Hö-ö In Öi Höng Hěngtak

1-2. (a) Kūö yòh öi mihôiṅ ṙinatu-ellōn tö hī öi öt hěngtak el minë kanihngen? (b) Asuh nup min tö kakka tö hī in ngih ātiköl?

YĒḴ HĪ ṙung öi vönhöt el minë kanihngen tö sā chanôchö, ngaich hē e lohten ayī-ö ngölōn töre öi höng hěngtak. Hö-ö pöri angū-ö nö kô-en nö ngatī, pön örheūheu nö in hī ngam tö hangenlōn Yöng hī Yāvē. Akahakūö anga-aṅ tö hī öi īnu tö minë kanihngen hēk kilēḵngôre inrē anga-aṅ tö ò min nö örheūheu nö hayööken hī. Kētö ṙinātö-ellōn më tö chiplö anga-aṅ tarikre nö imat ngam Paipöl, nö ngö ṙô: “Holṙen meh chin min.”—Isa. 41:10.

² In ngih ātiköl in min öi kakkö minë inlahen tī Yāvē nö hayööken hī: (1) hachōḵ talöökö hī min anga-aṅ, (2) hateungngö minë kuilōn hī, (3) laklen hī min anga-aṅ, hēk (4) hareuskö alaha hī. Kētö ṙinatö-ellōn hī ang Yāvē, tö hī yěi pòrô el minë kanihngen ngaich öthō min anga-aṅ nö ṙāngen hī hēk vaichngen hī inrē. Lökten min ayī-ö öi öt hěngtak.

HACHŌḴ TALÖÖKÖ HĪ ANG YĀVĒ

3-4. Sitih inlahen ang Yāvē nö hachōkūö hī? (Salmai 48:14)

³ Vë-evkūö Salmai 48:14. Akahakūö ang Yāvē tö hī ayī-ö tarik öi ötkô hachōḵ talöököre, lökten anga-aṅ nö hayööken hī. Sitih inlahen pöri anga-aṅ nö hachōḵ talöökö më tö chiplö tarikre? Löktö in ngam Paipöl. (Sal. 119:105) Kūichhöt minë mikah anga-aṅ nö imat ngam Paipöl nö mahayööken hī öi lööngö kahë tö fëslare hēk asīöp minë tövai inrē tinrīken, yēḵ hī min öi hang minë tö kūichi imat e ngaich ṙamlōn min ayī-ö töngamuh hēk teūngen inrē min ayī-ö tö ngam nômö tö örheūheu-aṅ ip yamih ṙētak.a Kò-òren öi ngëichkö ngih inchōḵelmat, tö sā Yāvē nö löktö in ngam Paipöl ṙô nö sōḵten hī öi köptī tö ngam lanīnö, hameuktöre öi öt michūṙen in nup töng sitih hēk kô-en hanangenlōn inrē tö höö. (Sal. 37:8; Hep. 13:18; 1 Pīt. 1:22) Yēḵ hī min öi ngatī inlahen ngaich tö akaha min öi inyööngö, inpīhö hēk hol inrē.

⁴ Hachōkūö hī ang Yāvē nö kūichngö inlahen yik tarik nö imat ngam Paipöl, yik tö sā kanihngen hī hēk mufē hī inrē. (1 Kòr. 10:13; Yāk. 5:17) Yēḵ hī öi haköp inlahen cha hēk lök in u inrē ngaich nët min minë yanöölen hī. Ngam raneh, akahakūö min ayī-ö töre öi öt hěngtak yěi el nup kanihngenre. Pò yip tahëng inrē nö sā inlahen kanihngen hī ngaich heuveū cha-a nö la-al u. (1 Pīt. 5:9) Ngam innëtö, haköplu ayī-ö tö hī mihôiṅ öi sitih inlahen öi la-al minë kanihngenre.—Rōm. 15:4.

5. Sitih inlahen tī ang Yāvē hēk nö hachōkūö hī?

⁵ Löktö in më prötör sistör tī ang Yāvē nö hachōkūö hī.b Tö sā më sörkit ovörsīör nö kaheuk ṙētak nö chöhken minë māṅ hēk hareuskö alaha hī inrē. Ngönlöre ngam ṙinatö-ellōn hī nö löktö in minë minkahten kahëtö cha ngaich ṙūöhölre alaha inrē ayī-ö öi köptī tö ngam hīnëngö ihôi höö. (Inl. 15:40–16:5) Hayööken më prötör sistör yin inrē më minṙöinylen el ngam māṅ, hòṅ cha nö köp nö röhta nö in Yāvē. (1 Pīt. 5:2, 3) Haköpten më kūönre yin më inyööngö nö hangenlōn tö Yāvē, harūnö cha inrē nö vī nup tövai tinrīkenre hēk holtö mikah elmatre nö la-evṙen. (Inch. 22:6) Tövai yin inrē më tö sööḵngö ṙēḵti sistör nö inchōkūö më ṙālö sistör nö el ngam māṅ. Kamëtö minë tövai inlēnö inrē cha-a nö in cha hēk holtö hanangenlōnre inrē nö hareuskö alaha cha.—Tai. 2:3-5.

6. Asūp inlahen hī yěi hòṅ yöölen öi löktö in minë inlēnö kahëtö Yāvē?

⁶ Pōyen nun minë inlahen tī Yāvē nö hachōkūö hī öi lök in ngam tölöng talöökö. Asuh pöri mihôiṅ öp inlahen hī yěi hòṅ yöölen öi löktö in ngih inlēnö? Kūichi ön nö im Inchōḵ-oṙô 3:5, 6 ngam tö ngö: “Keuheūttö ellōn re hayönglenre im Mā Tēv, um hayönglenre inrē i ellōn re.” Asuh öp min yanöölen hī yěi ngatī inlahen? Ngö ṙô ön nö hēk, ‘hachōkūö meh an min nö lök in ngam tölöng talöökö.’ Angū-ö min ngih lāinyngen hī öi laklöre tö minë töpōyen kanihngen hēk ṙamölōn inrē öi in ngam tinrīkenre. Kô-en ang Yāvē nö tö akaha nö Tēv, hangenlōn anga-aṅ tö hī öi ṙòkhöre hēk asā öp kanò-òṅ hī inrē anga-aṅ nö kētö inlēnö hī!—Sal. 32:8.

HATEUNGNGÖ NUP KUILŌN HĪ ANG YĀVĒ

7. Sitih inlahen tī ang Yāvē nö hateungngö minë kuilōn hī? (Filipī 4:19)

⁷ Vë-evkūö Filipī 4:19. Öt höng hachōḵ talöökö hī ang Yāvē, pön hayööken hī inrē nö hateungngö nup kuilōn hī. Kētö inkòlô minë kumlēḵ alaha hī ang Yāvē öi im inhāṅha nômöre tö sā ngam nyinā-avkūö, chinhënö hēk inrūkui inrē. (Mët. 6:33; 2 Tös. 3:12) Ṙòkhöre in öi paṙūtalōn tö inlahen inteungngö minë tötṙanāngen kuilōnre, sōḵten hī pöri ang Yāvē öi yahlö pinṙūtölōn tö u. (Ngëichkö ngam istötī nōt ngam Mëtiv 6:25.) Kūö yòh? Kūö ngam Yöng hī Yāvē nö öthō nö ṙāngen më tö chiplö tarikre. (Mët. 6:8; Hep. 13:5) Kilēḵngôre anga-aṅ tö ò min nö hateungngö minë kuilōn hī hēk mihôiṅ inrē ayī-ö öi ṙatö-ellōnre in minë kinlēḵngô ò.

8. Asuh öp inlahen tī Yāvē nö hayööken Tāvit?

⁸ Chumkūöṙen tö inlahen Yāvē nö sitih inlahen nö hateungngö nuk kuilōn Tāvit. Ik sā ò hē e nö falngöre nö laklö ngam nômöre tö Sôl ngaich chumkūöṙen ang Yāvē tö ò hēk tö yik tarik alaha ò inrē. Ik sā Tāvit ngaich nö aṙū-uti mufē nö fēkö inlahen Yāvē nö chumkūöṙen tö ò im rò-òten ngam samyeūheu ngaich ngö ṙô anga-aṅ: “Ayal chin misī, ngaich chin töngamuh köiny: ngaich sön öich öt hĕng tak maheuṅk tö tölöök nö ṙā-ai, ötrēhĕn yip kūön ò nö icheūkö nya-aṅkūöre..” (Sal. 37:25) Lohten man më-eṅ inrē öm sā inlahen Tāvit öm meuk inlahen tī Yāvē nö hateunngö kuilōn meh hēk hateungngö kuilōn yip tahëng inrē tarikre.

9. Sitih inlahen ang Yāvē nö hateungngö kūilōn më tarikre el ṙētak minë tö faltöre kanihngen? (Ngëichkö ngam nyat.)

⁹ Chumkūöṙen an inrē Yāvē tö minë kuilōn më tarikre el ṙētak minë tö faltöre kanihngen. Yěi ngëichkö inlahen ök tökiröng inyāchö ik raneh senchūri nö in ök töhěng kamngö ngaich söömtu rilīf yik aṅ in e prötör sistör tö yik tö tahëngö kamngö chūök Kristīön. (Inl. 11:27-30; Rōm. 15:25, 26) Ngatī inlahen an töngamuh Yāvē nö hōten më tarikre nö keuheūttö ellōnre nö hayööken më prötör sistör re. Lökten yěn yih nup tö faltöre kanihngen, ngaich ilööṙen më holmaneuk hī nö söömtö minë rilīf nö in më prötör sistör tö sā minë, nyā-aṅkūö, mak, chehen hēk minë lanë-en inrē. Më prötör sistör kamëtöre nö im la-en minānö, ngaich mānlö minë Patī Pūlngö cha-a hēk vī tit minë patī më prötör sistör inrē. Më tökapahlöng tö holmaneukre hēk më tö payayī patī tö kūö pinlāngen, ngaich hareuska alaha cha-a hēk hangönka alaha inrē tö më tarik Yāvē nö löknyö mat ngam Paipöl.c

10-11. Asuh öp haköplö meh im ekspirīön Pōris?

¹⁰ Luvënyökūö ellōnre an inrē Yāvē nö hayööken yip tarik töt lamöklōn ò, ngatī inlahen inrē ayī-ö mihôiṅ öi asīnken ò öi chöhtö inlahenre öi hayööken yip tarik töt lamöklōn Yāvē. (Kal. 6:10) Chöngṙen in ṙung öi teūngen tö minë töt insā-av ṙòng në tö ngatī inlahenre. Töi chumkūöṙen tö inlahen ekspirīön ngòh töhěngtak tarik tö Pōris minënyi ngòh prinsipöl nö el ngam iskul i Yukrēn. Öt Vamënyen Yāvē ön Pōris, vaiyö tinrīken pöri anga-aṅ nö in më nyīö më Vamënyen Yāvē el ngam iskul ò hēk milēṙen inrē töm ṙinatö-ellōn cha. Ik sā Pōris nö hòṅ ṙāngen ngam kamngö chūökre nö iyöng tökūö ök töhěng kinyūngö, ngaich hayöökaṙen anga-aṅ tö yik prötör nö chuh in öp töhěng kamngö nö hanyatlöre hòṅ ò nö öt fehngūṙen. Unôichngöre ngaich ang Pōris nö yihtökūö nö im infēkö kinpaha Yēsū. Ngö ṙô ang Pōris nö vënyö inlahen tī më prötör nö hayööken ò: “Kirööngen tī yin më Vamënyen Yāvē nö hayööken chu hēk chumkūöken chu inrē. Öt vaichngö chin min tö minë tī cha nö in chu.”

¹¹ Pītnyöre in ayī-ö inrē öi asīnken ngam tö aheūkölōn Yöngre Yāvē öi hangenlōn tö më tarik töt lamöklōn ò. (Lūk. 6:31, 36) Meūka in tö cha min nö yihtöre nö löklōn Yāvē yěn meuk ngam hanangenlōn hī. (1 Pīt. 2:12) Ngaich teūngen min ayī-ö tö ngam ṙanamlōnre im kinë-eṅtī, pòrô cha-a nö löklōn ngam Tēv hēk hö-ö.—Inl. 20:35.

HAYÖÖKEN HĪ ANG YĀVĒ

12. Sitih inlahen ang Yāvē nö kilēḵngôre töre min laklö ngam töhěng krup më tarikre? (Salmai 91:1, 2, 14)

¹² Vë-evkūö Salmai 91:1, 2, 14. Kilēḵngôre ang Yāvēnö in më tarikre tö ò min nö laklö ngam innôlö hī öi in ò, hòṅ e nö öt pasū. Öt hěngheuh min ang Yāvē nö halöngten ngam Satān nö hachōichngen ngam töhet nööinyöre. (Yôh. 17:15) Rö-ö nöng angū-ö pön in ngam “tökiröng kanihngen inrē” ang Yāvē nö kilēḵngôre tö ò min nö laklö më tarikre. Nö sitih inlahen? Hangönken ngam ṙinatö-ellōn cha min anga-aṅ ngaich öt halöngngen ngam töhěng krup cha min anga-aṅ nö ahetiyö.—Inm. 7:9, 14.

13. Sitih inlahen ang Yāvē nö laklen ngòh töhěngtak tarikre?

¹³ Sitih inlahen ang Yāvē inrē nö laklen ngòh töhěngtak tarik? Löktö im ṙôre anga-aṅ nö haköpten hī öi akahakūö tö nup tölöng hēk tövaich. (Hep. 5:14) Yēḵ hī min öi asīnken minë lökngörit chööngö aṅmat ngam Paipöl ngaich öthō min nö pasū ngam innôlö hī nö in Yāvē, vai min ngam el alaha hī hēk ṙamlōn inrē min öi im tinrīkenre. (Sal. 91:4) Löktö el minë māṅ tī inrē ang Yāvē nö laklen hī. (Isa. 32:1, 2) Hangenlōn min më prötör sistör hī tö Yāvē hēk lök in minë töhet inchöngtenre inrē nö in ngam tinrīkenre. Lökten yēḵ hī öi kēnyö ṙētakre öi in cha ngaich teūngen ayī-ö tö inreuskö alahare hēk ngön inrē ngam kuilōn hī öi ṙūöhöngre tö minë tötlöng la-en.—Inch. 13:20.

14. (a) Kūöyòh ang Yāvē nö öt örheūheu nö laklen hī tö minë kanihngen? (b) Asuh öp ṙinātö-ellōn hī öi in ngam tö kūichi Salmai 9:10? (Ngëichkö ngam futnōt.)

¹⁴ Laklö nômö yik tarikre misī ang Yāvē nö in nuk urěh ṙētak. Örheūheu hòng pöri anga-aṅ nö ngatī inlahen? Hö-ö. Vënyu nang in tö ngam Paipöl tö hī mihôiṅ ṙòkhöre öi teunghukui tö minë kanihngen. (Mum. 9:11) Löktökūö ik raneh söl ing töngamuh pöri ang Yāvē nöng hökngen më tarikre nö ötlēḵkaṙen, ötrēhěn inrē nö laklen cha tö ngam kinpaha, kūö ò nö hòṅ minyôinyngö aṅ ngam Satān. (Yōp 2:4-6; Mët. 23:34) Ngatī ayī-ö töngamuh lohten öi öt ṙòkhöre öi laklöng öi in minë kanihngenre, mihôiṅ pöri ayī-ö ṙātö-ellōnre tö ò nö öthō nö ṙāngen më tarikre, yip tö hangenlōn tö ò.d—Sal. 9:10.

KĒTÖ INREUSKÖ ALAHA HĪ ANG YĀVĒ

15. Sitih inlahen öi teūngen tö inreuskö alahare öi löktö im vinë-ekūötēv, Paipöl hēk më prötör sistör? (2 Kòrin 1:3, 4)

¹⁵ Vë-evkūö 2 Kòrin 1:3, 4. Lohten in ṙung öi hēṙu öi kalē-ě miṙivlōn hēk yīhi pinṙūtölōn inrē. Ngatī öm më-eṅ inrē öm la-al nup kanihngenre hēk ngölōn inrē töre öm höng hěngtak? Yěn ngatī, ngaich lohten min më-eṅ öm ngölōn tö yip tahëng nö öt akaha elmat tö ngam kanihngen meh, akaha elmat pöri ang Yāvē. Rö-ö anga-aṅ nöng akahakūö tö ngam chanökö hī öi la-al minë kanihngenre, pön kētö ‘inreuskö alaha hī inrē öi la-al minë kinlahare.’ Nö sitih inlahen? Yēḵ hī öi vë-ekūö Yāvē ngaich kētö ngam lanāmö anga-aṅ nö in hī ngam chmööḵngö taṙòkhöre mikah. (Filip. 4:6, 7) Ngaich yēḵ hī öi haköp ngam ṙô ngam Tēv imat ngam Paipöl ngaich teūngen min ayī-ö tö inreuskö alahare. Vënyu nang ayī-ö öi in e tö ngam ṙôken hanangenlōn ò tö hī, harūnö hī inrē im mikah, hěnghöre kētö ngam maheūṅkkö hī inrē. Teūngen in tö nganönöre yēḵ hī öi haköpö u, teūngen inrē ayī-ö tö inreuskö alahare öi el minë mīting yěi hang minë tövai tö vënyu aṅmat ngam Paipöl hēk yēḵ hī inrē öi meukkūö më prötör sistör.

16. Asuh öp haköplö hī öi löktö in ngam ekspirīön nā Nëtön nā Prisillā?

¹⁶ Löktö im ṙô re ang Yāvē nö hangönken hī hēk kētö inreuskö alaha hī inrē. Ta-a töi mikahtö elmatre öi löktö in ngam ekspirīön nā Nëtön nā Prisillā, minā mi-iyöng Amërikā. Inuk urěh samyeūheu cha-a nö vī inlahenre nö chuh in nup kamngö tö öl nö teunghu tö ngam tölöök inhānga. Ngö ṙô ang Nëtön: “Ṙinātu-ellōn ai, ai in Yāvē tö ò min nö kētö inkòlô minë la-en ai.” Ik sā cha pöri nö chuh in ngam tö tufömngöre kamngö nö la-evṙen ngaich hönglöö nö harīkngöre ngam inlahen nö in e. Vahavö ngaich cha-a hēk kihngen inrē nö ha-aṅh nômöre tökūöre nö öt teūngen tö kinmānöre. Unôichrit e ngaich cha-a nö havan nö chuh patīre, höng kihngen hēk cha-a tö rupīö nöng in e. Ngö ṙô ang Nëtön nö fēken e angū-ö ṙētak: “Ngam lōn ai lang inlahen ai, öt ngatī inlahen angū-ö. Ngölōn chū-ö, ‘uich höng vaichköreren lohten, lökten ang Yāvē nö öt kētö inkòlô ai.’” Unôichngöre ngaich nā Nëtön nā prisillā nö akahaiṙen töre nö öt ṙā-ayö tö Yāvē el ṙētak minë töpōyen kanihngen. Ngö ṙô Nëtön: “Sā inlahen ngòh tö akaha hol nö hareuskö alaha hī el ṙētak minë kanihngen hēk hayööken hī inrē, ngatī inlahen ai, ai teūngen tö inreuskö alaha ai löktö mat ngam Paipöl hēk löktö in e inrē öi akahakūö tö nup tö hòṅ inlahenre, hö-ö ngaich ai afēkö minë kanihngenre, pöi chumkūöṙen tö minë inlahen tī Yāvē nö hayööken ai, ai la-al minë kanihngenre. Löktö in e ngam ṙinātö-ellōn ai nö ngönlöre hēk hööngöre inrē ai, ai la-al minë yamih kanihngenre.”

17. Sitih inlahen ang sistör Hëlka nö teūngen tö inreuskö alahare? (Ngëichkö ngam nyat.)

¹⁷ Löktö in më prötör sistör in inrē öi mihôiṅ öi teūngen tö inreuskö alahare. Ta-a töi mikahtö elmatre öi löktö in ngih ekspirīön sistör Hëlka, mi-iyöng Höngköri. Samyeūheuv rò-òten anga-aṅ nö la-al minë tö ṙōlkangen kanihngenre angū-ö lāinyngen ò nöng örheūheu nö haṙivlōn, kūöṅn elmat inrē anga-aṅ töre hēk höng öt yanööluṙen tī anga-aṅ tölōnre. Fēken e angū-ö ṙētak anga-aṅ nö vënyö inlahen Yāvē nö löktö in më prötör sistör nö hareuskö alaha ò. Ngö ṙô anga-aṅ: “Kinmānu chin sin hēk ngamëichkö ngam kūönre inrē tövahāvö, hěnghöre la-al minë tahëng inrē chū-ö kanihngenre, angū-ö lāinyngen chu öich ṙōlheuh kūönṅngöre ellōn öich la-evṙen hēk pöri ang Yāvē nö kē-ěkūö chu tö ngam kumlēḵ. Öt hěnghang heuh ang Yāvē nö in minë tö 30 samyeūheu nö öt hateūngngö minë öt kinlēḵngôre hēk öt hěnghang inrē anga-aṅ nö öt kētö inreuskö alaha chu. Yēḵ chu ṙung öich haṙivlōn ngaich öthō min nö öt hěngtak prötör sistör tö mësechö chu, söömtö kāt chu hēk eū nup tövai inrē la-en chu. Yīhi nganönö chū-ö yěich hang minë tö reuslöre alaha tī ṙô cha hēk meuk ngam hanangenlōn cha inrē tö chu. akahakūö chū-ö tö u nöng tī Yāvē.”

18. Sitih inlahen öi ayī-ö mihôiṅ kētö inreuskö alaha yip tahëng holre?

¹⁸ Töt insā-av an ngam inlahen hī öi mihôiṅ inrē ayī-ö öi sā inlahen Yāvē kētö inreuskö alaha yip tahëng holre. Öi sitih inlahen? Chumkūöṙen ayī-ö öi hangihtö ṙô yip holre, mihôiṅ inrē öi löktö in minë ṙô re öi haṙamkölōn cha hēk asā öp kanò-òre öi hayööken cha. (Inch. 3:27) Ma-ainyre in ṙung öi hòṅ hareuskö alaha yip tö kihngen holre, pòrô cha-a nö töt lamöklōn Yāvē. Mihôiṅ ayī-ö öi chuh in yip holre tövahāvö, tökalē-ě miṙivlōn hēk tö kihngen ellōn inrē. Mihôiṅ ayī-ö öi chumkūöṙen hanightö ṙô cha yěn vënyö nup kanihngenre ngaich löknyö mat ngam Paipöl ayī-ö mihôiṅ öi hangönken cha. Yēḵ hī min öi asīnken Yāvē ngam “Tēv kamētö inreuskö alaha” ngaich hayööken yip prötör sistör re min ayī-ö nö la-al minë kanihngenre. Rö-ö nöng anū-ö, pön mihôiṅ inrē min më tarik töt lamöklōn Yāvē nö lökngöre nö meuk minë inlahen hī hēk lōnu inrē min cha-a nö haköp inlahen Yāvē.—Mët. 5:16.

ÖRHEŪHEU ANG YĀVĒ NÖ IN HĪ

19. Asuh öp inlahen Yāvē nö chö-öinyten hī ngaich sitih inlahen ayī-ö mihôiṅ öi asīnken ò?

¹⁹ Chumkūöṙen ang Yāvē tö yip tarik tö hangenlōn tö ò. Yēḵ hī ṙung öi el minë kanihngen ngaich öthō anga-aṅ nö ṙāngen hī. Sā inlahen yip inyööngö nö chumkūöṙen tö më kūönre, ngatī inlahen ang Yāvē nö chumkūöṙen tö më tarikre tö hangenlōn tö ò. Hachōḵ cha anga-aṅ, hateungngö minë kuilōn cha, laklen cha hēk kētö inreuskö alaha cha inrē. Mihôiṅ inrē ayī-ö öi asīnkö inlahen ngam tö hangenlōn Yöngre Yāvē. Yěn ōt ṙung yip hol hī tö kihngen nö la-al minë kanihngenre ngaich mihôiṅ ayī-ö öi holṙen cha öi kētö inreuskö alaha cha. Lohten in ayī-ö inrē öi la-al në tö ngatī kanihngen hēk la-al nup tökirööngen inrē miṙivlōnre. Mihôiṅ pöri ayī-ö öi ṙātö-ellōnre tö Yāvē nö in hī, ngö ṙô anga-aṅ nö kilēḵngôre nö in hī: “Uh man pa-ekūö, tön in meh chin.” (Isa. 41:10) Teūngen in tö nganönöre yēḵ hī öi vë-ekūö ngih miröökö! Kô-en takô ang Yāvē nö öthō nö ṙāngen hī öi höng hěngtak.