Löktökūö Ing Töngamuh Holṙen Ngam Pūlngö Ngam Tēv!
Asehkūöre man, yěn yih öp tökiröng chanôichö nö im kamngö meh. Töölöṙô ayī-ö tö yip òfisör öi veūten öi ṙāngö ngam chūökö ngaich chöh öp chūökre öi hanyatlöre. Hòṅ sitih inlahen pöri min më-eṅ? Lohten öm ilööṙen ṙāngö öp chūökre hòṅ meh öt pala-aiṙen.
Ngatī öp ihih min tökiröng chanôichö yamih i në ṙētak hī. Ngam ṙô Yēsū chanôichö nö ṙô tö ngam “tökiröng kanihngen” angū-ö. (Mëtiv 24:21) Öthěng tak tökô ma-asökngen e angū-ö chanôichö, mihôiṅ pöri ayī-ö öi chöh inlahenre öi laklöre. Öi sitih inlahen?
Hē Yēsū Kristū misī nö ikui ök rôngö, kētö ngih inlēnö anga-aṅ nö ngö ṙô: “Urĕh pöri yī-ö chöh ngam pūlngö ngam Tēv, ngam lanöökö Ò inrē.” (Mëtiv 6:33) Sitih inlahen öi min hang ngih inlēnö?
Urěh chöh ngam Pūlngö ngam Tēv. Tö ngö manah angū-ö tö hī öi höng hòṅ urěhlö ngam Pūlngö ngam Tēv tö nup töng sitih taṙòkhöre chehen. (Mëtiv 6:25, 32, 33) Kūö yòh nö ngatī? Kūö ngòh tarik nö ötkô nö halööktit në kanihngen hī ikūö ngih panam, höng ngam Pūlngö ngam Tēv pöri tö mihôiṅ nö kēngen u.
Chöh ngam lanöökö ò. Hòṅ ma-anyre in öi lök in minë chööngö ngam Tēv hēk minë lökngörit chööngö inrē. Kūö yòh angū-ö nö tötṙanāngen? Pöi yēḵ hī min kahngenre öi atöllö ngam tölöng hēk tövaich ngaich öt löng min ngam ṙòng e. (Inchōḵ-oṙô 16:25) Yēḵ hī pöri öi lök in minë inchöngtenre kahëtö Yāvē ngaich haṙamlōn ò min ayī-ö hēk ṙamlōn inrē min ayī-ö.—Isayā 48:17, 18.
Iṙūöhen man chöh ngam Pūlngö ngam Tēv töm lanöökö ò inrē. Hōten hī ang Yēsū öi hīnöre tö yip tarik töt chumkūöṙen tö ngam Pūlngö ngam Tēv, tö ngölōn inrē tö ngam nômö cha min nö laklöngö yēḵ cha nö hamūl minë rupīö. Ōt inrē yip tarik töt ṙētakvö nö chöh ngam Pūlngö ngam Tēv kūö minë kanihngen yamih lamākūöre.—Mëtiv 6:19-21, 25-32.
Kilēḵngôre ang Yēsū, nö in yip tarik min hamòlṙen ngam Pūlngö ngam Tēv nö teūngen min cha-a tö nup kuilōnre, ṙūöhlöng ṙôken inrē min nup inkòlô cha ip yamih ṙētak.—Mëtiv 6:33.
Ngatī yik inrē mahaköp nö in Yēsū ik raneh senchūri nö iṙūöhen nö chöh ngam Pūlngö ngam Tēv töm lanöökö ò inrē. Hö-ö pöri cha-a nö meuk manāngen nuk kanihngen. Laklöng pöri cha-a tö u. Nö sitih inlahen? Töi mikahtökūöre.
Kūö minë tölöök inchöngten lamöktö in ngam Tēv vē mahaköp nö in Yēsū nö öt kò-òngvah tö minë kanihngen. Ṙatö-ellōnre inrē yik haköptö ò tö ngam Pūlngö ngam Tēv nö öthō nö öt yih, lökten cha-a nö mihôiṅ nö la-al minë tökiröng kanihngenre. Rö-ö nöng anū-ö, pön kē-ěkūö cha inrē ngam Tēv tö ngam kumlēḵ töt insā-av tö kumlēḵ tarik nö la-al minë kanihngenre.—2 Kòrin 4:7-9.
CHÖH NGAM PŪLNGÖ NGAM TĒV ÖM MIN MË-EṄ?
Ngatī inlahen yik inrē raneh Kristīön nö hang chööngö Yēsū hēk chöh ngam Pūlngö ngam Tēv inrē. Keuheūt chūökre cha-a nö vënyö ngam tölöök inhāngö inlahen ngam Pūlngö. (Kòlòsi 1:23) Ōt hòng töngamuh tö sā inlahen cha nö kēken ngih la-en?
Heūṅ! Akahakūö yin më Vamënyen Yāvē tö ngih panam ngam Sī-ö nöng rahëichtitṙen. Röhta inlahen ngam Pūlngö ngam Tēv inrē min nö kētö manāngen ngih panam. Angū-ö lāinyngen hī öi hòṅ ma-anyre hang ngih ṙô Yēsū: “Ahangka min ngih tölöök inhangkö ngam pūlngö, i në taṙòkhöre panam, inmeukhömat taṙòkhöre tarik; ngaich möl min öp manāngen nö yih.”—Mëtiv 24:14.
Sitih inlahen öm min chumkūöṙen tö ṙô ngih tölöök inhāngö? Ṙūöhöl alaha yīö in öi asīnkö inlahen yik mu-urěh Kristīön aṅ Pīrīa. Ik hē Pôl nö vënyö ngam Tölöök inhāngö nö in cha, ngaich ‘chumkūöṙen cha-a nö hō-o ngam ṙô ò.’ Chumkūöṙen inrē cha-a nö ‘ngëichkö mat ngam līpöre’ yěn tökô-en minë ṙô Pôl hēk yěn hö-ö. Hē cha pöri nö ṙatö-ellōnre tö u nö tökô-en, ilöö kēkö kaha minë haköpre ngaich cha-a.—Inlahen 17:11, 12.
Mihôiṅ man më-eṅ inrē sā inlahen më aṅ Pīrīa öm ngëichkö ṙô ngam töhet līpöre. Ṙatö-ellōnre man tö meh yěm iṙūöhen min chöh ngam Pūlngö ngam Tēv töm lanöökö ò inrē. Ngaich rö-ö öm höng töngamuh pöm ip yamih ṙētak inrē min öm teūngen töm tökô-en lanāmö hēk kumchikṙen inrē.