TÖHAKÖÖPÖ ĀTIKÖL 18
Kö Hareuskö Alaha Höö El Mīting
“Ta-a, töi kö haruhkö alaha höö . . . , ui ṙāngenre hamūlöre.”—HEP. 10:24, 25.
TINKÖÖKÖ 88 Haköpten Chu Tö Minë Talöökö Meh
RAHËICHTAMATa
1. Kūö yòh öi hòṅ kētö ansöör öi el mīting?
KŪÖYÒH öi ṙung chuh el mīting? Pò hī, öi hòṅ ha-öinyö Yāvē. (Sal. 26:12; 111:1) Ṙën inrē öi chuh el mīting pöi hòṅ kētö inreuskö alaha yip holre el ṙētak në kanihngen. (1 Tös. 5:11) Ngaich yē hī öi hachônglö këlre öi kētö ansöör, ngaich sā kamëken në tö nët ayī-ö la-en.
2. Ihē öi ṙung teūngen tö ṙētak re öi kētö ansöör el mīting?
2 Kaheuk afta in ṙung öi teūngen tö ṙētak re öi kētö ansöör. Tö sā hī mihôiṅ öi kētö ansöör yěi haköpmat ngam Chūökamahati hē el manā-angrit ngam afta. Hēk ihôi ngam afta inrē, yěn kētu ngam Töhakööpö Töpōiṙāi, tö ngam Inkööpöṙô Paipöl el Ngam Māṅ, hēk tö nup tahëng inrē.
3. Asuh nup mihôiṅ kanihngen hī yěi hòṅ kētö ansöör, ngaich sitih inlahen ayī-ö öi yöölen tö tī ngam līpöre Heprāi 10:24, 25?
3 Ṙòkhöre in öi hòṅ ha-öinyö Yāvē hēk hòṅ hareuskö alaha më prötör sistör re inrē. Në pöri mihôiṅ kanihngen hī, yěi hòṅ kētö ansöör. Lohten öi vöö öi kētö ansöör, hēk hòṅ kētö ansöör ayī-ö lang, öt kē-ě kël pöri. Sitih inlahen öi min yěi ngatī inlahen? Teūngen in tö sanapṙô e, in ngam chitri kahūich Pôl chamuh in yik Heprāi. Ik sā ò nö vë-eny nang cha tö ngam chinuhu el mitīng nö töt ṙanāngen, ngaich tölṙô cha anga-aṅ nö chumkūöṙen nö ‘kö hareuskö alaha höö.’ (Vë-evkūö Heprāi 10:24, 25.) Reuslöre alaha yin më prötör sistör yěn hang minë ansöör hī, pòrô anū-ö nö kūönö, yē hī min köplōn tö e, ngaich öt hō min ayī-ö öi piyu-u ṙô öi kētö ansöör. Hēk pôrò öi öt ṙōlheuh kinë-e kël, sön öi höng ṙamlōn pò yip tahëng prötör sistör el ngam māṅ nö ṙētakvö nö kētö ansöör.—1 Pīt. 3:8.
4. Asuh nup min tö lūöi kahakkö hī in ngih ātiköl?
4 In ngih ātiköl in min, öi mikahtökūöre tö inlahen re, öi sitih inlahen mihôiṅ kētö inreuskö höö, pòrô öi el nup töng kun kun Māṅ ip chūök yip prötör sistör nö kūönen kamëtö ansöör. Ngaich sitih inlahen inrē mihôiṅ öi kētö inreuskö höö yēḵ hī öi el öp tökiröng Māṅ öp chūök yip prötör sistör kamëtö ansöör nö pōyen. Ngaich in ngam mana-aṅ min öi mikahtökūöre tö inlahen minë kahëtö hī ansöör nö hòṅ sitih inlahen anū-ö, hòṅ yip hol hī tahëng nö teūngen tö inreuskö alahare.
HAREUSKÖ ALAHA HÖÖ HÖÖ EL MINË TÖ KUN KUN MĀṄ
5. Sitih inlahen öi mihôiṅ kētö inreuskö alaha höö yěn öt pōyen yip prötör sistör nö el mīting?
5 Öt pōyen yip prötör sistör ṙung kamëtö ansöör nö el nup tö kun kun māṅ. Lökten öp prötör yöngṙen hī lohten nö hökkö inlahen yip mahachônglö këlre. Mihôiṅ min öi ngölōn tö ngam mīting nö öt hē nö keuheūten. Lohten inrē nö öt pōyen yip tö teūngen tö inreuskö alahare. Sitih inlahen öm min hē e? Angū-ö hē meh kô-òren öm ṙōlheuh tī öm hachônglö këlre öm kētö ansöör. Yē meh min ngatī inlahen, ngaich reuslöre alaha min yip tahëng nö meuk inlahen meh ngaich hòṅ kētö ansöör min cha-a.
6-7. Asup öp mihôiṅ inlahen hī yěi tö vöö öi kētö ansöör?
6 Pi-a pöri më-eṅ öm tö vöö öm kētö ansöör. Pōyen yip prötör sistör tö sā inlahen meh. Sitih inlahen öm min yěm ngatī? Mihôiṅ më-eṅ öm chöhtö inlahenre öm kēngö ngam pinhë-ekūöre, hòṅ yip prötör sistör nö reuslöre alaha tö nup ansöör meh. Öm sitih inlahen kò-òren?
7 Mihôiṅ öm kē inlēnöre in nuk tö urěhngöre ātiköl imat ngam Chūökamahati.b Tö sā ngam töhěng inlēnö, tö hī öi hòṅ örheūheu öi halēn minë mīting. (Inch. 21:5) Yē meh min akahakūö tö minë töhakööpö, ngaich lööṙen min më-eṅ öm kētö ansöör. Ngaich ngam tahëng hēk inlēnö, nö hòṅ cheūta nup ansöör hī. (Inch. 15:23; 17:27) Yěn cheūta min nup ansöör meh ngaich öthō min öm yaha mufē. Yē meh pöri öm marôtòng ṙô, ngaich mihôiṅ min yip prötör sistör nö kihngen mikah elnang tö ṙô meh. Yěm höng hěng miröökö ṙô pöri öm kētö ansöör ngaich lööṙen mikah elnang min yip prötör sistör. Lökten öm höng hòṅ cheūta ṙô yěm kētö ansöör. Löktö in e mikahkūö min yip hol meh tö meh öm vayö inlahen öm halēn minë töhakööpö nö el mīting.
8. Sitih mufē ang Yāvē yěn meuk inlahen hī öi halēn minë ansöör re hēk kēten u inrē?
8 Lohten pöri ngaich më-eṅ öm hang minë inlēnö, sön ngenre öm ṙömöng vöö yěm kētö tö hěng hēk nët ansöör. Sitih inlahen öm min yěn ngatī? Mihôiṅ man öm ṙātö-ellōnre tö Yāvē nö ṙamlōn tö minë kahëtö meh ansöör. (Lūk. 21:1-4) Pön öt tölṙô hī anga-aṅ öi kētö nup töt kanô-ò re. (Filip. 4:5) Mihôiṅ më-eṅ öm fēkö nup la-en nup töng kanò-òṅ meh, ngaich vë-ekūötēv öm havëkö hinòlṙenre in Yāvē, hòṅ meh öt pa-ekūö. Mihôiṅ sin öm höng kētö öp töhěng tökun ansöör.
HAREUSKÖ ALAHA HÖÖ EL MINË TÖKIRÖNG MAṄ
9. Asuh nup mihôiṅ kanihngen hī el minë tökiröng māṅ?
9 Hěng mihôiṅ ngam kanihngen hī, yěn pōyen më pöplisör el ngam māṅ. Pön pōyen yip mahachônglö këlre nö kētö ansöör ngaich lohten më-eṅ öm öt kē-ě kël. Sā ngih inchō elmat hī inlahen Taina.c Ṙamlōn anga-aṅ yěn kētö ansöör nö el mīting. Pön tö hěng angū-ö nö kinëtö nöönyö ngam Tēv, sā mahareuskö alaha yip tahëng inrē anga-aṅ hēk sīöplöre inrē ngam ṙinātö-ellōn ò nö in minë kanô-en aṅmat ngam Paipöl. Ik sā ò pöri ngaich nö chuh el ök tökiröng māṅ, ngaich öt kē-ě kël anga-aṅ tökūö ṙôken cha. Ṙōlheuh ngaich anga-aṅ nö öt kē-ě kël nö el mīting. Ngöṙô anga-aṅ, “Haṙivlōn chū-ö pöich öt kētö ansöör. Yěm ṙōlheuh öm hachônglö kël re ngaich öt kē-ě kël, mihôiṅ min öm ngölōn, höng tölngenre an lohten nö öt kē kël chu.”
10. Hòṅ asuh nup hēk inlahen hī yěi hòṅ kētö ansöör?
10 Sā mufē Taina öm më-eṅ? Yěn ngatī, ngaich lohten min öm ngölōn, ‘Ĕhten chin uich hachônglö këlre, höng ūichhaka öich hangihtöre.’ Ötkô pöri öm ngatī mufē. Hòṅ sitih inlahen pöri? Mihôiṅ nö ṙōl nup ansöör tö halēnö tö meh. Yěm pòrô öt kē-ě kël im raneh ngaich mihôiṅ më-eṅ öm kētö sanapṙô nup tahëng intöönö. Yēḵ meh halēn ngam Chūökamahati, ngaich mihôiṅ öm chumkūöṙen ngëichkö minë perekrāf nö sitih inlahen anū-ö nö sāta nö im lökngörit ngam töhakööpö. Ngaich öt hō min më-eṅ öm öt reushlöre alaha tī tö më prötör sistör öm löktö in minë ansöör re. Mihôiṅ inrē më-eṅ öm halēn nup ansöör re in minë perekrāf vamë-eny minë tö aṙū-uti manah ṙô ngam Paipöl. (1 Kòr. 2:10) Pöi öt uroh öi ṙòkhöre öi kētö minë töngatī ansöör. Sitih inlahen pöri min më-eṅ, yē meh pòrô öm hang në inlēnö, sön öm öt kē-ě kël? Mihôiṅ man öm urēhěkūö öp mīting öm vë-eny nang öp prötör töp kahëtöre ansöör.
11. Asūp ṙinūöhlö alaha hī in ngam Filipī 2:4?
11 Vë-evkūö Filipī 2:4. Ṙūöhlö alaha yik Kristīön ang Pôl yik aṅ Filipī nö fēkö holre. Sitih inlahen öi min öi hang ngih inlēnö yěi el mīting? Hòṅ köplōn ayī-ö tö yip prötör sistör tö sā hī inrē nö lōnu nö kētö ansöör.
Sā inlahen meh yěm vë-ekūö öp holre ngaich kētö ṙētak ò më-eṅ nö ṙô-òvö ngaich hòṅ ngatī inlahen ayī-ö öi el mīting öi hòṅ kētö ṙētak yip holre nö kētö ansöör (Ngëichköm perekrāf 12)
12. Asuh öp mihôiṅ inlahen hī hareuskö alaha höö el mīting? (Ngëichköm nyat.)
12 Fēkö inlahenre man sin yěm vë-ekūö yip holre. Höng hěng ṙô öm ṙung yěm ṙô-òvö? Hö-ö, pöm kētö ṙētak yip holre inrē nö ṙô-òvö. Ngatī inlahen inrē ayī-ö öi lōnu tö yip tahëng nö teūngen tö ṙētak re nö kētö ansöör. Töhěng angū-ö nö inlahen hī öi hareuskö alaha cha hòṅ cha nö hameuktö ngam ṙinātö-ellōnre nö löktö in minë kahëtöre ansöör. (1 Kòr. 10:24) Ta-a töi mikahtökūöre tö minë tö mihôiṅ nö inlahen hī.
13. Asup mihôiṅ inlahen hī hòṅ më prötör sistör nö ṙētakvö nö kētö ansöör?
13 Hěng öp tö hòṅ chumkūöṙen meh, hòṅ cheūta nup ansöör meh, hòṅ yip tahëng nö ṙētakvö nö kētö ansöör. Hòṅ chumkūöṙen më minṙöinylen hēk më tö ekspirīönu pöplisör hön haköplu më tahëng nö in cha. Hòṅ chumkūöṙen inrē yěm kētö minë törachëichyen ansöör ngaich um höng keuheūtnyö minë pōint. Yē meh min öm höng keuheūtnyöre ṙô öm vënyö ngam perekrāf ngaich öt ansööru min yip tahëng. Tö sā inlahen në tönët inlēnö tökētu in ngih perekrāf. Ngam raneh, cheūta ṙô öm kētö ansöör ngaich ngam innëtö, um höng keuheūtnyö minë pōint. Yěm raneh öre öm kamëtö ansöör in ngih perekrāf, ngaich mihôiṅ öm höng hēngö vahënyi tö point.
Ihē öi kô-òren öt hachônglö këlre el mīting? (Ngëichköm perekrāf 14)f
14. Ihē öi mihôiṅ hachônglö këlre kētö ansöör? (Ngëichkö ngam nyat.)
14 Hòṅ chumkūöṙen man inrē tö tum heuh tī re yěm hachônglö këlre. Yē meh min höng örheūheu tī hachônglö këlre, ngaich mihôiṅ min öp yöngṙen nö ngölōn, tö ò nöng hòṅ hatön kūö meh, nöng ōt yip tahëng tö öl nö teūngen tö ṙētak re nö kētö ansöör. Ngaich mihôiṅ min cha-a nö haṙivlōn, öt lōnu inrē min cha-a nö hachônglö këlre.—Mum. 3:7.
15. (a) Sitih inlahen öm min yěm öt hatöönö kūö tö nup ansöör? (b) Asup tö hòṅ chumkūöṙen ngam prötör kamëtö ngam töhakööpö? (Ngëichköm pòks “Yěm Yöngṙen.”)
15 Yěn pōyen yip prötör sistör mahachônglö këlre el ṙētak minë inkööpö, ngaich lohten ayī-ö öi öt ṙētakvö öi kētö nup lōnre ansöör. Ṙōlheuh inrē lohten öi öt hěngheuh hatöönö kūö tö ansöör. Ötkô pöri ayī-ö öi haṙivlōn.—Mum. 7:9.
16. Sitih inlahen öi hareuskö alaha yip holre yěn kētö ansöör?
16 Yē meh öt pōyen ṙētak kētö ansöör nö asā öp lōn meh ngaich asuh mihôiṅ öp inlahen meh? Mihôiṅ öm hangihtöṙô yip tahëng nö kētö ansöör ngaich ip kinheūten mihôiṅ öm eū vanāyö öp ansöör ò. Ngaich lohten min më prötör sistör nö reushlöre alaha yěn hangṙô meh sā cha yěn hang nup ansöör meh. (Inch. 10:21) Töhěng kangen ngam inlahen hī öi eū yip holre nö kinëtö inreuskö alaha cha inrē.
SITIH INLAHEN ÖI HĒK HAREUSKÖ ALAHA HÖÖ
17. (a) Sitih inlahen aich mihôiṅ më inyööngö nö asā ṙēḵti më kūönre tī nö halēnlö minë ansöör? (b) Sā inmeuktö e nö el ngam Vitiō, asuh nup mihôiṅ tö fën inlahen hī öi halēnlö minë ansöör? (Ngëichkö ngam futnōt.)
17 Sitih inlahen öi mihôiṅ hēk hareuskö alaha höö el mīting? Yē meh tö kūönö kūön, ngaich asā ngam ṙēḵti ò më-eṅ kô-òren öm halēnlö öp ansöör ò. (Mët. 21:16) Ōt ṙung nup ātiköl kamakkö inlahen minë yamih kanihngen mina pamihöre hēk inlahen minë hanëtö elkuilōn inrē. Sön pöri nö ōt nup perekrāf chūök më nyīö mihôiṅ nö kētö ansöör. Mihôiṅ inrē öi vënyö nang më nyīö tö cha nö un haṙivlōn yěn öt kē-ě kël. Yěm urěhnyi ṙô min öm vë-eny nang cha ngaich öt haṙivlōn min cha-a yěn öt kē-ě kël.—1 Tim. 6:18.d
18. Hòṅ asup chumkūöṙen hī yěi kētö ansöör? (Inchōḵ-oṙô 27:2)
18 Lōnu ayī-ö tö minë halēn hī ansöör nö löktö nöönyö Yāvē hēk löktö inreuskö alaha më prötör sistör hī inrē. (Inch. 25:11) Mihôiṅ ayī-ö hēṙu öi vënyen minë ekspirīön re yěi kētö ansöör, ötkô pöri öi höng örheūheu öi vënyö inlahenre. (Vë-evkūö Inchōḵ-oṙô 27:2; 2 Kòr. 10:18) Hòṅ chumkūöṙen ayī-ö tö minë ansöör hī, nöng ṙòkhöre anū-ö nö kamëtö nöönyö Yāvē, ngam ṙô ò hēk më tarik ò inrē. (Inm. 4:11) Yěn ōt pöri minë intöönö in ngam perekrāf hamôten hī öi vënyö minë ekspirīön re, ngaich hē e mihôiṅ öi vë-eny inlahen re. Sā ṙô ngam intöönö in ngam yamih perekrāf.
19. (a) Asup min ṙòng ngam inlahen hī yěi chumkūöṙen tö höö el mīting? (Rōma 1:11, 12) (b) Asup ṙanamlōn meh inlahen hī yěi kētö ansöör el mīting?
19 Öt kētu nun minë chööngö inlahen ṙô hī öi kētö ansöör, pītnyöre pöri ayī-ö öi kētö nup ansöör, nup tö reuslöre alaha tī tö yip hol hī. Öi sitih inlahen? Lohten nö ōt öp ṙētak hī öi hòṅ ṙōlheuh tī hachônglö këlre öi kētö ansöör. Ōt hēk öp ṙētak hī öi öt uroh kē-ě kël, höng hòṅ ṙamlōn pöri ayī-ö tö yip tahëng yěn ṙētakvö nö kētö ansöör. Yē hī min ngatī inlahen ngaich mahameuktö chumkūöṙen re ayī-ö min tö yip holre, ngaich ṙòkhöre min ayī-ö öi reuslöre alaha.—Vë-evkūö Rōma 1:11, 12.
TINKÖÖKÖ 93 Hakòlô Në Manūlö Ih
a Yē hī kētö ansöör öi el mīting ngaich teūngen yip hol hī tö inreuskö alahare. Ōtre pöri yip prötör sistör tö vöö nö kētö ansöör, ōt yip tö ṙamlōn, ngö mufē pöri cha-a, söö öre yěch pōyen kahëti tö ansöör. Sitih inlahen öi min hameuktö chumkūöṙen re tö më holre, hòṅ cha nö teūngen tö inreuskö alahare? Hēk hòṅ sitih inlahen nup kahëtö hī ansöör hòṅ ngam hanangenlōn më prötör sistör nö sīöplöre nö kēken minë tölöök la-en inrē? In ngih ātiköl in min teūngen tö sanapṙô në intöönö.
b Ṙūöhtö mikahkūöre im, Chönvörī 2019 Chūökamahati-HI, pěch 8-13, hēk in ngam 1 Septempör, 2003, Chūökamahati-HI, pěch 19-22.
c Harīki ngam minë-eny.
d Ngëichkö ngam vitiō in ngam jw.org Hanôlö Yāvē Man—Halēnlö Nup Ansöör Re.
e Ngëichkö ngam 15 Chulāi, 2013, Chūökamahati-HI, pěch. 32, hēk in ngam 1 Septempör, 2003, Chūökamahati-HI, pěch. 21-22.
f VAMË-ENY INLAHEN NGAM NYAT: Hěngtak ngam prötör më el ngam tökiröng māṅ, ngaich anga-aṅ nö kētö ansöör im raneh, kētö ṙētak më holre hēk anga-aṅ nö kētö ansöör.