Hatön Meh

Ngöṙô ang Tāvit nö in ngam līpöre Salmai 61:8 tö ò min nö “örheūheu” nö ha-öiny minë-eny ngam Tēv. Ngölōn hòng Tāvit töre min nö öthō nö kapah hēk hayahlö ṙô re hòng anga-aṅ nö ṙô-òv?

Hö-ö ön nö ngatī. Pön rö-ö ang Tāvit nöng kūich. Pön nup tö kūichi ngaich kô-en anū-ö nö löng.

Ngö kinūichngö ön im Salmai 61:8, “Ngaich örheūheu chū-ö min ha-öiny ngam minë-eny Meh: ngaich kaheuk sakāmö öich kētö nup kinlēḵngô re.” Ngöṙô tī ang Tāvit inrē nö kūich in ngam Salmai: “Ō Mā, Tēv chu, hòṅ ha-öinyö Meh chin, öich keuheūttö ellōnre: hapōilö ngam minë-eny Meh chin min örheūheu.” “Tēv chu, hapōilen Meh chin, Ō Rācha: hakôlò ngam mine-eny Meh chin örheūheu.”—Sal. 61:8; 86:12; 145:1, 2.

Ik sā ṙô tī Tāvit nö kūich tö ò nö “örheūheu” nö ha-öiny minë-eny ngam Tēv, ngaich hö-ö anga-aṅ nö ngö mufē töre min nö öt kapah. Kūö yòh öi mihôiṅ ngatī ṙô? Akahakūö ang Tāvit tö ṙô Yāvē tö hī öi kūö ngam tökööl öi kapah. Kôten inrē anga-aṅ nö kūich inlahen re töre nö köölö fālen, lökten nö akahakūö töre min nö öthō nö öt kapah. (Ran. 3:3, 17-19; Sal. 51:4, 5) Akahakūö inrē anga-aṅ tö yip töchiplö tarik nö ngaich nö kapah, tö hē Aprahām, Isak hēk Yāköp inrē. (Sal. 37:25; 39:4) Lökten anga-aṅ ik sā ò nö ngöṙô “örheūheu” chin min ha-öiny ngam minë-eny ngam Tēv, ngaich inlahen ṙô ò töre nö hòṅ örheūheu nö ha-öiny ngam Tēv nö söl kinpaha re.—2 Sa. 7:12.

Pōyen nuk kahūich Tāvit in ngam Salmai inlahen tinrīkngen ò. Akahakūö min ayī-ö yěi haköp ngam Salmai tö 18, 51, hēk tö 52 mirūlö inrē. Yěi ngëichkö ṙô ngam Salmai tö 23 mirūlö, ngöṙô ang Tāvit nö in e, tö Yāvē nö töhěng tak nö yōm sīṅp nö hachō kūö yip tarik re nö lök im tökô-en talöökö, kētö hanöhlö cha hēk lamaklen cha inrē. Ngatī ök inrē Tāvit nö töhěng tak nö yōm sīṅp, lökten anga-aṅ nö meuk inlahen Yāvē nö sitih inlahen nö chumkūöken nup sīṅp re. Lökten ang Tāvit nö ‘söl kinpaha re’ nö ha-öiny ök tö ngatī inlahen Tēv.—Sal. 23:6.

Köpölōn inrē tö ngam kahūich Tāvit līpöre Salmai nö tö uhômhötvö tö ngam Tēv kūichi inrē nup tö eūka nö in e. Tö sā hī yěi haköp ngam Salmai 110, ngöṙô tī ang Tāvit nö kūich, yih min öp töhěng ṙētak yēḵ öp Mā chu min nö ‘lāhāmö ngam Tēv min nö ūichngöre’ ngaich kētu minā-a inrē. Ngö kinūichngö ön inrē tö ngam mā nö mihôiṅ tö yip lā-al re, ngaich ‘akah fālen min nö i vē pumnāmö tarik.’ Höng inlahen Kristū ön ngih nö eūka ngam lamöknyö in Tāvit min. Hayöng min anga-aṅ nö el halīöngö hēk ‘kūönṙô inrē nö örheūheu.’ (Sal. 110:1-6) Ik sā Yēsū nö ing panam ngaich vënyö ṙô ngam tö kūichi anga-aṅ im Salmai 110 tö minë tö eūka inlahen ò nö öthō min nö öt teung ip yamih ṙētak.—Mët. 22:41-45.

Rö-ö ang Tāvit nöng kūich inlahen nuk ṙētak re pön kūich inlahen nup yamih ṙētak inrē, yēḵ ò min nö ha-aṅlöng ngaich “örheūheu” min nga-aṅ nö ha-öinyö Yāvē. Lökten öi mihôiṅ öi ngöṙô in ngam Salmai 37:10, 11, 29 tö u ngaich nö teung inuk urěh ṙētak hēk ip yamih inrē min ṙētak. Ngatī inlahen anū-ö nö in nuk ṙētak yik Israel nö sā ṙô ngih miröökö hēk yěn hateungngö ngam kinlēḵngôre min ang Yāvē ngaich keuheūtngöre chūök min angū-ö nö ikūö ngih panam—Mihôiṅ öm haköp ngam ātiköl in ngih Chūökamahati nagm tö ngö kui “Tötaheui Man Min Hol Chu El Peretāis” im përa 8.

Yěi chumkūöṙen tö ngam tö kūichi im Salmai 61:8 nöng rö-ö anū-ö nö tö hayahlöng nö ṙô. In ngih miröökö hēk in minë tahěng inrē miröökö ang Tāvit nö ngö ṙô, “örheūheu” chin ha-öinyö Yāvē tö ngö manah ngam ṙô ò tö ò nö söl kinpaha re nö hòṅ ha-öinyö Yāvē. Ngaich kô-en min angū-ö ip yamih ṙētak nö örheūheu min anga-aṅ nö ha-öinyö Yāvē yēḵ ò min nö ha-aṅlöng nö ikūö öp tufömngöre panam.