TÖHAKÖÖPÖ ĀTIKÖL 15
Asūp Haköplö Hī In Minë Pinngangkūö La-en Yēsū?
“Kumröönköre nö la-evṙen tö tölöök, halanken yik taṙòkhöre.”—INL. 10:38.
TINKÖÖKÖ 13 Kristū An Incho-okūö Hī
RAHËICHTAMATa
1. Asuh ök raneh pinngangkūö la-en Yēsū?
ASHKŪÖRE tök samyeūheu 29 C.E. hē ranulten Yēsū nö löklōn ngam Tēv. Havëtu anga-aṅ nö ik nyina-aṅ inpīhö nö hol tö ök yöngre Mariā tö yik haköptö ò inrē. Kēkaṙen ngam inpīhö nö i Kānā, ök töng röhta nö i Nāsaret ngam chūök kinyônyö Yēsū. Mikahkūö Mariā ngam mikūönö nö mahaṙūötken yip tarik yamihikūö cha. Hěng pöri ök kanihngen cha hē ngam nyina-aṅ inpīhö. Pön hòṅ keuheūt ngaich ök vāin cha.b Kūö yik yamihtökūö nö im inpīhö nö pōyen tö yik tö havëku. Aṙē-ěvö min minā tö hapīhö tö më aṅ patī cha inrē yěn öt ngëichka angū-ö. (Yôh. 2:1-3) Lökten ang Yēsū nö vīngö ök mak nö ‘tö kuchik nö vāin’ ngam töt ha-eh nö maheuk tarik.—Yôh. 2:9, 10.
2-3. (a) Asuh nuk inrē pinngangkūö tö hameuktö tö Yēsū? (b) Kūö yòh öi hòṅ chumkūöṙen tö minë pinngangkūö la-en Yēsū?
2 Ōt inrē minë tahëng pinngangkūö la-en Yēsū.c Inlahen ò nö hayööken yik tö köinyu ṙôken tarik. Sā ṙô ngam Paipöl nö vë-eny ngam hī tö ò nö hěng heuh nö hanë-el yik tö 5,000 ṙôken tarik, unôich hēk yik tö 4,000 ṙôken tö hanëlöng tö ò, yěn kaheūkö öre cha-a nö ṙòkhöre tö më nyīö hēk tö më yöngnyīö inrē ngaich lohten nö pōyen tö tö 27,000 ṙôken nö hanëlöng tö Yēsū. (Mët. 14:15-21; 15:32-38) In e inrē ang Yēsū nö halanken yik tarik tö vahavö. (Mët. 14:14; 15:30, 31) Asëhkūöre man tö yik tarik nö pingangkūö tö inlahen tī Yēsū nö halanken yik tö vahavö hēk hanëlen cha inrē!
3 Pōyen haköp in töngamuh öi in minë pinngangkūö hameuknyö Yēsū misī. In ngih ātiköl in min haköp inlahen nuk pinngangkūö la-en ò nö tö ngönlöre tīmin tö ngam ṙinatö-ellōn hī. Haköp inlahen ò min ayī-ö nö tö yāchö ellōn hēk tö aṙē-ělōn inrē, hòṅ hī min öi asīnken ò.
HAKÖPLÖ HĪ IN YĀVĒ HĒK YĒSŪ
4. Achīö öp töhakööpö inlahen tö hī öi löktö in minë pinnagngkūö la-en Yēsū?
4 Pōyen nup mihôiṅ haköplö hī öi in minë pinngangkūö la-en Yēsū, nö töngönlöre tī tö ngam ṙinatö-ellōn hī. Rö-ö pöri öi höng mikahtökūöre tö inlahen Yēsū, pöi löktö in e inrē öi akahakūö tö ngam yöng ò Yāvē nö hayööken ò nö hameuktö minë pinngangkūö. Sā ṙô ngam Inlahen 10:38: ‘tö ò [Yēsū] nö hachāmö elkui tö ngam Tēv hēk tö ngam töhet fanöinylö ò, kētu minhôiṅyö inrē anga-aṅ nö halanken tö taṙòkhöre yik töt hakôlöngṙô tö ngam Sī-ö, pò ngam Tēv nö in ò.’ Lökten in minë pinngangkūö inrē öi akahakūö tö mufē Yāvē. (Yôh. 14:9) Ta-a töi ngëichkö minë tö lūöi haköplöre öi löktö in minë pinnagngkūö la-en Yēsū.
5. Asuh öp chö-öiny Yēsū nö hameuktö nuk pinngangkūö? (Mëtiv 20:30-34)
5 Raneh haköplö hī: Hangenlōn nā Yēsū nā Yāvē tö hī. Hē Yēsū misī nö ing panam, meūkö ngam hanangenlōn ò tö tarik nö löktö in inuk la-en ò. Kūö ngam hanangenlōn ò tö tarik lökten anga-aṅ nö kēngö nuk kanihngen cha nö hameuktö pinngangkūö. Hěngheuh nak tö nët tak töt meuk mahavëkö kūö ò tö inyööken re. (Vë-evkūö Mëtiv 20:30-34.) Ngaich aheūkölōn ang Yēsū nö meūkö cha lökten nö halanken cha. Ngam ṙô “neūkölōn” tö vënyu nö im ëlô Krik nö ṙô tö ngam lamöknyö elkuilōn hī angū-ö neūkölōn. Aheūkölōn ang Yēsū tö yip tarik lökten nö hangenlōn tö cha. Kūö ngam neūkölōn inrē anga-aṅ nö hanëlen cha hēk halanken nuk invah cha inrē. (Mët. 15:32; Māk. 1:41) Löktö in e öi ṙatö-ellōnre tö Yāvē hēk tö Yēsū nö hangenlōn tö hī, lökten cha-a nö haṙivlōn yěn meūkö hī öi kihngen. (Lūk. 1:78; 1 Pīt. 5:7) Meūka ang Yāvē hēk Yēsū nö hökken öp ṙētak hē cha min nö kēngen në taṙòkhöre kanihngen hī!
6. Iṙôken tī ang Yāvē nö kētö kumlēḵ Yēsū?
6 Innëtö haköplö hī: Kētö kumlēḵ Yēsū ang Yāvē nö kēngö nuk taṙòkhöre kanihngen tarik. Nuk pinngangkūö tö hameuktu tö Yēsū öi akahakūö tö ò nö mihôiṅ nö kēngö nup töng sitih kanihngen hī. Mihôiṅ inrē anga-aṅ nö ha-etngö në tökööl hī, ngam löktö yanīhi në taṙòkhöre kanihngen hī. (Mët. 9:1-6; Rōm. 5:12, 18, 19) Hameuktu anga-aṅ tö minë pinngangkūö la-en re nö mihôiṅ nö lööken tī tö nup töng sitih invah hēk mihôiṅ anga-aṅ nö hachohlö yik hol hī tö ngaich nö kapah. (Mët. 4:23; Yôh. 11:43, 44) Īnu tö kumlēḵ re nö ṙaptö chanôichö, öt kanò-òvö inrē yip tötlöök ma-ahānga tö ò. (Māk. 4:37-39; Lūk. 8:2) Reuslöre alaha in öi meuk tī Yāvē nö kē-ěkūö ngam kūönre tö ngam kumlēḵ!
7-8. (a) Asūp mihôiṅ ṙinatö-ellōn hī öi löktö in minë pinngangkūö la-en Yēsū? (b) Asūp tö hòṅ maheuk meh pinngankūö ip tufömngöre panam?
7 Linūöyö haköplö hī: Mihôiṅ in öi kiröngen ṙinatö-ellōn tö minë inkòlô hī min nö öthō nö öt teung nö in ngam Pūlngö ngam Tēv. Minë pinngangkūö misī la-en Yēsū nö ing panam, löktö in e mikahkūö ayī-ö tö ò min nö ngatī inlahen yěn yih ngam Pūlngö ngam Tēv. Asehkūöre man tö inlahen hī min ip hēe öi kòlô el alaha pön kēngen minë tö sitih invah min ang Yēsū hēk kēngen minë öt kumlēḵ-en hī inrē. (Isa. 33:24; 35:5, 6; Inm. 21:3, 4) Öthěngtak inrē min tö ha-euk ip hē e hēk öt pala-aiṙen inrē tö nup tö faltöre chanôchö kūö panam. (Isa. 25:6; Māk. 4:41) Meukkūö yik hol maneukre inrē min ayī-ö tö kapah “yip më-el ngam anūlö.” (Yôh. 5:28, 29) Asūp tö hòṅ maheuk meh pinngangkūö ip yamih tufömngöre panam?
8 Ik sā Yēsū nö hameuktö minë la-en pinngangkūö, īnu anga-aṅ tö ngam inyāichngö hēk neūkölōn inrē. Anū-ö në tinrīken tö hòṅ asīöpö tö hī. Töi chumkūöṙen tö minë tö nët pinngangkūö. Urěh öi ngëichkö ngam raneh pinngangkūö ik inpīhö i Kānā.
HARŪNÖRE ĪNU TÖM INYĀICHNGÖ
9. Kūö yòh ök Yēsū nö hameuktö pinngangkūö nö ik inpīhö? (Yôhan 2:6-10)
9 Vë-evkūö Yôhan 2:6-10. Hē nuk vāin nö keuheūt ik inpīhö ngaich hòṅ hameuktö pinngangkūö hòng ang Yēsū hē e? Hö-ö. Pön öt urěhangen vinënyi anga-aṅ nö hameuktö pinngangkūö nö vīngen ngam mak nö vāin. Kò-òren pöri öm fēkö inlahen re, ṙònghöichṙen ngam inpīhö meh, ngaich kūönen minë halēn meh nya-akūö më yamihtökūö nö im inpīhö, Sitih mufē öm min? Chumkūöṙen ang Yēsū tö mufē ngam mikūönö hēk minā töhapīhö inrē. Sōten cha anga-aṅ nö aṙē-ěv. Lökten nö vī ngam tö 390 lītör (103 kelön) mak nö vāin. Kūö yòh anga-aṅ nö ngatī ṙôken vahī tö vāin? Pön lohten anga-aṅ nö hōten nup chööḵ nö inyīhiyö, ngaich teūngen minā töhapīhö tö pësa re. Irôken ṙanamlōn takô lohten minā töhapīhö!
Asīnken Yēsū, um eū nup heuneū-en re (Ngëichköm perekrāf 10-11)e
10. Vënyö nup inlahen im Yôhan tö 2 mirūlö? (Ngëichkö ngam nyat.)
10 Töi chumkūöṙen hēk ngëichkö ngam inlahen tövënyu nö im līpöre Yôhan tö 2 mirūlö. Chumkūöṙen öm tö inlahen Yēsū nö öt kahngenre nö rös aṅ nuk neū-euṅ tö mak? Pön höng tölṙô yik tö la-evṙen anga-aṅ nö röslö aṅ nuk neū-euṅ, pön sōten yik tarik nöng in ò mat. (Miröökö 6, 7) Unôichrit inlahen ngam mak nö vī-i nö vāin ötrēhěn inrē anga-aṅ nöng kahngenre nö chuh in ngam yōm nāhaṅl pò ò nö tölṙô yik tö la-evṙen. (Miröökö 8) Ötrēhěn anga-aṅ nö eū-eu re nö kē ngam vāin nö chuh kūö yik tarik nö ngöṙô, ‘Òkken ngih vahī chu yin vāin!’
11. Asūp haköplö hī in ngam pinngangkūö hameuktö Yēsū?
11 Asūp haköplö hī öi in ngam pinngangkūö hameuktö Yēsū? Hòṅ īnu ayī-ö tö ngam inyāichngö. Öt hěngheuh ök Yēsū nö eū-eu re nö in nup pinngangkūö la-en re. Pön hayāichngöre anga-aṅ hēk nup töng sitih kahëken ò la-en ṙòkhöre anū-ö nöng nyöinyö ngam Yöng ò. (Yôh. 5:19, 30; 8:28) Ngatī inrē ayī-ö hòṅ asīnken Yēsū öi īnu tö ngam inyāichngö, ötkô öi eū-eure inup la-en re. Ötkô öi hakeūṙô re tö nup inlahen tī Yāvē hēk tö yip hol hī inrē, pöi hòṅ ṙamlōn öi im inlahen re öi kētöre i linökölōn ngam tökiröng Tēv. (Yar. 9:23, 24) Ta-a chěi töi kētö nöinyö Yāvē öi löktö in minë la-enre, pöi öthō teungten in minë la-enre yěn öt hayööken hī anga-aṅ?—1 Kòr. 1:26-31.
12. Sitih hēk kò-òren öi asīnken Yēsū öi īnu tö ngam inyāichngö? Kētö inchōḵ elmat hī.
12 Ngam tahëng hēk inlahen hī öi asīnken Yēsū im inyāichngö. Asehkūöre, töp tö hěngtak ṙālö mahayööken töla-evṙen öp tö möl nö kētö pöplik tòk. Marô-òten ngam töhěng tak minṙöinylen nö hayööken ò nö halēn ngam minkahten kahëtö ò. Lökten anga-aṅ nö vāyö ṙô nö kētö ngam minkahten ngaich ṙamlōn yip aṅ el ngam māṅ. Ik sā kinheūten ngam mīting ngaich yihtöre öp töhěng tak nö in ngam minṙöinylen nö ngöṙô: Iṙôk vanāyö ṙô ngam prötör taheui nö kētö ngam minkahten yiröh? Ngöṙô hòng min öp minṙöinylen nö sapṙô ò, ‘Heūṅ kūö inlahen tī chu öich hayööken ò.’ Hayāichngöre ṙöng nö ngöṙô, ‘Kô-en an nö vāyö ṙô taheui. Ṙamlōn chin öich in ò.’ Yēḵ hī min öi īnu tö ngam inyāichngö ngaich nup töng la-en hī öi hayööken yip holre, öthō min ayī-ö höng eū-eure. Ṙamlōn in öi hang inlahen re yěi hayööken holre pön milēḵṙen ang Yāvē tö ngam inlahen hī. (Asātô e im Mëtiv 6:2-4; Hep. 13:16) Kô-en takô öi hòṅ asīnken Yēsū öi īnu tö ngam inyāichngö, ngaich ṙamlōn min ang Yāvē.—1 Pīt. 5:6.
HARŪNÖ ĪNU TÖ NEŪKÖLŌN
13. Asuh ök maheuk Yēsū nö in ök panam Nēin, ngaich sitih inlahen anga-aṅ? (Lūkös 7:11-15)
13 Vë-evkūö Lūkös 7:11-15. Kalah man asehkūöre sin tö ngih inlahen. Hē Yēsū nö la-evṙen nö ing panam nö nët samyeūheu lohten nö ngaich. Chuh in ök panam Nēin anga-aṅ i Kelelī, vai rò-òlkūö angū-ö tö Sunēm chūök ök pròfět Elāisa nö ha-aṅlen ök kūön ök tafīösi urēhěkūö tö 900 samyeūheu. (2 Rā. 4:32-37) Ik sā Yēsū ngaich nö teung nö ikūö öp inkūp ngam elpanam, ngaich meuk ök kupah anga-aṅ tö keūnö. Tökiröng angū-ö hē e nö kanihngen. Pön kapahlöng ök tafīösi tö ök töng hěng maneuk kūön re. Holūröön anga-aṅ tö më tarik aṅ kūö ngam panam. Asökngen cha pöri ang Yēsū ngaich hayööken ngam yöngnyīö nö kēngö ngam kanihngen ò nö ha-aṅhlö ngam kūön ò. Raneh ngih inlahen Yēsū nö ha-aṅlö tö kapah, in minë tö lūöi līpöre tölöök inhānga.
Asīnken Yēsū öm hameuktö ngam neūkölōnre in yip tökapahlöng tö holmaneukre (Ngëichköm perekrāf 14-16)
14. Vënyö ngam inlahen im Lūkös tö 7 mirūlö? (Ngëichkö ngam nyat.)
14 Töi chumkūöṙen hēk ngëichkö ngih inlahen im Lūkös tö 7 mirūlö. Chumkūöṙen öm tö inlahen Yēsū nö ‘ngëichkö ngam yöngnyīö’ ngaich ‘lökngöre ellōn töm kanihngen ò.’ (Miröökö 13) Pī-a lohten anga-aṅ nö meuk ngam yöngnyīö nö peuny nö holröön ngam kupah tö keūnö. Lökten anga-aṅ nö yihi miṙēlōn nö meūkö ò, örhöng aṙē-ěvlōn ang Yēsū tö ngam yöngnyīö pön kētöre nö hayööken ò. Ngaich holtö hanangenlōnre anga-aṅ nö ngöṙô nö in ò, ‘Uh man peuny.’ Ha-aṅlen ngam kūön ò ngaich anga-aṅ nöng öt ṙô-òv nö in ngam yöngnyīö ngaich kēten ò nö in ò—Miröökö 14, 15.
15. Asūp haköplö hī in ngam pinngangkūö la-en Yēsū?
15 Asūp haköplö hī in ngam pinngangkūö la-en Yēsū? Tö hī öi hòṅ hameuktö ngam neūkölōn re öi in yip holre tö kapalöng. Hö-ö in kô asīnken ò öi ha-aṅlö yip tö kapah mihôiṅ pöri öi hameuktö miṙēḵlōn re öi in yip holre tö kapahlöng tö holmaneukre. Öi sitih inlahen? Hòṅ chumkūöṙen ayī-ö tö yip holmaneukre tö ngatī kanihngen. Nup tölngö kanô-ò hī öi hareuskö alaha cha öi inup ṙô re hēk inup la-enre inrē.d (Inch. 17:17; 2 Kòr. 1:3, 4; 1 Pīt. 3:8) Yē hī min öi ngatī inlahen cha ngaich reuslöre alaha min cha-a.
16. Asūp haköplö hī in ngam ekspirīön ngam yöngnyīö tö kapahlöng tö ök kūön re?
16 Töi ngëichkö ngih töhëng hēk inchōḵ elmat. Yò-òv tumhang samyeūheu tikökṙô re yik tarik el ök töhěng mīting. I alaha ngam invanlö tökapah ngam tinköökö cha. Ngaich hěngtak ök sistör in cha mameuk ök tahëng sistör nö peuny. Fē-ělre ngaich anga-aṅ tö ngam sistör nö tö kapahlöng tö ök kūön re. Ilööṙen ngaich anga-aṅ nö chuh in ngam yöngnyīö ngaich sarālöre nö in ò ngaich holṙô ò nö tikökṙô re. Ngöṙô ngam yöngnyīö: “Sīöplöre ngam hanangenlōn chu tö yip prötör sistör.” Ṙamlōn anaga-aṅ pön yihtökūö nö el ngam mīting. Ngöṙô anga-aṅ, “Angū-ö ngih Patī Pūlngö chūök hī öi teūngen tö inyööken re.” Yēḵ hī min öi hameuktö ngam miṙēḵlōnre hēk hayööken yip prötör sistör tö haṙivlōn ngaich chumkūöṙen ang Yāvē tö u hēk milēḵṙen inrē.—Sal. 34:18.
KĒ YANÖÖLEN RE MAN LÖKTÖ INUP HAKÖPRE
17. Asūp ngaich haköplö hī in ngih ātiköl?
17 Vënyu nang in tö minë līpöre tölöök inhānga tö minë pinngangkūö hameuktö Yēsū, mihôiṅ min öi teūngen tö yanöölen re yěi haköpö u. Löktö in u min ayī-ö akahakūö töṙôken hanangenlōn Yāvē hēk Yēsū tö hī. Īnu inrē ang Yēsū tö kumlēḵre nö kēngö kanihngen hī. Sīöplör ṙinatö-ellōn ayī-ö tö Yāvē min nö hateungngö nup kinlēḵngôre in öp yamih Pūlngöre. Yēḵ hī min öi haköp në inlahen, ngaich mihôiṅ min ayī-ö öi fēkö minë tinrīken Yēsū mihôiṅ inrē min öi asīnkö tinrīken ò. Kò-òren ayī-ö mihôiṅ öi kēnyö ṙētakre öi el ngam fëmilī vörsīp hēk pörsönöl istötī öi haköp minë pinngangkūö la-en Yēsū? Kò-òren öm ngëicha asūp haköplö meh mihôiṅ öm in minë pinngangkūö. Ngaich mihôiṅ inrē min öm vë-eny nang yip tahëng. Fē-a man yēḵ meh min ngatī inlahen öm vë-eny nang yip prötör sistör ngaich hēk min cha-a nö reuslöre alaha!—Rōm. 1:11, 12.
18. Asūp min kahakkö hī ip yamih ātiköl?
18 Hachohlö ök töhěng tak hēk tarik ang Yēsū nö ṙa-ang im kinpaha, im mana-angrit minë ṙētak ò nö ing panam. Rö-ö an pön ngaich sin nö ha-aṅlen yik urěh tarik töka-pah, tö harīkngöre pöri ngih pinngankūö tö u. Pò ò nö ha-aṅlen ök holre, ngaich harīkngöre hē e ngam ṙētak. Asūp haköplö hī in ngih pinngangkūö aṅmat ngam līpöre tölöök inhānga? Ngaich sitih inlahen min nö sīöplöre ngam ṙinatö-ellōn hī yē hī öi haköpö e tö inlahen yip tökapah min nö ha-aṅlöng? Ip yamih ātiköl min öi mikahtökūö re tö sanapṙô në intöönö.
TINKÖÖKÖ 20 Kētöm Tölngö Hanangenlōn Më-eṅ Kūönre
a Ṙaptö chanôchö ang Yēsū, halanken tö vahav hēk hachohlö tö kapah. Pingangkūö öi hang hēk meuk minë la-en ò. Rö-ö nun nöng inṙamlōn hī nö kūichi nö imat ngam Paipöl, pöi mihôiṅ haköplu öi löktö in u. Kakkö minë la-en Yēsū in min pinngangakūö öi in ngih ātiköl. Ngaich asuh öp haköplö hī inlahen Yāvē hēk Yēsū öi löktö in u, hòn sīöp ngam ṙinatö-ellōn hī. Mikahtökūöre min ayī-ö tö nup tinrīken cha öi löktö in minë pinngangkūö hòṅ hī min öi asīöpö u öi in minë tinrīken.
b Ngöṙô ök ihih kamūich ngam Paipöl, tö më tarik, ‘ranghö ngam panam Israel misī nö tö hangenlōn nö meukṙen holre. Kaheūkö e cha-a nö töt ṙanāngen nö la-en cha. Yěn havëtö holre min cha-a, ngaich hòṅ pōyen nup halēn cha nya-akūö, tö ṙôken yip havëkö cha, tö sā inlahen cha yěn havëtö holre el ṙētak inpīhö.’
c Pōyen tö tö 30 ṙôken minë pinngangkūö la-en Yēsū tö hěng hēngö vinënyi nö imat minë līpöre tölöök inhānga. Ōt inrē minë pinngangkūö la-en ò töng hěngtum vinënyi. Tö sā ngam inlahen yik tarik ‘töhěng pumnāmö’ yamihtöre nö in Yēsū ngaich ‘halankaṙen tö ò.’—Māk. 1:32-34.
d Asūp mihôiṅ inlahen ṙô meh hēk inlahen meh öm kētö inreuskö alaha öp tö kapahlöng? Kētu ngam inlēnö im 2016 Chūökamahati-HI ātiköl tö ngö kui, “Kētö Hanöhlö Yip Tökapahlöng tö Holmaneukre, Sā Inlahen Yēsū.”
e INLAHEN VINËNYÖ NGAM NYAT: Sökhak Yēsū nö lā-uk ngaich ṙamlōn minā tö hapīhö hēk më tarik yamihtökūö nö òk ngam vāin.