Köplōn Öm?

Chumkūöṙen öm vahë haköpmat minë Chūökamahati el ngih samyeūheu? Ta-a töi ngëichken meh yěm heuveū-eu ṙô kētö sanapṙô në intöönö:

Asūp min yanöölen hī yěi kēnyö ṙētakre vë-ekūö Yāvē, hang minë ṙô ò hēk fēkö inlahen ò inrē?

Löng min nup atöllö hī, heuveū-en min haköptö tahëng, sīöp min ngam ṙinātö-ellōn hī hēk sīöp min ngam hanangenlōn hī tö Yāvē.—w22.01, pěch 30-31.

Kūö yòh töngamuh nö töt ṙanāngen ngam inlahen hī ṙātö-ellōnre in Yāvē hēk in më prötör mahachōḵ kūö hī inrē?

Kô-en nö töt ṙanāngen ngam inlahen hī töngamuh hòṅ hang minë inlēnö kahëtö më minṙöinylen ötkô inrē öi ngö mufē tö cha nöng lök inup lōnre. Yēḵ hī min ngatī inlahen ngaich hameuktöre min ayī-ö öi ṙatö-ellōnre tö minë la-en Yāvē. Yēḵ hī töngamuh hang nup inlēnö re, ngaich ngatī inlahen min ayī-ö öi hang minë inlēnö in öp yamih tökiröng kanihngen, pòrô min anū-ö nö öt ööilōn hī.—w22.02, pěch 4-6.

Hē ök maha-anga nö ngö ṙô, ‘Ṙamlōn min yip tarik yěn meuk ngam kinlah kūö panam nö eltī Sērūpapěl,’ tö sitih manah angū-ö? (Sak. 4:8-10)

In ngam tö meūkö më tarik nö ṙatö-ellōnre tö ngam tö vī-i min töhet chūök, pòrô angū-ö nö öt yaha vanānyö, sā lōn Yāvē pöri ngam vinī-i e ngaich ṙāmlōn Yāvē nö in e.—w22.03, pěch 16-17.

Sitih inlahen öi tövai inchōḵelmat öi i ṙinô-òv? (1 Tim. 4:12)

Haṙēmngenre hēk holtö minlēḵṙen re öi ṙô-òvö yěi ahangkö ngam tölöök inhānga, höltö ṙanamlōn re öi tikökṙôre hēk ui ṙāngö töhěng mīting öi kētö sanapṙô. Löktö in minë ṙô re öi hangönkö yip tahëng, ṙôtö nup tökô-en hēk ṙūöhngöre tö minë töng sitih ötlinëkô, ötkô inrē ayī-ö ṙônyö nup ṙô nup tö aṙē-ěvö tī tö yip hol hī.—w22.04, pěch 6-9.

Ngam töṙeūla tö vënyu im Inmeukhömat 13:1, 2, kūö yòh anū-ö nö sa mineūkö minë töṙeūla im Tanīěl tö 7 mirūlö?

Ngam töṙeūla tö vënyu inlahen im Inmeukhömat tö 13 mirūlö, hö-ö ön nö hameuktö ngam töhěng inyööngö, tö sā Rōm. Pön inmeuktö minë taṙòkhöre inyööngö ing panam.—w22.05, pěch 9.

Sitih inlahen öi hameuktö ngam ṙinatö-ellōnre tö Yāvē min nö öthō nö öt kahòklökui hī?

Yěn ōt yip töt lēkôre tö hī, mumṙivngölōn hēk tö fāluṙen inrē nö in hī, ngaich ötkô ayī-ö köptī tö ngam lanīnö re öi in cha, pöi hòṅ ṙāngen u nö eltī Yāvē. Pò-ò min nö halööktit u īnup yamih ṙētak.—w22.06, pěch 10-11.

Yēḵ ngam töhěng tak prötör nö töölô nö vë-ekūötēv, ngaich hòṅ asuh öp kanöplōn ò?

Yēḵ ò nö vë-ekūötēv, ngaich ötkô anga-aṅ nö kētö inlēnö yip prötör sistör hēk ötkô inrē nö kētö minkahtölōn nö in e. Möthë nö im ranehnyö ṙô ò nö vë-ekūötēv hòṅ chumkūöṙen anga-aṅ tö re nö ötkô nö ‘yaha ṙôken ṙô’. (Mët. 6:7)—w22.07, pěch 24-25.

Yip tarik töng iṙūöhen nö kēken minë “tötlöng la-en” tö ha-aṅlöng nö im kinṙôka, tö sitih manah öng angū-ö? (Yôh. 5:29)

Hö-ö ön nö töngö manah tö cha nö kētu sācha nö ha-aṅlöng nö asā nup la-en kahëken re inuk urěh, pön tö ngö manah angū-ö tö cha min yěn ha-aṅlöng ngaich ngëichkaṙen min cha-a nö inup la-enre yěn kô-en nö halööktit re. Ngaich möl min nö asā nup la-en nö kahòkkaṙen.—w22.09, pěch 18.

Asūp ṙinūöhlö alaha yip taṙòkhöre tarik tö tī prötör J. F. Rötörfōt ip töhěng könvensön ik Septempör 1922?

El ngam töhěng könvensön i Sītör Pòint, Ōhayō, Amerika ngam prötör nö pōitô nö ngöṙô: “Hayöng ngam Rācha! Ngaich tanīnöṙô më-eṅ. Lökten yin yēḵ ahangken e, ahangken e, ahangken ngam Rācha tö ngam Pūlngö ò inrē!”—w22.10, pěch 3-5.

In ngam Isayā tö 30 mirūlö, asuh nup i tö lūöi inlahen tī Yāvē nö hayööken hī lā-al minë kanihngen re?

Vënyu nang in öi in ngih mirūlö tö Yāvē nö (1) hang minë ṙô hī öi vë-ekūötēv ngaich sapṙô hī inrē, (2) hachōḵ el talöökö hī, hēk (3) Kētö inkòlô hī töngamuh hēk inup yamih inrē min ṙētak.—w22.11, pěch 9.

Kūö yòh öi mihôiṅ öi ngöṙô tö ngam tö kūichi im Salmai 37:10, 11, 29 nö ngaich nö teungtakūö īnuk urěh ṙētak hēk in öp yamih inrē min ṙētak?

Ngam inlahen tövai kahūich Tāvit nö ngatī inlahen inrē angū-ö nö in ngam panam Israel, möthë nö in ngam inyööngö Sôl. Ngaich ik sā Yēsū nö vë-eny nang yip tarik nö sitih inlahen yip tarik min mi-iyöng kūö öp tufömngöre min panam, ngaich hēk anga-aṅ nö havanyô e im tö 11 miröökö. (Mët. 5:5; Lūk. 23:43)—w22.12, pěch 8-10, 14.