LESÖN 10
Sitih Inlahen Ön Minë Mīting Më Vamënyen Yāvē Nö Yöölen Tī Tö Meh?
Ngaich öm ṙung chuh el mīting më Vamënyen Yāvē? Yěm hö-ö, ngaich lohten öm aṙē-ěvö. Pöm ngö lōn: ‘Asuh öp uvöh la-en cha nö el mīting? Kūö yòh öng ngam chinūhu el mīting nö töt ṙanāngen? Ngaich kūö yòh chū-ö öich hòṅ chuh el mīting?’ Anū-ö nun min haköp hī in ngih lesön, tö hī yěi chuh el mīting ngaich ngönlöre min ngam innôlö hī nö in ngam Tēv Yāvē hēk asuh inrē min nup haköplö meh in e.
1. Asuh öp tökiröng lāinyngen hī hòṅ meuk kūöre?
Hang ṙô ök ihih kamūich ngam Paipöl nö ngö ṙô: “Ha-öönyö meh [Yāvē] chin min el ṙôngö yip tömaṙôngö.” (Salmai 22:22) Angū-ö ön tökiröng chö-öny hī öi chuh el mīting. Pöi in e öi ha-öny ngam Tēv öi vë-ekūö ò. Lökten yin vē Vamënyen Yāvē nö kaheuk afta nö hamūlöre nö ha-öiny ngam Tēv. Kaheuk samyeūheu yin inrē nö kēken minë tökiröng manūlö. Ngaich yēḵ cha nö mūl ngaich in e cha-a nö ha-öny ngam Tēv nö tikökṙô re, vë-ekūötēv inrē.
2. Asuh öp min haköp meh el minë mīting?
Höng aṅmat ngam Paipöl nun minë töhakööpö nö el mīting. Höng, “vë-eny manah e cha-a inrē, pòn hōtu yip tarik nö akaha elnang tö ṙô re yěn vë-ekūö e.” (Vë-evkūö Nahimiā 8:8.) Pōyen haköp man min tö inlahen Yāvē öm el mīting. Akahakūö min më-eṅ inrē tö nup tövai tinrīken ò nö hangenlōn tö meh, ngaich röhta min öm in ò. Rö-ö nöng anū-ö pöm teūngen min töm tö kô-en ṙanamlōn.—Isayā 48:17, 18.
3. Asuh öp min yanöölen meh yēḵ meh hamūlhötre in yip tahëng öm el mīting?
Ngö ṙô ang Yāvē “ta-a, töi kö haruhkö alaha höö im hanāngenlōn, tölöök la-en inrē. Ta-a, ui ṙāngenre hamūlöre.” (Heprāi 10:24, 25) Meukkūö yip tarik man min öm el mīting yip tö hangenlōn, töchumkūöṙen inrē tö höö. Reuslöre alaha man min öm löktö in nup ṙô cha, ngönlöre inrē ngam ṙinatö-ellōn meh öm in Yāvē. (Vë-evkūö Rōma 1:11, 12.) Meuk yip töṙōlkangen tinrīken man min tarik öm el mīting ngaich kôtökūö min më-eṅ tö inlahen cha nö la-al nup töṙōlkangen kanihngenre nö sā meh. Pōyen nup min haköplö hī yěi yihtökūö el mīting. Kuilōn Yāvē inrē angū-ö tö hī öi ötkô öi ṙāngen minë mīting.
MIKAHTÖKŪÖRE HĒK
Sitih inlahen aich vē Vamënyen Yāvē nö kēken minë mīting re. Kūö yòh öi ötkô kūönngöre ellōn töm chinūhu el mīting? Ta-a töi mikahtökūöre.
4. Mīting më Vamënyen Yāvē
Hěng kang chūök yik misī mu-urěh Kristīön nö ha-öiny ngam Tēv Yāvē. (Rōma 16:3-5) Vë-evkūö Kòlòsī 3:16, ngaich kakkö ngih intöönö yamih:
Asuh nuk la-en yik mu-urěh Kristīön hē cha nö hamūlöre nö ha-öönyö Yāvē?
Patī Pūlngö ngö ṙô in töm chūök më Vamënyen Yāvē töngamuh nö ha-öny ngam Tēv, röngnyöm VITIŌ. Ngaich mikahtökūöre tö inlahen ih yěi mūl el mīting. Ngëichken ngam tö kētu nyat inlahen mumting, ngaich kakkö minë intöönö yamih.
Sā ṙô ngam Kòlòsī 3:16 asuh nup töngamuh tö kēkaṙen nö el minë mīting ih?
Asūp inrē tö lökngöre tī tö ellōn meh öm meuk minë vitiō hēk minë nyat?
Vë-evkūö 2 Kòrin 9:7, ngaich kakkö minë intöönö yamih:
Kūö yòh öi öt havëka kūö tö pësa yěi chuh el mīting më Vamënyen Yāvē?
Hol matre nan töp mahaköpten meh an ngëichkö minë töhakööpö min nö el mīting el ngih afta.
Asūp min tö lōn meh ööi lōn meh in minë haköp meh el ngam mīting?
Akahakūö öm?
El ngam jw.org, man kò-òren ngëichkö ngam ṙētak töm kamtö chūök kinëken minë mīting më Vamënyen Yāvē tö keuheūtngöre chūök nö ing panam.
El minë mīting ōt minë minkahten, töhameuknyu minë, hēk vitiō inrē. Rěhlöngrit hēk mana-angrit tö tinköökö hēk vinë-ekūötēv inrē minë mīting
Ṙētakvö yip yamihtökūö nö ṙônyö nup haköpre nö el minë mīting
Ṙòkhöre mihôiṅ öi yih—mikūönö, ṙālö, tököiny, hēk nyīö
Höng öt ṙāyu. Öt havëkö kūö meh yin min më Vamënyen Yāvē tö pësa
5. Hòṅ kē-ěny ṙētakre in öi chuh el minë mīting
Asehkūöre tö inlahen ök mikūönö Yēsū. Tö cha nö kaheuk samyeūheu nö lökngö Nasöret nö chuh Yērusalem. Lohten nö 100 kilomitör rò-òlkūö nö chuh Yērusalem, tö pōyen paneūlö ngam panam ngaich höng kiröön cha-a nö lūöi sumkam röön nö chuh in e. Vë-evkūö Lūkös 2:39-42, ngaich kakkö minë intöönö yamih:
Sitih lōn öm, lööṙen yik misī hē cha nö chuh Yērusalem?
Asuh nup kanihngen meh min më-eṅ yēḵ meh öm hòṅ chuh el mīting?
Köplōn man tö meh yěm hakihtenre öm chuh el mīting, ngaich öthō min öm öt pōyen haköplö? Kūö yòh öm ngatī ṙô?
Ngö ṙô an ngam Paipöl ötkô in ṙāngenre hamūlöre öi ha-öny ngam Tēv Yāvē. Vë-evkūö Heprāi 10:24, 25, ngaich kakkö ngih intöönö yamih:
Kūö yòh öi hòṅ örheūheu chuh el mīting?
ṘÔ YIP TAHËNG: “Mihôiṅ in kòl höng i patī öi vë-ekūö līpöre, asūp tö uroh chinūhu yò-òvö.”
Asuh öp miröökö aṅmat ngam Paipöl vamënyö kuilōn Yāvē nö in hī?
MINË HAKÖP HĪ NGAICH
Yēḵ meh min öm chuh el mīting, ngaich haköp inlahen Yāvē min më-eṅ in e. Ngaich ngönlöre min ngam innôlö meh tö ò ngaich holṙô yip tahëng min më-eṅ ha-öny ngam Tēv.
Sitih ṙô öm më-eṅ?
Kūö yòh ang Yāvē nö lōnu tö hī öi chuh el mīting?
Asuh öp min haköp meh öm el mīting më Vamënyen Yāvē?
Asuh nup min yanöölen meh yěm yihtökūö el mīting?
NGËICHKÖ NË INRĒ
Sitih inlahen min yěm tö sirōngkūö öm chuh el mīting? Ngëichköm tarik töngatī inlahen sin, ngaich pöri anga-aṅ nö hangenlōn nö chuh el mīting.
Ngëichköm ṙālö tö ṙamlōn yěn chuh el mīting ngaich sitih inlahen anga-aṅ pön sō nö hěng hang heuh nö öt mīting.
Hang ṙô mufē yip tahëng töm chinūhu el minë mīting.
“Kūö Yòh Öich Hòṅ Chuh El Patī Pūlngö Öich Mīting?” (El vepsāit töhakööpö)
Ngëichköm tarik tötainy sin, nö haṙī-ingre tinrīken nö ngaich unôichrit inlahen ò nö yihtökūö nö el mīting më Vamënyen Yāvē.
“Öp Töng Kū-ö Chu Höng el Chēp Chu ngam Kun Inreul chu” (Chūökamahati, Òktopör 1, 2014)