MIRŪLÖ 24

Kahūich Pòl Chitri Chamuh in Minë Māṅ

Ngönlöre ṙinātö ellōn yik mu-urĕh kristīön tö minë chitri kahūich Pòl

PŌYEN lā-en më mu-urĕh kristīön nö i inteungtökūö minë kuilōn ngam Tēv Yāvē. Ngach pöri më raneh kristīön nö ilöö hakihtuṙen. Ōt nup inkihten cha lamöktö el kahôyö, ōt minë kanihngen lamöktö in cha nö tī yip töng hol maneuk cha yip töt ngöönö ṙinātö ellōn. Köp aich pökeh min më kristīön nö lā-al u? Nët anāi kahōk ṙôken nun minë līpöre më kristīön tö sā kinūchö chitri nö i ëlô Krīk. Lökten in u më kristīön nö teūngen tö inlēnöre, inngëṅkö cha inrē nö köp nö ṙātö ellōn re nö im Tēv.

In u mine tö 21 ṙòken 14 minë chitri kahūich Pòl löktökūö im Rōma söl im Heprāi. I mine-eny yip tö lumnööṙu töminë chitri anu-ö nö kūichö—yĕn lamöö i tö hĕng tak hēk yĕn lamöö in minë māṅ. Tā-a töi ngëichkö minë inlēnö hēk tö minë inngönlö alaha minë māṅ ṙô minë chitri kahūich Pòl.

Inlēnö in mine tinrīken hēk hanëtö elkuilōn inrē. “Öt amīnuvö min tö ngam pūlngö ngam Tēv” yip ma-asĕha, chamô-òṅkānö hēk nup tahëngngöre inrē ötlanöökö. (Kalatī 5:19-21; 1 Kòrin 6:9-11) Hòṅ haköp ngam hinëngö yip tarik vame-eṅkūö ngam Tēv, ötkô nö atöltuṙen pòrò nö kö i nup pumnāmö re. (Rōma 2:11; Efisös 4:1-6) Hòṅ holtö ṙanamölōn re chā-a nö kētöre nö i inyööken yip tö sā ṙinātö ellōn re, yip tö hòṅ hayöökaṙen. (2 Kòrin 9:7) Ngö ṙô Pòl “un ṙākôre ve-ekūötēv.” Ṙūöhöl alaha cha anga-aṅ inrē nö keuheūtnyö ṙô ellōn re nö i vine-ekūö ngam Tēv Yāvē. (1 Tösalònikē 5:17; 2 Tösalònikē 3:1; Filipī 4:6, 7) Yēḵ cha nö hòṅ hāngö ṙô nö ve-ekūö ngam Tēv, ngach hòṅ holtö ṙinātö ellōn re cha-a nö ve-ekūö ò.—Heprāi 11:6.

Sitih tī öi asīöp ngam ṙanamlōn ngam mikūönö? Hòṅ hāngenlōn yin më kikōnyö tö më pihöre kikānö nö sā lōn re tö alaha re. Hòṅ milēḵṙen më kikānö tö më pīhöre kikōnyö nö hòṅ tumṙeūtöre. Hòṅ hang chööngö yöng re më nyīö pön angu-ö lōn ngam Tēv. Hòṅ hachōten yip kūön re hēk holtö ṙanamlōn re inrē më inyööngö nö haköptö më kūön re nö asā ṙô ngam Töhet līpöre.—Efisös 5:22–6:4; Kòlòsi 3:18-21.

Yangta maheuṅk më raneh kristīön tö minë kuilōn ngam Tēv. Pōyen tī misī ngam chööngö Môsös nö hachōkūö hēk haköptö yik Israel, hanöng saha taneungtö kūö Kristū. (Kalatī 3:24) Ngach pöri vē raneh kristīön nö öt sā tö sā re nö haköpkö ngam chööngö Môsös nö i vine-ekūö ngam Tēv. I kinūchtö chitri yik Heprāi yik lamökngö rit in yik kristīön, pōyen ṙô Pòl nö hayangtö manah ngam chööngö Môsös, tö inteungngö nup kuilōn ngam Tēv inrē nö lökten in Kristū. Vë-eny tumkangen minë tö halēnlöngö chööngö inrē Pòl minë vahënyö yik Pròfĕt tö sā ngih: ngam finëlngö töṙeūla nö tökētu, nö nyat nup tö hòṅ teungtakūö, kinëngö nômö re tö Kristū nö tö teungten, nö tökô-en inṙē-ĕl tökööl. (Heprāi 10:1-4) Lökten im kinpāha Yēsū ngach ngam hötreh kinlēḵngô nö kēḵ chūök tö ngam tufömngöre kinlēḵngô, lökten nö öt sā re nö haköpkaṙen ngam hötṙeh kinlēḵngô.—Kòlòsi 2:13-17; Heprāi 8:13.

In Mw raneh Kristīön el ngam māṅ nö haköp minë chitri Pôl ngaich hangihtöre më tarik

Inlēnö tölöökö tī nö inruklö në Maṅ im hinëngö. Yip tarik tö hòṅ kēḵ minë lā-en el ngam māṅ nö tö hòṅ teungten nö in minë ṙô ngam töhet līpöre tinrīken, hanëtö elkuilōn inrē. (1 Timôtī 3:1-10, 12, 13; Tāitös 1:5-9) Ötkô yin nö rākenre vē vamë-ekūö ngam Tēv Yāvē nö im manūlö hòṅ cha nö haruhkö alaha höö. (Heprāi 10:24, 25) Hòṅ kēkaṙen minë manūlö nö im inrukhölö hēk inlēnö inrē.—1 Kòrin 14:26, 31.

Ik innët van Pòl nö chuh Rōma hē e anga-aṅ nö kūich ök innëtö chitri Timòtī; el kinlōngö anga-aṅ hē e nö hökkö ngam kinṙòkken re. Haroh tum tak yik töt pinhë-eṅvkūö kristīön yamihken ò nö el kinlōngö nöng öt mufē-ĕvö tö inkihten re. Akahalōn ang Pòl tö ngam ṙētak re nö röhta, lökten ò nö ngö ṙô tī “ngachö alaha chin kiyung im tölöök kinyūngö, sölngö röön chin ngach fal, köptī chin tö ngam mikah.” (2 Timôtī 4:7) Röhta ngam finëlngö Pòl tö kūö ngam ṙinātö ellōn ò sön pöri minë kahūich ò chitri nö inchōḵkūö yip tökô-en vamë-ekūö ngam Tēv i në ṙētak hī töngamuh.

—Lökngörit im Rōma; 1 Kòrin; 2 Kòrin; Kalatī; Efisös; Filipī; Kòlòsi; 1 Tösalònikē; 2 Tösalònikē; 1 Timôtī; 2 Timôtī; Tāitös; Filimòn; Heprāi.

Achiö Ang Ngam Tö Kilē-ĕyö Kūön Ngam Kikānö?

Unôichrit nā Ātöm nā Ēva nö fukngö nö im tökööl, ngö ṙô ngam Tēv nö in ngam pēch: “Ṙātö kumnyah chin ihôi meh tö ngam kikānö, ihôi öp kūön meh inrē tö öp kūön ò inrē: paṙôkö kui man min tö tī ò, ngach me-eṅ paṙôkötī tö kulôichröön ò.” (Ranehlö 3:15) Vënyu nang in töm töhet līpöre tö ngam sī-ö tö ṙô nö “ngam pēch misī.” (Inmeukhömat 12:9) Öt hē pöri ngam inkahkö ngam tö kilē-ĕyö Kūön ngam kikānö, ngam Ṙama-any nö hameuknyu. Unôichrit tö kööinyu samyeūheu ngach ngam Tēv nö mikahtökūö hī tö inlahen ò nö löknyö mat ngam töhet līpöre tī.

Unôichrit tö 2,000 samyeūheu rô-angen inlaha nā Ātöm nā Ēva nö fukngö nö im tökööl, vënyö nang hī ngach ngam Tēv töm tö kilē-ĕyö Kūön ngam kikānö min, nö löknyö im mikūönö Aprahām. (Ranehlö 22:17, 18) Samyeūhu rô-angen, ang Pòl ök tanīnöṙô nö hameuknyö ngam tö kilē-ĕyö Kūön ngam kikānö nö ngam Mesayā, ang Yēsū Kristū. (Kalatī 3:16) Ik hē finëlngö Yēsū, hē taneungtö kūö ngam raneh mupākö alaha ngam kinlēḵngô im Ranehlö 3:15, ngam tö ngö ṙô “ngach me-eṅ paṙôkötī tö kulôichröön ò.” Ngach hachohlen Yēsū ngam Tēv nö ṙā-ang im kinpaha, ngach “ha-aṅhaṅ [ò] pöri nö im ma-alaha.”—1 Pītör 3:18.

Ngih ön inrē kuilōn ngam Tēv tö më tö 144,000 tarik nö chā-a innëtö mupākö alaha ngam kinlēḵngô kūön ngam kikānö. (Kalatī 3:29; Inmeukhömat 14:1) Hachohlöngö chā-a nö im ma-alaha nö tö amīnu nö hol Kristū nö im pūlngö ngam Tēv el halīöngö. —Rōma 8:16, 17.

Sā Yēsū nö tö kalēḵ nö rācha nö el halīöngö, ilööṙen min anga-aṅ nö ahetngö ngam sī-ö, tö yip kūön ò tötlöök tarik, yip tamömrit ò inrē tötlöök ma-ahānga. (Yôhan 8:44; Efisös 6:12) Lanāmö pöri hēk kumchikṙen inrē nö in yip tölöök tarik më elkatòh ngam inyööngö tö Yēsū. Ngach möl min anga-aṅ nö hateungtökūö ngam inlahen ngam pēch i tinleuchnyö ngam “kui ò” ngach öt ōtren min anga-aṅ pön kētu nö im tötchanuhuvṙen kinpāha.—Heprāi 2:14.