Asīnken Yip Töchiplö Ma-ahānga!

1-2. (a) Sitih inlahen öi harīkngöre tö më ma-ahānga? (b) Asuh nup töhěngren tinrīken hī tö më ma-ahānga?

YĒ HĪ kakken më töt kanṙeūken ma-ahānga, ngaich lohten ayī-ö ngölōn tö cha nö harīkngöre tö hī. (Tan. 7:9, 10) Pön tö urěhlö vinī-i cha-a tö hī öi tarik. (Yōp 38:4, 7) Hěnghöre töhet, tö kalēḵ hēk tölöök inrē nö hamang chööngö Yāvē. Öt kanò-òv in ayī-ö tarik öi sā inlahen cha, pò hī töng öthet. Sön pöri ang Yāvē nö tūökten hī el ngam mikūönö ò.—Lūk. 9:26.

² Kô-en in öi harīkngöre takô tö më ma-ahānga. Ōtre pöri nup töhěngren tinrīken hī. Tö sā hī mihôiṅ hameuktö minë tövai tinrīken Yāvē hēk kahngenre inrē öi kē nup fëslare. Sā inlahen cha ayī-ö, minë-enyu, inkahkuvö hēk aṅhav in ayī-ö tö nup la-en kinë-ekūöre. Hěnghöre kūyulōn ayī-ö töre öi haköp inlahen ngam Tēv hēk ha-öinyö ò inrē.—1 Pīt. 1:12.

3. Asūp mihôiṅ haköplö hī öi in më ma-ahānga?

³ Pōyen nup tinrīken hī tö sāḵta nö in nup tinrīken më ma-ahānga. Yē hī pöri min chumkūöṙen tö u, ngaich teūngen min ayī-ö tö töpōyen haköplöre hēk reuslöre alaha inrē. Mikahtökūöre in min in ngih ātiköl tö hī mihôiṅ öi sitih inlahen sā më ma-ahānga öi aṅhav in töm inyāichngö, hangenlōn tö tarik, möi hēk köptī inrē tö ngam hanëtö öi el ngam māṅ.

ĪNU YIN MË MA-AHĀNGA TÖM INYĀICHNGÖ

4. (a) Sitih inlahen mikahkūö öi tö më ma-ahānga nö aṅhav in tö ngam inyāichngö? (b) Kūö yòh cha-a nö aṅhav in tö ngam inyāichngö? (Salmai 89:7)

⁴ Tökalēḵ yin më ma-ahānga, tö aṅhav in tö heuneū-en hēk tökiröngen mikah inrē, sön pöri cha-a nö hang nup töng chööngö Yāvē. (Sal. 103:20) Öt tāilölōn cha-a tö nup la-enre, ötrēhěn inrē nö lōntö ineū-eure. Lōnu pöri cha-a tö ngam kuilōn Yāvē nö teung.a (Ran. 32:24, 29; 2 Rā. 19:35) Lōnu cha-a tö Yāvē nöng anga-aṅ tö ha-öinyö. Kiröngen hanangenlōn yin më ma-ahānga tö Yāvē hēk milēḵṙen inrē tö ò, lökten cha-a nö aṅhav in tö ngam inyāichngö.—Vë-evkūö Salmai 89:7.

5. Sitih inlahen öi akahakūö tö ngòh ma-ahānga nö aṅhav in tö ngam inyāichngö, ik sā ò nö halēnö Yôhan? (Ngëichkö ngam nyat.)

⁵ Chumkūöṙen tö ök ihih inlahngen ik 96 C.E. ik sā Yôhan nö hameukhumat töm töt insā-av tö meūkö tök töhěng tak ma-ahānga ngam töt vënyu minë-eny. (Inm. 1:1) Asuh ngaich ök inlahen Yôhan ik sā ò nö meūkö e? Sontökūöre anga-aṅ nö i-uk röön ök ma-ahānga ngaich ha-öinyö ò. Ilööṙen pöri ngam ma-ahānga nö asökngen ò ngaich ngöṙô: ‘Uh man ngatī inlahen: hol meh chin chū-ö tanölöṙô, hol yip hol meh inrē . . . ha-öiny ngam Tēv man.’ (Inm. 19:10) Kô-en ngam ma-ahānga nö öt halöngngen re nö ha-öinyö, pön aṅhav in tö ngam inyāichngö. Ilööṙen anga-aṅ nö hōten Yôhan nö ha-öinyö Yāvē. Tö samyeūheuv ön ngam ma-ahānga nö ilinkölōn Yāvē hēk tökalēḵ inrē, öt rēhěn pöri anga-aṅ nö kun elmat tö Yôhan. Vë-enyre pöri anga-aṅ nö in ò töre nöng tanöölô. Hěng inrē ngih inlahen ngam ma-ahānga, ik sā ò nö halēn ngam tökönyö ṙēḵti tanīnöṙô ngaich öt hatainyken ò anga-aṅ, pön holtö hanangenlōnre nö vë-ekūö ò. Akahakūö inrē anga-aṅ tö Yôhan nö pingangkūö, lökten nö sontökūöre nö ha-öinyö ò.

6. Asūp tö hòṅ inlahen hī yěi hòṅ sā inlahen yip ma-ahānga aṅhav in ngam inyāichngö?

⁶ Sitih inlahen öi mihôiṅ sā më ma-ahānga īnu töm inyāichngö? Ötkô in öi eūkö nup töng inlahenre i linökölōn Yāvē öi in yip tahëng. Lōnu pöri ayī-ö tö u nöng nööinyö Yāvē nö ṙòkhöre. (1 Kòr. 4:7) Yē hī ngaich tömarô-òten ilinökö lōn Yāvē hēk teūngen inrē tö nup tö pōyen la-enre, ngaich ötkô ayī-ö kun elmat tö yip tahëng prötör sistör re. Asā ṙôken nup taneūngen hī la-en, ngaich hòṅ ngatī inlahen ayī-ö öi tumreūtöre. (Lūk. 9:48) Hòṅ sā më ma-ahānga ayī-ö hayööken yip tahëng hēk ötkô inrē öi mööḵlö mat töre tö yip tahëng.

7. Sitih inlahen öi hameuktöre īnu tö ngam inyāichngö yē hī öi halēn hēk halööktö mufē yip tahëng?

⁷ Hēṙu in ṙung öi hòṅ halēn hēk halööktö mufē yip prötör sistör hēk tö yip kūönre inrē. Sitih inlahen pöri ayī-ö öi mihôiṅ hameuk töm inyāichngöre. Lohten in ṙung öi hòṅ halööknyö ṙôre öi vë-eny nup inlahen cha. Hē e pöri ayī-ö öi hòṅ köplōn tö inlahen ök ma-ahānga ök mahalēnö Yôhan. Rö-ö in min pöi halööknyôre öi halēn öp tarik, hö-ö pöri öi hatāinyken ò. Hòṅ chumkūöṙen inrē ayīö tö nup ṙôre nö tö hòṅ reuslöre alaha tī tö ò. Yē hī min hayāichngöre, ngaich holtö hanangenlōnre hēk minlēḵṙenre min ayī-ö öi kētö inlēnö löknyö mat ngam Paipöl.—Kòl. 4:6.

HANGENLŌN YIN MË MA-AHĀNGA TÖ TARIK

8. (a) Sitih inlahen mikahkūö öi tö më ma-ahānga nö hangenlōn tö tarik öi löktö in ngam Lūkös 15:10? (b) Sitih inlahen aich më ma-ahānga nö holṙen hī im la-en inhānga? (Ngëichkö ngam nyat.)

⁸ Hangenlōn takô yin më ma-ahānga tö hī öi tarik hēk chumkūöṙen inrē. Pòrô cha-a nö īnu tö tökiröngen kumlēḵ sön nö öt kun elmat tö hī. Vënyu nang in tö ngam Paipöl tö öp töhěng tak sīṅp nö havantöre nö in Yāvē yēḵ ò nö lō-ongkūö, töngö manah tö öp tarik yěn halööktitre, ngaich ṙamölōn më ma-ahānga nö meuk inlahen ò. (Vë-evkūö Lūkös 15:10.) Ṙamlōn inrē cha-a yěn meuk öp töhěng tak tarik nö harīngö minë tinrīkenre kūö ò nö haköp inlahen Yāvē. Rö-ö nöng angū-ö pön holtö kumlēḵ alahare inrē më ma-ahānga nö la-evṙen tö ngam tölöök inhānga. (Inm. 14:6) Rö-ö pöri nö kūö cha nö hakôten re nö ahānga, lohten pöri cha-a nö hayööken hī öi haköpten yip tarik tö inlahen Yāvē. Ötkô pöri ayī-ö halöökṙôre tö inlahen më ma-ahānga nöng cha-a mahayööken hī öi chuh in yip tarik. Ṙën nö ngatī pön ṙolkangen talöökö tī ang Yāvē nö hayööken hī. Tö sā ò nö löktö in ngam töhet kumlēḵ re, mihôiṅ anga-aṅ nö lökten in e nö tūöktö yip tarik nö chuh in ò, yip tö hòṅ mikahtökūöre tö inlahen ò hēk mihôiṅ inrē nö hayööken hī chuh in cha. (Inl. 16:6, 7) Hayööken hī pöri inrē më ma-ahānga öi in ngam la-en inhānga. Lökten mihôiṅ ayī-ö ṙātö-ellōnre tö cha nö holṙen hī öi ing la-en.—Ngëichkö ngam pòks, “Hāngö Minë Ṙô Cha Nö Vë-ekūötēv.”b

9. Sitih inlahen öi hameuktöre sā inlahen më ma-ahānga öi hangenlōn tö tarik?

⁹ Sitih inlahen öi kò-òren hameuktöre sā inlahen më ma-ahānga öi hangenlōn tö tarik? Yěi hang öp töhěng minkahtölōn ṙung el mīting, inlahen öp töhěng tak tarik nö havantu inlahen nö Vamënyen Yāvē, ngaich ṙamlōn ṙung ayī-ö sā ṙanamlōn më ma-ahānga. Mihôiṅ ayī-ö öi ha-öinytö yīhi öp tarik hēk kētö ṙinatö-ellōn ò inrē tö hī öi hangenlōn tö ò. (Lūk. 15:4-7; 2 Kòr. 2:6-8) Asīnken yip ma-ahānga inrē öi kētöre in ngam la-en inhānga, öi hayööken yip prötör sistör. (Mum. 11:6) Kò-òren më-eṅ öm fēkö në intöönö, mihôiṅ öich chū-ö öich hayööken yip prötör sistör yip töng möl nö rultenre nö im la-en inhānga? Mihôiṅ hòng inrē chū-ö öich hayööken yip tököiny hēk tö vahav, yip tötkô nö kunyī-inyre tö patī nö ahānga?

10. Asuh öp haköplö meh in ngam ekspirīön sistör Sëra?

¹⁰ Mihôiṅ in ṙātö-ellōnre tö më ma-ahānga min nö hayööken hī, yěn ōt nup lāinyngenre hī öt teungten löklōn Yāvē. Chumkūöṙen tö inlahen sistör Sërac ngòh aṅ Intiā. 20 samyeūheu rò-òten anga-aṅ nö la-evṙen töm la-en painīör. Vahav pöri ngaich anga-aṅ, angū-ö ngaich tö tī-iv tö ò nö haṙivlōn. Havan pöri ngam ṙanamlōn ò, kūö ngam tö örheūheu vinë-ekūö ngam Paipöl hēk inyöökenre inrē tö më prötör sistör. Harīngö inlahenre anga-aṅ nö im inhānga kūö ngam invahre. Kihngen anga-aṅ nö uichhaka nö kūich chitri, lökten ò nöng el fūn nö ahānga hēk vë-ekūö yip rītön visitre. Lökten in nuk ṙô yik vahë-ekūöre anga-aṅ nö akahakūö tö yip tarik nö ōt lohten yip tö hòṅ haköp inlahen ngam Tēv. Asuh ngaich ök ṙòng ngam inlahen ò? Teūngen ngaich anga-aṅ tö më tö 70 ṙôken kahë istötīre. Öt kò-òre ṙētak anga-aṅ nö kē istötī cha nö ṙòkhöre, lökten anga-aṅ nö kētö yik rīkre istötīre nö in yik tahëng prötör sistör. Ōtre yip ngaich yamihtökūö nö el mīting in më kahë istötī ò. Kô-en më ma-ahānga nö kiröngen ṙanamlōn nö hayööken më prötör sistör, më tö sā inlahen kumlēḵ alaha sistör Sëra nö im linökö lōn Yāvē.

ĪNU YIN MË MA-AHĀNGA TÖ NGAM MANÖÖYÖ

11. Kūö yòh aich më tö chiplö ma-ahānga nö tövai nö inchōḵkūö hī nö im manööyö?

¹¹ Tövai yin më ma-ahānga nö inchōḵkūö hī nö im manööyö. Köönyu samyeūheu rò-òten cha-a nö meuk sanīöpö në ötlanöökö nö ing panam. Tö sā cha nö meuk inlahen ngam Satān hēk tö yip tahëng tötlöök ma-ahānga më mu-urěh sin nö löklōn Yāvē, ngaich pöri cha-a nö la-al ò. (Ran. 3:1; 6:1, 2; Yūt 6) Vënyu inrē angū-ö nö imat ngam Paipöl töp töhěng tak tötlöök ma-ahānga nö ṙōl sumkam nö la-al öp tölöök ma-ahānga. (Tan. 10:13) Rö-ö nöng angū-ö, pön löktökūö in nuk ṙētak nā Atöm nā Ēvā më ma-ahānga nö meuk më tarik nöng kūönen më kamëtöre nö löklōn Yāvē. Sön pöri cha-a nö ngöt nö löklōn ò. Pön akahakūö cha-a tö Yāvē min nö löngö ṙētak tī nö ha-etngen në ötlanöökö.

12. Asūp mahayööken hī īnu töm manööyö?

¹² Sitih inlahen öi mihôiṅ sā manööyö më ma-ahānga? Lohten in öi sā inlahen më ma-ahānga öi meuk minë ötlanöökö ing panam hēk lohten inrē öi ötlēkaṙen. Hòṅ ṙātö-ellōnre pöri ayī-ö tö Yāvē min nö löngö ṙētak tī nö ha-etngen u. Lökten mihôiṅ öi sā inlahen më tö chiplö ma-ahānga öi ‘öt heūlngöre öi in minë tölöök la-en.’ (Kal. 6:9) Köplōn inrē tö Yāvē nö hayööken hī min öi aṅhav in töm manööyö. (1 Kòr. 10:13) Lökten öi hòṅ vë-ekūötēv hēk havëkökūö ò tö ngam töhet kumlēḵ, hòṅ hī möi hēk ṙamlōn öi löklōn ò. (Kal. 5:22; Kòl. 1:11) Sitih inlahen pöri ayī-ö yěi ötlēkaṙen? Um pa-ekūö, hayönglenre pöri in Yāvē. Köplōn tö ò nö örheūheu min nö holṙen meh hēk hangönken meh inrē.—Hep. 13:6.

HAKÖPKÖ HANETÖ NGAM MĀṄ YIN MË MA-AHĀNGA

13. Asūp tö kētu la-en më ma-ahānga ing manā-aṅ sakāmö tö Yāvē? (Mëtiv 13:47-49)

¹³ Kē-ěvkūö yin më ma-ahānga tö Yāvē nö ngëichkö ngam la-en inhānga nö keuheūtngöre chūök ikūö ngih panam nö in më tö ṙōlkangen mihëṅṙö tarik. (Vë-evkūö Mëtiv 13:47-49.) Pōyen yip tarik in cha mahalööktö nup tinrīkenre nö sā kūilōn Yāvē. Hö-ö pöri cha-a nö ṙòkhöre nö ngatī inlahen. Ngih ön la-en më ma-ahānga nö “harēvngö yip tölöök tarik tö yip tötlöök.” Tö ngö manah, tö cha nö haköpkö ngam hanetö nö el ngam māṅ. Öt tö ngö manah pöri angū-ö tö yip tarik yip ṙamāngenre nö chuh el mīting hēk ahānga, nö ötkô nö havan nö el ngam māṅ. Öt rēhěn nö tö ngö manah nö öthěng tak ngaich min kamëken tökööl nö el ngam māṅ. Ṙātö-ellōnre pöri ayī-ö tö më ma-ahānga nö ma-ainyre nö haköpkö ngam hanetö nö el ngam māṅ.

14-15. Asuh nup mihôiṅ inlahen hī hòṅ hī köptī tö ngam hanetö el ngam māṅ? (Ngëichkö minë nyat.)

¹⁴ Sitih inlahen öi haköpkö hanetö ngam māṅ öi sā inlahen më ma-ahānga? La-en hī ön öi ṙòkhöre haköpkö ngam hanetö ngam māṅ. Öi sitih inlahen? Hòṅ holtö mikah elmatre öi katöllö holre hēk ṙūöhngöre inrē tö nup tö pasū-u tī tö ngam innôlö hī in Yāvē. (Sal. 101:3) Mihôiṅ inrē öi hayööken yip tahëng prötör sistör nö haköpkö ngam innôlöre nö in Yāvē. Tö sā meh yěm akahalōn töp töhěng tak prötör hēk sistör nö kēken tökiröng fālen, ngaich kūö ngam hanangenlōnre më-eṅ tö ò öm tölṙô ò nö chuh in yip minṙöinylen nö vënyö ngam fālenre. Yěn öt hangṙô meh anga-aṅ, ngaich mihôiṅ më-eṅ hakôtenre öm chuh in yip minṙöinylen öm vënyö ngam fālen ò. Lōnu in tö më prötör sistör re nö ilööṙen nö teūngen tö inyöökenre, hòṅ cha hēk nö hanôltöre nö in Yāvē.—Yāk. 5:14, 15.

¹⁵ Yěn ōt yip tö ha-uknyu töm māṅ kūö nup tökiröng fālenre, ngaich ‘ötkô öi hanôltöre in cha.’d (1 Kòr. 5:9-13) Mahameuktö hanangenlōnre min ayī-ö tö cha yē hī öi öt hanôlö cha hēk hamang chööngö Yāvē inrē, yē hī min ngatī inlahen ngaich lohten min cha-a nö hòṅ havantöre nö in Yāvē. Yěn havantöre min cha-a nö in Yāvē, ngaich ṙamlōn min Yāvē tö yip ma-ahānga hēk ayī-ö inrē. Kô-en nö töt insā-av ngam halēnlö Yāvē inköpkö hanetö ngam māṅ.—Lūk. 15:7.

16. Asuh nup tö hòṅ inlahen meh, yěm hòṅ asīnken më ma-ahānga?

¹⁶ Ha-öiny tī Yāvē in pò ò nö haköpten hī tö inlahen më ma-ahānga hēk kētö ṙētak hī inrē öi holṙen cha la-evṙen. Ta-a chěi töi asīnken më ma-ahānga öi īnu töm inyāichngö, hangenlōn tö tarik, īnu inrē töm manööyö hēk örheūheu öi haköpkö ngam hanetö el ngam māṅ. Yē hī min öi ma-ainyre asīnkö inlahen më tö chiplö ma-ahānga, ngaich örheūheu min öi köp el ngam mikūönö Yāvē.