Fëliyö ngach Yēsū

LŪÖI samyeūheu ròngti rò-òten ök misī Yēsū nö ahānga hēk haköphöti inrē nö ing panam. Akahalōn inrē anga-aṅ tö ranöhta yanihih ngam kinpaha re. Chöh inlaha tīre yik makūökūönṙô nö nö hòṅ fëlngen ò, pa-ekūö pöri cha-a tö yik tarik. Kūö yòh? Kūö yik tarik nö akahakūö tö Yēsū nö pròfĕt. Vöö yik mākūö kūönṙô yē cha nö fëlngen ò pòn mihôiṅ min nö taṙōllöngṙen. Ngach pöri Satān nö chaphöt ellōn ök tö hĕng tak aṅ in yik tö nëtsīön tak tanīnöṙô ang—Yūta Iskaryôt—ök kamëngen Yēsū. Hē yik makūökūönṙô nö kē-ĕkūö Yūta tö nuk tö lūöi anāi rupīö ṙāi kinëngö Yēsū ngach höng ilöö hō-o ṙô cha anga-aṅ.

Ik manā-aṅ hatööm Yēsū nö ing panam, hamūlöre chā-a tö yik tö 12 tak mahaköp pò cha nö hòṅ kēken ngam Pāska. Unôichrit e ang Yēsu nö tīnngen Yūta nö kunyī-inyre. Ngach rĕhlörit ök tufömngöre anga-aṅ inköpkölōn ngam ‘inmūlkūö ngam Mā’ tö ṙô. Kētam anga-aṅ töm ròtī ngach ve-ekūötēv ngach kē-ĕkūö yik tö ōt tit tö 11 tak mahaköp nö ngö ṙô “alaha chu ön ngih, nö tö kētuvö tö pôkūö yīö. Ngatī tī pöichö haköpkölōn re tö chu.” Ngatī tī anga-aṅ tök kulah hē kinheūtö kūö cha nö nyā ngach ngö ṙô: “Ngih ön kulah tufömngöre kinlēḵngô nö i mahām chu, ngam tökitaktuvö töpòkūö yīö.”—Lūkös 22:19, 20.

Pōyen nup vahënyö Yēsū lang nö in yik haköptö ò ik hatööm. Höng hĕng pöri ök tufömngöre chööngö kahëtö ò nö in cha—tö cha nö hōtu nö hangenlōn tö höö. Ngö ṙô anga-aṅ: “In e inkaha yin min tö taṙòkhöre tarik, öi mahaköp in chu, yē yīö kö hangenlōn tö höö.” (Yôhan 13:34, 35) Ve-ekūö cha anga-aṅ nö sōten cha nö röingö alaha tö nup kanihngen tö hòṅ yih. Kalē-ĕṙô Yēsū nö ve-ekūötēv nö chöönyö ten tö cha. Tikökṙô re ngach cha-a nö ha-öiny ngam Tēv ngach kunyī-inyre im hatööm.

El ök panô-òṅ Kĕtsemenī ngach Yēsū nö simngöre ngach hōngnyö ellōn re nö ve-ekūötēv. Höng ilööṙen yik kumyung tö aṅhav eltī tö chehetī kumyung, makūökūönṙô hēk yik tahëng inrē nö yihtöre ngach kē-an. In cha inrē ang Yūta. Yihtöre ngach anga-aṅ nö in Yēsū ngach hāmkūö ò. Kē-ĕ Yēsū ngach yik kumyung pön akahakūö tö ò. Falngöre pöri yik mahaköp.

Hē Yēsū nö sökhaka nö ikuö yik yahuti kamhôkken ò, ve-eny re anga-aṅ nö kuön ngam Tēv. Lökten cha nö kaheūkan nö faluṙen pön ötlēkôre töm Tēv, töp lökten ò nö hòṅ kumpaha. Kē-ĕyö hēk ang Yēsū nö chuh kūö Pòntiös Pailĕt ök mahayöng aṅ Rōm. Pòrò anga-aṅ nö öt kanòtukuö tö fālen Yēsū, kūö ṙô yik tömaṙòngö pöri anga-aṅ nö hōten Yēsū nö kumpaha.

Kē-ĕ ngach Yēsū nö chuh Kòlkòta tö yik kumyung aṅ Rōm, im chuök ò nö harātu, nö i rōi ök töhĕng mirööḵö chōn. Hönglūk ngach ök tökiröng pinngangkūö im sakāmö ngam inrātö Ò, ök tökiröng singūlö im panam im chūök Ò nö tōki. Unòchrit tö nëtsiön köiny ṙò ang Yēsū nö ṙā-ang nômö re, hē e ngach ök yöng kumyeūnö. Ṙātu ngach ök alaha ò nö el ök anūlö ök tö hulhötvö nö i kaha ihong. Im tahëng sakamö ngach, yik mākūökuönṙò nö haköpngö kūö ök anūlö, ngach ṙātö amahaṅti inrē nö i kūö e. Ngöhakṙen ök pökeh alaha Yēsū nö el ök anūlö? Hö-ö, Kūö ök töhĕng tökiröng pingangkuö. Ngam haköp inlahen hī min im mu-unôichrit ngih mirūlö.

—Lökngörit im līpöre Mëtiv 26 mirūlö hēk 27; Mākös 14 mirūlö hēk 15; Lūkös 22 mirūlö hēk 23; Yôhan 12 mirūlö söl im tö 19.