LESÖN 01
Hěng Ön Ngih Tövai Līpöre Mahayööken Meh
Ṙòkhöre in öi hòṅ ṙamlōn. Kūö yòh pöri öi ngatī ṙôken kanihngen töngamuh? Sitih inlahen öng vö min ngih panam? Hēk sitih inlahen min öi ha-aṅ nômö re? Sitih inlahen öi ṙamlōn el minë mikūönöre? Mihôiṅ pöri min öm ṙamlōn pön hěng ngih tövai līpöre tö mihôiṅ nö kētö sanapṙô në intöönö. Asuh angū-ö tövai līpöre? Ngam Paipöl. Yěm vë-ekūö e min ngaich teūngen min më-eṅ tö sanap ṙô minë intöönö, ngaich ṙamlōn inrē.
1. Asuh nup intöönö tö kētu sanap ṙô tö ngam Paipöl?
Vënyu nang in tö ngam Paipöl tö ngam Tēv nö kūö yòh nö vīlö ngòh tarik? Kūö yòh yip tölöök tarik nö kihngen? Asuh öp maheūkkö yip tökapah? Kūö yòh öi höng öt lām ikūö ngih panam? Köpsören öng min ngih panam? Anū-ö nun në intöönö töt ṙanangen nö tö hòṅ chööhö sanap ṙô, pōyen ngaich tarik tö teūngen tö sanap ṙô u nöng löknyö mat ngam Paipöl. Lōnu ngam Tēv inrē tö meh öm teūngen tö sanap ṙô u.
2. Asuh nup inlēnö yanöölen hī ṙama-ang mat ngam Paipöl öi la-al nup kanihngen re kaheuk sakāmö?
Ōt nun minë inlēnö aṅmat ngam Paipöl. Tö sā në, Sitih inlahen öi teūngen töm ṙanamlōn el ngam mikūönö? Sitih inlahen min öi la-al nup kanihngen re, köptī inrē töm ṙanamlōn re inup töng la-enre? Anū-ö min në inlēnö töhakööpö tö meh öm löknyö mat ngam Paipöl, yěi holṙô re min hakööpö u, ngaich kôtökūö min më-eṅ tö minë inlēnö nö ‘tö yöölen tī tö hī’ öi la-al nup kanihngenre kaheuk sakāmö.—2 Timôtī 3:16.
Hö-ö ön ngih līpöre vahë-ekūö meh nö Paipöl. Aṅhavmat pöri angū-ö tö minë ṙô ngam Paipöl. Lōnu in tö meh öm vë-ekūö minë miröökö tökētu. Hòṅ meh akahakūö tö minë haköpre nöng aṅmat ngam Paipöl.
MIKAHTÖKŪÖRE HĒK
Pōyen yip ngaich tarik tö yöölen nö löktö in ngam Paipöl, mihôiṅ më-eṅ inrē öm ṙamlōn yěm vë-ekūö e, söö pöri yěn hěng tak öp mumkahtö elnang meh tö minë haköp meh, kūö yòh? Ta-a töi mikahtö kūöre.
3. Ngam Paipöl an tö mihôiṅ nö hachōkūö hī
Sā ṙēngen ëāṅvö röön hī an ngam Paipöl. Yěi vë-ekūö e min ngaich sā mahachōkūö hī angū-ö töngamuh öi katöllö öp tölöng talöökö re. Akahakūö inrē ayī-ö tö nup yamih min ṙētak.
Vë-evkūö Salmai 119:105, ngaich kakkö minë intöönö yamih:
Sā ṙēngen yòh öng ngam Paipöl nö vënyu?
Mihôiṅ öng ngam Paipöl nö hachō talöökö meh, sitih lōn öm?
4. Kētu sanap ṙô minë intöönö hatön hī tö ngam Paipöl
Yöölen ök ihih yöng nyīö pön teūngen tö sanap ṙô nuk intöönö nö löknyö mat ngam Paipöl. Röngnyöm VITIŌ,ngaich kakkö minë intöönö yamih.
Asuh nuk intöönö tö kihngen tī tö ngam yöng nyīö ngam tö hameuknyu nö el ngam vitiō?
Asuh öp yanöölen ò hē ò nö haköp mat ngam Paipöl?
Tövai nö inlahen hī yěi öltöre mikahkūö, ngaich hòṅ hatöntöre. Vë-evkūö Mëtiv 7:7, ngaich kakkö ngih intöönö yamih:
Ōt hòng intöönö el kuilōn meh, tö hòṅ kētu sanap ṙô tö ngam Paipöl?
5. Mihôiṅ man kuchik ṙô öm vë-ekūö ngam Paipöl
Pōyen yip tö kuchik ṙô nö haköp mat ngam Paipöl, teūngen inrē tö yanöölenre. Röngnyöm VITIŌ, ngaich kakkö minë intöönö yamih.
Sitih ṙô aich sin më ṙāl tarik tö ngam vinë-ekūö līpöre më tö hameuknyu nö el ngam vitiō?
Kūö yòh aich nö harīkngöre mufē nö ngaich töm vinë-ekūö Paipöl?
Vënyu nang in töm Paipöl tö e nö mihôiṅ nö kētö inlēnö, kētö hanöhlö hēk maheūkkö hī inrē. Vë-evkūö Rōma 15:4, ngaich kakkö ngih intöönö yamih:
Sitih inlahen öm yěm hòṅ mikahtö kūöre tö minë kinlēḵngô aṅmat Paipöl minë kamëtö hanöhlö, maheūkkö hī inrē?
6. Mihôiṅ yip tahëng nö mikahtö elnang hī tö ṙôm Paipöl
Mihôiṅ man kahngenre haköp mat ngam Paipöl, pōyen pöri yip tö yöölen nö ngaich pön mikahtu elnang tö yip tahëng tö ṙô ngam Paipöl. Vë-evkūö Inlahen 8:26-31, ngaich kakkö ngih intöönö yamih:
Sitih inlahen öm më-eṅ yěm hòṅ akah elnang tö ṙô ngam Paipöl?—Ngëichkö ṙô në miröökö 30 töm 31.
Öt akaha elnang ngam tarik aṅ Iti-opiā tö ṙô ngam Töhet līpöre. Lökten anga-aṅ nö mikahtu elnang tö ngam töhěng tarik, ngatī töngamuh öi hòṅ mahaköptu tö ṙô ngam Paipöl.
ṘÔ YIP TAHËNG: “Öt yanööluṙen in yěi vë-ekūö Paipöl.”
Sitih ṙô öm më-eṅ? kūö yòh öm ngatī ṙô?
MINË HAKÖP HĪ NGAICH
Löknyö mat ngam Paipöl in ngaich akahakūö tö inlahen re öi la-al nup kanihngenre, ōt minë sanap ṙô nup tökiröng intöönö, teūngen ayī-ö töm hanöhlö, mineūka inrē.
Sitih ṙô öm më-eṅ?
Asuh nup mahayööken hī aṅmat ngam Paipöl öi la-al nup kanihngen re öi kaheuk sakāmö?
Asuh nup intöönö tö kētu sanapṙô tö ngam Paipöl?
Asuh nup lōn meh haköp meh aṅmat ngam paipöl?
NGËICHKÖ NË INRĒ
Sitih inlahen ön minë inlēnö aṅmat ngam Paipöl nö yöölen tī min tö meh.
“Inlēnö Aṅmat Paipöl—Tö-örheūheu Nö Yöölen Tī” (Chūökamahati-HI Öngk. 1 2018)
Ngëichköm tarik töng haṙivlōn sin, nö löktökūö nyinī-öre, kūöṅnö elmat inrē töre, ngëichken ò pöri ngaich nö ṙamlōn pön vë-ekūö ngam Paipöl.
Ngëichkö minë inlēnö yip töpīhövö hēk yip nyīö i mat ngam Paipöl.
“Kalahtenre Hang Në Tö 12 Inlēnö, Vī Ngam Mikūönöre nö Ṙamlōn” (Hinörē!-HI Öngk. 2 2018)
Pōyen yip tö ngö lōn tö ngam Tēv nö hayöng ngih panam. Kô-en hòng nö ngatī? Sitih ṙô öng ngam Paipöl.