Chuh Im Manāngen Hòng Ngih Panam?

Sön man ṙung hang ṙô yip tahëng tö inlahen öp manāngen ngih panam. Vë-eny nang hī inrē ngam Töhet Līpöre tö ngih panam min nö chuhngöre. (1 Yôhan 2:17) Ṙòkngöre vah hòng min tarik ip hē e? Hēk keuheūtngöre hòng ngih panam nö piyāyi?

HÖ-Ö NUN NÖ NGATĪ TÖ ṘÔ NGAM TÖHET LĪPÖRE!

**Asuh nup min Töt Ha-etiyö?**

YIP TARIK IKŪÖ NGIH PANAM

Ngöṙô ön ngam Töhet Līpöre: ‘Vī-i ngih tumlat nö öt payāyaṙen, chūök elyöngö pöri.’—ISAYĀ 45:18.

Ngam tahël töhavīlöng tö minë rung hēk töm elinchōn inrē.

NGIH TUMLAT CHŪÖK HĪ IYÖNG

Ngöṙô ön ngam Töhet Līpöre: “Kiröönngöre tö hěng köl chap, yih inrē töhěng köl chap, örheūheu pöri ngam tumlat nöng ngöh.”—MUMKAHTEN 1:4.

TÖ SITIH MANAH ANGŪ-Ö: Sā ṙô ngam Töhet Līpöre, öt löktu ngih panam nö payāyi. Köpsören min angū-ö nö aṅhavkūö tö tarik. Tö sitih manah öng pökeh ngam manāngen ngih panam?

FĒKÖ NGIH MAN: Kūichiyö ön nö imat ngam Töhet Līpöre. Ik sā ngih panam misī nö tööḵlö tö ötlanöökö “tööḵlö tö chanökhuṙen” inrē. (Ranehlö 6:13) Ngaich kē-ělkūö alaha re ngam Tēv nö ‘kumtö ṙanööingö nö ing panam.’ Öt piyāyi pöri ngih tumlat tö ò, höng yik tarik töt löngö la-en, acha-a tö kē-ěyö tö ò. (2 Pītör 3:6) Hěng tak misī ök tarik tö akaha ik hē e, ang Nō-a. Hang chööngö ngam Tēv anga-aṅ. Lökten ngam Tēv nö laklen ò, laklen ök mikūönö ò inrē. Lökten yěn ṙôtö manāngen ngih panam ngam Paipöl, ngaich rö-ö angū-ö nö ṙôtö pinyāingö ngih panam. Ṙôtö pinyāingö yip tarik pöri angū-ö yip tötlöngö la-en holre tö nup tötlöng la-en cha inrē.

**Asuh nup Min tö ha-etiyö?**

NË KANIHNGEN TÖ NË ÖTLANÖÖKÖ

Ngöṙô ön ngam Töhet Līpöre: “Pòn höng rahëichtöreṙen, ngaich öt ōtre min yip tötlöök, hòṅ, pētngen man min ngëichkö chūök ò, ngaich öt ōtre min anga-aṅ. Amīnu pöri anga-aṅ tö panam ngam töyāichö ellōn, ngaich kumchikngenre min ip lanāmö töpōyen.”—SALMAI 37:10, 11.

Collage: 1. Mu-ulāya mahayunngö kūö re, kunyī-inyre nö ṙā-ang el ngam tukān, aṅhav eltī tö minë ulāingöre. 2. Kē-ěkūö ngam holre ngam tarik tö ngam kasòng tö tööḵlö aṅ tö rupīö.

TÖ SITIH MANAH ANGŪ-Ö: Ha-etngö yik tötlöök tarik ngam Tēv inuk sakāmö Nō-a nö aṅtī tök Ṙanööingö. Unôichrit ngam Ṙanööingö pöri hēk yik tarik nö havantö inlahen re nö ötlöngö la-en. Veūten min ngam Tēv nö kēngen në ötlanöökö. ‘Öt ōtre min yip tötlöngö la-en’ höng yip tarik hamang chööngö ngam Tēv, cha-a min tö aṅ nö ikūö ngih panam. Höng hěng min öp mahayöng ken hī ip hē e, ngam Pūlngö ngam Tēv. Löktö el halīöngö min angū-ö nö hayöng.

FĒKÖ NGIH MAN: Vē mahayöng töngamuh, hōḵ hòng min cha-a nö hayöngkaṙen tö ngam Tēv? Vënyu nang in tö ngam Paipöl, tö cha min nö la-al ngam inyööngö tö ngam Tēv. (Salmai 2:2) Lökten min ngam inyööngö tö ngam Tēv nö piyāingö nup inyööngö tö tarik, ‘ngaich sökhak nö örheūheu.’ (Tanīěl 2:44) Kūöyòh pöri ngam Tēv nö piyāingö minë inyööngö tö tarik?

KŪÖYÒH NÖ HÒṄ PIYĀYI NË INYÖÖNGÖ

Ngöṙô ön ngam Töhet Līpöre: ‘Ötkô ngòh tarik nö hachōḵ vanāngöre.’—YARIMIĀ 10:23.

Kiröön më tarik nö chööḵngö ngam patī tö hapanlöng kaha tö minë pōstör.

TÖ SITIH MANAH ANGŪ-Ö: Öt tö vī-i ngòh tarik nö hayöng nö ikui tahëng. Lökten në inyööngö töngamuh nö ötkô nö kēngö në kanihngen.

FĒKÖ NGIH MAN: Ngöṙô ngam töhěng website nö vë-eny nang hī, “öthěng tak in më mahayöng tökô nö kēngö inyāichö, neūkö tö nya-aṅkūö, invah, kinyūngö tö nup tö sā u inrē ötlanöngö.” Ngöṙô hēk angū-ö: “Ōt yip tö ngö ṙô, yěn pòrô öre nö holṙen höö më mahayöng, sön cha-a nöng ötkô nö kēngö në kanihngen hī, pön höng tarik cha-a nö tö sā hī.” Höng ngam Tēv tömihôiṅ nö kēngö në töngatī kanihngen. Öt kanô-òṅ tarik anū-ö.

Ngaich in akahakūö tö manah ngam manāngen ngih panam, nöng ṙamôtö inhetngö yip tötlöök tarik holre tö nup tötlöök la-en cha. Lökten ayī-ö ötkô vöö yěi hang ngam manāngen. Hòṅ ṙamlōn pöri ayī-ö, pön unôichrit e min ngam Tēv nö havailö ngih panam!

Ihē pöri min anū-ö nö teung? Ngam yamih ātiköl min kamëtö sanapṙô e, nö löknyö imat ngam Paipöl ṙô.