MIRŪLÖ 1
Kē-ĕkūö Tarik ngam Vamīlö në Taṙòkhöre Töm Peretāis
Vīlö ngih panam ngam Tēv tö nup taṙòkhöre aṅ kūö e; vīlö nak töhet tarik anga-aṅ kikōnyö, kikānö inrē. Ngach ṙāten cha nö el ök tövai panô-òṅ. Kē-ĕkūö cha inrē anga-aṅ tö chööngö
NGIH ön ranehnyörit ṙô ngam Töhet līpöre: “Vīlö ngam halīöngö ngam Tēv tumlat inrē, ik raneh.” (Ranehlö 1:1) Öt maheūṅkuvö in tö līpöre töngatī vanāyö ranehnyörit kinūichö, tö ngatī lanööṙen hēk töngatī ṙô nö harōilen ngam Tēv Yāvē ngam vamīlö në taṙòkhöre chehen el halīöngö ing panam inrē. Im tahëng miröökö hēk nö vënyu ngam inlahen rò-òtö tī Ò nö vīlen ngih panam nö chūök hī iyöng nö holtö minë taṙòkhöre pinngangkūö aṅ kūö ngih panam. “Sakāmö” ngö ṙô anga-aṅ nö kaheuk ngam rô-òtötī re nö vī-i u.
Pinngangkūö an ngam vinī-i ngòh tarik tö ngam Tēv i në taṙòkhöre tövīlöng aṅ kūö ngih panam. Vī-i ò anga-aṅ nö insā re, nö tö mihôiṅ nö hameuknyö minë tinrīken Ò tö sā ngam hanāngenlōn, mikah inrē. Vī-an ngam Tēv Yāvē tö aṅ i pinṙōngö ngam tumlat. Kaheuk minë-eny ò anga-aṅ nö Ātöm, ngach ṙāten ò nö el ök Peretāis, ngam panô-òṅ Ēten tö ṙô. Hakôten re ngam Tēv nö vītö ök panô-òṅ, ngach hatööḵlen e tö nup tövāyö mineūkö, tölöök inrē nö nyā-aṅkūö.
Öt kuchik elmat ngam Tēv nö meuk ngam tarik nöng hĕng tak nö öt hōlu. Lökten Anga-aṅ nö hēngö kahë tö aṅ inup ranūmö Ātöm, vī-an ngach nö kikānö, ngach kēten ò nö pīhö ò, kaheuk minë-eny ò ngach Ātöm nö Ēva. Pōyen ṙanamlōn ngach Ātöm, kaknyöre ngach nö tikökṙôre nö ngö ṙô: “Tangë ön ngih aṅ i tangë chu, alaha inrē aṅ i alaha chu.” Töp lökten ngam Tēv nö ngö ṙô: “Lökten ön min ngòh tarik nö ṙāngö yöng re kikōnyö yöng re kikānö inrē, ngach haköpngöre min nö im pīhöre: ngach chā-a min nö hēngö alaha.”—Ranehlö 2:22-24; 3:20.
Nët nuk chööngö kahëtö ngam Tēv nö in nā Ātöm nā Ēva. Ngam raneh, hinôtö cha nö ul ngam tumlat, aṅtö e, hōten cha inrē nö mikūönlö. Ngam innëtö chööngö, sinôtö kūö cha nö nyā ṙòng ök chōn, “inkaha tölöök tötlöök inrē.” (Ranehlö 2:17) Yēḵ cha pöri nö halôngen ngam chööngö ngach kô-en chā-a min nö kapah. Yēḵ cha pöri nö hang ngam chööngö kinë-ekūöre, hameuktöre chā-a nö hāngenlōn, milēḵṙen hēk hōḵ nö yööngu töm Tēv. Kūö cha nö töhëtö vinī-i tö ngam Tēv lökten cha öre nö öt kihngen nö hang minë chööngö Ò. Sā ṙô ngam Töhet līpöre nö ngö ṙô: “Ngaich ngam Tēv nö keuheūt matre nö ngëichkö nup tö vīlöng tö Ò, yĕh meuk, ngaich löök takô anū-ö.”—Ranehlö 1:31.
—Lökngörit im Ranehlö tö 1 hēk 2 mirūlö.