LESÖN 11
Sitih Inlahen Öm Hakūötenre Haköpmat Ngam Paipöl?
Kihngen öm ṙung kētöre in öp tö langanhu la-en? Söö man yěm rahëich rahëichyen kahë tö la-enre öm in e, ngaich öt yaha lumngan min angū-ö nö meūkö tö meh. Ngatī ṙēngen ngam vinë-ekūö Paipöl. Lohten öm ngö lōn, ‘Tö kufòng ön nö līpöre sitih inlahen öich vö min rěhlörit ṙô re vë-ekūö e?’ In ngih lesön man min vënyu nang tö minë tö lööṙen inlahen re öm vë-ekūö Paipöl, öm holtö kumchik ṙô re.
1. Kūö yòh öi hòṅ örheūheu vë-ekūö Paipöl?
Yěi örheūheu haköp minë “chööngö ngam Mā Tēv [Yāvē],” ṙamlōn min ayī-ö, kôlò min inrē nup töng vahīṙen hī. (Vë-evkūö Salmai 1:1-3.) Mihôiṅ man kalahtenre höng 5 hēk 10 minit rò-òten öm vë-ekūö Paipöl. Kuchiklöre ṙô man min yěm örheūheu vë-ekūö e.
2. Tö sitih manah öng ngam inlahen hī öi afēkö minë haköpre?
Yěi hòṅ yöölen löktö im vinë-ekūö Paipöl, hòṅ rahëichtakūö ayī-ö afēkö minë haköpre. (Yôsuā 1:8) Yěm haköp, mihôiṅ öm hatöönöre kahngenre öm ngö ṙô: ‘Asuh öp haköplö chu inlahen Yāvē in ngih haköp chu? Sitih inlahen öich min kēkö kaha nup haköpre? Hēk sitih inlahen min angū-ö nö aṅtī chu öich hayööken yip tahëng?’
3. Sitih inlahen öm mihôiṅ kē-ěny ṙētakre vë-ekūö Paipöl?
Kihngen öm kē-ěny ṙētakre vë-ekūö Paipöl? Hòṅ sitih inlahen öm? Töölô in töm Paipöl öi: “Haṙënngö ṙētak.” (Efisös 5:16) Mihôiṅ öm halēnlö öp töhěng ṙētakre öm vë-ekūö Paipöl. Ōt chamôhòlre tö peuheū nö vë-ekūö Paipöl. Ōt kamënyö ṙētakre el sakāmö hēk ōt yip muh vamë-ekūö Paipöl urēhěkūöre nö haṙòh. Asūp ṙētak lōn meh më-eṅ öm vë-ekūö Paipöl?
MIKAHTÖKŪÖRE HĒK
Sitih inlahen öm yěm hòṅ kuchik ṙô öm vë-ekūö Paipöl? Kūö yòh öm hòṅ halēn ngam istötī re hòṅ meh yöölen löktö in e? Ta-a töi mikahtökūöre.
Sā inlahen meh öm ṙūöhlö öp neūköre öm nyā, ngatī inlahen më-eṅ öm ṙūöhlö kumchik ṙô re haköpmat ngam Paipöl
4. Sitih inlahen öm yěm hòṅ kuchik ṙô öm vë-ekūö Paipöl?
Öt lööṙen in yěi hòṅ rěhlörit ṙô re haköpmat ngam Paipöl. Mihôiṅ pöri öi asīöp neūköre tö e, sā ṙēngen öp ma-asīöp neūköre töp tö tufömngöre nya-aṅkūö. Vë-evkūö 1 Pītör 2:2, ngaich kakkö ngih intöönö yamih:
Sitih inlahen öm min kuchiklöre ṙô yěm örheūheu vë-ekūö ngam Paipöl?
Röngnyöm VITIŌ ngaich mikahtökūöre tö inlahen më tarik nö kūö yòh nö kuchiklöre ṙô nö vë-ekūö ngam Paipöl. Ngaich kakkö minë intöönö yamih.
Asūp kanihngen më ṙāl tarik nö vë-ekūö mat ngam Paipöl?
Ngaich sitih inlahen cha-a nö la-al u?
Sitih inlahen ngaich cha-a nö kuchiklöre ṙô nö vë-ekūö mat ngam Paipöl?
Minë inchōten meh rěhtenre haköp:
Mihôiṅ man vë-ekūö nup Paipöl nup tölööngö translēsön hēk tö lööṙen mikah elnang tī inrē. Yěm aṅhav in tö ngam Niū Vöörlt Translēsön òf tī Hōli Iskripchörs ngaich kò-òren öm kalahtenre vë-ekūö e.
Urěh man vë-ekūö nup aṅmat ngam Paipöl nup kumchik ṙô meh. Ngëichkö ngam chart “Kalahtenre Vë-ekūö Ngam Paipöl.”
Kūichngö nup haköpre man. Ngëichkö ngam chart “Söl Yih Ṙô Öich Ngaich Vë-ekūö Ngam Paipöl.”
Mihôiṅ an ngam JW Laëprërī ep nö chehetī meh. Mihôiṅ öp töng yòh chūök meh öm vë-ekūö mat ngam Paipöl hēk hang ṙô e inrē. Mihôiṅ inrē ngih ep nö chaphötvö nö el ismāt fūn.
Ngëichkö ngam appendixes in ngam Niū Vöörlt Translēsön òf tī Hōli Iskripchörs. Ngam tö aṅhav mat tö minë mëp, minë chart hēk tö minë ṙô inrē. Kuchik ṙô man min öm haköp mat e.
5. Halēn ngam Paipöl istötī
Vë-evkūö Salmai 119:34, ngaich kakkö ngih intöönö yamih:
Kūö yòh öi hòṅ urěh öi vë-ekūötēv yěi hòṅ vë-ekūö mat ngam Paipöl hēk hòṅ halēn ngam Paipöl istötī inrē?
Yěm hòṅ akah elnang tö ṙô minë lesön nö ṙòkhöre, ngaich hòṅ halēn minë haköpre më-eṅ? Yěm hòṅ halēn, köplōn tö në tinöölô re tö kētu yamih:
Vë-ekūö minë raneh pāt ngam lesön.
Fehnyö mat ngam Paipöl, ngaich vë-ekūö e. Kalah öm mikahtökūöre töp chö-öny e nö kūö yòh nö kētu nö in e.
Mikahngö nup sanap ṙô nup intöönö, hòṅ meh lööṙen kētö sanap ṙô u, yěm hatöönö min töp kamë istötī re.
Akahakūö öm?
Tö më Vamënyen Yāvē nö ṙōlkangen minë Paipöl chehetī cha nö la-evṙen. Ngam Niū Vöörlt Translēsön òf tī Hōli Iskripchörs tö mötlö nö ööilōn cha, pön tö lööṙen hēk lööngö translēsön angū-ö, ōt inrē ngam minë-eny ngam Tēv nö imat e.—Ngëichkö ngam el vepsāit töhakööpö “Ngaich Aich Më Vamënyen Yāvē Nöng Kahngenre Nö Vī Paipöl re?”
ṘÔ YIP TAHËNG: “Larāḵ öich hěng sumkam la-evṙen, öt ṙētakvö chin chū-ö öich vë-ekūö mat ngam Paipöl.”
Sitih mufē öm më-eṅ?
MINË HAKÖP HĪ NGAICH
Hòṅ kē-ěny ṙētakre man öm vë-ekūö Paipöl yěm hòṅ yöölen takô, vë-ekūötēv yěm hòṅ akaha elnang tö ṙô minë haköpre, hòṅ urěh inrē öm halēn ngam istötī re.
Sitih ṙô öm më-eṅ?
Sitih inlahen öm yěm hòṅ yöölen takô öm haköpmat ngam Paipöl?
Ihē öm më-eṅ kò-òren kē-ěny ṙētakre öm vë-ekūö hēk haköpmat ngam Paipöl inrē?
Kūö yòh öng nö tö söö nö inlahen meh yěm urěh öm halēn ngam istötī re ?
NGËICHKÖ NË INRĒ
Ōt nun minë inchōtö inlahen hī ṙūöhlö mikahkūöre töm Paipöl.
“Sitih Inlahen Öi Yöölen Hēk Kuchīken Öi Haköp Mat Ngam Paipöl?” (Chūökamahatī Öngk. 1 2017)
Mikahtökūöre tö minë tö lūöi inlahen hī haköp mat ngam Paipöl.
“Sitih Inlahen Ngam Paipöl Nö Hayööken Chu?—Pāt 1: Rultenre Haköpmat Paipöl” (El vepsāit töhakööpö)
Asūp tö hòṅ inlahen meh hòṅ meh kuchīken haköp mat ngam Paipöl? Ta-a töi mikahtökūöre.
Hang ṙô vē hol hī tö marò-òten ngaich nö haköpmat ngam Paipöl nö vë-eny inlahen re.