Köplōn Öm?

Chumkūöṙen öm haköp minë Chūökamahatī ing samyeūheu? Töi ngëichkö në intöönö chěi, yěi mihôiṅ öi kētö sanapṙô u:

Tö sitih manah ngam inlahen hī “tumfömlö ngam mūfē kuilōnre”? (Rōm. 12:2)

Öt tö ngö manah an ngam “tumfömlö ngam mufē kuilōnre” tö hī öi höng rahëichtaṙen kēken nup tölöök la-en. Pöi hòṅ örheūheu öi ngëichkö minë tinrīkenre hēk hòṅ la-evṙen inrē tö minë tölöök la-en. Hòṅ örheūheu inrē öi ngëichköre yěi kô-en öi halööktitre. Hòṅ hī öi asā minë inchöngtenre lamöktö in Yāvē.—w23.01, pp. 8-9.

Asuh öp tö hòṅ chumkūöṙen tö hī yěi ngëichkö në falngën ing panam?

Chumkūöṙen in ṙung yěi ngëichkö nup inlahngen ngih panam, pöi hòṅ meuk taneungtö kūö minë pròfēsī aṅmat ngam Paipöl. Ötkô pöri ayī-ö öi höng lökṙôre yěi kakken u, pön mihôiṅ min nö taṙōl ngam māṅ. Lökten öi hòṅ hayönglenre in minë tövënyu minkahtölōn lamöktö el ngam söngkötön. (1 Kòr. 1:10)—w23.02, p. 16.

Sitih inlahen ang nö harīkngöre ngam vinôkö Yēsū töm vinôkö yik haköptö ò?

Öt uroh ang Yēsū nö hòṅ vë-enyre nö ikūö Yāvē töre nö kētöre nö löklōn ò, kūö ò nö kayônyu nö ikūö ngam panam më tarik ngam Tēv më tö katöllöng tö ò nö lamöklōn ò. Öt uroh inrē anga-aṅ nö hòṅ havëkö inṙē-ěl nup tökööl re, kūö ò nö töhet öt īnu inrē anga-aṅ tö tökööl.—w23.03, p. 5.

Sitih inlahen öi hayööken yip holre nö kētö ansöör nö el mīting?

Hòṅ cheūḵta nup kahëtö hī ansöör hòn ṙētakvö yip hol hī nö kētö ansöör inrē. Öt kô nö keuheūtnyu inrē nup pòin. Hòn kētö chūök ṙò yip holre ayīö.—w23.04, p. 23.

Tö sitih manah öng ngam “Talöökö Hanetö” tövënyu nö in Isayā 35:8?

Ngam “talöökö hanëtö” inuk misī ṙētak, ṙôtö ngam talöökö më aṅ Israel angū-ö, ngam talöökö cha hē cha nö havan nö chuh Israel nö ṙā-ang Pēpilön. Löktökūö ik samyeūheu 1919 C.E., pöri nö halēnlöng ngam talöökö nö in në ṙētak hī, tö sā ngam kintānö ngam Paipöl tö nup tahëng inrē. Lök el ngam “talöökö hanetö” më tarik ngam Tēv ngam chamuh im pūlngö.—w23.05, pp. 15-19.

Achīö nap tönët tak kikānö tö vënyu im Inchōḵ-oṙô tö 9 mirūlö sitih inlahen min ayī-ö yěi hangṙô cha?

Vënyu ngam “tökulō-ov kikānö“, yip hamang ṙô ò min chamuh im kinpaha cha a. Vënyu inrē ngam “tö-akaha kikānö” ngam inmeuktö ngam mikah, yip hamang ṙô ò min örheuheu min cha a nö aṅ. (Inch. 9:1, 6, 13, 18)—w23.06, pp. 22-24.

Ngam inlahen Yāvē nö in Lòt sitih löktö mikahkūö ayī-ö tö Yāvē nö tö yāichö ellōn hēk tö milēḵṙen inrē nö Tēv?

Tölṙô Lòt ang Yāvē nö falngöre nö ṙāngö Sôtöm nö chuh kui ngam rôngö. Höng hòṅ tölngö Sōār pöri ang Lòt, ngaich hang ṙô ò Yāvē.—w23.07, p. 21.

Hòṅ sitih inlahen ang ngam kikānö yěn meuk pòrnokrafī ngam pīhö ò?

Öt kô angū-ö nö vanāichö ò tö lōn ò. Hòṅ hangön ngam innôlöre pöri anga-aṅ nö in ngam Tēv Yāvē. Mihôin anga-aṅ nö vë-ekūö inlahen yik kikānö aṅmat ngam Paipöl yik tö ngatī kanihngen yik vamë-ekūötev ngaich teungen tö hanöhlöre. Mihôiṅ inrē anga-aṅ nö hayööken ngam pīhöre hòṅ ò nö ṙangenre nö meuk pòrnokrafī.—w23.08, pp. 14-17.

Yěn hatöönö inlahen ngam ṙinatö-ellōn hī, ngaich sitih inlahen ayī-ö öi holtö ṙanëmenre yěi aṅhav-in tö ngam mikah elmat?

Yěn ōt öp mahatönö hī, ngaich mihôiṅ ayī-ö mikahtökūöre töp mufē ò hēk asuh inrē öp ööilōn ò. Ngaich möl mihôiṅ ayī-ö holtö ṙanëmenre öi sapṙô ò.—w23.09, p. 17.

Asuh öp mihôiṅ haköplö hī in Mariā yěi hòṅ aṅhav-in töm nganönö?

Ik sā Mariā nö akahalōn töre nö hòṅ pīrūkö nyīö ngam tö kilē-ey min nö mesaya, ngaich kē inyöökenre anga-aṅ nö in yik tahëng. Teungen ang Mariā tö inreuskö alahare ik sā ò nö vë-ekūö Ēlisöpet hēk töm ma-ahānga Kēprīl ngaich ṙatö-ellōnre anga-aṅ tö Yāvē nö in ò. Mihôiṅ man më-eṅ inrē teungen tö kanönöre löktö in më prötör sistör.—w23.10, p. 15.

Sitih inlahen tī ang vöh Yāvē nö kētö sanapṙô hī yěi vë-ekūötēv?

Kilēḵngôre ang Yāvē töre nö hangṙô hī yěi vëkūötēv. Chumkūöṙe inrē anga-aṅ tö nup ṙô hī yěi vëkūötēv nö tö hòṅ sā kuilōn ò. (Yar. 29:12) Ṙolheuh lohten pöri ang Yāvē nö tahëngö talöökö tī nö kētö sanap nup ṙô hī yěi vëkūötēv, örheuheu pöri anga-aṅ nö holṙen hī.—w23.11, pp. 21-22.

Yěn ngaich nö vënyu ngam “maheuṅkkö” nö im Rōma 5:2, ngaich kūöyòh hēk angū-ö nö kakka nö im tö 4 miröökö?

Yē ngòh tö hěngtak Tarik nö hang ngam tölöök inhānga hēk hō-en e inrē ngaich teungen anga-aṅ tö maheuṅkköre. Yē ò pöri nö yīhivö tö minë kanihngen, holtö manöiyöre anga-aṅ nö lā-al u hēk akahaiṙen inrē anga-aṅ tö Yāvē nö ṙamölōn nö in ò, ngaich lökten in e hēk ngam maheuṅkkö ò nö ngönlöre ngaich pōiṙāi mat inrē anga-aṅ tö e.—w23.12, pp. 12-13.