Sitih Inlahen Öi Hayööken Cha Unôichrit Ngam Pinlāḵngen?

Ngaich nun töngamuh nö sīöplöre ṙôken minë tö faltöre pinlāḵngen. Lökten nö vai minë töhalēnlöng mineukṙen më prötör sistör hī yěn yih minë pinlāḵngen. Hòṅ hěngren inrē nup kuilōn hī yěi hòṅ kētöre öi in ngih la-en. Lökten yin më Yōm La-en nö halēnlö mineukṙen më tö pala-aiṙen nö el minë mupākö òfis.

Yěn akahalōn më prötör tö la-evṙen tö ngam, tö faltöre pinlāḵngen nö inup kamngö, ngaich ilööṙen cha-a nö vë-ekūö re tö më minṙöinylen tö inlahen nup inyööken më prötör sistör. Yěn kirööngen ngam pinlāngen ngaich öt heuveū-en më prötör sistör nö hayöngken re, ngaich halēnlö yip prötör tö heuveū-en min ngam mupākö òfis nö ngëichken cha. Ngaich cha-a min vē prötör tö mihôiṅ nö havëkö hamòlṙen re nö la-evṙen hēk kētö tōnēsön inrē hēk havah nup hanakten yip prötör sistör inrē nö kē-ěkūö cha.

Yēḵ më prötör sistör nö sā ṙô ngam söngkötön nö hayööken më holmaneukre, ngaich öt yaha yanëngen cha-a tö minë pësa hēk tö minë chehen inrē. Ngaich mihôiṅ min cha-a nöng hěng van nö kēken ngam la-en.

Më prötör tö halēnlöng tö ngam mupākö òfis acha-a min ngamëichkö ṙôken minë rupīö tö yūsö nö in ngam la-en hēk tö ṙôken më volöntīör tö la-evṙen. Mihôiṅ cha-a inrē nö vë-ekūö më òfisör nö im kamngö, nö hayööken cha nö veūten nö kēken ngam la-en. Lökten ui höng kahngenre öi hamūl pësa hēk söömngö minë chehen inrē. Yěm öt tölöṙô inrē öm chuh im kamngö chūök ngam pinlāḵngen ngaich um chuh in e.

Kô-en in hòṅ hayööken më holmaneukre hē el minë tö faltöre pinlāḵngen, pò hī öi hangenlōn tö cha. (Hep 13:16) Asuh öp tö hòṅ inlahen hī? Ngam töt ṙanāngen inlahen hī, mihôiṅ in öi höng vë-elkui më prötör sistör më tö la-evṙen nö ichūök ngam tö faltöre pinlāḵngen. Ngaich kētö tōnēsön inrē. Yūsö nun minë tōnēsön nö in minë töngatī la-en nö keuheūtngöre ikūö në taṙòkhöre panam. Më Yōm La-en yin kamë-ekūö ngam mupākö òfis nö ngëichkö ṙôken minë pësa tö hòṅ yūsö nö in minë la-en. Yēḵ yīö hòṅ lōnu töre öi volöntīör öi la-evṙen ngaich mihôiṅ fil ngam fôm Lōköl Tīsaën/Könströksön Volöntīör Ëplikēsön (DC-50).

NGËCHKÖ NGAM VITIŌ TÖKIRÖNG YANËNGEN TÖ KŪÖ ṘANÖÖINGÖ NÖ I PRASĪL, NGAICH KĒTÖ SANAPṘÔ NË INTÖÖNÖ:

Asūp lanökngöre ellōn meh tö inlahen më Vamënyen Yāvē nö kētöre nö hayööken më tö pala-aiṙen i Prasīl tö kūö ngam ṙanööinyö ik 2020?