Hareuskö Alaha Hī Ang Yāvē

1. Asuh nup kanihngen yik Yahūti töhaköövö nö i Pēpilön?

TÖI chumkūöṙen tö kanihngen yik Yahūti tö haköövö nö i Pēpilön. Iyöng kūö ngam töt panamre cha-a, ngaich kôta mat nö meuk inlahen ngam panamre nö piyāyi. Kūö yòh cha-a nö ngatī inlahen? Kūö cha hēk tö yik muvöhngö cha nö öt hang chööngö Yāvē. (2 Kin. 36:15, 16, 20, 21) Kô-en cha-a nö kihngen nö i Pēpilön pön öt uroh nö kahngenre nö in nup kuilōnre. (Yar. 29:4-7) Höng öt kuchīken cha-a nö iyöng in e. Töi hangṙô ngòh in cha tö hěngtak töchiplö Yahūti: “I kui nup tahël i Pēpilön umuh ihö ūichhaka: hôṅ, peuiny ihö, hē ih fēken Siyôn.” (Sal. 137:1) Kiröngen miṙivlōn cha-a nö iyöng Pēpilön, isuh aich öre nö teūngen tö inreuskö alahare?

2-3. (a) Sitih inlahen ang Yāvē nö hareuskö alaha yik Yahūti mi-iyöng Pēpilön? (b) Asūp min kahakkö hī in ngih ātiköl?

² Yāvē an ‘Tēv kamëtö inreuskö alaha hī.’ (2 Kòr. 1:3) Hangenlōn anga-aṅ tö më tarikre lökten nö kētö inreuskö alaha cha. Akahakūö anga-aṅ misī tö yik Yahūti mi-iyöng Pēpilōn nö fē-ělre min tö minë vanāichöre hēk havantö inlahenre min nö ha-öinyö ò. (Isa. 59:20) Lökten ang Yāvē nö löktö in pròfět Isayā tī nö kūichlö nuk rīkre tökilē-ěyö, urēhěkūö tö 100 samyeūheu inlahen yik Yahūti nö haköövö. Imat ngam līpöre Isayā in öi teūngen tö u. Kūö yòh ang Yāvē nö tölṙô kinūichö u? Ngö ṙô tī ang Isayā, “Ngöṙô ngam Tēv yīö, ‘Hareuskö alaha meh tarik chu!’” (Isa. 40:1) Hòṅ hareuskö alaha yik tarikre hē e ang Yāvē. Reuslöre alaha takô lohten yik mu-unôich Yahūti mi-iyöng Pēpilön nö lökten in ngih līpöre.

³ Chumkūöṙen in min tö inlahen Yāvē nö sitih inlahen nö hareuskö alaha yik Yahūti: (1) Kilēḵngôre anga-aṅ tö ò min nö aṙēlen yip mahalööktitre, (2) Kētö maheūkkö cha anga-aṅ hēk (3) Kēngö ngam pinhë-eṅkūö cha. Ngatī in ayī-ö töngamuh hòṅ lōnu tö inreuskö alahare. Lökten in min mikahtökūöre tö hī mihôiṅ sitih inlahen teūngen tö raneuslö alahare öi löktö in minë ṙô kahūichlö Yāvē nö chö-önytö yik Yahūti.

HAMEUKTÖ NGAM NEŪKÖLŌNRE ANG YĀVĒ NÖ AṘĒLEN HĪ

4. Sitih inlahen ang Yāvē nö hameuktö ngam neūkölōnre nö in yik Yahūti? (Isayā 55:7)

⁴ ‘Yöng neūkölōn’ an Yāvē. (2 Kòr. 1:3) Löktö in Isayā tī anga-aṅ nö kilēḵngôre nö in yik Yahūti mahalööktitre, tö ò min nö hameuktö ngam neūkölōnre nö aṙēlen cha. (Vë-evkūö Isayā 55:7.) Ngöṙô anga-aṅ, “Holtö ngam töt chanuhuvṙen pöri min hanangenlōn öich aṙē-ělōn tö meh.” (Isa. 54:8) Sitih inlahen ang Yāvē nö hameuktö ngam neūkölōnre nö in cha? Kô-en yik Yahūti nö kihngen tö kūö minë vanāichöre, lökten cha-a nö ṙōl samyeūheu nö haköövö nö i Pēpilön. Kilēḵngôre pöri ang Yāvē tö cha min nö öt köpsöreṙen nö el inköövö. (Isa. 40:2) Iṙôken raneuslö alaha lohten më Yahūti mahalööktitre nö hang ngih ṙô!

5. Asuh öp chö-öiny hī ṙātö-ellōnre tö Yāvē nö aṙēlen hī?

⁵ Asuh öp haköplö hī öi in e? Holtö ellōnre ang Yāvē nö aṙēlen më tarikre. Pōyen nun minë chö-öiny hī töngamuh öi ṙātö-ellōnre in minë kinlēḵngô Yāvē, minë tö hö-öv misī nö in yik Yahūti. Akahakūö ayī-ö töngamuh tö ngam inlahen tī Yāvē nö aṙēlen hī. Lohten nö unôichrit ngam tö 700 samyeūheu inlahen Isayā nö pròfěsī, ang Yāvē nö tīnten ngam hanangenlōnre kūönre nö ing panam nö kēngö nômöre tö pôkūö hī. Yē hī min öi ṙātö-ellōnre in ngam tö kitaknyu mahām Yēsū hēk yěi halööktit minë tököölre inrē, ngaich ‘ha-etngen’ minë tökööl hī min ang Yāvē. (Inl. 3:19; Isa. 1:18; Efi. 1:7) Kô-en takô ang Yāvē nö Tēv neūkölōn!

6. Sitih inlahen öi teūngen tö inreuskö alahare yěi köplōn tö Yāvē nö aṙēlen hī? (Ngëichkö ngam nyat.)

⁶ Teūngen in tö inreuskö alahare, öi löktö in ngam Isayā 55:7 yěi höng fēkenre vaichköreṙen. Lohten in öi kamëken tökiröng fālen sin in nuk urěh ṙētak, ngaich halööktit re ngaich ayī-ö. Lohten pöri hēk öi unôichngöre öi fē-ělre tö nuk vanāichöre. Anū-ö min në lāinyngen hī lohten öi höng ngölōn töre öi töng vaichköreṙen. Asuh pöri mihôiṅ öp inlahen hī? Köpölōn, yē hī ngaich öi hō-en minë vanāichöre hēk lök im tölöng talöökö, ngaich mihôiṅ öi ṙātö-ellōnre tö Yāvē nö ngaich nö aṙēlen hī. (Asātô e im Yarimiā 31:34.) Yē Yāvē nö öt köplōn tö minë vanaichö hī, ngaich hòṅ köplōn hòng ayī-ö tö u? Hö-ö an Yāvē nö ngëichkö minë tö urěhngöre vanaichö hī, pön ngëichken minë inlahen hī töngamuh i linökö lōn ò. (Isi. 33:14-16) Röhta inlahen an min ngam tö aṙē-ělōn Yöng hī Yāvē nö kēngö minë miṙivlōn hī tö kūö minë vanaichköre inlahen hī.

7. Asūp mihôiṅ mahayööken hī vënyö minë tökiröng fālenre öi in më minṙöinylen?

⁷ Hòṅ asuh öp inlahen hī, yěi haṙivlōn tö kūöre öi hayunken nup tökiröng fālenre? Vënyu nang in tö ngam Paipöl tö hī hòṅ kē inyöökenre in më minṙöinylen. (Yāk. 5:14, 15) Mihôiṅ in ṙung kihngen hō-en minë tököölre. Löktö in më minṙöinylen tī pöri ang Yāvē nö hayööken hī, më minṙöinylen tö sā hanangenlōn ò tö hī hēk hòṅ hameuktö ngam neūkölōnre nö in hī, yē hī min köpölōn tö u, ngaich holtö ellōnre min öi halööktitre hēk öt pa-ekūö inrē min öi vë-eny nang më minṙöinylen. Töi chumkūöṙen öi ngëichkö ngih ekspirīön prötör Artör,a Kihngen ellōn anga-aṅ tö kūö ngam vanāichöre, löktö in më minṙöinylen tī pöri ang Yāvē nö hayööken ò nö kētö inreuskö alaha ò. Ngöṙô ang Artör, “Hěng samyeūheu rò-òten chū-ö öich meuk minë tötlöng tö meūkö. Ik sā chu pöri öich hang ngam minkahten i alaha ngam elkuilōn hī, ngaich vënyen minë vanāichöre chū-ö öich in ngam pīhöre hēk in më minṙöinylen inrē. Sā tö höhlö ngaich chū-ö hē e töp kumre tö langan hēk teūngen inrē tö lanāmö elkuilōnre. Pòrô chū-ö öich halööktitre sön öich hēṙu haṙivlōn yěch fēkö ngam tökiröng fālenre. Kētö ṙinātö-ellōn chu pöri më minṙöinylen, tö Yāvē nö in chu hēk hangenlōn inrē tö chu lökten nö halööktit chu. Lökngöre ellōn chū-ö tö nuk ṙô cha töp lökten chu ngaich öich halööktö minë mufēre. ” Ngaich ön töngamuh prötör Artör nö la-evṙen tö ngam painīör hēk mahayööken töla-evṙen inrē. Kô-en öi teūngen tö inreuskö alahare, tö Yāvē nö hameuktö ngam neūkölōnre nö aṙēlen hī, yěi kô-en öi halööktitre!

KĒTÖ MAHEŪKKÖ HĪ AN YĀVĒ

8. (a) Asuh ök kahëtö Yāvē maheūkkö yik Yahūti mi-iyöng Pēpilön? (b) Sitih inlahen mufē cha-a ik sā cha nö teūngen tö ngam maheūkköre lamöktö in Yāvē? (Isayā 40:29-31)

⁸ Tökalēḵ ön hē e ngam panam Pēpilön nö mahayöng, ngaich öt ṙamānyen yik töhaköövö cha-a misī, lökten nö kihngen yik Yahūti mi-iyöng in e. (Isa. 14:17) Kētö maheūkkö më tarikre pöri ang Yāvē hēk kilēḵngôre tö ò min nö ṙānyen cha, öt hěng tak min tö kô nö asökngen ò. (Isa. 44:26; 55:12) Höng sā pitung yin më aṅ Pēpilön nö imat Yāvē. (Isa. 40:15) Öt ōttit min cha-a yěn fëli tö ò. Sitih mufē yik Yahūti nö hang ngih kinlēḵngô Yāvē? Ötlöktu cha-a nö öt teūngen tö raneuslö alahare lohten. Ngöṙô tī inrē ang Isayā nö kūich, ‘teūngen yin më mahayönglenre nö in Yāvē tö ngam tö tufömngöre kumlēḵ.’ (Vë-evkūö Isayā 40:29-31.) Teūngen yik Yahūti lohten tö raneuslö alahare nö löktö in ngam maheūkköre kahëtö Yāvē. Lökten cha-a hē e nö mihôiṅ nö ‘sā kël matēṙö nö kiteūlöre.’

9. Asuh nuk chö-öiny yik Yahūti nö hòṅ ṙātö-ellōnre nö in nuk kinlēḵngô Yāvē?

⁹ Kētö ngam chö-öiny yik Yahūti ang Yāvē yik mi-iyöng Pēpilön, nö ṙātö-ellōnre nö in minë kinlēḵngô ò. Töi fēkö inlahen cha misī nö kôta mat nö meuk taneungtökūö nuk tö eūka. Akahakūö inrē cha-a tö më aṅ Asiria nö kēngen ngam lā kapā inyööngö tö më aṅ Israel. (Isa. 8:4) Meuk pinyāyngö ngam panamre hē e cha-a Yērūsalem, ngaich haköövö nö chuh Pēpilön. (Isa. 39:5-7) Hěnghöre meuk inlahen Sētikiā inrē nö pīôknyu mat ngaich kē-ě nö chu Pēpilön. (Yar. 39:7; Isi. 12:12, 13) Ṙòkhöre në tö ha-ehangen vinënyi tö Yāvē nö teungtakūö. (Isa. 42:9; 46:10) Ngaich lohten nö ngönlöre ngam ṙinatö-ellōn yik Yahūti, tö Yāvē min nö öthō nö öt hateungngö ngam kinlēngôre nö ṙānyen cha nö ṙā-ang Pēpilön!

10. Asūp mihôiṅ inlahen hī yěi sōten ngam maheūkköre nö paṙūöya in ngih manā-aṅ sakāmö?

¹⁰ Asuh öp haköplö hī öi in e? Yē hī ṙung öi haṙivlōn ngaich mihôiṅ öi teūngen tö inṙamkölōnre öi löktö in ngam maheūkköre kahëtö Yāvē. Kô-en ayī-ö töngamuh öi la-al minë kanihngenre ing manā-aṅ sakāmö. Ötkô pöri öi pa-ekūö hēk haṙivlōn inrē tö kūö u. Pön kilēḵngôre ang Yāvē tö ò min nö kētö ngam töt insā-av maheūkkö hī, ngam nômö tö örheūheu aṅ hēk kētö ngam tövai panam ngam chūök lanāmö hēk kumchikṙen. Hòṅ köplōn ayī-ö tö e. Yē hī min öt köplōn, ngaich sā öp samökhak min ayī-ö nö ikūö öp kirki öp tö paṙūöya mat nö meuk öp tövai elkahòiṙen tö kūö ngam pitung ngam kirki. Yē ngam pitung pöri min nö ha-etiyö, ngaich hetö maheuk min öi meuk ngam elkahòiṙen. Sitih inlahen pöri ayī-ö ha-etngö ngam pitung hòṅ ngam maheūkkö hī nö öt paṙūöya? Hòṅ kēnyö ṙētakre ayī-ö fēkö inlahen ngam tufömngöre panam. Lökten öi haköp minë tö kētu ātiköl inlahen ngam maheūkkö hī. Meuk minë vitiō tö kētu, hang minë tinköökö inrē. Yē hī min ngatī inlahen ngaich öt paṙūöyi min ngam maheūkkö hī. Rö-ö nöng angū-ö pöi hòṅ vë-eny nang Yāvē inrē tö hī öi hökkö taneungtökūö minë kinlēḵngô ò.

11. Löktö yih kumlēḵ ang sistör Chôi nö la-al ngam tökiröng invah re?

¹¹ Töi chumkūöṙen tö ngih ekspirīön sistör Chôi, ngòh tö īnu töm tökiröng invahre. Ṙamölōn pöri anga-aṅ hēk ngön inrē tö kūö ò nö afēkö ngam maheūkköre, ngöṙô anga-aṅ: “Yēḵ chu öich yīhi pinṙūtölōn, ngaich keuheūtnyö ṙô ellōnre chū-ö öich vë-ekūö Yāvē. Akahalōn chū-ö tö Yāvē nö akahakūö tö minë kanihngen chu. Hang ṙô chu inrē anga-aṅ yěich vë-ekūötēv ngaich kē-ěkūö chu tö ngam ‘kumlēḵ ngam tö mötlö tö kumlēḵ tarik.’” (2 Kòr. 4:7) Ngamuh inrē inlahen sistör Chôi pön asehkūöre anga-aṅ tö inlahen re nö ikūö öp tufömngöre panam. “Ngaich öt hěngtak min mi-iyöng kūö öp panam tö ngöṙô: ‘Vahav chin.’” (Isa. 33:24, NW) Ngatī inlahen ayī-ö mihôiṅ asīnken ngòh sistör öi keuheūtnyö ṙô ellōnre in Yāvē hēk örheūheu öi fēkö ngam maheūkköre, ngaich kētö kumlēḵ hī min ang Yāvē.

12. Asuh nup chö-öiny hī ṙātö-ellōnre in minë kinlēḵngô Yāvē? (Ngëichkö ngam nyat.)

¹² Pōyen nuk misī kahëtö Yāvē chö-öiny më Yahūti nö ṙātö-ellōnre nö in minë kinlēḵngô ò. Ngatī inrē anga-aṅ töngamuh nö kētö minë töpōyen chö-öiny hī ṙātö-ellōnre in u. Tö sā hī ngaich töngamuh öi meuk taneungtökūö ngam tö eūka, inlahen ngam mahayöng nö hěngö lā a nö kalēḵ, ngaich hěngö lā a nö ötkalēḵ. (Tan. 2:42, 43) Meuk minë ‘kumyeūnö inrē ayī-ö nö keuheūtngöre chūök.’ Ngaich inrē öi kôta mat öi meuk inlahen ngam tölöök inhānga nö ‘keuheūtngöre chūök’ nö ikūö ngih panam. (Mët. 24:7, 14) Kô-en ayī-ö sīöplöre ṙinatö-ellōn öi löktö in minë tö eūka tö Yāvē tö ò min nö öt löktu nö öt hateungngö nup kinlēḵngôre tö öl nö teungtakūö.

ṘŪÖHNGEN NGAM PINHË-EṄKŪÖ HĪ ANG YĀVĒ

13. (a) Asuh nuk kanihngen yik Yahūti urēhěkūö cha nö ṙānyu? (b) Sitih inlahen ang Yāvē nö hareuskö alaha yik Yahūti mi-iyöng Pēpilön? (Isayā 41:10-13)

¹³ Akahakūö hē e ang Yāvē tö yik Yahūti nö teūngen tö raneuslö alahare nö löktö in ngam maheūkköre. Akahakūö inrē anga-aṅ tö cha min nö kihngen yěn röhta ngam inlahen cha nö ṙānyu. Eūkö inlahen öp töhěng tak rācha misī ang Yāvē urēhěkūö ṙinānyī yik Yahūti, öp maha-etngen nup tö röhta min panam hēk kiyung ngam panam inrē min anga-aṅ Pēpilön. (Isa. 41:2-5) Hòṅ pa-ekūö hòng pökeh yik Yahūti? Hö-ö. Pön urěhngöre ṙô hē e ang Yāvē nö kētö inreuskö alaha më tarikre, nö ngöṙô: “Uh man pa-ekūö, tön in meh chin; um ngangngökūö, tön chū-ö chin Tēv meh.” (Vë-evkūö Isayā 41:10-13.) Kūö yòh ang Yāvē nö ngöṙô “chū-ö chin Tēv meh”? Öt tö ngö manah ngam ṙô Yāvē tö ò nöng vë-enyre nö Tēv cha hēk hòṅ ha-öinyö ò cha-a. Pön akahakūö misī yik Yahūti tö e. Fēlen cha pöri ang-aṅ tö ò nö örheūheu nö in cha.—Sal. 118:6.

14. Asūp ṙô Yāvē nö fēlen yik tarikre nö un pa-ekūö?

¹⁴ Ṙūöhngö ngam pinhë-eṅkūö më tarikre ang Yāvē nö fēlen cha tö ò nö aṅhav in tö ngam töt kūöngu kumlēḵ hēk keuheūtlöre mikahkūö inrē anga-aṅ. Tölṙô më Yahūti anga-aṅ nö ngëichken minë tö pōyen taneūsömat el halīöngö. Rö-ö anga-aṅ nö vë-enyre nö vī minë taneūsömat nö in cha, pön vë-enyre inrē nö akahakūö tö minë-eny u. (Isa. 40:25-28) Yēḵ Yāvē nö vë-enyre nö akahakūö tö minë-eny minë taneūsömat, ngaich vaichngö hòṅ min anga-aṅ tö hī öi tarik ò? Hö-ö, pön ṙòklöre mikahkūö anga-aṅ tö hī. Yēḵ Yāvē nö aṅhav in tö kumlēḵ re nö vī minë tö pōyen taneūsömat, ngaich ötkô hòng min anga-aṅ nö hayööken më tarikre? Kô-en yik Yahūti mi-iyöng Pēpilön nö mihôiṅ nö öt pinhë-evkūö tö kūö Yāvē nö tökalēḵ.

15. Sitih inlahen ang Yāvē nö hīnken më tarikre in minë yamih ṙētak?

¹⁵ Hīnken më tarikre inrē ang Yāvē nö la-al minë yamih kanihngenre. Minë tö vënyu in minë raneh mirūlö ngam līpöre Isayā, ngöṙô ang Yāvē nö in më tarikre: ‘Kuhēthötre yin el minë urôhòre, ngaich öptökūö minë inkūp, rahëchtaṙen öm hayunngöre, hanöng saha chanuhu ngam lanīnö chu.’ (Isa. 26:20) Höng tölngu taneungtökūö ön ngih tö-eūka ik hē e, ik sā Sairös nö kiyung nö i Pēpilön. Ngöṙô ök i töhěng tak Krīk historīön, ik sā Sairös nö yòkhöt nö im panam Pēpilön, ngaich “tölṙô yik tarik alahare anga-aṅ nö fëlngen yip kumnyī-inyre tö patīre.” Lohten hē e yik tarik aṅ Pēpilön nö pa-ekūö! Hang ṙô Yāvē pöri yik Yahūti nö öt meutnyi tö patīre, lökten cha lohten ngaich nö öt kò-òngvah.

16. Kūö yòh öi ötkô pa-ekūö fēken minë yamih min kanihngen? (Ngëichkö ngam nyat.)

¹⁶ Asuh öp haköplö hī öi in e? Röhta an ngam tökiröng ötkanòlô nö lākūö hī ngam töt ha-eh nö meūkö tö hī. Pa-ekūö min hē e yip tarik yěn rultenre ngam kanihngen, öt pa-ekūö pöri min yip tarik Yāvē ip hē e. Pò hī min ṙātö-ellōnre tö Yāvē nö Tēv hī ngaich örheūheu min anga-aṅ nö in hī. Holtö ṙinatö-ellōnre min ayī-ö öi sökhaka öi hökkö ‘ranöhta ngam inlahen hī min öi ṙānyu.’ (Lūk. 21:28) Yěn la-al hī min ngam Kōk, minë inyööngö tö ṙô hī, ngaich höng hayönglenre min ayī-ö in Yāvē hēk öt hěngtak min tökô nö halönyken hī. Hē e min ang Yāvē nö löktö in yip ma-ahāngare tī nö laklen hī hēk hachōkūö hī inrē. Isuh pöri ayī-ö min teūngen tö ngam inchō-okūöre? Höng ip ṙētak in min akahakūö, pön lohten min nup inlēnö hī nö löktö el minë māṅ, minë tö sā ṙēngen nup ‘lamātuhēt uròhò’ ngam chūök hī öi öt fehnguṙen. Sitih inlahen mihôiṅ ayī-ö öi hīnöre tö minë yamih min kanihngen? Löktökūö ing töngamuh ayī-ö öi hangön ngam innôlöre in më prötör sistör hēk hang minë inlēnö inrē lamöktö el ngam söngkötön Yāvē, ngaich ṙatö-ellōnre tö Yāvē nö anga-aṅ mahachōkūö ngam söngkötönre töngamuh.—Hep. 10:24, 25; 13:17.

17. Sitih inlahen öm yěm hòṅ teūngen tö ngam inreuskö alahare lamöktö in Yāvē?

¹⁷ Öt lööṙen ngam inlahen yik Yahūti nö iyöng Pēpilön hēk höng haṙivlōn inrē cha-a. Kētö inreuskö alaha cha pöri ang Yāvē, ngatī min anga-aṅ nö kētö inreuskö alaha hī. Lökten öi ötkô yaha piṙūtkö tö nup yamih huṙöich, ṙātö-ellōnre pöri öi in Yāvē hēk ṙatö-ellōnre tö ò nö hameuktö ngam miṙēḵlōnre min nö aṙēlen hī. Lökten ui hökngen ngam maheūkköre nö paṙuyi. Köplōn pöri tö Yāvē nö Tēv meh, ngaich um pa-ekūö.