Hö-ö An Yāvē Nö Tö Cheūḵtòng Kël!

1. Ik sā Môsös nö ṙānyen yik aṅ Israel nö ṙā-ang Aikup, ngaich sitih inlahen anga-aṅ nö hayönglenre nö in Yāvē?

PŌYEN yin më tö chiplö tarik Yāvē tö vënyu inlahen nö im līpöre Heprāi. Hěng tak ang Môsös nö in cha nö tökalē-ě ṙinatö-ellōn. (Hep. 3:2-5; 11:23-25) Ṙānyen më aṅ Israel anga-aṅ hē e nö ṙā-ang Aikup. Öt pa-ekūö anga-aṅ ik sā hē Fërō hēk tö yik tarik alaha ò nö lūḵlörit cha, hayönglenre pöri anga-aṅ nö in Yāvē. Hayööken yik Israel anga-aṅ nö havangngö ngam töngāv mai, ngaich hachōḵ kūö cha nö el ök tönyalnyi. (Hep. 11:27-29) Sön ang Môsös nö hayönglenre nö in Yāvē pòrô yik tö pōyen Israel nö ngöṙô lōn tö Yāvē nö öt hateungngö minë kuilōn cha. Öt yanëḵngen ngam inlahen ò nö hayönglenre nö in Yāvē. Löktö i pinngangkūö ngaich ang Yāvē nö kētö nyā-aṅkūö yik Israel hēk kētö òk cha inrē tö mak, chumkūöṙen inrē tö cha.a—Man. 15:22-25; Sal. 78:23-25.

2. Kūö yòh ang Yāvē nö ngö ṙô nö in Môsös, ‘Cheūḵngöre rôta kël hòng ang Yāvē nö öt heuveū min nö kē-ěkūö më tarikre tö nyā-aṅkūö?’ (Kinṙeūkö 11:21-23)

² Tö ngöönö ṙinatö-ellōn ök misī Môsös. Hěngheuh pöri anga-aṅ nö yīhi kintöngö elkuilōn nö in Yāvē unôichrit ngam töhěng samyeūheu inlahen ò nö ṙānyen më Israel nö ṙā-ang Aikup. Kūö më aṅ Israel hē e nö havëkö kāḵre tö alaha nö in ò, ngaich ngö mufē ang Môsös tö Yāvē min nö löktö yih tī nö kē-ěkūö më tö lāku ṙôken tarik tö kāḵ cha tö alaha nö el ngih tönyalnyī. Lökten ang Yāvē nö ngöṙô nö in Môsös, ‘Cheūḵngöre rôta kël hòng ang Yāvē nö öt heuveū min nö kē-ěkūö më tarikre tö nyā-aṅkūö?’ (Vë-evkūö Kinṙeūkö 11:21-23.) Ngam manah ngam kël Yāvē tö vënyu nö ihih nö ṙôtö ngam töhet kumlēḵ ò angū-ö ngam tötkūöngu kumlēḵ ò nö hateungngö nup kuilōnre. Ngam ṙô Yāvē nö hatönkūö Môsös ngaich sā tö ngöṙô anga-aṅ nö in ò, ‘Sitih mufē öm kan tö chu, ötkô hòng chū-ö tö lōn meh öich hateungngö nup ṙô re?’

3. Kūö yòh öi hòṅ chumkūöṙen tö ngam inlahen Môsös hēk tö yik aṅ Israel?

³ Hēṙu öm ṙung më-eṅ öm ngö ṙô lōn, ‘öt akahakūö chin min tö Yāvē yěn hateungngö kuilōn chu hēk hateungngö kuilōn ngam mikūönö chu inrē.’ Ta-a töi chumkūöṙen öi ngëichkö inlahen Môsös hēk tö yik aṅ Israel pò cha cha-a inrē misī nö ngatī mufē. Chumkūöṙen in min in ngih ātiköl tö nup rīkre lökngörit chööngö, ngaich mikahtökūöre inrē min tö inlahenre öi kūö yòh mihôiṅ hayönglenre im kël Yāvē tö e nö töt cheūḵta nö ötkô nö hateungngö nup kuilōn hī.

HAKÖPLU IN MÔSÖS HĒK IN YIK ISRAEL

4. Kūö yòh yik tö pōyen Israel nö yīhi kintööngö elkuilōn?

⁴ Töi ngëichkö inlahen yik Israel nö kūö yòh cha-a nö yīhi kintööngö elkuilōn tö Yāvē nö ötkô nö hateungngö nup kuilōn cha. Ōt më tarik el ngam tönyalnyī töt aṅ Israel më lamöknyö Aikup nö hamūltöre nö in më aṅ Israel. Vai rò-òten cha-a hē e nö el ngam tönyalnyī. (Man. 12:38; Chöö. 8:15) Acha-a vë tömaṙôngö tö ṙěingö kūö nö nyā ngam manna, asīnkö inlahen cha ngaich inrē yik rīkre aṅ Israel nö sirös ṙôre. (Kin. 11:4-6) Kapahare cha-a hē e nö fēkö nuk tökuchik nyā-aṅkūöre ik sā cha nö i Aikup, lökten cha ngaich nö la-alkūö Môsös. Ngö ṙô lōn ngaich ang Môsös nö fēkö minë ṙô cha löktö yih öich min kē-ěkūö cha tö kāḵ cha tö alaha.—Kin. 11:13, 14.

5-6. Asūp lanökngöre yik aṅ Israel tö nuk inlahen yik tömaṙôngö töt aṅ Israel?

⁵ Öt milēḵṙen yik tarik töt aṅ Israel tö minë kinë-ekūöre tö Yāvē. Ngaich ngatī inlahen lohten yik tö pōyen Israel nö asīnken cha. Mihôiṅ ayī-ö kò-òṙen töngamuh öi ngatī lōn, kūö hī öi havīlöng tö më tarik më töt maha-öiny kinë-ekūöre. Ngatī inlahen lohten min ayī-ö öi öt ha-öiny minë kinë-ekūöre tö Yāvē. Ngaich lohten min öi fachuhrit nup chehen nup ṙahāngö hī i nuk urěh ṙētak hēk lohten inrē min öi ṙāinyngö öi meuk nup chehen aṅ in yip tahëng. Yēḵ hī pöri min öi harūnöre ṙamlōn in nup töng rahëichyen aṅ in re, ngaich örheūheu min ayī-ö ṙamölōn pòrô öp tö yòh kanihngen hī.

⁶ Hòṅ fēkö minë inkòlôre öre më aṅ Israel minë kinë-ekūö cha min tö Yāvē. Hòṅ köplōn pöri inrē öre cha-a töre min nö rö-ö nö el ngam tönyalnyi nö teūngen tö minë inkòlôre, in ngam kinlēḵngô panam pöri min cha-a nö teūngen tö u. Ngatī ṙēngen ayī-ö töngamuh öi hòṅ fēkö inlahen minë inkòlôre min kahëtö Yāvē ip tufömngöre panam, rö-ö öi fēkö minë chehen aṅ in re töngamuh. Mihôiṅ ayī-ö öi fēken minë miröökö aṅ mat ngam Paipöl minë löktö ngam ṙinatö-ellōn hī min nö ṙūöhlöre nö in Yāvē.

7. Kūö yòh öi mihôiṅ ṙatö-ellōnre tö ngam kël Yāvē nö öt cheūta?

⁷ Lohten min më-eṅ öm ngö mufē tö Yāvē nö kūö yòh anga-aṅ nö ngöṙô nö in Môsös: ‘Cheūḵngöre rôta kël hòng ang Yāvē nö öt heuveū min nö kē-ěkūö më tarikre tö nyā-aṅkūö?’ Lohten ang Yāvē nö hòṅ mikahtö elnang Môsös töre nö aṅhav in tö ngam töt kūöngu kumlēḵ hēk mihôiṅ inrē min anga-aṅ nö hayööken më tarikre pòrô öp tö yòh kamngö chūök cha. Mihôiṅ misī ang Yāvē nö kē-ěkūö më aṅ Israel tö kāḵ cha tö töpōyen alaha nö el ngam tönyalnyi. Kô-en ngaich anga-aṅ nö ngatī inlahen nö ‘hateutnyö ngam tökalēḵ këlre’ nö hameuktöre nö tökiröngen kumlēḵ. (Sal. 136:11, 12) Yēḵ hī inrē ayī-ö öi el ṙētak kanihngen, ngaich mihôiṅ öi ṙatö-ellōnre tö Yāvē min nö öthō nö öt hayööken hī, pòrô öp tö yòh chūök hī.—Sal. 138:6, 7.

8. Asūp mihôiṅ inlahen hī yěi sōḵ öi asīnkö inlahen yik aṅ Israel? (Ngëichkö ngam nyat.)

⁸ Nup ṙô Yāvē ngaich ngatī inlahen anga-aṅ. In nup tahëng ṙētak anga-aṅ nö kē-ěkūö më tarik tö minë tö pōyen kuīl. Ötrēhěn pöri më aṅ Israel nö ha-öinyö Yāvē tö ngam hameuktö ò pinngangkūö. Pön höng afēkö minë kuilōnre cha-a. Pōyen më in cha töhěng sumkam hēk hěng mitööm nö hamul minë kuīl. Yīhi tanāinyö ang Yāvē nö meuk ngam inlahen cha ‘nöng lōntö minë nyā-aṅkūö,’ lökten anga-aṅ nö kētö sācha cha. (Kin. 11:31-34) Pōyen haköplö in öi in ngih inlahen. Hòṅ chumkūöṙen ayī-ö tö hī ötkô öi höng yahlö lōn tö nup kuilōnre chehen. Pòrô ayī-ö öi tö kòlô hēk yāich, höng hòṅ “hamūl kanòlôre pöri öi el halīöngö.” Yěi hòṅ ngatī inlahen, ngaich hòṅ kaheuk sakāmö ayī-ö öi haröhtöre in nā Yāvē nā Yēsū öi hangön ngam innòlöre. (Mët. 6:19, 20; Lūk. 16:9) Yēḵ hī min ngatī inlahen, ngaich ṙinatu-ellōn min ayī-ö tö Yāvē nö öthō nö öt hateungngö minë kuilōn hī.

9. Asūp mihôiṅ ṙinatö-ellōnre hī?

⁹ Hateutnyö ngam kël re ang Yāvē töngamuh nö hayööken më tarikre. Öt tö ngö manah pöri angū-ö tö hī min öi öthěngö hanakten tö rupīö hēk öt hakten inrē tö nyā-aṅkūö.b Mihôiṅ pöri ayī-ö öi ṙatö-ellōnre tö Yāvē min nö öthō nö ṙāngen hī. Örheūheu min anga-aṅ nö chumkūöken hī el ṙētak minë kanihngen. Ta-a töi chumkūöṙen tö nup i tönët inlahen hī mihôiṅ hameuktöre öi ṙatö-ellōnre tö Yāvē min nö hateutnyu ngam këlre nö hateungngö minë kuilōn hī; (1) yěi kihngen tö rupīö (2) yĕi paṙūtalōn tö inlahenre öi hateungngö nup kuilōnre min ip yamih ṙētak.

YĔI KIHNGEN TÖ RUPĪÖ

10. Asuh nup mihôiṅ lāinyngen hī öi hakten tö rupīö?

¹⁰ Asā ranöhta yanīhi ngam manāngen ngih panam, ngatī hanakten min më tarik tö rupīö. Kūö minë tötlöng inlahen tī më mahayöng ing panam, kinyūngö, chanôchö kūö panam hēk lohten inrē öi pōilöre hötṙeh tö kūö minë tötufömngöre tölëlngö kūö invah, öt köpsöṙen kinmānö, chuhngöre kanòlô hēk lohten inrē min öi hòṅ ṙāngö patīre. Ngaich lohten min ayī-ö öi hòṅ chöh tötufömngöre kinmānöre hēk lohten inrē öi hòṅ holtö ngam mikūönöre öi chuh in nup tahëng kamngö öi iyöng ngaich ha-aṅ nômöre. Asuh öp min fësla hī el në tö ngatī ṙētak? Sitih inlahen ayī-ö öi hameuktö ngam ṙinatö-ellōnre tö Yāvē nö öt cheūta kël nö hayööken hī?

11. Asūp mihôiṅ inlahen hī yěi piṙutkö minë inlahenre öi kihngen tö ngam rupīö? (Lūkös 12:29-31)

¹¹ Yěi piṙutkö inlahen kanihngenre ṙung tö ngam rupīö, ngaich höng Yāvē tö mihôiṅ nö mötlö tī nö hayööken hī. (Inch. 16:3) Lökten öm vënyö nup pinṙutölōnre in ò. Iṙūöhö ṙô öm havëkö ngam mikah ò hòṅ meh kē nup tövai fëslare, ngaich havëkökūö ò tö lanāmö elkuilōnre ‘hòṅ meh öt yahlö mufē.’ (Vë-evkūö Lūkös 12:29-31.) Mihôiṅ inrē öm havëkö kūö ò tö meh yěm ngaich öm teungen tö minë kuilōnre, ngaich höng ṙamlōn më-eṅ in u. (1 Tim. 6:7, 8) Mihôiṅ inrē öm rīsörch in minë pöplikēsön hī, ngaich haköp minë ātiköl minë chūök meh mihôiṅ teūngen tö yanöölenre öm la-al minë kanihngenre i alaha ngam rupīö. Pōyen nun inrē minë minkahtölōn el ngam jw.org vepsāit minë lökten yip tö pōyen tarik tö teūngen tö yanöölenre, mihôiṅ inrē më-eṅ öm ngëichken u.

12. Sitih ṙô öm mihôiṅ hatönöre yěm hòṅ löngö kahë tö fëslare öm chö-öinytö ngam mikūönöre?

¹² Ōtre yip tarik kamë fëslare nö köhngen tö ngam mikūönöre nö marôvat chūök nö kamān. Fē unôich pöri cha-a tö ngam kahëre fësla nö vaich. Lökten yěm kē ngam tufömngöre kinmānö, ngaich um höng fēkö ṙôken nup rineushöre, hòṅ fēkö inlahenre pöri më-eṅ hēk töm mikūönö meh yěn köp nö röhta nö in Yāvē. (Lūk. 14:28) Hatöönöre man kò-òren: ‘Asuh öp min lanökngöre ngam innòlö ai töp pīhö chu yēḵ chu min öich marôvat tö ò? Örheūheu öich min yihtökūö in minë mīting, im la-en inhānga hēk kēnyö ṙētakre öich in më prötör sistör? Kò-òren më-eṅ inrē öm fēkö inlahen ngih yěm tö kūönö: ‘Yēḵ chu min öich marôvat tö ngam mikūönöre, ngaich heuveū inlahen hòng min chū-ö öich haruklö më kūönre öich ‘asā ngam kuilōn Yāvē öich haköpten cha hēk halēnö cha’ inrē?’ (Efi. 6:4) Yēḵ meh öm kē öp töhěng fësla, ngaich um hang ṙô yip holre hēk yip aṅpatīre yip töt mi-im kanô-en, afēkö ngam mufē Yāvē pöri më-eṅ.c Hěng tak ngòh tö Tōnī minënyi mi-iyöng Vest Ēsiā, pōyen taneūngen hē e anga-aṅ tö òför re nö chuh tökiröng panam nö kamān hěnghöre pōyen taneūngen öre anga-aṅ tö rineūshöre. Vënyen e pöri anga-aṅ nö in Yāvē nö vë-ekūötēv hēk kakken e inrē nö in ngam pīhöre. Kē fëslare pöri ang Tōnī nö sōḵ nö chuh tökiröng panam nö kamān, pön höng hòṅ iyöng in ngam mikūönöre ngaich hakūönngö ṙôken nup körcha re. Ngöṙô ang Tōnī: “Kūö ngih fëslare chū-ö öich teungten haköpten më töpōyen tarik tö inlahen Yāvē. Ngaich yin inrē töngamuh më kūön chu nö holtö nganöötöre nö löklōn Yāvē. Haköplu ngam mikūönö chu tö ih min yěi asīnkö ṙô ngam Mëtiv 6:33, ngaich örheūheu min ang Yāvē nö chumkūöken ih.”

YĔI PAṘUTALŌN TÖ INLAHEN MINË HANAKTENRE

13. Hòṅ asūp inlahen hī töngamuh hòṅ hī öt kihngen min ha-aṅ nômöre yěi ngaich öi ṙēḵtivös?

¹³ Lohten ayī-ö paṙutalōn tö inlahen re ip yamih ṙētak yěi köiny min ngaich sitih inlahen öi ha-aṅ nômöre. Sā tö kalah hē e min ngam ṙinatö-ellōn hī öi in Yāvē. Vënyu nang in öi in ngam ṙô ò, tö hī öi hòṅ kalēḵ alaha öi la-evṙen hòṅ hī min öt kihngen in minë yamih ṙētak. (Inch. 6:6-11) Minë hamulngöre rupīö in minë yamih ṙētak, hö-ö nun nö tö chōchngen. Pön yanöölen hī min anū-ö in nup tökihngen ṙētak. (Mum. 7:12) Ötkô pöri öi höng kaheuk sakāmö min öi fēkö inlahen re öi hamul rupīö.

14. Kūö yòh öp töhěng tak tarik nö hòṅ chumkūöṙen nö in ngam kūichi Heprāi 13:5 yēḵ ò nö hòṅ hamul rupīö?

¹⁴ Ngöṙô ang Yēsū nö vënyö ngam töhěng inchōḵ elmat tö inlahen ngòh tarik, yěn höng im inmūlö rupīö ngaich töng ‘yāichngen min anga-aṅ nö ikūö ngam Tēv.’ (Lūk. 12:16-21) Hö-ö in ṙòkhöre akahakūö tö inlahen öp yamih ṙētak. (Inch. 23:4, 5; Yāk. 4:13-15) Kūö hī pöri öi mahaköp öi in Yēsū ngaich ōt min minë kanihngen hī. Ngöṙô anga-aṅ tö hī min öi hòṅ harööḵngenre in minë kanòlô re. (Lūk. 14:33, ftn.) Yik Kristīön Yahūti ik raneh senchurī nö holtö ṙamalōnre cha-a misī nö harööḵngen re tö minë chehen. (Hep. 10:34) Ngaich yin töngamuh më prötör sistör hī tö īnu tö kinmānöre hēk tö minë kanòlô inrē. Kūö yòh? Kūö cha nö sōḵ nö holṙen minë inyööngkö ikūö ngih panam. (Inm. 13:16, 17) Ṙën cha-a nö teungten nö ngatī inlahen, pön ṙatö-ellōnre cha-a nö in ngam kinlēḵngô Yāvē ngam tö ngö: “Öthō chin löhlö tö meh, ötrēhěn chin min löktu ṙāngen meh.” (Vë-evkūö Heprāi 13:5.) Kô-en in öi hamul minë rupīö in minë yamih ṙētak, yěn ōt pöri min minë tö faltöre kanihngen hī, ngaich höng hòṅ hayöönglen re ayī-ö öi in.

15. Hòṅ sitih mufē aich më Kristīön nö i inruklö më nyīö? (Ngëichkö ngam nyat.)

¹⁵ In minë rīkre panam më tarik nö ṙën nö hòṅ kūönu, pön hòṅ ngëichkaṙen min tö më kūönre yēḵ cha min nö ngaich nö ṙēḵtivö. Ngölōn cha-a tö më nyīö min nö ngamëichken cha, yēḵ cha ngaich min nö ritāiyör im kinmānöre. Ngö kinūichngö pöri angū-ö nö imat ngam Paipöl tö më inyööngö nö hòṅ hateungngö minë kuilōn më kūönre. (2 Kòr. 12:14) Kô-en yin më yöng hī nö hòṅ hayöökaṙen yēḵ cha ngaich min nö köiny hēk pōyen inrē yip nyīö tö ṙamölōn nö meukṙen yöngre. (1 Tim. 5:4) Öt ngatī mufē pöri më inyööngö ṙamatö-ellōnre nö in Yāvē nö haruklen më kūönre, tö cha nö hamul rupīö ngaich mameukṙen cha. Pön hayööken më kūönre cha-a nö kētöre nö i linöökö lōn Yāvē. Löktö in e min cha-a nö teūngen tö ngam tökirööngen ṙanamlōn.—3 Yôh. 4.

16. Sitih inlahen aich më inyööngö nö harun më kūönre nö heuveū-en in nup tö sitih la-en? (Efisös 4:28)

¹⁶ Yī-ö inyööngö tövai yin öi inchōḵ elmat më kūönre hēk harūnö cha nö hayönglenre nö in Yāvē. Kētö trēning cha hòṅ cha nö heuveū-en nö in nup tö sitih la-en. Ngaich löktökūö nyinī-ö cha öm harūnö cha nö kalēḵ alaha nö la-evṙen. (Inch. 29:21; vë-evkūö Efisös 4:28.) Ṙūöhlö inlahen cha inrē nö im inköpö hēk kinūichö. Rö-ö anū-ö, pön hayööken cha inrē nö löngö kahë tö fëslare nö im inkööpö. Öm sitih inlahen? Mihôiṅ öm chöh minë tövai lökngörit chööngö aṅ mat ngam ngaich kakken u in më kūönre. Ngaich möl min ngam kūön meh nö heuveū nö kē fëslare tö minë tö yöölen tī min tö ò nö ha-aṅ nômöre in minë yamih ṙētak hēk pōyen kahëti inrē min tö ṙētakre nö im la-en inhānga, mihôiṅ kò-òren inrē min nö im la-en painīör.

17. Asūp mihôiṅ ṙinatö-ellōn hī?

¹⁷ Ṙatö-ellōnre yin më tö chiplö tarik Yāvē tö ò min öthō nö öt hateungngö nup tö sitih hanakten cha pön angū-ö inrē kuilōn ò. Asā ranöhta yanīhi ngam manāngen ngih panam pöri, hòṅ ṙūöhlö ngam inlahenre hēk ayī-ö öi ṙatö-ellōnre in ò. Ta-a chěi töi ṙatö-ellōnre in Yāvē tö ò min nö chumkūöken hī in minë tö sitih inlahen hēk hateutnyö ngam tökalēḵ kël re inrē anga-aṅ nö hayööken hī. Kô-en ngam kël Yāvē nö öt cheūta.