LESÖN 59
Öthō Man Min Öt Mihôiṅ Yēḵ Meh Hakihtuṙen
Yih min ngaich öp ṙētak vē taṙòkhöre Kristīön nö sō-oiṙen tö vē tarik nö löklōn Yāvē. Hakihten hī min cha-a ötlēḵken hī inrē. Hòṅ pa-ekūö öi min tö u? Ta-a töi mikahtökūöre.
1. Kūö yòh öi öthō min öi öt hakihtuṙen?
Ngö ṙô an ngam Paipöl: “Ṙòkhöre yip tö hòṅ löök [tömrit] Kristū Yēsū nö kihngen min tö öt inkôlò.” (2 Timôtī 3:12) Hakihtuṙen ök misī Yēsū kūö ò nö öt aṅ ngih panam ngam Sī-ö. Ngatī ayī-ö öt aṅ ngih panam lökten vē mahayöng tö minë söngkötön në tinlööken inrē nö ötlēken hī, ngaich öt pingangkūö ayī-ö.—Yôhan 15:18, 19.
2. Sitih inlahen öi yěi hòṅ hööngöre tö nup inkihtenre?
Hòṅ löktö kūö töngamuh in öi hangönlö ngam ṙinātö-ellōnre öi in Yāvē. Hòṅ örheūheu öi vë-ekūötēv, vë-ekūö Paipöl inrē. Hòṅ örheūheu öi chuh el minë mīting, ngaich ngön min ayī-ö öi la-al nup töng sitih inkihtenre. Yěn hakihten hī min yip aṅ patī hī hēk ötlēḵken hī, sön min öi höng köp öi ngön. Ṙōlheuh ök Pôl nö ötlēḵkaṙen ngö ṙô tī pöri anga-aṅ nö kūich: “Ngam Mā Tēv [Yāvē] an hamòlṙen chu; öt pa-ekūö chin min.”—Heprāi 13:6.
Ngönlöre in min inrē yēḵ hī örheūheu ahangkö ngam tölöök inhānga. Inköptö hī angū-ö öi hayönglen re öi in Yāvē ngaich kēnyö ngam pinhë-ekūö tö tarik nö ṙa-ang ellōnre. (Inchōḵ-oṙô 29:25) Yēḵ hī töngamuh ngön öi ahangkö ngam tölöök inhānga ngaich öthō min ayī-ö öi ṙāngenre yěi sō-oiṙen tö vē mā mahayöng aṅ ing panam.—1 Tösalònikē 2:2.
3. Asuh öp min yanöölen hī yěi köp inup inkihtenre?
Öt hěng tak in hī töṙamlōn yěn hakihtuṙen, yěi höng köp pöri min pòrô nup inkihten hī ngaich ngönlöre min ngam ṙinātö-ellōn hī öi in Yāvē. Nö sitih inlahen? Pöi yěi ngö lōn min, töre ötkô öi la-al nup inkihtenre ngaich akahaiṙen min ayī-ö tö Yāvē nö ṙapken hī, ngaich angū-ö min lāinyngen hī röhta öi in ò. (Vë-evkūö Yāköp 1:2-4.) Yēḵ hī hakihtuṙen, haṙivlōn ang Yāvē nö meūkö u. Yěi höng köp pöri min im linöklōn ò pòrô öi kihngen ngaich ṙamlōn min anga-aṅ. Ngö ṙô an ngam Paipöl: “Yē yīö, kihngen töpòkūö e, [tölöök la-en] töhōḵovö an angū-ö nö im Tēv.” (1 Pītör 2:20) Yēḵ hī min höng köp inup inkihtenre, ngaich reushen hī min Yāvē tö ngam nômö, hē hī min ngaich örheūheu öi ha-ööinyö ò.—Mëtiv 24:13.
MIKAHTÖKŪÖRE HĒK
Yěi hakihtuṙen hēk ötlēḵkaṙen inrē tö tarik höng köp pöri öi im linöklōn Yāvē ngaich reushen hī min anga-aṅ. Nö sitih inlahen? Töi mikahtökūöre.
4. Öthō man öt mihôiṅ yěm hakihtuṙen tö yip aṅ ngam mikūönö meh
Yēḵ hī öi katöllö ngam linöklōn Yāvē, rīkre min yip aṅ ngam mikūönö hī töt ṙamlōn nö meuk inlahen hī öi löklōn ò. Akahakūö ang Yēsū tö u. Vë-evkūö Mëtiv 10:34-36, ngaich kakkö ngih intöönö yamih:
Yěn hěng tak öp tarik tö hòṅ kētöre nö löklōn Yāvē, ngaich mihôiṅ min yip rīkre aṅ patī ò nö sitih inlahen?
Yěm hòṅ mikahtökūöre ngaich kò-òren öm, röngnyöm VITIŌ, ngaich kakkö ngih intöönö yamih.
Yěn sōngen meh yip aṅ patī meh öm löklōn Yāvē, sitih inlahen öm min?
Vë-evkūö Salmai 27:10 hēk Mākös 10:29, 30. Unôichrit ṙô meh öm vë-ekūö në miröökö ngaich kakkö ngih intöönö yamih:
Yěn sōngen meh yip aṅ patī meh hēk yip hol meh inrē, ngaich sitih inlahen min ngih kinlēḵngô ngam Tēv nö hayööken meh?
5. Um ṙāngenre löklōn Yāvē pòrô öm hakihtuṙen
Yěn hakihten hī yip tarik, kô-en ayī-ö hòṅ hangönka yěi hòṅ iṙūöhen im linöklōn Yāvē. Röngnyöm VITIŌ, ngaich kakkö ngih intöönö yamih.
Asuh nup töngönlöre tī tö meh in në inchō elmat tö vënyu?
Vë-evkūö Inlahen 5:27-29 hēk Heprāi 10:24, 25. Unôichrit meh vë-ekūö në miröökö ngaich kakkö ngih intöönö yamih:
Yēḵ më mahayöng nö sōngen hī öi ahangkö ngam tölöök inhānga hēk chuh el minë mīting. Ngaich kūö yòh öi ötkô ṙāngenre öi löklōn Yāvē?
6. Kētö manööyö meh an min Yāvē
Ṙōl pumnāmö hēk ṙōlkangen ṙēḵti më Vamënyen Yāvē tö hakihtuṙen, sön cha-a nö öt ṙāngenre nö löklōn Yāvē. Asuh öp mahayööken cha? Yěm hòṅ mikahtökūöre, röngnyöm VITIŌ. ngaich kakkö ngih intöönö yamih.
Më prötör sistör tö hameuknyu nö el ngam vitiō kūö yòh aich nö mihôiṅ tö minë kinlaha re?
Vë-evkūö Rōma 8:35, 37-39 hēk Filipī 4:13. Unôichrit meh vë-ekūö në miröökö ngaich kakkö ngih intöönö yamih:
Sitih inlahen ön në miröökö nö ngönlöre tī tö meh öm la-al nup töng sitih kinlahare?
Vë-evkūö Mëtiv 5:10-12, ngaich kakkö ngih intöönö yamih:
Kūö yòh öm mihôiṅ höng ṙamlōn pòrô öm hakihtuṙen?
Lāku ṙôken yip tarik Vamënyen Yāvē tö mihôiṅ nö la-al minë inkihtenre. Mihôiṅ man më-eṅ inrē!
ṘÔ YIP TAHËNG: “Yěn yih min nup kanihngen chu ötkô chin tö lōnre min öich la-al u.”
Asuh öp min hameuktö meh miröökö yěm hòṅ hangönlö ngam ṙinātö-ellōn ò?
MINË HAKÖP HĪ NGAICH
Yēḵ hī öi hakihtuṙen, sön öi öt ṙāngenre öi löklōn Yāvē, ngaich öthō min Yāvē nö vaichngö tö u. Anga-aṅ min mahayööken hī öi la-al nup kanihngenre.
Sitih ṙô öm më-eṅ?
Yěn hakihtuṙen vē tökô-en Kristīön ngaich kūö yòh öi öt pingangkūö?
Hòṅ sitih inlahen öi yěi hòṅ höngkö nup yamih kanihngen?
Asuh öp löktö ṙinātö-ellōn meh, tö hī mihôiṅ höng köp öi löklōn Yāvē pòrô nup töng sitih inkihten hī?
NGËICHKÖ NË INRĒ
Hachēlhötvö ngam ṙālö prötör kūö ò nö öt hēngö kahë tö lā-are. El ngam vitiō anga-aṅ nö vë-eny inlahen inyööken re tö Yāvē nö la-al minë inkihtenre, pön öt hēngö kahë tö lā-are.
Sitih inlahen aich minā pamīhöre nöng iṙūöhen nö löklōn Yāvē pòrô minë inkihten cha nö marò-òten, asuh öp mahayööken cha? Töi mikahtökūöre.
Sitih inlahen öi hööngöre töngamuh, hòṅ hī min ngön öi la-al nup yamih kanihngen.
“Hööngöre Tö Nup Yamih Kanihngen” (Chūökamahati-HI, Chulāi 2019)
Hòṅ sitih mufē öm yěm hakihtuṙen tö yip aṅ patī re, sitih inlahen öm min la-al u?
“Öt Kumtö Kumchikṙen, ‘Ngam Kanô-en, Sanët Pöri’” (Chūökamahati-HI, Òktopör 2017)