Iṙūöhen Lök Im Ṙinatö-ellōn

1. Kūö yòh ök hē e Pôl nö ṙamlōn pòrô nö röhta finëlngö?

RÖHTA hē e ngam finëlngö ök tanīnöṙô ang Pôl, höng ṙamlōn pöri anga-aṅ pò ò nö pōyen kahëken tö tövai la-en. Ngöṙô anga-aṅ, ‘Sölngö röön chin ngaich fal, köptī chin tö ngam ṙinatö-ellōn.’ (2 Tim. 4:6-8) Vai ngam fësla Pôl nö kētöre nö löklōn Yāvē. Ṙinatu-ellōn hē e anga-aṅ tö Yāvē nö ṙamlōn nö in ngam fësla kahë ò. Ngatī in ayī-ö inrē lōnu töre öi löngö kahë tö fëslare, hòṅ Yāvē nö ṙamölōn nö in hī. Sitih inlahen pöri ayī-ö?

2. Tö sitih manah öng ngam inlahen hī lök im ṙinatö-ellōn?

² Ngöṙô ang Pôl nö vënyö inlahenre hēk vënyö inlahen yik tö chiplö inrē Kristīön, ‘Pò hī öi lök im ṙinatö-ellōn, öt lök in minë tö meūkö chehen.’ (2 Kòr. 5:7) Asuh öp manah ngam ṙô Pôl? Ngam manah ngam ṙô imat ngam Paipöl ‘lök in e’ vamënyö inlahen tinrīken öp töhěng tak tarik angū-ö. Yē ngòh tarik nö töng lamök in minë chehen tö meūkö, ngaich töng mahayönglenre anga-aṅ nö in re, tö ngö manah töp tarik nö kē fëslare anga-aṅ nö asā nup töng maheukre, ahangre hēk nup tölöng inrē nö in ò. Ngòh tarik pöri lamök im ṙinatö-ellōn hayönglenre anga-aṅ nö in Yāvē, ngaich chumkūöṙen inrē anga-aṅ tö ngam mufē Yāvē yē ò nö kē nup fëslare. Ṙinatu-ellōn anga-aṅ töre nö yöölen min yěn hang minë chööngö Yāvē imat ngam Paipöl. Ngaich kē-ěkūö ò min ang Yāvē tö raneushö ip yamih ṙētak.—Sal. 119:66; Hep. 11:6.

3. Asuh nup min yanöölen hī, yěi lök im ṙinatö-ellōn? (2 Kòrin 4:18)

³ Kô-en in ṙung öi ṙōlheuh kē fëslare öi höng asā nup maheukre, ahangre hēk nup tölöng inrē nö in hī. Yē hī pöri min öi höng hayönglenre in u öi kēḵ nup tökiröng fëslare, ngaich mihôiṅ min ayī-ö öi kihngen. Kūö yòh? Pön hēṙu ṙung minë maheuk hī hēk ahang hī inrē nö öt kô-en. Pòrô ayī-ö öi löng inrē min tö lōnre, sön pöri öi ötkô öi hayönglenre in minë tö meukö chehen, pöi mihôiṅ min öi la-evṙen tö nup la-en tövaich nö imat Yāvē. (Mum. 11:9; Mët. 24:37-39) Yē hī pöri öi lök im ṙinatö-ellōn, ngaich teungten min ayī-ö öi kēḵ nup fëslare nup tö ‘hō-ov tö ngam mā.’ (Efi. 5:10) Yē hī öi hang minë inlēnöre kahëtö ngam Tēv ngaich teūngen ayī-ö tö lanāmö elkuilōnre, ngaich ṙamölōn inrē. (Sal. 16:8, 9; Isa. 48:17, 18) Yē hī min öi köp lök im ṙinatö-ellōn, ngaich kē-ěkūö hī inrē min ang Yāvē tö ngam nômö tö örheūheu aṅ ip yamih ṙētak.—Vë-evkūö 2 Kòrin 4:18.

4. Sitih inlahen mikahkūö öng ngòh tarik töre yěn lök im ṙinatö-ellōn hēk yěn höng lök in minë chehen tö meukö?

⁴ Sitih inlahen öi mikahtökūöre tö inlahenre yěi lök im ṙinatö-ellōn hēk yěi lök in në chehen tö meukö? Yěm hòṅ mikahtökūöre ngaich kò-òren öm hatönöre, ‘Asuh öp lökngörit chu yěch kēḵ nup fëslare? Höng lök in nup maheukre hòng chū-ö öich kēḵ nup fëslare? Hayönglenre hòng ṙöng öich in Yāvē hēk hang minë inlēnöre ṙöng kahëtö ò?’ Ta-a töi chumkūöṙen tö në tölūöi inlahen, ngaich ngëichkö öp inlahenre inrē öi sitih inlahen mihôiṅ lök im ṙinatö-ellōn: (1) Yē hī öi katöllö kinmānöre, (2) yē hī öi katöllö pīhöre hēk (3) yē hī öi teūngen tö inlēnöre löktö el ngam söngkötön. Yē hī min öi kakken në inlahen, ngaich mikahtökūöre min ayī-ö tö nup tö hòṅ chumkūöṙen hī hòṅ hī löngö kahë tö fëslare.

YĒ HĪ KĒḴ ÖP TÖHĔNG KINMĀNÖ

5. Asuh nup min tö hòṅ chumkūöṙen hī yěi kēḵ kinmānöre?

⁵ Ṙòkhöre in ayī-ö öi lōnu töre öi hateungngö nup kuilōnre hēk kuilōn ngam mikūönöre inrē. (Mum. 7:12; 1 Tim. 5:8) Ōt nun minë kinmānö tövai ṙôken rineushö, mihôiṅ ngòh töhěng tak tarik nö teungten nö hateungngö nup kuilōnre tö kaheuk sakāmö hēk hamūllöre tī inrē tö tönët tāk rupīö. Rīkre pöri yip töt pōyen taneūngen tö rupīö nö in minë tahëng kinmānö, ngaich höng hateungngö nup töng kuilōn ngam mikūönöre cha-a. Yěi kēḵ öp töhěng kinmānö, ngaich ngëichkö ṙôken nup taneūngenre min ayī-ö rupīö öi löktö in e. Yē hī pöri min öi höng angū-ö ngahëichka, ngaich sā ṙēngen töng lamök in minë chehen min ayī-ö tö meukö.

6. Yē hī öi katöllö kinmānöre ngaich sitih inlahen ayī-ö öi hameuktöre öi lök im ṙinatö-ellōn? (Heprāi 13:5)

⁶ Ngòh tarik lamök im ṙinatö-ellōn urěh min anga-aṅ nö fēkö inlahen ngam innôlöre nö in Yāvē urěhēkūö ò nö kēḵ kinmānöre. Hatöönöre min anga-aṅ nö Ngöṙô, ‘Yē chu min öich kēḵ ngih kinmānö, ngaich hòṅ kētöre hòng min chū-ö öich in nup la-en surikhö Yāvē?’ (Inch. 6:16-19) ‘Ṙētakvö hòng min chū-ö öich chuh el mīting? Ṙētakvö hòng min chū-ö öich vë-ekūö Paipöl hēk ṙētakvö inrē öich ahanga? Hö-ö öng min ngih kinmānö chu nöng ṙūöhngen chu tö ngam mikūönö chu?’ (Filip. 1:10) Yē ò min nö “heūn” Ngöṙô nö kētö sanapṙô në intöönö, ngaich tövai min ngam inlahen ò yěn un kēḵ nup tö ngatī kinmānö, pòrô anga-aṅ nö kihngen nö teūngen tö tahëng kinmānöre. Yē hī öi lök im ṙinatö-ellōn, ngaich höng löktö in nup kahë hī min fësla nö meūkö ngam inlahen hī öi hayönglenre in Yāvē. Ṙātö-ellōnre ayī-ö tö ò nö öthō nö öt hateungngö minë kuilōn hī min.—Mët. 6:33; vë-evkūö Heprāi 13:5.

7-8. Sitih inlahen ang Haviyēr nö hameuktöre nö lök im ṙinatö-ellōn? (Ngëichkö ngam nyat.)

⁷ Töi chumkūöṙen öi ngëichkö inlahen prötör Haviyēr,a ngòh aṅ Saôt Amerika. Akahakūö hē e anga-aṅ töm linök in ngam ṙinatö-ellōn nö tö möḵlö. Ngöṙô anga-aṅ, “El ngam kömpönire (company) chū-ö öich fil fôm ngam töhěng ööilōnre kinmānö, pōyen taneūngen inrē min chūö tö rupīö öich in e.” Kūiyulōn pöri inrē anga-aṅ töre nö hòṅ painīör. Ngöṙô anga-aṅ, “Kē e intörviv ngaich chū-ö tö ngam měněchör ngam kömpönī. Urěhēkūö chu öich kētö ngam intörviv re ngaich havëkūö Yāvē chū-ö tö inyöökenre. Ṙātö-ellōnre chū-ö tö Yāvē nö akahakūö töp chūök chu min öich yöölen. Lōnu chin hē e tö ngam kinmānö, yěn öt ṙētakvö tī pöri angū-ö tö chu öich i linökö lōn Yāvē ngaich hö-ö chū-ö min öich kētöre öich in e.”

⁸ Ngöṙô ang Haviyēr, “Ik sā chu intörvivö ngaich tölṙô chu ngam měněchör öich pōyen kahëti tö ṙētakre öich im kinmānöre. Holtö hanangenlōnre chū-ö öich vë-eny nang ò töre öich ötkô öich ngatī inlahen pöich hòṅ ṙētakvö inrē öich ahanga.” Ṙāngenre ngaich ang Haviyēr nö öt kē ngih kinmānö. Unôichrit tö nët afta ngaich anga-aṅ nö kētöre nö im painīör. Rěh rò-angen chumngëṅtö ngaich anga-aṅ nö teūngen töm töhěng part-time kinmānöre. Ngöṙô anga-aṅ, “Hang ngam ṙô chu ang Yāvē öich vë-ekūötēv, ngaich hayööken chu inrē öich chöh ngam kinmānöre ngam tö ṙētakvö tī tö chu öich painīör. Ṙamlōn takô chin pò chu öich löngö kahë tö fëslare. Ngaich chin töngamuh öich pōyen kahëti tö ṙētakre öich in Yāvē hēk hanôl më prötör sistör re inrē.”

9. Asūp haköplö meh in ngam ekspirīön Tresōr?

⁹ Yē meh öm ṙömöng la-evṙen töm kinmānö ngam tö lainynguṙen tī tö meh kihngen lök im ṙinatö-ellōn, ngaich asuh mihôiṅ öp inlahen meh? Ngëichkö inlahen Tresōr ngòh aṅ Kòngkō nö sitih inlahen anga-aṅ nö la-al e angū-ö kanihngenre. Ngöṙô anga-aṅ: “La-evṙen chū-ö hē e töm kinmānö ngam lōn më tarik nö ṙòkhöre. Pōyen taneūngen chū-ö tö rupīöre öich löktö in e hēk pōyen inrē më tö milēḵṙen tö chu.” Hòṅ pōyen kahëti pöri hē e anga-aṅ tö ṙētakre nö in e, angū-ö lainyngen ò nö ṙōlheuh nö öt yihtökūö nö el mīting. Michūṙen inrē më hol ò nö la-evṙen hēk tölṙô ò inrē nö minyôny aṅ hòṅ cha nö öt kôḵti nö michūṙen. Lōnu anga-aṅ hē e töre nö hòṅ ṙāngen ngih kinmānö, kihngen pöri inrē anga-aṅ pön öt ilööṙen min nö teūngen tö tahëng kinmānö. Sitih inlahren pöri anga-aṅ nö kēḵ ngam tölöng fëslare? Ngöṙô anga-aṅ, “Akaha elmat chū-ö tö ṙô ngam līpöre Hapakūk 3:17-19 tö chu yěich kihngen tö rupīö, öthō pöri ang Yāvē nö öt chumkūöṙen tö chu. Lökten ngaich chū-ö öich ṙāngen ngam kinmānöre.” Ngöṙô inrē anga-aṅ: “Pōyen yin më yöngkūö töla-evṙen tö ngö lōn tö cha min yěn kētö tö pōyen rineushö më töla-evṙen, ngaich mihôiṅ min cha-a nö hō nö kētöre nö in nup töng sitih la-en. Mihôiṅ min cha-a nö ṙāngen ngam mikūönöre hēk ṙāngen ngam Tēvre inrē. Ṙamlōn pöri chū-ö pöich öt ngatī inlahen. Unôichrit tö hěng samyeūheu ngaich chū-ö öich löktö i inyöökenre tö Yāvē öich teūngen töm töhěng kinmānöre ngam tö aṅha nômö tī tö chu hēk ṙētakvö tī inrē tö chu öich im linökö lōn Yāvē. Yē hī öi urěhlen Yāvē öi im tinrīkenre, ngaich rö-ö min ayī-ö pöi kô-en öi raheichtakūö kihngen tö rupīö, harūötken hi pöri min ang Yāvē.” Kô-en pöri yěi hang minë inlēnöre kahëtö Yāvē, ngaich ṙātö-ellōnre öi in minë kinlēngô ò, ngaich teūngten min ayī-ö lök im ṙinatö-ellōn, hěnghöre teūngen inrē min ayī-ö tö töpōyen inkòlô.

YĔM KATÖLLÖ PĪHÖRE

10. Sitih inlahen öi hameuktöre öi öt lök in minë tö meukö chehen yěi katöllö pīhöre?

¹⁰ Tö hěngkangen ön ngam pinīhö nö inlōntī nö lamöktö in Yāvē. Yěn lōnu ngam kikōnyö hēk kikānö töre nö hòṅ hapīhö, ngaich tövai angū-ö. Fē-a man, yē öp töhěng tak sistör nö fēkö inlahenre nö hòṅ pīhövö. Ngaich lohten min anga-aṅ nö ngëichkö inlahen tinrīken öp töhěng tak kikōnyö, ngëichkö inlahen mineūkö ò, ngëichkö ṙô yip tahëng tö inlahen ò, ngëichkö ngam mufē ò tö inlahen ngam rupīö hēk asuh inrē nup la-en ò nö el ngam mikūönö. Lohten inrē min anga-aṅ nö afēkö öp mufēre yěn röhta ngam kikōnyö nö in ò.b Öt tövaich ön ngam inlahen hī yěi afēkö në tö ngatī inlahen. Yē u pöri min nöng anū-ö në afēkö ngòh sistör nö kēḵ fëslare, ngaich töng lamök in minë tö meukö chehen min anga-aṅ.

11. Sitih inlahen öi hameuktöre lök im ṙinatö-ellōn yěi katöllö pīhöre? (1 Kòrin 7:39)

¹¹ Yē më tarik ngam Tēv pöri nö lamök im ṙinatö-ellōn ngaich chumkūöṙen min cha-a tö minë inlēnöre aṅ mat ngam Paipöl yěn katöllö pīhöre. Tö sā cha yěn ‘hūṙö ellōn’ töre nö hòṅ pīhövö, ngaich tēting min cha-a. (1 Kòr. 7:36) Chumkūöṙen inrē min cha-a nö fēkö inlahen öp chūökre tarik nö hòṅ hapīhö yē ò nö īnu tö minë tinrīken minë kuilōn Yāvē nö in ngòh inpīhö kikōnyö hēk inpīhö kikānö. (Inch. 31:10-13, 26-28; Efi. 5:33; 1 Tim. 5:8) Yěn hangenlōn pöri yip tarik tö cha yip töt lamöklōn Yāvē, ngaich hang ngam inlēnö min cha-a im 1 Kòrin 7:39 tö cha nöng hòṅ im mā nö hapīhö. (Vë-evkūö.) Ṙën cha-a nö ngatī inlahen pön ṙinatu-ellōn tö Yāvē nö in cha hēk örheūheu inrē min nö chumkūöken cha. (Sal. 55:22) Afē-a man tö ṙôken ngam ṙanamlōn Yāvē lohten yěn meuk inlahen më tarikre nö ngatī inlahen!

12. Asūp haköplö meh in ngam ekspirīön Rōsa?

¹² Töi chumkūöṙen tö ngih ekspirīön Rōsa ngòh painīör nö im panam Kòlömpīa. Ngam chūök ò sin nö kaman ngaich hěng tak öp in e kikōnyö tö hangenlōn tö ò ngatī ngaich inrē lang anga-aṅ nö hangenlōn tö ò. Ngöṙô anga-aṅ, “Kuchik elmat chū-ö öich meuk inlahen ò pön tövaiyö tinrīken anga-aṅ nö tarik, mahayööken holre inrē. Vaiyö tinrīken anga-aṅ nö in chu. Ngaich ngatī kuilōn chū-ö tö tinrīken öp tarik chūök chu öich hapīhö. Ngamuh pöri ngaich, kūö ò nö öt lamöklōn ngam Tēv.” Ngöṙô hēk anga-aṅ, “Kô-en ngaich chū-ö öich hòṅ tētingö ò lang lökten öich kihngen öich öt sapṙô ò. Kihngen chū-ö hē e pöich höng hěng tak lökten öich hòṅ lōnu lang töre öich hapīhö. Öt teūngen pöri chū-ö hē e tö töakaha prötör chūökre öich hapīhö.” Hö-ö ang Rōsa nöng lök in minë chehen tö meukö, fēkö inlahen ngam innôlöre pöri anga-aṅ in Yāvē nö un pasū tö kūö ngam kahë ò fësla. Lökten ngaich ang Rōsa nö ṙāngenre nö vë-ekūö ngam tarik, ngaich höng chumkūöṙen anga-aṅ nö im linökölōn Yāvē. Unôichngöre ngaich anga-aṅ nö teūngen tö invitēsönre nö chuh el ngam iskul më ma-ahangkö ngam tölöök inhānga. Ṙònghöichṙen ön töngamuh nö ispěsöl painīör. Ngöṙô ang Rōsa, “Töḵlö chin tö minë ṙanamlōn tö tī Yāvē.” Yē meh öm hangenlōn töp töhěng tak tarik ngaich lohten öm kihngen lök im ṙinatö-ellōn. Yē meh pöri öm hang minë chööngö Yāvē, ngaich örheūheu min më-eṅ öm yöölen.

YĔI TEŪNGEN TÖ INLĒNÖRE ÖI LÖKTÖ EL NGAM SÖNGKÖTÖN

13. Yē hī öi kētu inlēnö löktö el ngam söngkötön ngaich sitih inlahen mihôiṅ min ayī-ö öi höng lök in minë chehen tö meukö?

¹³ Tö chöngṙen an ngam inlahen hī ṙung öi teūngen tö inlēnöre öi löktö el ngam söngkötön Yāvē, öi löktö in më minṙöinylen, sörkit ovörsīör, löktö el ngam mupākö òfis hēk löktö in më yōm la-en inrē. Yěi hang minë inlēnö lamöktö in cha ngaich hēk ayī-ö öi vaiyö inlahen im linökö lōn Yāvē. Lohten pöri min ayī-ö hēṙu öt akaha elmat tö lāinyngen minë inlēnö nö kūö yòh nö kētu nö in hī. Hēk lohten min öi ngö lōn tö minë tökētu inlēnö nö töng kihngen tī tö hī. Lohten inrē min öi chöhnyö nup ötkumlē-en yip prötör kamëtö minë inlēnö hī.

14. Yěi teūngen tö inlēnöre löktö el ngam söngkötön, ngaich sitih inlahen ayī-ö mihôiṅ öi lök im ṙinatö-ellōn? (Heprāi 13:17)

¹⁴ Yē hī öi lök im ṙinatö-ellōn ngaich hayönglenre ayī-ö öi in Yāvē tö ò nö anga-aṅ mahachōḵkūö ngam söngkötönre hēk akahakūö inrē anga-aṅ tö öp chūök hī mihôiṅ öi yanöölen. Lökten yěi teūngen ṙung tö inlēnöre, ngaich ilööṙen ṙung ayī-ö öi hangö u öi holtö ṙanamlōnre. (Vë-evkūö Heprāi 13:17.) Köplōn inrē ayī-ö tö hī min yěi ngatī inlahen ngaich köp min ngam hinëngö nö el ngam māṅ. (Efi. 4:2, 3) Kô-en yin më mahachōḵkūö hī prötör nö töthet, yē hī pöri min öi hangṙô cha, ngaich mihôiṅ öi ṙātö-ellōnre tö Yāvē min nö kētö inkòlô hī. (1 Sa. 15:22) Yěn ōt min nup tö hòṅ harīkiyö, ngaich öthō min ang Yāvē nö öt harīkngen u.—Mai. 7:7.

15-16. Sitih inlahen öp i töhěng tak prötör nö lök in ngam ṙinatö-ellōn pòrô nö kihngen nö hang öp töhěng inlēnöre? (Ngëichkö ngam nyat.)

¹⁵ Töi chumkūöṙen öi ngëichken ngih töhěng ekspirīön, ngaich löktö in e min öi akahakūö tö yanöölenre yěi lök im ṙinatö-ellōn. Keuheūtngöre chūök yip tarik ṙamô tö ngam ëlô Ispenis nö im panam Pērū. Pōyen pöri yip tarik in e ṙāmôtö nup ëlôre. Hěng ön ngam ëlô cha in u ngam ëlô Kēchuā. Samyeūheuv rò-òten hē e më aṅ in e prötör sistör ṙamôtö ëlô Kēchuā nö chöh yip tarik tö heuveū-euṙô tö ngam ëlô Kēchuā. Ōt pöri minë tö harīkiyö ngaich nö im inlahen cha nö chöh më tarik, hòṅ cha nö hang minë chööngö më mahayöng. (Rōm. 13:1) Angū-ö lāinyngen më rīkre prötör sistör ngaich nö ngö lōn tö cha min hēk nö kihngen nö chöh më tarik ṙamôtö ëlô Kēchua. Hang nuk inchöngtenre pöri më prötör lamöktö el ngam söngkötön, lökten ang Yāvē nö kētö inkòlô minë la-en cha hēk pōyen inrē më tarik taneūngen cha.

¹⁶ Kalē-ě pinṙūtölōn hē e inrē ang prötör Kevin tö inlahen e ngòh minṙöinylen aṅl ngam māṅ ṙamôtö ëlô Kēchuā. Ngöṙô anga-aṅ, “Höng ma-afēkö ngam inlahen ih chū-ö öi sitih inlahen min öi teūngen chöh yip tarik ṙamôtö ëlô Kēchuā?” Sitih inlahen pöri ngaich anga-aṅ? Ngöṙô anga-aṅ, “Fēkö ṙô ngam Inchōḵ-oṙô 3:5 chū-ö. Afēkö inlahen Môsös inrē chū-ö ik sā Yāvē hē e nö tölṙô ò nö ṙānyen yik Israel nö ṙā-ang Aikup. Ngöṙô lōn anga-aṅ misī tö ò min yěn hangṙô Yāvē ngaich kihngen min cha-a, ngaich kē-ě cha min më aṅ Aikup. Sön pöri ang Môsös nöng hang ngam inchō-okūöre tö Yāvē, nö hameuktö ngam pinngangkūö nö laklen yik Israel, lökten ngaich ang Yāvē nö kētö inkòlô ò.” (Man. 14:1, 2, 9-11, 21, 22) Harikngö minë inlahenre ang Kevin nö im inhānga. Asuh ngaich öp ṙòng ngam inlahen ò? Ngöṙô anga-aṅ, “Pingangkūö takô chū-ö öich meuk inlahen tī Yāvē nö kētö minë inkòlô ih. Ik raněh sin inlahen ih yěi chöh yip tarik ṙamôtö ëlô Kēchuā ngaich hòṅ marò-òlkūö kinröönö sin min ihö öi chöhö cha, ngaich höng hěng nët tak taneūngen min īhö tö cha. Ngaich in pöri töngamuh öi chuh in nup kamngö nup chūök më tö pōyen tarik ṙamôtö ëlô Kēchuā. Lökten in töngamuh ngaich öi pōyen vahë-ekūö tö tarik, pōyen inrē më rītöön visit ih nö ngaich hēk tö më Paipöl istöti ih inrē. Pōyen inrē nö ngaich më tarik yamihtökūö nö el mīting.” Kô-en ön ngam inlahen hī yěi lök im ṙinatö-ellōn ngaich örheūheu ang Yāvē nö kētö inkòlô hī.

17. Asūp haköplö meh in ngih ātiköl?

¹⁷ In ngih ātiköl in ngaich taheui öi chumkūöṙen öi ngëichkö minë tölūöi chūök hī öi hòṅ lök im ṙinatö-ellōn. Ōt pöri inrē nup tahëng chūök hī hòṅ lök im ṙinatö-ellōn. Tö sā hī yěi kē fëslare öi nup inṙamlōn, asuh mihôiṅ nup la-en hī yěi öt la-evṙen, hòṅ iṙòkhöl öi im inköphö hēk sitih inlahen tī inrē öi haruklen më nyīö. Pòrô öp tö yòh inlahen öp kahë hī fësla, uh pöri ayī-ö öi höng ngëichkö minë chehen tö meukö ngaich kēḵ fëslare. Ta a pöri töi lök im ṙinatö-ellōn, tö ngö manah ngëichkö inlahen ngam innôlöre in Yāvē, hang chööngö ò ngaich hayönglenre inrē in ngih kinlēngô ò tö ò min nö haṙūötken hī. Yē hī min ngatī inlahen, ngaich ‘Kēḵ minë-eny ngam Tēv Yāvē pöri min ayī-ö öi örheūheu kiröön.’—Mai. 4:5.