TÖHAKÖÖPÖ ĀTIKÖL 10
TINKÖÖKÖ 31 Chöl Yah Kē Sāt!
Asīnkö Mufē Nā Yāvē Nā Yēsū
‘Pò Kristū nö ngaich nö kihngen nö im alaha, ngatī yin yē yī-ö öi asīnkö mufē ò öi hīnöre.‘—1 PĪT. 4:1.
ASUH ÖP MIN HAKÖP HĪ?
Asuh nup haköp Pītör nö lökten in ngam mufē Yēsū, ngaich asuh mihôiṅ inrē öp haköplö hī öi in e.
1-2. (a) Asuh öp manah ngam inlahen hī yěi hangenlōn tö Yāvē? (b) Sitih inlahen ök misī Yēsū nö hameuktöre nö keuheūttö elkuilōnre nö hangenlōn tö Yāvē?
HALÖÖKNYÖ ṙôre misī ang Yēsū nö vënyen ngam tökiröng chööngö nö in minë chööngö Môsös. Ngö ṙô anga-aṅ, “Hangenlōn man tö ngam Tēv re Yāvē, öm keuheūttö ellōnre, keuheūttö nômöre hēk keuheūttö elkuilōnre hēk keuheūttö kumlēḵre inrē öm hangenlōn tö ò.” (Māk. 12:30) Chumkūöṙen tö ngam inlahen hī öi hòṅ keuheūttö ellōnre öi hangenlōn tö Yāvē, tö ngö manah tö hī öi hòṅ ellōnuvö hēk hòṅ kuyulōn inrē töre öi hangenlōn tö ò. Hòṅ keuheūttö nômöre ayī-ö öi ha-öinyö ò ngaich hòṅ keuheūttö kumlēḵre öi löklōn ò. Hòṅ keuheūttö ngam elkuilōnre pöri inrē ayī-ö öi hangenlōn tö Yāvē. Ngam tö ngö manah, nup mufē hī i alaha nup inlahngen ngaich in u ayī-ö öi hameuktöre öi hangenlōn tö Yāvē. Kô-en in ayī-ö tarik öi ötkô öi keukeūttlöre mikah elmat tö ngam mufē Yāvē. Yēḵ hī pöri min öi mikahtökūöre tö ngam ‘mufē Kristū’, ngaich möl min ayī-ö öi akahakūö töm mufē ngam Tēv. Ṙën angū-ö nö ngatī, kūö Yēsū nö sā mufē ngam Yöngre.—1 Kòr. 2:16.
2 Keuheūttö elkuilōnre ang Yēsū misī nö hangenlōn tö Yāvē. Akahakūö misī anga-aṅ tö ngam kuilōn Yāvē nö in ò, ngaich uroh anga-aṅ nö hakihtenre kūöre nö hòṅ hateungngen e. Hīnöre misī inrē anga-aṅ nö hakihtuṙen tö kūö e. Höng chumkūöṙen anga-aṅ nö im inteungngö kuilōn ngam Yöngre, öt halöngtenre anga-aṅ nö lō-ongkūö nö in nup tahëng chehen.
3. Asūp haköplö Pītör nö lökten in Yēsū, ngaich asuh inrē öp ṙô ò nö ṙūöhlö alaha yik tahëng Kristīön? (1 Pītör 4:1)
3 Teūngen misī ang Pītör hēk tö yik tahëng tanīnöṙô tö tövai ṙētakre nö hanôlö Yēsū, teūngen inrē cha-a tö haköplöre nö löktö im inlahen ngam mufē Yēsū. Ik sā Pītör nö halönyka ellōn tö ngam töhet kumlēḵ nö kūich ök raneh chitri, ngaich in e anga-aṅ nö ṙūöhlö alaha yik Kristīön nö asīnkö ngam mufē Kristū nö hīnöre. (Vë-evkūö 1 Pītör 4:1.) Ngam ṙô “Hīnöre yin” tö translētö nö im ëlô Krīk, ngaich yūsö ṙung angū-ö yěi kakkö inlahen öp kumyung, öp hamīnöre nö keunlöre tö nup aṅhtīre nö kiyung ngaich kiröönngöre nö chuh im kinyūngö. Lökten yē ngòh töhěng tak Kristīön min nö asīnkö mufē Yēsū, ngaich sā kameunlöre min anga-aṅ tö minë aṅhtī kumyung nö la-al ngam tökööl hēk la-al ngam Satān inrē ngam rācha ngih panam.—2 Kòr. 10:3-5; Efi. 6:12.
4. Asuh öp min haköp hī in ngih ātiköl?
4 In ngih ātiköl in min öi chumkūöṙen tö inlahen ngam mufē Yēsū hēk ngëichkö öp haköplöre inrē min öi löktö in e. Mikahtökūöre inrē min ayī-ö tö hī: (1) sitih inlahen mihôiṅ asīnkö mufē Yāvē, hòṅ hī ṙòkhöre öi hēngö mufē, (2) sitih inlahen öi īnu töm inyāichngö, ngaich (3) sitih inlahen öi mihôiṅ öi hayönglenre in Yāvē öi havai ngam mufēre?
ASĪNKÖ MUFĒ YĀVĒ
5. Sitih inlahen ök Pītör nö öt teungten nö asīnkö ngam mufē Yāvē?
5 Ta a töi chumkūöṙen tö inlahen Pītör nö sitih inlahen anga-aṅ nö hěngheuh nö öt teungten nö asīnkö mufē Yāvē. Vë-eny nang yik tanīnöṙô misī ang Yēsū tö ò min nö chuh Yērūsalem, ngaich in e min anga-aṅ nö ṙōlkangen ötlinëken nö eltī yip mā mākūö kūönṙô, in e inrē min anga-aṅ nö fëli. (Mët. 16:21) Kihngen lohten ang Pītör nö ṙātö-ellōnre tö Yāvē min nöng hökkngen ò nö kapah, pön akahakūö hē e anga-aṅ tö Yēsū nö tökilē-ěyö nö Mesayā nö ṙamānyen më tarik ngam Tēv min. (Mët. 16:16) Lökten ngaich ang Pītör nö tūökngökël Yēsū nö harēvngö chūökre nö vëken ò nö ngöṙô: “Mā uh man ngatī ṙô tö inlahenre; ötkô takô man min më-eṅ öm ngatī ötlinëken.” (Mët. 16:22) Angū-ö ngih ṙētak Pītör nö öt sāḵta mufē nö in Yāvē, lökten ang Yēsū nö öt hō-en minë ṙô ò.
6. Sitih inlahen ang Yēsū nö hameuktöre nö asīnkö mufē Yāvē?
6 Sā mufē ngam Yöngre pöri ang Yēsū. Töp lökten ò nö ngö ṙô nö in Pītör: “Më-eṅ Satān, kiröönngöre man umu-a marôvat tö chu! Më-eṅ man lökngen fanukngö chu, pò ngam mufē meh nö öt sāḵta nö im mufē ngam Tēv, pò meh höng sā mufē tarik.” (Mët. 16:23) Vaiyö mufē lohten ang Pītör nö ngatī ṙô nö in Yēsū, hö-ö pöri ang Yēsū nö hō-en ngam ṙô ò. Pòn akahakūö misī anga-aṅ töre nö hòṅ hateungngö kūilōn Yāvē nö hòṅ kihngen hēk hòṅ kēngö nômöre inrē. Teūngen ang Pītör tö ngam tökiröng haköpre nö lökten in ngih inlahen tö ò nö hòṅ vī ngam mufēre nö hòṅ sā mufē ngam Tēv. Haköplu in inrē ayī-ö löktö in e!
7. Sitih inlahen ök Pītör nö unôichngöre nö hameuktre nö hòṅ asīnkö mufē Yāvē? (Ngëichkö ngam nyat.)
7 Unôichngöre pöri ngaich ang Pītör nö hameuktöre nö asīnkö mufē Yāvē. Kò-òren öi chumkūöṙen tö inlahen Yāvē ik sā ò nö kētö ṙētak yik töt tunyīnyi tahëng mihëṙö nö haköp ngam kanô-en. Ngaich tīni ang Pītör nö ahangköm tölöök inhānga nö chuh in Kòrnēli ök tahëng mihëṙö. Anga-aṅ ön ngòh raneh tahëng mihëṙö tö teūngen tö ngam kanô-en. Hö-ö pöri misī më Yahūti nö vamë-ekūö më tahëng mihëṙö, lökten ang Pītör nö hòṅ haṙīngö ngam mufēre urěhēkūö ò nö vë-ekūö Kòrnēli. Lökten ik sā ò nö akahakūö töm kuilōn Yāvē nö in më tahëng mihëṙö, ngaich haṙīngö ngam mufēre ngaich anga-aṅ. Lökten ik sā Kòrnēli nö havëten ò nö chuh patīre, ngaich ‘öt piyū-en’ anga-aṅ nö chuh in e. (Inl. 10:28, 29) Vë-eny nang Kòrnēli hēk tö yip aṅpatī ò anga-aṅ tö ngam tölöök inhānga ngaich kē ngam vinôkö ngaich cha-a.—Inl. 10:21-23, 34, 35, 44-48.
Chuh patī Kòrnēli ang Pītör (Ngëichköm perekrāf 7)
8. Sitih inlahen öi mihôiṅ öi hameuktöre öi asīnkö mufē Yāvē? (1 Pītör 3:8)
8 Unôichrit tö ṙōl samyeūheu ang Pītör nö ṙūöhlö alaha më Kristīön tö cha nö hòṅ ‘hēngö mufē.’ (Vë-evkūö 1 Pītör 3:8.) Mihôiṅ in ayī-ö Kristīön öi hēngö mufē, yē hī öi asīnkö ngam mufē Yāvē minë tö vënyu nö imat ngam Paipöl. Yěi ngëichkö ngih inchōḵelmat, ṙūöhlö alaha hī ang Yēsū öi urěhlö ngam Pūlngö ngam Tēv. (Mët. 6:33) Lohten min öp töhěng tak prötör hēk sistör nö afītöre tö ngih ṙô, ngaich keuheūttö ṙētakre nö löklōn ngam Tēv. Chumkūöṙen min ayī-ö yěi vë-ekūö cha öi ui ṙônyö nup ṙô nup tö mihôiṅ min nö kūönngöre ellōn tī tö cha nö löklōn ngam Tēv, hareuskö alaha cha pöri min ayī-ö hēk hayööken cha inrē.
KÖP IM INYĀICHNGÖ
9-10. Sitih inlahen ang Yēsū nö hameuktöre nö īnu töm inyāichngö?
9 Haköpten Pītör ang Yēsū ik hatööm urěhēkūö kinpahare hēk haköpten yik tahëng inrē tanīnöṙô tö cha nö hòṅ īnu töm inyāichngö. Hòṅ ma-angkūöre hē e ang Yēsū nö nya ngam paska nö holkūö më haköptöre. Lökten ò nö tīnngen Pītör hēk Yôhan nö halēnkö chūök cha nö nyā-aṅ e. Öt löktu lohten inrē cha-a nö öt halēnkö töhěng chūök mak hēk tuhal inrē. Pön inlahen yik mā misī angū-ö yēḵ cha nö havëten yip tahëng holre nö chuh patī cha nö nyā, ngaich söich kunröön cha min cha-a urěhēkūö cha nö nyā. Achīö pöri ngaich öp i hē e tö ngatī inlahen nö hayāichngöre nö la-enten e angū-ö ngih la-en?
10 Choholre ngaich ang Yēsū nö söichröön yik haköptöre. Ngaich ṙāḵtö ök kinṙum alahare anga-aṅ, kē ök tuhal ngaich nyëklen e nö i ṙatre. Unôichrit e ngaich anga-aṅ nö asëlö mak nö el ök chūök mak ngaich söichröön yik haköptöre. (Yôh. 13:4, 5) Lohten ang Yēsū nö vai rò-òten inlahen nö söichröön yik tö 12 tak haköptöre. Hěng tak an ngam tö Yūta minënyi in më haköptö Yēsū, ngam mahachīlö Yēsū nö kēngen ò. Kô-en nö töt insā-av ngam inlahen Yēsū nö hameuktö ngam inyāichngö! Lohten më tanīnöṙô nö pingangkūö nö meuk ngam inlahen Yēsū, pön höng yik mahalanṙen misī tö la-evṙen tö ngih la-en sinöchröön. Hē Yēsū ngaich nö keuheūten nö söichröön yik haköptöre ngaich ngö ṙô anga-aṅ nö in cha, “Akaha elmat öi tö ngih inlahen Chu öich in yīö? Ngö ṙô yin öi havëken chu ‘Mahaköphöti’ hēk ‘Mā,’ ngaich kô-en yī-ö öi lööngö ṙô, pò Chu öich ngatī. Lökten yēḵ Chu chū-ö pòrô öich Mā hēk Mahaköphöti, öich söichröön yīö ngaich hòṅ ngatī inlahen yī-ö öi söichröön höö.”—Yôh. 13:12-14.
Ngam mufē ngòh tarik an mihôiṅ inrē mahameukten ò nö im inyāichngö
11. Sitih inlahen ök Pītör nö hameuktöre nö ngaich nö aṅhav in töm inyāichngö? (1 Pītör 5:5) (Ngëichkö ngam nyat.)
11 Teūngen ang Pītör nö haköplu nö lökten im inlahen Yēsū nö īnu töm inyāichngö. Unôichrit inlahen Yēsū nö yônlö nö el halīöngö, ngaich halanken ök töhěng tak tarik ang Pītör ök lamöktökūö nyinī-öre nö lum. (Inl. 1:8, 9; 3:2, 6-8) Ik sā yik lachīrö Pītör nö meuk ngam hameuktö ò pinngangkūö, yihtöre ngaich cha-a nö chu in ò. (Inl. 3:11) Lohten cha-a hē e nö eū an. Asuh pöri ök inlahen Pītör? Hö-ö ök misī Pītör nö tö sā inlahen yik Yahūti in nuk ṙētakre nö tö hòṅ kiröngö minë-eny hēk kiröngö minā-a, kiröngö kamngö inrē, pön tö aṅhav in misī anga-aṅ töm inyāichngö. Lökten ik sā yik tarik nö eū nuk la-en ò ngaich höng kēten u anga-aṅ nö nöönyö nā Yāvē nā Yēsū. Lökten anga-aṅ nö ngö ṙô, ‘Ṙātö-ellōnre in ayī-ö öi im minënyö Yēsū ngaich lökten in e inrē ngòh tarik nö lööken töm invahre, ngòh maheuk yīö, ngòh mikahkūö yīö inrē.’ (Inl. 3:12-16) Ik sā Pītör inrē nö kūichtö chitri yik Kristīön ngaich tölṙô cha anga-aṅ nö hayutlöre tö ngam inyut inyāichngö. Yē hī öi hang ngih ṙô ò ngaich fē-ělre ayī-ö tök inlahen Yēsū ik sā ò nö söichröön yik haköptöre.—Vë-evkūö 1 Pītör 5:5.
Īnu misī ang Pītör töm inyāichngö lökten ò nö kēten nup ineū-eure nö hameuktö pinngangkūö nöng nöönyö nā Yāvē nā Yēsū. Yē hī min inrē ayī-ö öi īnu töm inyāichngö, ngaich rö-ö min ayī-ö öi höng hòṅ eū-eu tö yip tahëng lökten öi hayööken cha hēk rö-ö inrē nö kūö hī hòṅ teūngen tö raneushö, kūö hī pöri öi hangenlōn tö cha (Ngëichkö minë perekrāf 11-12)
12. Asūp mihôiṅ inlahen hī yěi hòṅ asīnkö inlahen Pītör öi köp öi im inyāichngö?
12 Mihôiṅ in inrē ayī-ö öi asīnken Pītör öi īnu töm inyāichngö. Mihôiṅ in öi höng lökten in nup ṙô ngòh töhěng tak tarik öi akahakūö tö ò yěn tö īnu anga-aṅ töm inyāichngö hēk tö hö-ö. Ngam tö yūsö pöri ṙô tö Pītör nö kakkö ngam inyāichngö, ngaich lökten in e ayī-ö öi akahakūö tö ngam mufē ngòh tarik nö angū-ö mihôiṅ mahameukten ò nö īnu töm inyāichngö. Tö sā ò nö sitih mufē tö inlahenre hēk sitih mufē tö inlahen yip tahëng. Ṙën in ayī-ö ṙung öi hayööken yip holre, pò hī hangenlōn tö Yāvē hēk hangenlōn inrē tö cha, rö-ö nö kūö hī hòṅ eū eu. Yē hī min öi holtö ṙanamlōnre öi löklōn Yāvē hēk hayööken më prötör sistör re inrē pòrô nö öt mameūku minë la-en hī ngaich mahameuktre min ayī-ö öi tö īnu töm inyāichngö.—Mët. 6:1-4.
VĪ NGAM “TÖVAI MUFĒRE”
13. Mikahtö elmat hī tö manah ngam inlahen hī yěi “havai ngam mufēre”.
13 Asuh öp manah ngam inlahen hī yěi “havai ngam mufēre”? (1 Pīt. 4:7) Yē ngòh töhěng tak Kristīön nö havai ngam mufēre, ngaich yē ò min nö kē nup fëslare ngaich urěh min anga-aṅ nö ngëichkö ngam mufē Yāvē nö i alaha ngam kahë ò fësla. Möḵlö mat anga-aṅ tö ngam innôlöre in Yāvē. Öthō inrē min anga-aṅ nö ngö mufē tö inlahenre nöng anga-aṅ tö keuheūtlöre mikahkūö tö nup töng sitih. Örheūheu pöri anga-aṅ nö hayönglenre nö in Yāvē hēk havëkö inyöökenre inrē nö in ò nö vë-ekūötēv.
14. Sitih inlahen ök Pītör nö hěngheuh nö öt teungten nö hayönglenre nö in Yāvē?
14 Halēn yik haköptöre ang Yēsū ik töhěng hatööm urěhēkūö kinpahare nö ngö ṙô, “Kūöṅnngöre an min ngam ṙinatö-ellōn yīö, yēḵ yīö min öi meuk ötlinëken chu ing hatööm.” Holtö ṙinātö-ellōnre pöri ang Pītör nö ngö ṙô nö in ò, “Pòrô min vē hol chu nö kūönngöre ṙinatö-ellōn nö in meh, öthō pöri min ngam ṙinatö-ellōn chu nö kūönngöre nö in meh!” Im hē e hēk angū-ö hatööm ang Yēsū nö ngö ṙô nö in yik rīkre haköptöre, “Aṅhaṅti yin lökten, vë-ekūötēv inrē.” (Mët. 26:31, 33, 41) Yē Pītör öre nö hang ngih inlēnöre kahëtö Yēsū, ngaich ötlöktu öre anga-aṅ nö öt holtö nganöönöre nö vë-enyre nö mahaköp nö in Yēsū. Hö-ö pöri ang Pītör pön mahngen ngam mahaköptöre, lökten ò ngaich nö unôichngöre nö haṙivlōn takô.—Mët. 26:69-75.
15. Sitih inlahen ök Yēsū nö havai ngam mufēre ik hatööm urěhēkūö kinpahare?
15 Örheūheu misī ang Yēsū nö hayönglenre nö in Yāvē. Pòrô anga-aṅ nö töhet sön pöri nö ṙōlheuh ṙô nö vë-ekūö Yāvē ik hatööm urěhēkūö kinpahare. Angū-ö ngih lāinyngen ò nö teūngen tö nganöönöre nö teungten nö hateungngö kūilōn ngam Yöngre. (Mët. 26:39, 42, 44; Yôh. 18:4, 5) Lohten ök Pītör nö chumkūöṙen tö ngih inlahen ò nö sitih inlahen nö öt ṙākenre nö im vinë-ekūötēv ngaich öt vaichngö inrē lohten anga-aṅ tö e.
16. Sitih inlahen ang Pītör nö hameuktöre nö ngaich nö havai ngam mufēre? (1 Pītör 4:7)
16 Sā inlahen ngam ṙētak, ngatī inlahen ang Pītör nö öt ṙākenre nö vë-ekūö Yāvē nö vë-ekūötēv, hayönglenre inrē nö in ò. Kētö ṙinātö-ellōn Pītör ang Yēsū hēk tö yik tahëng tanīnöṙô unôichrit ò nö hachohlöng tö ò min nö kē-ěkūö cha töm töhet kumlēḵ, hòṅ cha min nö teungten nö ahangkö ngam tölöök inhānga. Ngö ṙô pöri inrē ang Yēsū nö in cha tö cha sin nö hòṅ hööka nö i Yērūsalem. (Lūk. 24:49; Inl. 1:4, 5) Asuh pöri hē e ök inlahen Pītör ik sā cha nö hööka? Öt ṙākenre ang Pītör hēk tö yik tahëng mahaköp nö ‘vë-ekūötēv.’ (Inl. 1:13, 14) Unôichngöre hēk ang Pītör nö kūich ngam raněh chitri nö ṙūöhlö alaha yik Kristīön nö hòṅ havai ngam mufēre, ngaich un ṙākenre nö im vinë-ekūötēv, hayönglenre inrē nö in Yāvē. (Vë-evkūö 1 Pītör 4:7.) Löktö in në tö vënyu ayī-ö öi akahakūö tö Pītör nö hayönglenre nö in Yāvē hēk töngön inrē ngaich anga-aṅ hē e nö machöḵlö ngam māṅ.—Kal. 2:9.
17. Yē hī pòrô öi tö aṅhav in tö heuneū-enre, ngaich sön pöri nö hòṅ asuh öp inlahen hī? (Ngëichkö ngam nyat.)
17 Yē hī öi hòṅ havai ngam mufēre, ngaich hòṅ örheūheu ṙô ayī-ö öi vë-ekūö Yāvē. Pòrô ayī-ö öi tö aṅhav in tö heuneū-enre, ngaich sön öi höng hòṅ hayönglenre öi in Yāvē. Yěi pòrô inrē öi kē nup tökiröng fëslare ngaich hòṅ hē e inrē ayī-ö öi kalē-ě ṙô öi vë-ekūö Yāvē ngaich havëkö inyöökenre öi in ò. Hòṅ ṙātö-ellōnre inrē ayī-ö tö ò nö akahakūö töp chūök hī min öi yöölen.
Hayönglenre ang Pītör nö in Yāvē ngaich örheūheu nö vë-ekūö ò nö vë-ekūötēv. Yē hī inrē ayī-ö öi hòṅ kē nup tökiröng fëslare, ngaich hòṅ havëkökūö Yāvē ayī-ö tö inyöökenre, ngatī inlahen min ayī-ö öi havai ngam mufēre (Ngëichköm perekrāf 17)a
18. Hòṅ asuh öp inlahen hī yěi hòṅ asīnkö ngam mufē Yāvē?
18 Kiröngen ṙô in öi ha-öinyö Yāvē kūö ngam inlahen tī ò nö vīlen hī öi mihôiṅ öi hameuktö minë tinrīken ò. (Ran. 1:26) Kô-en in ayī-ö tarik öi ötkô öi asīnken Yāvē. (Isa. 55:9) Mihôiṅ pöri ayī-ö öi sā inlahen Pītör öi ma-ainyre öi asīnkö mufē Yāvē. Ta-a chěi töi örheūheu asīnkö mufē Yāvē, hayāichngöre inrē ngaich örheūheu öi havai ngam mufēre.
TINKÖÖKÖ 30 Yöhōva, Mëra Pörmēsvör, Pitā Ôr Tōs
a VAMË-ENY INLAHEN NGAM : Ellōnre ṙô nö vë-ekūötēv ngam sistör urěhēkūö ò nö kētö ngam intötvivre.