Sitih Inlahen Ang Yāvē Nö Hayööken Hī Inu Töm Manööiyö?

1. Kūö yòh öi hòṅ īnu töm manööyö hēk achīöp mihôiṅ mahayööken hī öi īnu tö e? (1 Pītör 5:10)

PŌYEN nun minë kanihngen lā-al më tarik Yāvē el ngih manā-aṅ sakāmö, angū-ö ṙung lāinyngen cha nö hēṙu nö ötlööṙen nö īnu töm manööyö, rīkre më prötör hēk sistör hī tö īnu tö minë tökiröng invahre hēk rīkre më tö haṙivlōn tö kūö kinpahlöre tö holmaneukre. Ōtre inrē më prötör sistör hī tö hakihtuṙen hēk ötlēḵkaṙen tö më aṅ patīre hēk tö më tarik alaha ngam mahayöng. (Mët. 10:18, 36, 37) Pòrô pöri nö öp tö yòh kanihngen meh, mihôiṅ më-eṅ öm kirööngen ṙinātö-ellōn tö Yāvē nö mihôiṅ nö kētö kumlēḵ meh öm möi lā-al minë kanihngenre.—Vë-evkūö 1 Pītör 5:10.

2. Kūö yòh öi ayī-ö Kristīön īnu töm manööyö?

² Ngih ön manah ngam inlahen hī īnu töm manööyö, yēḵ hī pòrô öi kihngen, hakihtuṙen hēk halō-oikūö öi inup tötlöng lā-en, höng köp pöri ayī-ö öi in Yāvē, holtö ṙanamlōnre öi löklōn ò hēk meūkkö öp yamih inrē tövai maheūkköre. Hö-ö pöri ayī-ö kô öi kahngenre īnu töm manööyö pön höng Yāvē tö mihôiṅ nö hayööken hī īnu tö e. Mihôiṅ anga-aṅ nö kē-ěkūö hī töm ‘kumlēḵ’ ngam ‘tö mööḵlö tö kumlēḵ töng tarīka.’ (2 Kòr. 4:7) Mikahtökūöre in min in ngih ātiköl tö nup ihih tö fën tö halēnlöng tö Yāvē nö chö-önyten hī, minë mahayööken hī min öi īnu töm manööyö, mikahtökūöre inrē min ayī-ö tö nup yanöölenre öi lökten in u.

VINË-EKŪÖTĒV

3. Kūö yòh öi mihôiṅ ngöṙô tö ngam töhalēnlöng inlahen hī öi vë-ekūötēv, nö öt kūöṅnen angū-ö tö nup tö hameuknyu pinngangkūö?

³ Lōnu an Yāvē tö hī öi īnu tö ngam manööyö, lökten ò nö halēnlö ngam töt insā-av inlahen hī ayī-ö töthët tarīk öi mihôiṅ vë-ekūö ò. (Hep. 4:16) Kò-òren öi afītöre, mihôiṅ ayī-ö öp töng yòh ṙētak hēk öp töng yòh tòpik öi vë-ekūö Yāvē. Rö-ö nöng angū-ö, pöi mihôiṅ inrē öi öp töng yòh kamngö chūök hēk ṙōlkangen ëlô öi vë-ekūö ò, pön mihôiṅ anga-aṅ nö hang ṙô hī, pòrô öi höng hěngtak hēk yěi el chēl. (Yôna 2:1, 2; Inl. 16:25, 26) Yēḵ hī ṙung öi īnu tö minë pinṙūtölōnre ngaich öt akaha elmat ṙung ayī-ö töp ṙôre min öi vë-ekūö Yāvē, sön pöri anga-aṅ nö akahakūö töp ṙô ellōn hī. (Rōm. 8:26, 27) Kô-en takô ngih töhalēnlöng inlahen hī öi vë-ekūö Yāvē nö öt kūöṅnen angū-ö tö nup tö hameuknyu pinngangkūö!

4. Kūö yòh öi mihôiṅ ngöṙô tö hī yěi havëkö ngam manööyö in Yāvē ngaich hang ṙô hī min anga-aṅ?

⁴ Löktö in ngam Ṙô re ang Yāvē, nö kētö ṙinātö-ellōn hī, tö ò min nö hang nup ṙô hī yěi havëkö kūö ò nup tö sā kuilōn ò. (1 Yôh. 5:14) Mihôiṅ hòng ayī-ö öi havëkö inyöökenre öi in ò öi īnu töm manööyö? Heūṅ, mihôiṅ in pön tö sā kuilōn ò angū-ö. Kūö yòh mihôiṅ öi ngatī ṙô? Kūö hī yěi īnu töm manööyö öi lā-al minë kanihngenre, ngaich heuveū-eu ṙô min ang Yāvē nö sapṙô ngam Satān ngam tötlamëkö elnang ò. (Inch. 27:11) Rö-ö nöng angū-ö pön ngöṙô inrē ngam Paipöl tö Yāvē nö kapahare nö hòṅ hameuktö ngam ‘kumlēḵre nö in më tarik, më kumheūttö ellōnre nö in ò.’ (2 Kin. 16:9) Ṙatö-ellōnre mihôiṅ ayī-ö tö Yāvē min nö hayööken hī öi īnu töm manööyö, pön aṅhav in anga-aṅ tö kumlēḵre nö ngatī inlahen hēk hòṅ hayööken hī inrē anga-aṅ.—Isa. 30:18; 41:10; Lūk. 11:13.

5. Sitih inlahen öi teungen tö ngam lanāmö elkuilōnre yēḵ hī öi vë-ekūötēv? (Isayā 26:3)

⁵ Yē hī öi vë-ekūötēv öi vë-eny nup pinṙūtölōnre öi in Yāvē, ngaich sitih inlahen anga-aṅ? Ngöṙô an ngam Paipöl, ‘Ngaich ngam Tēv nö kē-ěkūö hī tö ngam lanāmö, ngam chamööḵngö nup taṙòkhöre mikah elmat nö laklen ngam ellōn yīö hēk ngam kumlēḵ mufē yīö.’ (Filip. 4:7) Afītöre yin, tö sitih manah öng ngih ṙô? Yēḵ vē tarik ing panam nö yīhi kanihngen, ngaich ṙōlkangen inlahen cha-a yēḵ cha nö hòṅ teūngen tö ngam lanāmö elkuilōn. Rīkre më in cha ma-ëksösāis ngam elkuilōnre pön hòṅ havaichngöre tö nup töng sitih mufē elkuilōnre hēk pinṙūtölōnre, höng kamëtö ṙētak ngam Satān pöri cha-a yěn ngatī inlahen nö yôkhötre nö elkuilōn cha. (Asātô e im Mëtiv 12:43-45.) Höng Yāvē pöri tö mihôiṅ nö kētö ngam tökô-en lanāmö nö in hī, ngam töt taneūngen hī yěi sā inlahen ngih panam öi mëtitēsön, yēḵ hī pöri vë-ekūö Yāvē öi vë-ekūötēv, ngaich mahameuktöre ayī-ö öi hayönglenre in ò hēk ‘kaheuk ṙētak anga-aṅ nö kē-ěkūö hī töm lanāmö.’ (Vë-evkūö Isayā 26:3.) Lökten ṙung ang Yāvē nö ṙōlheuh nö fēlen hī tö minë kanô-en minë haköp hī sin tö lā urěh öi lökten im ṙô. Löktö in në kanô-en ayī-ö öi ṙātö-ellōnre tö Yāvē nö kirööngen hanangenlōn tö hī hēk hòṅ hayööken hī inrē anga-aṅ. Ngaich möl min ngam elkuilōn hī hēk ellōn hī nö teūngen töm lanāmö.—Sal. 62:1, 2.

6. Sitih inlahen öm mihôiṅ yöölen lökten im vinë-ekūötēv? (Ngëichkö ngam nyat.)

⁶ Asuh öp mihôiṅ inlahen meh? Yēḵ meh öm lā-al öp tö hěng kanihngenre, ngaich vë-eny nang Yāvē më-eṅ tö ngam mufē elkuilonre. ‘Hakeunlö minë taṙòkhöre më-eṅ lumnganre öm in ò,’ ngaich havëkökūö ò tö ngam lanāmö. (Sal. 55:22) Rö-ö nöng angū-ö pöm havëkö ngam mikahre inrē öm lā-al ngam kanihngenre. (Inch. 2:10, 11) Um vaichngö öm kētö tëngs ò yěm vë-ekūö ò. (Filip. 4:6) Afītöre tö inlahen Yāvē, nö sitih inlahen nö kaheūk sakāmö nö hayööken meh īnu töm manööyö, ngaich kò-òren më-eṅ kētö tëngs ò tö kūö e. Kô-en man lā-al minë kanihngenre uh pöri ngaich öm yahlö mufē tö u öm öt ngëichkö minë taneūngenre inkòlô.—Sal. 16:5, 6.

ṘÔ NGAM TĒV

7. Sitih inlahen öi īnu tö ngam manööyö yēḵ hī öi vë-ekūö ngam Paipöl?

⁷ Hōten hī ang Yāvē öi holtö manööyöre lā-al minë kanihngenre. Töp lökten ò inrē nö kē-ěkūö hī tö ngam Paipöl. Pōyen nun minë miröökö imat ngam Paipöl mahayööken hī mihôiṅ öi ṙātö-ellōnre tö Yāvē nöng örheūheu nö in hī. Kò-òren öi chumkūöṙen tö ngih töhěng inchōḵelmat. Ngöṙô an ngam Mëtiv 6:8, “Akahakūö an ngam Yöng meh, tö nup kuilōn meh urēhěkūö ṙô meh öm havëken u.” Yēsū ök misī tö ṙô-òv tö ngih ṙô, ngaich höng anga-aṅ tö mööḵlö mikahkūö tö tinrīken Yāvē. Lökten mihôiṅ öi kirööngen ṙinatö-ellōn tö hī yěi el ṙētak kanihngen, ngaich akahakūö ang Yāvē tö nup tötṙanāngen kuilōn hī hēk ötlöktu inrē min anga-aṅ nö öt hayööken hī. Pōyen nun minë miröökö imat ngam Paipöl minë kamëtö kumlēḵ hī öi möi lā-al minë kanihngenre.—Sal. 94:19.

8. (a) Hachōḵ elmat hī nö sitih inlahen mihôiṅ minë inlēnö aṅmat ngam Paipöl, nö hayööken hī öi īnu töm manööyö? (b) Asūp mihôiṅ inlahen hī yěi hòṅ ilööṙen fē-ělre tö minë lökngörit chööngö aṅmat ngam Paipöl?

⁸ Kētu nun minë inlēnö hēk minë tövai lökngörit chööngö nö imat ngam Paipöl, minë mahayööken hī mihôiṅ möi lā-al minë kanihngenre. Yēḵ hī öi hāngö u ngaich īnu min ayī-ö tö ngam mikah hēk löngö kahë inrē tö fëslare. (Inch. 2:6, 7) Tö sā ṙēngen hī öi ṙūöhlöng alaha tö ngam Paipöl öi ui yahlö piṙūtka tö öp huṙöich, höng fēkö inlahen ngih töngamuh sakāmö pöri. (Mët. 6:34) Yēḵ hī min örheūheu ṙô haköp ngam Paipöl hēk afēkö nup haköpre inrē imat e, ngaich yēḵ hī min öi el kanihngen hēk yěi hòṅ kēḵ öp fëslare inrē ngaich ilööṙen min ayī-ö fē-ělre tö minë inlēnö aṅmat ngam Paipöl.

9. Yěi haköp minë inlahen tinrīken imat ngam Paipöl, ngaich sitih inlahen nö ṙūöhlöre ngam ṙinatö-ellōn hī tö Yāvē min nö hayööken hī?

⁹ Kētu nun inrē minë inlahen tinrīken yik tarik nö imat ngam Paipöl, yik mahayönglenre nö in Yāvē ngaich hayööken cha ang Yāvē. (Hep. 11:32-34; Yāk. 5:17) Yē hī öi haköp minë inlahen cha, ngaich ṙūöhlöre ngam ṙinatö-ellōn hī tö Yāvē nö chūök innyatlö hī hēk kumlēḵ hī, tö lööṙen inrē nö inyööken hī el ṙētak kanihngen.’ (Sal. 46:1) Yē hī öi afēkö inlahen yik tarik Yāvē nö sitih inlahen cha-a nö köptī töm ṙinatö-ellōnre hēk iṙūöhen nö löklōn Yāvē pòrô nö kihngen, ngaich ṙūöhlöre alaha ayī-ö öi asīnken cha.—Yāk. 5:10, 11.

10. Sitih inlahen öm mihôiṅ teūngen tö yanöölenre öm lökten im Ṙô ngam Tēv?

¹⁰ Asuh öp mihôiṅ inlahen meh? Örheūheu man vë-ekūö ngam Paipöl, hēk kuichngö nup miröökö nup chūök meh ngaich öm yöölen. Pōyen yin më prötör sistör tö teūngen ngaich tö yanöölenre kūö cha nö kaheuk sakāmö nö vë-ekūö ngam tēli tëks. Ngaich höng afēkö ngam ṙô e ngaich cha-a irôta ngam sakāmö. Chumkūöṙen tö ngih inlahen Möriā.a Ik sā ò nö akahalōn tö minā yöngre nö kënsör, ngaich asuh öp mahayööken ò? Ngöṙô anga-aṅ nö vë-eny inlahenre ik sā ò nö ṙömöng chumkūöken minā yöngre urēhěkūö kinpaha cha, “Örheūheu chū-ö el peuheū öich vë-ekūö ngam tēli tëks, ngaich afēkö minë ṙô e. Lökten ngaich öich öt yāha mufē tö minë kanihngenre hēk kanihngen ellōnre, höng fēkö inlahen Yāvē pöri chū-ö hēk fēkö minë tövai ṙô ò imat ngam Paipöl.”—Sal. 61:2.

MË KRISTĪÖN HOLMANEUK HĪ

11. Kūö yòh öi reuslöre alaha yěi hang inlahen më prötör hēk sistör re nö sā kanihngen hī?

¹¹ Kē-ěkūö hī an Yāvē tö më Kristīön holmaneuk hī, më mahayööken hī öi īnu töm manööyö. Reuslöre alahare in öi hang inlahen më ‘tö keuheūtngöre chūök holmaneuk hī ikūö ngih panam, nö sā hī nö lā-al minë kanihngenre.’ (1 Pīt. 5:9) Lökten ayī-ö mihôiṅ min öi la-al nup töng sitih kanihngenre. Köpölōn tö më holmaneuk hī nö holtö manööyöre nö lā-al minë kanihngenre, ngaich mihôiṅ inrē ayī-ö öi sā inlahen cha!—Inl. 14:22.

12. Sitih inlahen aich më prötör sistör nö hayööken hī, ngaich asuh mihôiṅ öp inlahen hī öi hayööken cha? (2 Kòrin 1:3, 4)

¹² Mihôiṅ yin më prötör sistör hī nö hareuskö alaha hī el ṙētak minë kanihngen hī. Chumkūöṙen tö inlahen ök tanīnöṙô ang Pôl. Ik sā ò hē e nö hachēli nö el ök töhěng patī, ngaich rīkre yik prötör mahareuskö alaha ò, hangönken ò hēk hateūngngö nuk hanāten ò inrē. Kirööngen ṙô ang Pôl nö ha-öiny minë tī më prötör nö hayööken ò, uroh anga-aṅ nö kēḵ minë-eny cha nö in minë kahūichre chitri, nö kētö tëngs cha. (Filip. 2:25, 29, 30; Kòl. 4:10, 11) Ngatī in inrē ayī-ö töngamuh yěi el ṙētak kanihngen, ngaich hareuskö alaha hī më prötör sistör hī hēk hayööken hī. Ngaich yēḵ cha nö el kanihngen, ngaich mihôiṅ ayī-ö inrē öi keuheūttö inlahenre öi holṙen cha.—Vë-evkūö 2 Kòrin 1:3, 4.

13. Asuh öp ihih mayööken sistör Mayā nö möi nö lā-al minë kanihngenre?

¹³ Teūngen takô ang sistör Mayā ngòh aṅ Rösiā tö inreuskö alahare nö löktö in më prötör sistör. Rötlö hē e anga-aṅ tö yik pulīs nöng yòkhötre nö el patī ò nö kiluh nö chöh nup chahöhre, ik samyeūheu tö 2020. Unôichngöre inrē ngam sistör nö kahòkkaṙen. Kūö yòh? Kūö ò nö vë-eny nang yip tahëng tö ngam ṙinatö-ellōnre. Ngöṙô an ngam sistör, “Īnu chu-ö hē e tö ngam ötkumlēḵ-enre, hē e pöri më prötör sistör nö kūichtö chitri chu, fūnken chu mësēchö chu inrē nö vë-eny nang chu töre nö kiröngen hanangenlōn tö chu. Akahakūö chin tö ngam tökiröngtī mikūönö hī kahëtö Yāvē el ngam kanô-en ngam tö hangenlon takô tö hī. Ik 2020 pöri chu-ö öich akahaiṙen tö më holmaneuk hī nö töt insā-av.”

14. Yěi lōnu tö më prötör sistör nö hayööken hī hē el ṙētak kanihngen, ngaich hòṅ asuh öp inlahen hī? (Ngëichkö ngam nyat.)

¹⁴ Asuh öp mihôiṅ inlahen meh? Haröhtöre man in më prötör sistör hē el ṙētak kanihngen. Um piyū-en öm kēḵ inyöökenre in më minṙöinylen. Pò më minṙöinylen nö ‘chūök innyatlö hī el kuföt hēk chanôchö panam inrē.’ (Isa. 32:2) Köplōn tö më holmaneuk hī nö sā hī inrē nö la-al minë kanihngenre. Lökten yēḵ meh min öm hayööken öp tö lōnu tö inyöökenre prötör hēk sistör, ngaich teūngen min më-eṅ tö ṙanamlōnre hēk heuveū inrē min öm lā-al nup kanihngenre.—Inl. 20:35.

MAHEŪKKÖ HĪ IP YAMIH ṘĒTAK

15. Asuh ök misī inlahen Yēsū tö kūö ò nö aṅhav in tö ngam maheūkköre, ngaich asūp inlahen hī ayī-ö tö kūö hī öi maheūṅkku? (Heprāi 12:2)

¹⁵ Kētö ngam töt insā-av maheūkkö hī ang Yāvē ip yamih min ṙētak, ngam lökten hī mihôiṅ öi möi lā-al minë kanihngenre. (Rōm. 15:13) Kò-òren öi afēkö ṙôken kanihngen Yēsū ik sā ò nö kapah. Īnu pöri anga-aṅ tö ngam maheūkköre töp lökten ò nö heuveū nö lā-al minë kanihngenre. (Vë-evkūö Heprāi 12:2.) Akahakūö anga-aṅ töre yěn köp min nö löklōn Yāvē, ngaich ma-ahetlö minë-eny ngam Yöngre min anga-aṅ hēk minyônyngö aṅ yip mahachōichngö ngam minë-eny ò inrē. Maheūkku anga-aṅ töre nö havanlöre min nö chuh in ngam yöngre nö el haliöngö hēk yih min ngam ṙētak ngaich holṙen yip kahëmre min anga-aṅ nö hayöng. Ngatī in inrē ayī-ö öi maheūkku töre min öi örheūheu aṅ ikūö öp tufömngöre panam, yēḵ hī öi afēkö ngih maheūkköre, ngaich heuveū-en min ayī-ö öi lā-al nup yamih kanihngenre öi el ngih panam ngam Satān.

16. Sitih inlahen ang ngòh sistör nö möi nö lā-al minë kanihngenre kūö ngam maheūkköre inlahen öp yamih ṙētak, ngaich asūp mihôiṅ haköplö hī lökten in minë ṙô ò?

¹⁶ Kò-òren öi chumkūöṙen tö inlahen sistör Alā ngòh aṅ Rösiā, nö sitih inlahen anga-aṅ nö yöölen nö lökten im maheūkköre inlahen öp tufömngöre min panam. Kē-ě hē e ngam pīhö ò tö yik pulīs nö chuh el chēl hanöng sā ò nö öl nö kahòkkaṙen. Ik sā në kanihngen ngam sistör hē e nö ṙònghöichṙen ngaich ngöṙô anga-aṅ, “Örheuheū ṙô chu-ö öich vë-ekūötēv öich kakkö ngam maheūkköre ip yamih ṙētak hēk afēkö inlahen e inrē. Angū-ö lāinyngen chu öich öt yaha miṙivlōn. Akahakūö chu-ö hē e tö minë kanihngen chu nöng töng rahëichtakūö. Höng Yāvē min tö minhôiṅyu ip manā-aṅ ngaich kē-ěkūö më tarikre min anga-aṅ tö raneushö.”

17. Sitih inlahen öi mihôiṅ hameuktöre milēḵṙen tö ngam kahëtö Yāvē maheūkkö hī? (Ngëichkö ngam nyat.)

¹⁷ Asuh öp mihôiṅ inlahen meh? Fēkö ngam kinlēḵngô Yāvē man inlahen öp töt insā-av min yamih ṙētak. Fēkenre man öm el öp tufömngöre panam öm in yip holre hēk in yip mikūönöre inrē, ṙòkhöre yī-ö öi ṙamölōn öi ikūö e. Yēḵ meh min öm ngatī inlahen öm fē-a, ngaich akahaiṙen min më-eṅ tö minë kanihngenre nö ‘töng rahëichyen hēk töng öt yahngen.’ (2 Kòr. 4:17) Rö-ö nöng angū-ö, pöm mihôiṅ öm vë-eny nang yip tahëng tö inlahen minë kinlēḵngô ngam Tēv. Afēkö inlahen vē tarik man mi-ikūö ngih panam ngam Satān, nö iṙôken kanihngen cha-a, ötrēhěn cha-a nö akahakūö tö ngam Tēv nö urěhangen tī nö halēnlö ngam tövai maheūkkö cha ip yamih ṙētak. Lökten man kò-òren öm vë-eny nang më tarik tö ngam maheūkköre, pī-a min cha-a nö lōnu töre nö hòṅ hēk nö mikahtökūöre tö inlahen e.

18. Kūö yòh öi mihôiṅ ṙatö-ellōnre tö Yāvē min nö hateūngngö minë kinlēḵngôre?

¹⁸ Pōyen nuk misī kanihngen Yōp, sön pöri anga-aṅ nö haköpngöre nö in Yāvē. Ngöṙô anga-aṅ nö in Yāvē: “Akahalōn chin tö meh tökô i tökeuheūttöre, öt tökô-òvö inrē nö asökngö öp chööḵnyö meh.” (Yōp 42:2) Akaha elmat ngaich hē e ang Yōp, nö öt hěngtak tökô nö asökngö inlahen Yāvē yěn hateungngö nup kuilōnre. Teūngen min inrē ayī-ö tö nganöönöre öi lā-al minë kanihngenre yěi köplōn tö e. Töi ngëichkö ngih töhěng inchōḵelmat, hěng tak ngam kikānö tö vāhavö. Pōyen ngaich yip chūök ò tòktör nö le-ënöre, sön pöri anga-aṅ nö öt lööken, angū-ö ngaich lāinyngen ò nö kalē-ě miṙivlōn. Teūngen pöri anga-aṅ töm töhěng tak tòktör ngam tö heuveū-en nö lë-en tövahav. Ilööṙen ngam tòktör nö akahakūö töm lāinyngen ngam invah ò hēk mikahtö elmat ò töp inlahen tīre min nö le-ënö ò. Höhlö nômö ngam kikānö nö hang ṙô ò hēk teūngen tö nganöönöre. Pòrô ngam invah ò nö öt tö ilööṙen nö lööken, maheūkku pöri anga-aṅ töre min nö öthō nö öt lööken. Lökten ò ngaich nö lööṙen nö lā-al ngam kanihngenre. Ngatī inlahen ayī-ö öi maheūkku tö Yāvē min nö ötlöktu nö öt hateungngö ngam kinlēḵngôre nö kētö ngam Peretāis, angū-ö ngih töngamuh lāinyngen hī mihôiṅ öi lā-al minë kanihngenre.

19. Hòṅ asuh öp inlahen hī yěi hòṅ īnu töm manööyö?

¹⁹ In ngih ātiköl in taheui öi haköp inlahen minë tö fën töhalēnlöng tö Yāvē, minë mahayööken hī öi la-al minë kanihngenre. Në nun taheūi, vinë-ekūötēv, ngam Ṙô ò Paipöl, më prötör sistör hī hēk tö ngam töt insā-av inrē maheūkkö hī ip yamih ṙētak. Yēḵ hī min kē yanöölenre in në tö halēnlöng, ngaich teūngen min ayī-ö töm nganöönöre hēk mihôiṅ inrē min öi lā-al nup töng sitih kanihngenre öi söl ip manāngen ngih panam ngam Satan.—Filip. 4:13.