ngam tö kētu nômö Yēsū ang Yāvē nö kēḵ yip tö 1,44,000 nö kūön re. (Rōm. 8:15-17; Inm. 14:1) Köiṅnyu ṙòken yip tarik hamang chööngö Yāvē. Maheūṅkku cha-a tö re min nö nôlhöt nö el ngam mikūönö Yāvē, unôichrit ngam tö hěng köiny samyeūheu. (Sal. 25:14; Rōm. 8:20, 21) “Kayöngö” ngöṙô cha-a tö Yāvē ngam Vamīlen cha. (Mët. 6:9) Kētu ṙētak inrē min yip tö ha-aṅlöng nö haköp inlahen Yāvē hēk haköp minë chööngö ò inrē. Yēḵ cha pöri nö katöllö ngam inlahen re nö ha-ööinyö Yāvē, ngaich möl min cha-a nö nôlhöt nö el ngam mikūönö ò. w21.08 pěch 5 përa 10-11

Kē-ěvkūö ang Pôl tö ngam la-en inhangköm tölöök inhānga. Ngaich söl mana-aṅ anga-aṅ nö mötlö elmat tö e nö la-en re. Ikūö tömaṙôngö hēk chuh kūö patī tarik anga-aṅ nö ahangken e. (Inl. 20:20) Yěn höng ṙētakvö ngaich vë-ekūö tarik anga-aṅ. Tö sā ngih, ik sā ò nö hökken yik hol re nö i Ĕtën, in e anga-aṅ nö vë-eny nang yik tö akahaka tarik tö ngam tölöök inhānga ōtre ngaich yik in cha vamītöre nö Kristīön. (Inl. 17:16, 17, 34) Pòrô anga-aṅ nö haköövö söönen anga-aṅ nö öt ṙākenre nö ahangkö ngam tölöök inhānga nö ikūö yip taṙòkhöre tarik. (Filip. 1:13, 14; Inl. 28:16-24) Yěn ahangkö ngam tölöök inhānga ang Pôl, ngaich haköpten yik holre anga-aṅ inrē. Töi ngëichkö ngam inlahen ò. Ngam raneh van ò nö misönörī, holten Yôhan Mākös anga-aṅ ngaich ngam innët van ò nö misönörī ngaich holten Timôtī anga-aṅ. (Inl. 12:25; 16:1-4) In e anga-aṅ nö haköpten cha tö nup la-en ngam māṅ nö kö harīkngöre kinëken. Tö sā minë inlahen cha nö chumkūöṙen tö yip prötör sistör hēk inlahen cha nö vīten cha nö tö heuveu-en nö mahaköphöti.—1 Kòr. 4:17. w22.03 pěch 27 përa 5-6

Ōt yip vamë-enyre nö ötkô nö ṙātö ellōnre nö im Vamīlen hī kūö cha nö öt meūkö ò. Pōyen pöri nup chehen ikūöng panam töt meūkö sön ayī-ö höng ṙātö ellōnre in u. Tö sā ṙēngen ngam kuföt. Ngatī ṙô inrē ngam Paipöl nö vë-eny nang hī tö ngam ṙinatö ellōn nö “mahameuktö nup töt meūkö.” (Hep. 11:1) Pōyen minë proof tö ōt, hòṅ kē-ěny ṙētak re pöri ayī-ö öi ngëichken u. Öt kën yip rīkre nö hakihtenre nö chöhö u lökten cha nöt ṙātö ellōnre nö im Tēv. Pōyen pöri yip saëntis kamënyö ṙētak re nö chöh minë mahameuknyö ngam Tēv nö anga-aṅ Vamīlen ngh panam. Pōyen yip in cha sin töt ṙamātö-ellōnre nö im Vamīlen hī pön öt hěng heuh nö haköptu nö el iskul tö inlahen ò. Ngaich pöri cha-a töngamuh nö mikahtökūö re tö inlahen Yāvē ngaich hameuktö ṙinatö ellōn re inrē nö in ò. Hòṅ ngatī inlahen in ayī-ö inrē öi sā inlahen më saëntis öi asīöp ngam ṙinatö ellōn re öi in ngam Tēv. Pòrô öi töng kuöṅnhöl öi haköp hēk tö pōihöl inrē, hòṅ kahngenre ayī-ö asīöp ngam ṙinatö ellōn re. w21.08 pěch 14 përa 1; pěch 15-16 përa 6-7

Lökten im istori ök kūön töchatngen ang Yēsū nö hameukhömat hī töṙôkö ngam neūkölōn Yāvē. Ṙāngö patī ngam yöngre ngam kūön “Ngaich mëichngö nup chehen, nöng öt lēnen.” (Lūk. 15:13) Unôich pöri hē ò nö fē-ěl re, havantöre ngaich anga-aṅ nö chuh patī ök yöngre. Ngaich sitih inlahen ök yöng ò? Ngö ṙô Yēsū, “Ṙòngmö maròvat anga-aṅ, ngaich meūkö tök yöngre; ngaich anga-aṅ nö aheūkölōn, faltöre ngaich, sarālöre nö elranôṙö ò, ngaich hāmkūö ò.” Öt tainy ngam yöng ò, ötrēhěn nö miṙēngen ò, aheūkölōn pöri anga-aṅ tö ò, ngaich aṙēlen ò. Pòrô nö kiröng ngam fālen ngam kūön, sön ngam yöng ò nö aṙēlen ò, kūöyòh? Pön holtö ellōnre ngam kūön nö halööktit re. I chūök ngam yöng an Yāvē. Ngam hamīnöre nö hameuktö neūkölōn re nö in cha yip tökô-en nö halööktit re.—Lūk. 15:17-24. w21.10 pěch 8 përa 4; pěch 9 përa 6

Pōyen yip yōm tinlööken tö hòṅ hayunngö ngam mine-eny ngam Tēv. Kēngen e nö ṙā-ang imat ngam Paipöl. Sōten yip tarik inrē nö kēḵ mine-eny ngam Tēv nö el keurcha. Harikngöre pöri vë Vamënyen Yāvē tö cha. Lööngö kinṙeūkö nö Vamënyen Yāvē kūö cha nö maharōilö minë-eny ngam Tēv Yāvē. (Isa. 43:10-12) Ngaich nö 24 körōr ṙôken ngam Paipöl Pövitrö Saströ Kā Nöyī Tūniya Anuvāt nö katānö. Ngaich nup chūök ngam minë-eny Yāvē nö kē-ěyö inup tahëng Paipöl, havantu anū-ö nö imat e. Pōyen tö töhěng kööiny ëlô minë līpöre tö aṅhav mat tö mine-eny Yāvē. In e öi akahakūö tö vë Vamënyen Yāvē nöng acha-a maharōilö mine-eny ngam Tēv. w21.10 pěch 20-21 përa 9-10

Yēḵ hī hayööken më prötör sistör ngaich sā maha-öinyö Yāvē ayī-ö. Kilēḵngôre ang Yāvē nö in yik aṅ Israel yēḵ cha min nö hayööken yip tö yāich ngaich kē-ěvkūö min cha-a tö inkôlò. (Chöö. 15:10) Yē hī öi meuk yip prötö hēk sistör tö kihngen ngaich kēnyö ṙētakre ayī-ö öi hayööken cha, ngaich ṙamlōn min ang Yāvē nö meuk inlahen hī. Yē hī min öi ngatī inlahen ngaich sā kamëtö tökētu min ayī-ö in Yāvē. (Inch. 19:17.) Ik sā Pôl nö haköövö, ngaich yik aṅ Filipī Kristīön nö sömhö kūö ò, ngaich ngö ṙô ang Pôl tö ngam sahömtö cha, ‘nö sā ṙēngen inlōti angū-ö nö tö kētu nö in ngam Tēv’ nö löktö ṙanamlōn ò. (Filip. 4:18) Ötkô öm më-eṅ mihôiṅ öm ngatī inlahen öm hayööken yip prötör sistör el ngam māṅ? Yē hī öi kētö ṙētak re kumlēḵ re inrē hēk in nup tahëng öi hayööken më prötör sistör re ngaich ṙamlōn min ang Yāvē nö in u, pò hī sā maha-öinyö ò. Hòṅ kēnyö ṙētak re inrē öi kumlēḵlö alaha re in ngam tö kô-en nööinyö. Hö-ö pöri angū-ö nö lumngān. (1 Yôh 5:3) kuö yòh?Pön inmeūktö ngam hanāngenlōn hi tö Yāvē hēḵ tö më prötör sistör inrē. w22.03 pěch 24 përa 14-15

Urēhěkūö hī hameuktöm neukölōnre öi in yip hol maneukre, ngaich hòṅ urěh öi mikahtökūöre tö nup kanihngen cha. Tö sā öp sistör yěn vahav öre, ngaich öthō min anga-aṅ nö havëkö inyöökenre. Sön pöri min anga-aṅ nö ṙamlōn yěi hayööken ò. Mihôiṅ öi havëkö inlahenre öi kahūlen ò hēk ha-et öp patī ò inrē. Ngaich ṙamlōn min anga-aṅ. Mihôiṅ in inrē öi hayööken yip holre tö löhlö tö kinmānöre. Nö inlahen hī anū-ö öi hameuktöm neūkölōnre tö cha. Mihôiṅ öi rēhěre öi hayööken yip holre, un höng höknyu ṙô cha-a nö havëkö inyöökenre. Mihôiṅ pöri öi asīnken Yāvē öi hameuktöm neukölōn tö cha. Kò-òren ngëichköm tavūöi nö örheūheu nö meutlö, pòrô öi öt havëken ò. Ngaich yöölen yip tölöök hēk tötlöök inrē nö lökten in ò. Hö-ö öng angū-ö nö inmeuktöm hanangenlōn ngam Tēv Yāvē tö hī? Mihôiṅ ayī-ö öi asīnköm neūkölōn ò tö yip holre! w21.09 pěch 22-23 përa 12-13

Kūö ngam töt chanuhuvṙen hanangenlōnre ngam Tēv nö aṙē-ěl. Yěn meuk öp tarik ang Yāvē nö halöktit re tö nup fālen re, ngaich aṙēlen ò min anga-aṅ tö kūö ngam töt chanuhuvṙen hanangenlōn re. Ngö ṙô ang Tāvit, “Hö-ö an nö asā nup tökööl hī nö lök alaha hī, ötrēhën nö asā nup tökööl hī nö reushen hī.” (Sal. 103:8-11) Akahakūö ang Tāvit tö miṙivlōn öp töfāluṙen yěn afēkö nup vanaichö re. Akahakūö pöri inrē anga-aṅ tö Yāvē nö ‘hamööngö re nö aṙēlen hī’ sā ṙô ngam tövë-evkūö töngamuh. Kô-en ang Yāvē nö ṙën nö aṙēlen hī, kūö ò nö aṅhavin tö ngam töt chanuhuvṙen hanangenlōnre tö yip mahavëken ò. Tövai angū-ö nö inlahen hī yěi fē-ělre tö minë vanāchöre. Pò hī min havëkö inṙē-ěl nup falen re ngaich halööktitre, ngaich aṙēlen hī min ang Yāvē. w21.11 pěch 5 përa 11-12

Hangenlōn an Yāvē tö ngam minë-eny re, hōten hī anga-aṅ öi milēḵṙen tö e. (Isa. 42:8) Ngaich pöri nö tafūöl köny samyeūheu rô-òten nö ötlēkaṙen ngam minënyö ò. (Sal. 74:10, 18, 23) Löktökūö el ök panô-òṅ Ēten nö hachōchiyö ngam minënyö ngam Tēv, ik sā ngam Sī-ö nö sūöchken ò nö öt kē-ěkūö na Ātöm nā Ēva. (Ran. 3:1-5) Löktö in e sinūöchka anga-aṅ inrē nö mahayun ngö mat tarik re tö minë tövai chehen. Höng afēkö ötlinëkö minë-eny ngam yöng re ang Yēsū. Höng Yāvē an tö minhôiṅyu nö hayöng nö el halīöngö ing panam inrē, höng anga-aṅ tövāyö tī nö hayöng. (Inm. 4:11) Möl min,taṙòkhöre nö, kòtökūö tö ngam Tēv Yāvē nöng anga-aṅ tö mihôiṅ nö hayöng nö kui hī. Höng ngam Pūlngö ò min kamëtö ngam lanāmö hēk kumchikṙen inrē nö ikūöng panam. w21.07 pěch 9 përa 5-6

La-en ngam kui ngam mikūönö ngam nginëichkö nômö, chinhënö hēk rūkui më aṅ ngam mikūönö. Lohten pöri më-eṅ öm kihngen ha-āṅ nômöre, kūö meh hāṅten tö rupīö. Angū-ö pöri ngih tövai nö ṙētak meh öm hangön ngam ṙinatö-ellonre. Vë-ekūötēv më-eṅ, ngaich haköp minë tökūichi ṙô Yēsū imat ngam Mëtiv 6:25-34 ngaich fēken u. Vë-ekuö nup ekspiriön yip tarik ngam Tēv inrē ing töngamuh, hôṅ meh meuk tī Yāvē nö hayööken cha yip mu-urěhlö minë la-en ò. (1 Kòr. 15:58) Yěm ngati inlahen min ngaich sīöp min ngam ṙinatö ellon meh in Yāvē mihôiṅ inrē min më-eṅ öm la-al nup kanihngen yamih nö ikūö meh. w21.11 pěch 20 përa 3; pěch 21 përa 6

Pōyen yip Kristīön mameuk kūö nup tö ṙōlkangen kanihngen, kinlaha inrē. Sön nöng öt ṙāngenre nö löklōn ngam Tēv. Ṙën cha-a nö ngatī inlahen kūö ngam ṙinatö-ellōn cha nö ngön nö lā im Tēv. Ngatī inlahen misī ang Yôhan. Lohten anga-aṅ nö 60 samyeūheu rò-òten nö ahangken Kristū ngam tökētu ṙāi ṙinānyi. Uroh nö ahööti nö i Petmòs tö më mā aṅ Rōm, hē ò ngaich nö 100 samyeūheu ṙēḵti, pön kapah nyin më tarik tö ṙô cha, yěn höng ngöh anga-aṅ, lökten cha-a nö haköövö ò. Ngam fālen ò nö haköövö, pò ò nö ‘Vë-eny inlahen ngam Tēv, eūken Yēsū inrē.’ (Inm. 1:9) Kô-en an nö tövai nö inchōkūö yip ṙamatö-ellōnre, nö tömöi nö inup kanihngenre. Vënyö ngam tökiröng hanangenlōnre ang Yôhan nö imat minë kahūichre līpöre. Töm minlēḵṙen ò inrē töm tökitaknyu mahām Kristū. Lohten anga-aṅ nö 100 tum heuh ṙô nö vë-eny minë yanöölen hī, öi löktö im ṙāi ṙinānyi. Yěn tarīkuvö tököölö fālen, vamëlukui in im yöng tö Yēsū Kristū ngam tölöök. (1 Yôh. 2:2) Kô-en ang Yôhan nö milēḵṙen töm ṙāi ṙinānyi. w21.04 pěch 17 përa 9-10

Lōnu ang Yāvē tö yik tarik re Israel nö miṙūöt tö yip tarik tö aṅhavin tö öt kumlē-en re. Ötkô misī yik Israel nö rūttö öt inkòlô nö i töthang. Ötkô inrē nö ötlēkôre tö cha hēk pinhë-eṅlkūö cha inrē. Öt tölöng angū-ö yěn ngatī inlahenken më töthang! Pön ötrēhěn nö kô ngam töthang nö kahòklö kui re kūö ò nö öt hang minë vinë-eng nang re. In ngam La-en Lēvī 19:14 inrē ngam Tēv nö sōten yik tarik re nö “ṙāḵtö kinvē-ěre i tötmeuk.” Ngöṙô öp ihih töhěng līpöre nö vë-eny inlahen yip tölum misī: “Ötlēkaṙen misī yik tölum inuk ṙētak anū-ö.” Ōt misi yip tamölngenre nö ṙāḵtö ihong nö el talöökö yik tötmeuk pön hòṅ vī minyīöl re tö cha. Tökiröng angū-ö nö ötlinëken cha! Löktö imat ngam chööngö pöri ang Yāvē nö tölṙô yik tarik re nö hameuktö miṙēḵlōn re tö cha yip tö aṅhavin tö öt kumlēḵ-en re. w21.12 pěch 8-9 përa 3-4

Pa-ekūö ang Yāköp nö fēken ök mëm re. Lökten anga-aṅ nö kalē-ěṙô peuinyhökūö Yāvē tö inyööken re. Ngaich sömtö tö pōyen inlōti anga-aṅ nö in Isô. (Ran. 32:9-15) Ngaich ik sā ò ngaich nö meuk kūö öp kahëmre ang Isô ngaich salāman anga-aṅ. Öt höng hěng-nët heuh, pön sat van anga-aṅ nö salāman. Tö īnu ang Yāköp töm inyāchngö, milēḵren inrē anga-aṅ tö öp kahëm re. Lökten nö halāmtöre nö in ngam kahëm re. (Ran. 33:3, 4) Chumkūöṙen öm taheui tö inlahen Yāköp nö sitih inlahen anga-aṅ nö halāmtöre nö in ök kahëm re. Ngam raneh, halēnöre anga-aṅ. Havëkö kūö Yāvē inrē anga-aṅ tö inyööken re. Asā ngam ṙô ò nö vë-ekūötēv ngaich ngatī inlahen anga-aṅ, hòṅ ngam tanāinyö ngam kahëm ò nö ṙātöre. Ngam innëtö, vī ngam inlahen re ang Yāköp nö hòṅ halāmtöre nö in ngam kahëm re. Ngaich lökten ik sā ò nö meukö Isô, ngaich öt la-al kūöre cha-a nö achīöp tö löng hēk tövaich. Mihôiṅ öm më-eṅ asīnken Yāköp?—Mët. 5:23, 24. w21.12 pěch 25 përa 11-12

Yěm hang inlahen Yēsū nö kapah tö pòkūö meh, kūöre nö hangenlōn töm, ngaich ngö lōn min më-eṅ öm kò-òren, ‘sitih inlahen min chū-ö ngatī ṙôken ṙāi?’ Köplōn man tö u nöng ṙô ellōn meh, pön öt ngatī mufē ngam Tēv nö in meh öm töt pōiṙāi. (1 Yôh. 3:19) Hòṅ köplōn ayī-ö “pò ngam Tēv nö mööḵlö tö ellōn hī.” Sitih inlahen öm min? Örheūheu man vë-ekūö mat Paipöl, vë-ekūötēv, hēk kēnyö ṙētak re öm meuk kūö yip hol maneukre. Ngaich ngön min ngam ṙinatö-ellōn meh nö in ngam Tēv. Asā inlahen hī haköp mat ngam Paipöl, ngatī hanëtö mat min öi meuk kūö Yāvē. Ngaich akaha elmat min ayī-ö tö ngam hangenlōn ngam Tēv nö kirööngen nö lā in hī. Hòṅ fēkö nup haköp re ayī-ö nup ‘mahalööktö nup mufē’ elkuilōn hī.—2 Tim. 3:16. w21.04 pěch 23-24 përa 12-13

Rö-ö ngam ṙinātö-ellōn nöng kūö inlahen hī öi haköp nö sīöp, tön hòṅ ōt nup la-en hī inrē. Hòṅ fēkö nup haköp re ayi-ö. Töi hachōḵ elmat re tö inlahen ngam kamūich ngam Salmai tö 77. Ngölōn anga-aṅ tö Yāvē nö haṙivlōn nö in ò in yik tahëng Israel inrē. Uroh nö öt yīhi inṙôhò tökūö kanihngen ellōn re. (Miröökö 2-8) Ngöṙô anga-aṅ nö in Yāvē, “Piṙūtkö minë la-en chin min.” (Miröökö 12) Kô-en nö akahakūö ngam kamūich salmai tö nuk la-urěh tī Yāvē nö ngëichkö yik tarik re, sön ngenre anga-aṅ nö ngölōn, “Vaichngö ang ngam Tēv tö miṙēlōn re, i lanīnö re angah nö löpngökūö miṙēlōn re?” (Miröökö 9) Ik sā ò pöri ngaich nö afēkö nuk la-en Yāvē inuk tö la-urěh, nuk tī ò nö hayööken yik tarik re ngam miṙēlōn ò inrē. (Miröökö 11) Ṙinātu-ellōn ngaich anga-aṅ tö Yāvē nö öt löktu nö ṙāngen yip tarik re. (Miröökö 15) w22.01 pěch 30-31 përa 17-18

Sitih mufē ang Yāvē tö yip tarik alaha re yik tö ngaich nö kapah? Chamīka anga-aṅ nö hòṅ meuk kūö cha nö hēk! (Yōp 14:15) Asehkūöre man tö kumlēḵ lōn Yāvē lohten nö hòṅ meukkūö öp holre Apraham! (Yāk. 2:23) Hēk fēkö inlahen re lohten anga-a nö vë-ekūö Môsös ök chūök nö “havööhen höö kūö” nö sā vamë-ekūö holre? (Man. 33:11) Lohten inrē anga-aṅ nö afēken Tāvit tö yik tahëng inrē kamūich tinköökö nöönyö ò! (Sal. 104:33) Acha-a vē hol Yāvē, töngaich yin nö kapah, öt vaichngö pöri Yāvē tö cha. (Isa. 49:15) Ha-aṅlen cha min hēk anga-aṅ nö ṙā-ang i tökapah. Mihôiṅ in teūngen tö hanöhlö re hē kinpahlöre tö yip hanangenlōn re yěi afēkö në inlahen Yāvē. Löktökūö el ök panô-òṅ Ēten, ngam Tēv nö akhakūö tö inlahen në ötlanöökö nö hēk min nö ṙūöhlöre ṙòken. Kunyaha elmat takô ang Yāvē tö në ötlanöökö töngamuh. Haṙivölōn anga-aṅ yěn afēken më töng lööṙen inyëḵe tö sā më tafīösi kūönyōich inrē. w21.07 pěch 10 përa 11; pěch 12 përa 12

Yēḵ hī min milēṙen tö ngam tökitaknyu mahām Yēsū, ngaich hangenlōn min ayī-ö tö yip prötör sistör re. Kūö yòh angū-ö nö töt ṙanangen? Pön kēngö nômöre inrē ang Yēsū tö pôkūö cha. Nö inmeuktö Yēsū inrē nö hangenlōn tö cha. (1 Yôhan 3:16-18.) Hòṅ meūkö ngam hanangenlōn hī nö in nup la-en hī. (Efi. 4:29, 31–5:2) Yěn vahavö min cha-a hēk īnu tö kanihngenre, sā nup töfaltöre pinlāngen, ngaich hòṅ hayööken cha ayī-ö. Ngaich sitih inlahen yěn miṙivngölōn hī cha-a? Kihngen öi ṙung aṙēḵlö holre? (Lēv. 19:18) Hòṅ hang ngih inlēnö in chěi yěi ngatī: “Kö ṙāpö höö, kö aṙēlen höö, yĕn tarīku tö miṙivulōn nö i töng holre; sā tī ngam Tēv nö aṙēlen yīö, ngatī yin yēḵ yī-ö inrē.” (Kòl. 3:13) Yēḵ hī min aṙēlö yip holre ngaich hameuktöre ayī-ö öi milēḵṙen tö ngam ṙinanyö hī tö Yēsū. Sitih inlahen öi min asīöp ngam minlēḵṙen re töm ṙāi ṙinanyi? w21.04 pěch 18 përa 12-13

Pòrô öi tö marô-òten öi löklōn Yāvē hēk töpōyen haköptī inrē. Hòṅ kööpölōn pöri ayī-ö tö u nöng lökten tī Yāvē. Hěng inrē ngamuh haköp hī in nāṅ Pôl nāṅ Apòlösyěn tö pōyen la-en cha-a nö el ngam māṅ, hòṅ chumkūöṙen cha-a nö kööpötī töm lanāmö nö el ngam māṅ. Lökten in öi ṙamölōn tö kūö më mahayööken töla-evṙen hēk tö më minröinylen nö chumkūöṙen nö vī ngam lanāmö nö el ngam māṅ. Nup inlēnö kahētö cha öt lamöktö in cha anū-ö pön höng lamöknyö mat ngam Paipöl ngaich hinôtö hī inrē öi asīnken ngam inchōkūö re ang Yēsū Krīstu! (1 Kòr. 4:6, 7) Ṙòkhöre in kö aṅhavin tö heuneū-en hēk mikah elmatre. Mihôiṅ öi ngö lōn höng hö-ö chin chu-ö öich la-evṙen. Sā inlahen hī pöri ṙung yěi chōk nup tö rahëichyen hīla ngaich yěi tāptēn nup hīla nö in höö tö vai ngaich angū-ö nö inyut ngāti ṙēngen minë tö rahëichyen la-en hī el ngam māṅ nö vītö ngam lanāmö töm hīnëngö. Yēḵ hī pöri akahngen re öi mööḵlö mufē tö re ngeich hòṅ ṙangen e ayī-ö, iṙuhen pöri öi vī ngam lanāmö hēk töm hīnëngö öi el ngam māṅ.—Efi. 4:3. w21.07 pěch 19 përa 18-19

Mihôiṅ in öi ṙatö-ellōnre tö hī min örhō öi öt meukkūö yip hanangenlōnre yěn ha-aṅlöng. Sā inlahen Yēsū nö hareuskö alaha yik holre hēk peuiny inrē nö in cha. In e mikahkūö ayī-ö tö ò nö örhō min nö öt ha-aṅlen yip tökapah. (Yôh. 11:35) Mihôiṅ man hayööken yip tö īnu tö miṙivlōn re. Rö-ö ök Yēsū nöng holṙô nā Mārta nā Mariā nö peuiny, pön hang ṙô cha inrē ngaich holtö hanangenlōnre nö vë-ekūö cha, ngaich hareuskö alaha cha inrē. (Yôh. 11:25-27) Mihôiṅ in inrē ayī-ö öi ngatī inlahen. Ta-a chěi töi ngëichken ngih inchō elmat tö hī öi sitih inlahen öi hayööken më tö haṙivlōn. Ngòh aṅ Ôstrēliā ang Tën tö hěngtak nö minṙönylen ngö ṙô an: “Ik sā ök pīhö chu kikānö nö kapah, ngaich hòṅ hayöökaṙen chū-ö. Pōyen yip prötör hīk tö yip pīhö cha nö peuheū harap nö chöhken chu hēk chumkūöṙen cha-a nö hangih tö ṙô chu. Öt asökngö inlahen chu acha-a öich peuiny, ngaich öt haṙikngöre mufē cha-a nö meukö chu öich peuiny. Hēṙu chū-ö öt teūngten öich kēken minë la-enöich i patī, hayööken chu pöri cha-a. Tö sā nö sööch lorī, havah minë nya-akūö hēk vī nya-akūö chu inrē. Rolvan inrē cha-a nö holṙô chu vë-ekūötēv. Kô-en cha-a nö hol chu ngaich ‘el ṙētak kanihngen cha-a nö vī ngöre nö holmaneuk chu.’”—Inch. 17:17. w22.01 pěch 16 përa 8-9

Lōnu Yāvē tö hī yöölen. (Inch. 4:20-22) Hāngenlōn takô anga-aṅ tö hī. Lökten anga-aṅ nö kētö ngam Paipöl, līpöre hēk yip prötör sistör nö halēnö hī. (Hep. 12:9, 10) Hôṅ hangihtöre in tö nup inlēnö, unngëchka öp mahalēn. Ṙolheuh in ngö lōn tö nup inlēnöre nö vāchö kinëti. Yē öp tarik nö halēn ngach hòṅ akaha elnag öp tö halēnö tö ò. (Kal. 6:1) Yē hī halēnö hôṅ hangihtör ayī-ö töṙô ò, asuh öp ṙô ò inlēnö chu. Mihôiṅ hatöönöre, pòrò öt öire tö nup inlahen ti ò inlēnö, Kô-en hòng minë ṙô ò nö löng? Mihôiṅ öch min hang ṙô ò pòrò anga-aṅ nö inu tö öt kumlē-enre? Tölöng nö in hī yěi hang minë taṙôkhöre inlēnö. w22.02 pěch 12 përa 13-14

Akahalōn ang Yāvē tö hī kihngen ṙāngö nup tötlöng mufē hēk la-en re. (Sal. 103:13, 14) Lökten anga-aṅ nö hayööken hī nö löktö im Paipöl, löktö im töhet kumlēḵ hēk löktö im söngkötön re tī inrē nö kētö mikah hēk kumlēḵ hī. Ngam Paipöl mahayööken meh ngëichköre. Sā ṙēngen tinmël ön ngam Paipöl, nö vamë-eny nang meh tö nup mufē, nup la-en hēk nup ṙô meh yěn tölöng hēk yěn tövaich. (Yāk. 1:22-25) Yāvē inrē ngam mahyööken meh. Pò ò nö akahakūö tö nup kuilōn meh. (Inch. 14:10; 15:11) Lökten örheūheu vë-ekūötēv vë-ekūö ngam Paipöl inrē. Ṙātö ellōnre tö u nö yanöölen meh yěm asīnkö minë inchöngten re tö Yāvē. Höng yanöölen hī yēḵ hī hang ṙô Yāvē. Vāyö tinrīken inrē hēk teūngen tö ṙanamlōn re.—Sal. 19:8-11. w22.03 pěch 4 përa 8-10

Yē hī in ngam la-en minānö ngaich chumkūöṙen inrē tö u, sā maha-ööinyö Yāvē ayī-ö. Ngö kinūichngö ön nö imat ngam Paipöl tö ngam töhet chūök hēk tö nup vahīṙen la-en nö ṙòkhöre nö “töhet nö la-en.” (Man. 36:1, 4) Ngatī inlahen in töngamuh öi ha-ööinyö Yāvē i vīni-i patī pūlngö hēk in minë tahëng inrē minānö. Töhet anū-ö inrē nö la-en nö imat Yāvē. Ōt yip prötör sistör inrē kamëtö ṙētak re nö im minānö. Kô-en minë la-en cha nö hòṅ eū-eu nö in minë la-en pūlngö. Pò më prötör sistör nö im la-en minānö hěnghöre ahangkö ngam tölöök inhāngö inrē nö yip kamëtöre nö painīör. Yip tökò-òre prötör sistör nö in ngam la-en painīör ngaich mihôiṅ cha-a nö kūich mat ngam fôm, ngaich öt kô më minṙöinylen nö heūlngöre nö hō-en minë fôm cha. Yē më minṙöinylen min nö ngatī inlahen ngaich sā hamôlṙen cha min nö im minānö. Pòrô öi tö heuveū-en hēk töt heuveū-en im la-en minānö, mihôiṅ pöri ayī-ö öi ha-et minë nö tö mānlöng hēk chumkūöṙen inrē tö u pòn alaha ngam vinë-ekūötēv inrē anū-ö. w22.03 pěch 22 përa 11-12