Hayööken Ngam Kahë Istötīre Nö Löklōn Yāvē

1-2. (a) Kūö yòh yip rīkre Paipöl istuten nö piyū-en nö kē fëslare nö löklōn ngam Tēv? (b) Asūp min kahakka hī in ngih ātiköl?

FĒKÖ ök inlahen re man ik sā meh öm rultenre haköp ngam kanô-en hēk ik sā meh inrē vītöre öm Vamënyen Yāvē, ngaich sitih inlahen më-eṅ hē e? Piyū-en hòng më-eṅ öm kētöre? Vöö hòng öm fēkö inlahen yip ichūök meh kamān, hol meh hēk yip aṅpatī meh yěn kunyaha elmat tö meh? Fēkö inlahenre hòng më-eṅ töre yěm kihngen min öm lök in minë inchöngtenre kahëtö Yāvē öm öt teungten? Yēḵ meh sin tö ngatī mufē, ngaich öthō min më-eṅ akaha elmat tö kanihngen öp kahë istötīre ngam tö piyū-en nö kētöre nö Vamënyen Yāvē.

² Akahakūö misī ang Yēsū tö ngam tö ngatī pinhë-ekūö nö mihôiṅ angū-ö nö asökngen ngòh tarik nö kētöre im linökölōn Yāvē. (Mët. 13:20-22) Öt heūlngöre pöri anga-aṅ nö hayööken yip tö ngatī inlahen tarik. Fën nun minë inlahen ò nö hayööken cha: (1) vë-eny nang cha anga-aṅ tö nuk ma-asökngö röön cha nö kū-ö urěh, (2) ṙūöhlö ngam hanangenlōn cha anga-aṅ tö Yāvē, (3) haköpten cha anga-aṅ nö urěhlö ngam linökölōn Yāvē hēk (4) haköpten cha anga-aṅ nö sitih inlahen mihôiṅ nö la-al nup kanihngenre. Mikahtökūöre in min in ngih ātiköl öi sitih inlahen mihôiṅ asīnken Yēsū öi hayööken yip kahë istötīre yē hī öi haköpten cha öi löknyö mat ngam līpöre Mihôiṅ Man Örheūheu ṙamlōn! Hòṅ cha nö kē fëslare nö löklōn Yāvē.

MIKAHTÖ ELMAT NGAM KAHË ISTÖTĪRE TÖP MA-ASÖKNGÖ RÖÖN Ò NÖ LÖKLŌN YĀVĒ

3. Asuh ök hē e ma-asökngö Nikòtimös nö vītöre nö mahaköp nö in Yēsū?

³ Tökiröng nö mākūö yik Yahūti misī ang Nikòtimös. Akaha elmat anga-aṅ tö Yēsū nö tö tīntu tö ngam Tēv nö löktö in minë la-en ò. (Yôh. 3:1, 2) Lohten hē e ang Yēsū nö tafūöl chumngëtö rò-òten nö la-evṙen. Hěng pöri öp ihih ma-asökngöre Nikòtimös nö vītöre nö mahaköp nö in Yēsū. Pò ò hē e nö pa-ekūö tö yik Yahūti, lökten nöng hayunkenre nö el hatöön nö haköp nö in Yēsū. (Yôh. 7:13; 12:42) Lohten anga-aṅ hē e nö vöö nö afēkö ngam inlahen re min yěn vītöre nö mahaköp nö in Yēsū, ngaich pōyen min nup tö hòṅ rahāngö ò.a

4. Sitih inlahen ök misī Yēsū nö mikahtö elmat Nikòtimös töp lōn ngam Tēv nö in ò?

⁴ Tö akahakūö ök misī Nikòtimös tö minë chööngö, hòṅ hayöökaṙen pöri hē e anga-aṅ nö mikahtökūö tö ngam lōn ngam Tēv nö in ò. Sitih inlahen ang Yēsū nö hayööken ò? Kēnyö ṙētakre misī ang Yēsū nö in ò hēk chuh in ò inrē el hatööm nö haköpten ò. Vë-eny nang Nikòtimös anga-aṅ tö minë tö hòṅ inlahen ò yěn vītöre nö mahaköp nö in ò: tö ò nö hòṅ havöötö ellōnre ngaich halööktit minë tököölre, hòṅ kē ngam vinôkö hēk hòṅ ṙatö-ellōnre inrē nö in ngam Kūön ngam Tēv.—Yôh. 3:5, 14-21.

5. Sitih inlahen öm mihôiṅ mikahtö elmat ngam kahë istötī re töp ma-asökngö röön ò nö kētöre nö löklōn Yāvē?

⁵ Lohten nö tö akaha elnang öp kahët istötī meh tö ṙô ngam Paipöl, lohten pöri anga-aṅ nö hòṅ hayöökaṙen nö mikahtu elmat töp ma-asökngö röön ò nö kētöre nö löklōn Yāvē. Lohten anga-aṅ nö pōyen kahëti tö ṙētakre nö im kinmānö hēk öt lōnu yip aṅ patī ò tö ò nö Vamënyen Yāvē. Yěn ngatī ngaich kēnyö ṙētakre öm hanòl ngam kahë istötīre. Mihôiṅ më-eṅ havëten ò nö òk chā hēk holröön inrē öm havötköre. Yěm ngatī inlahen min kēnyö ṙētakre in ò, ngaich mihôiṅ min anga-aṅ nö vënyu nup inlahenre nö in meh. Löktö in e min më-eṅ akahakūö töp ma-asökngö röön ò nö kētöre nö löklōn Yāvē. Ngaich teungten min më-eṅ vë-eny nang ò tö nup tö hòṅ harīkiyö inlahen ò. Vë-eny nang ò inrē më-eṅ tö ò nö un höng chö-öinyten ngam ṙanamlōn meh nö halööktit nup inlahenre, hòṅ haṙamlōn Yāvē anga-aṅ.

6. Sitih inlahen öm mihôiṅ hareuskö alaha ngam kahë istötīre hòṅ ò nö kētöre nö löklōn ngam Tēv? (1 Kòrin 16:13)

⁶ Yěn ngaich min nö ṙinatu-ellōn ngam kahë istötī meh tö Yāvē nö hayööken ò min nö asīnkö minë töhet chööngö aṅ mat ngam Paipöl, ngaich teūngen min anga-aṅ tö nganöönöre hēk hang minë inchöngtenre inrē. (Vë-evkūö 1 Kòrin 16:13.) Fē-a man, ik sā meh misī ṙömöng iskul, ngaich tö sitih inlahen misī ök tīchör ööilōn meh? Lohten më-eṅ ööire töp tīchör tö īnu tö manööyöre nö haköpten meh hēk hareuskö alaha meh inrē. Mihôiṅ më-eṅ öm ngatī inlahen, rö-ö më-eṅ öm höng haköpten ngam Paipöl istutenre töp lōn ngam Tēv nö in ò. Pò meh hòṅ holtö manööyö hēk kētö ṙinatö-ellōn ò tö Yāvē min nö hayööken ò nö halööktit nup inlahenre. Asūp hēk mihôiṅ inlahen hī hayööken ngam kahë istötīre?

ṘŪÖHLÖ HANANGENLŌN Ò TÖ YĀVĒ

7. Sitih inlahen ök misī Yēsū nö ṙūöhlö ngam hanangenlōn yik tarik tö Yāvē?

⁷ Akahakūö misī ang Yēsū tö inlahen yik haköptöre, yēḵ cha min nö hangenlōn tö Yāvē ngaich hang minë chööngö ò min cha-a. Töp lökten ò misī nö haköpten cha tö nuk ṙô tö mihôiṅ nö ṙūöhlö ngam hanangenlōn cha tö Yāvē. Tö sā ò nö ngöṙô nö in yik haköptöre tö Yāvē nö sā inlahen öp töhěng tak inyööngö nö kamë-ekūö më kūönre tö nup tövai chehen. (Mët. 7:9-11) Lohten nö rīkre in yik hamang ṙô Yēsū yik töt teūngen misī tö hanangenlōn yöngre. Fē-a man ik sā Yēsū lohten nö vë-eny nang cha tö ngam inchōḵ-oṙô inlahen ök manāngö kūön ök tökòlô tarik, ngaich sitih mufē lohten cha-a. Ik sā ngam kūön ò nö hayëḵngen nuk kanòlô ök yöngre ngaich havan nö chuh patī, ngaich holtö hanangenlōnre ngam yöng ò nö ha-öinytö yīhi ò. Lohten ngaich cha-a hē e nö akaha elmat nö löktö in ngih inchōḵelmat tö inlahen Yāvē nö hangenlōn tö hī öi kūön ò, tö ngö manah hangenlōn tö hī öi tarik.—Lūk. 15:20-24.

8. Sitih inlahen öm mihôiṅ ṙūöhlö ngam hanangenlōn ngam kahë istötīre tö Yāvē?

⁸ Mihôiṅ man më-eṅ inrē ṙūöhlö hanangenlōn ngam kahë istötīre tö Yāvē. Öm sitih inlahen? Haköpten ò tö minë tinrīken Yāvē yēḵ meh kē istötī ò. Ngaich hayööken ò öm mikahtö elmat ò nö sitih inlahen anga-aṅ nö löktö in minë haköpre nö akahakūö tö Yāvē nö hangenlōn tö ò. Tö sā ṙēngen ò yěn haköp inlahen ngam ṙāi ṙinānyi ngaich mihôiṅ më-eṅ mikahtö elmat ò, tö Yāvē inrē nö chö-öinyten ò nö kētö ngam ṙāi ṙinānyi kūö ò nö hangenlōn tö ò. (Rōm. 5:8; 1 Yôh. 4:10) Yēḵ ngam kahë istötī meh min nö afēkö ṙôken ngam hanangenlōn Yāvē tö ò, ngaich yīhi hanangenlōn min anga-aṅ tö Yāvē.—Kal. 2:20.

9. Asuh ök lāinyngen Maiköl nö harīkngö ngam tinrīkenre?

⁹ Töi chumkūöṙen tö ngih inlahen Maiköl ngòh aṅ Intonēsiā. Tö haruklöng anga-aṅ nö el ngam kanô-en, hö-ö pöri anga-aṅ nö kētöre nö im vinôkö. Chuh tökiröng panam anga-aṅ nö la-evṙen nö chumvē tökiröng lôrī ik sā ò nö ṙömöng 18 höiny samyeūheu ṙēḵti. Hapīhö ngaich anga-aṅ. Ngaich höng ṙāngen ngam mikūönöre nö i Intonēsiā ngaich iyöng tökiröng panam nö kamān. Ik hē e ngaich ök pīhö ò hēk tö ök kūön ò kikānö nö haköp ngam Paipöl, ngaich asīnkö minë haköpre inrē cha-a. Unôichrit e ngaich ök yöng Maiköl kikānö nö kapah. Havan ngaich anga-aṅ nö chuh panamre nö meukṙen ngam yöngre kikōnyö. Istötī ngaich anga-aṅ nö in ngam līpöre Mihôiṅ Man Örheūheu Ṙamlōn! Ik sā cha nö ṙònghëichṙen nö in ngam “Mikahtökūöre Hēk” pāt im lesön 27 ngaich lökngöre ellōn ang Maiköl nö meuk ṙôken ngam miṙivlōn Yāvē nö meuk chanöökö nômö ngam kūönre nö halankaṙen. Angū-ö ngih tö meutnyi mak mat tī tö Maiköl. In e ngaich anga-aṅ nö ṙūöhlöre minlēḵṙen tö ngam ṙāi ṙinānyi. Fē-ěre ngaich anga-aṅ töre nö hòṅ halööktit minë tinrīkenre, ngaich kētöre nö im vinôkö.

HAKÖPTEN Ò NÖ URĔHLÖ NGAM LINÖKLŌN YĀVĒ

10. Sitih inlahen ök misī Yēsū nö mikahtö elmat yik rīkre haköptöre tö inlahen cha nö hòṅ urěhlö ngam la-en inhānga? (Lūkös 5:5-11) (Ngëichkö ngam nyat.)

¹⁰ Ilööṙen yik rīkre misī mahaköp nö akahakūö tö Yēsū nö anga-aṅ tö kilēḵ-ěyö nö Mesayā, öt akaha elmat pöri cha-a tö inlahenre nö hòṅ urěhlö ngam inhangkö ngam tölöök inhānga. Tö sā ṙēngen nā Pītör nā Antarū nöng iṙūöhen cha-a nö im kinë-e kāḵ pòrô ngaich nö vītöre nö mahaköp nö in Yēsū. Lohten cha-a hē e nö holṙen nā Yāköp nā Yôhan nö kamë kāḵ hēk pōyen taneūngen inrē tö pësa re. (Mët. 1:16-20) Havëten cha pöri ngaich ang Yēsū nö holṙen ò nö keuheūtö ṙētakre nö löklōn ngam Tēv. (Māk. 4:18, 19) Hē e ngaich nā Pītör nā Antarū nö ‘ṙāngö minë inhāṅl re’ ngaich tömkörit Yēsū. Öt löktu lohten cha-a nö öt halēngö nuk inlahen yik aṅ patīre hòṅ cha nö heuveū-en nö ha-aṅ nômöre. Ngamuh pöri intöönö, kūö yòh hē e cha-a nö ṙāngö minë la-enre ngaich tömkörit Yēsū? Ngö kinūichngö an nö im līpöre Lūkös tö Yēsū nö hameukhö mat cha tök töhěng pinngangkūö, hòṅ ngam ṙinatö-ellōn cha nö ṙūöhlöre nö in Yāvē. Akaha elmat ngaich cha-a nö löktö in ngam tö hameuktu pinngangkūö, tö cha min yěn urěhlen Yāvē ngaich hateungngen minë hanakten cha min anga-aṅ.—Vë-evkūö Lūkös 5:5-11.

11. Sitih inlahen öi mihôiṅ hangönlö ṙinatö-ellōn ngam kahë istötīre öi vë-eny minë ekspirīönre?

¹¹ Hö-ö in kô sā inlahen Yēsū öi hameuktö pinngangkūö. Mihôiṅ pöri öi vë-eny nang ngam kahë istötīre tö nup ekspirīön yip prötör sistör yip mu-urěhlen Yāvē nö in nup töng sitih inlahenre. Tö sā ṙēngen meh kò-òren vë-eny nang ò tö inlahenre, ik sā meh rultenre chuh el mīting, ngaich sitih inlahen ang Yāvē nö hayööken meh. Lohten hē e më-eṅ vë-eny nang öp yöngṙenre tö meh öm sōḵ marò-òten la-evṙen hē el ṙētak minë mīting. Vë-eny nang ngam kahë istötīre inrē më-eṅ tö inlahenre ik sā meh kē fëslare öm urěhlö ngam vinë-ekūö Yāvē. Ngaich sitih inlahen anga-aṅ nö kētö inkòlô ngam fësla meh hēk sitih inlahen ngam ṙinatö-ellōn meh nö ngönlöre nö lökten in e.

12. (a) Kūö yòh öi hòṅ harīkngö holre tö më prötör sistör yěi kē istötī? (b) Sitih inlahen öm mihôiṅ öm höng löktö in minë vitiō öm haköpten ngam kahë istötīre nö urěhlö ngam linökölōn Yāvē? Kētö ngam töhěng inchōḵ elmat.

¹² Mihôiṅ nö ṙūöhlöre ngam ṙinatö-ellōn ngam kahë istötī meh, yēḵ ò min nö hang minë ekspirīön yip tahëng prötör sistör. Yēḵ më prötör sistör min nö vë-eny nang ò tö nuk inlahen cha misī nö urěhlö ngam linöklōn Yāvē, ngaich teūngen min tö inyöökenre ngam kahë istötī meh. Lökten më-eṅ mihôiṅ harīkö holre tö më prötör sistör yēḵ meh öm kē istötī ò. Tölṙô cha nö vë-eny nang ngam kahë istötī meh, tö inlahenre nö teūngen tö ngam kanô-en hēk asuh inrē öp inlahen cha nö urěhlö ngam linökölōn Yāvē. Rö-ö nöng angū-ö pöm mihôiṅ inrē holmat ngam kahë istötīre öm meuk minë vitiō minë tö kētu nö im “Ngëichkö Në Inrē” hēk im pāt “Mikahtökūöre Hēk” in ngam līpöre Mihôiṅ Man Örheūheu Ṙamlōn! Tö sā nā yěn ṙònghëichṙen an haköp ngam lesön 37, ngaich mihôiṅ më-eṅ öm holmat ngam kahë istötīre öm meuk ngam vitiō tö ngö Meukṙen Hī An Min Yāvē Inup Hanāten Hī, ngaich mihôiṅ öm kakken minë lökngörit chööngö aṅ mat ngam Paipöl tökētu nö in e.

HARŪNÖ CHA NÖ LA-AL MINË KANIHNGEN

13. Sitih inlahen ök Yēsū nö hinken yik haköptöre nö la-al nup inkihtenre?

¹³ Ṙōlheuh ṙô ang Yēsū nö vë-eny nang yik haköptöre, tö yip tarik min hēk yip hanöngkisānö cha kunyaha elmat min tö cha. (Mët. 5:11; 10:22, 36) Ngöṙô anga-aṅ nö in yik haköptöre, tö yip tarik min nö kunyaha elmat tö ò hēk uroh inrē min nö hòṅ fëlngen ò in minë manā-aṅ ṙēktak ò nö la-evṙen. (Mët. 24:9; Yôh. 15:20; 16:2) Tölṙô yik haköptöre anga-aṅ nö hööngöre yēḵ cha nö ahangkö ngam tölöök inhānga. Vë-eny nang cha anga-aṅ, tö cha min yěn ötlēḵkaṙen, ngaich ui la-alkūö cha. Höng kiröönngöre öi lökngö muh ngaich chuh im tahëng kamngö öi inhānga.

14. Sitih inlahen öi mihôiṅ hinken yip kahë istötīre nö la-al minë inkihtenre? (2 Timôtī 3:12)

¹⁴ Mihôiṅ inrē ayī-ö öi hinken öp kahë istötīre nö la-al nup inkhtenre. Ngaich mikahtö elmat ò tö nup ṙô yip hol chūök ò nö kamān, yip hol ò hēk tö yip aṅ patī ò min tö ò. (Vë-evkūö 2 Timôtī 3:12.) Mihôiṅ ayī-ö vë-eny nang ò tö ò min lohten nö hayëḵ-e hēk ötlēḵka elnang tö yip holre ichūök ò nö kamān hēk tö yip aṅ patīre inrē kūö ò nö ṙatö-ellōnre nö im Paipöl. Tövayen öng min ngam inlahen hī yěi veūten öi vë-eny nang öp kahë istötīre tö në inlahen hòṅ ò min nö heuveū nö la-al minë inkihtenre yēḵ ò min nö hakihtuṙen.

15. Yěn la-alkūö ngam tö kē-ě istötī tö më aṅ patīre, ngaich sitih inlahen më-eṅ mihôiṅ hayööken ò?

¹⁵ Yěn la-alkūö ngam tökē-ě istötī tö më aṅpatīre, ngaich tölṙô ò më-eṅ nö hatön kūö cha nö fēkö inlahen e nö kūö yòh cha-a nö līplö nö in ò. Lohten min cha-a nö ngöṙô lōn tö më Vamënyen Yāvē nöng halō-ongkūö ò hēk ngöṙô lōn lohten inrē nö hang inlahen më Vamënyen Yāvē nö tötlöök nö tarik. Töng ha-eh nun në nö ahang hī. Ngatī yik misī hanöngkisānö Yēsū nö līplö in ò hēk ötlöngö elkui inrē anga-aṅ tö lōn cha. (Māk. 3:21; Yôh. 7:5) Lökten më-eṅ mihôiṅ öm harūnten ngam kahë istötīre nö holtö manööyöre hēk mikah elmatre yěn vë-ekūö yip tahëng, mööhë yěn vë-ekūö yip aṅ patīre.

16. Sitih inlahen ayī-ö mihôiṅ öi haköpten ngam tö kē-ě istötī nö holtö mikah elmatre nö vë-eny nang më aṅpatīre tö ṙô ngam Paipöl?

¹⁶ Vënyö nang ngam istötīre tö ò nö un keuheūtnyôre nö vënyö inlahen ngam Paipöl nö in më aṅ patīre yēḵ cha nö hòṅ mikahtökūöre. Hòṅ cha min nö piyū-uṙô yēḵ cha min nö hòṅ hēk nö vë-ekūö meh. Rö-ö nöng angū-ö, pöm vënyö nang ngam kahë istötīre tö ò nö mihôiṅ nö rahëichy rahëichnyenṙô nö vë-eny nang më aṅ patīre hòṅ cha min hēk nö hòṅ mikahtökūöre nö hang minë ṙô meh. (Kòl. 4:6) Vënyö nang ò inrē tö ò nö mihôiṅ nö vë-eny inlahen ngam vepsāit jw.org. Ngaich in e min nö kò-òren nö mikahtökūöre më aṅpatī ò tö inlahen më Vamënyen Yāvē.

17. Sitih inlahen öm mihôiṅ harūnten ngam kahë istötīre yěn hatönö kūö anga-aṅ tö inlahen më Vamënyen Yāvē? (Ngëichkö ngam nyat.)

¹⁷ Mihôiṅ më-eṅ kò-òren tölṙô ngam kahë istötīre nö hameuktö ngam sirīs el ngam jw.org vepsāit ngam tö ngö kui, “Yahova Kē Saksiyō Kē Parē mē Öksör Pūchē Chanēvalē Sövāl.” Löktö in e min anga-aṅ nö heuveū-euṙô nö sapṙô minë intöönö hatön më hol ò ichūök ò nö kamān hēk më hanöngkisanö ò inrē. (2 Tim. 2:24, 25) Mihôiṅ inrē öm lökten im līpöre Mihôiṅ Man Örheūheu Ṙamlōm! öm kakken ngam pāt “Ṙô Yip Tahëng” tö kētu nö in minë lesön. Mihôiṅ më-eṅ prektis in ngam kahë istötīre nö sitih inlahen anga-aṅ mihôiṅ nö mikahtö elnang yip tahëng tö ngam ṙinatö-ellōnre. Um piyū-u ṙô öm vë-eny nang ò nö sitih ṙô mihôiṅ anga-aṅ nö sapṙô yip tahëng. Yēḵ nā min ngatī inlahen prektis, ngaich heuveū-eu ṙô min anga-aṅ nö vënyö ngam ṙinatö-ellōnre.

18. Asūp mihôiṅ inlahen meh ṙūöhlö alaha ngam kahë istötīre nö kētöre nö pöplisör? (Mëtiv 10:27)

¹⁸ Tölṙô yik haköptöre misī ang Yēsū nö vë-eny nang yip tarik tö ngam tölöök inhānga. (Vë-evkūö Mëtiv 10:27.) Yěn vënyö ṙinatö-ellōnre ngam kahë istötī meh nö in yip tahëng, ngaich maharūnöre min anga-aṅ nö hayöönglenre nö in Yāvē. Lökten öm ilööṙen ṙūöhlö alaha ò nö ngatī inlahen. Asūp mihôiṅ inlahen meh? Yěn vënyu öp minkahlōn nö el ngam māṅ inlahen kinëken ngam fīl kömpēn, ngaich kò-òren öm tölṙô ngam kahë istötī nö fēkö inlahenre yěn hòṅ kētöre nö pöplisör. Vënyö nang ò tö yip töpōyen prötör sistör ramultenre nö ahānga nö im ṙētak kömpēn hēk vënyö nup yanöölen cha inrē. Mihôiṅ inrē öm ṙūöhlö alaha ò nö fēkö inlahenre nö kētöre nö in minë istuten tôk ngam tö kēkaṙen mīting ihôi ngam afta. Ngatī inlahen min anga-aṅ nö teūngen tö trēning re nö heuveū-eu ṙô nö vë-ekūö yip tarik.

HAMEUKTÖRE ÖM ṘATÖ-ELLŌNRE IN NGAM KAHË ISTÖRE

19. Sitih inlahen ang Yēsū nö hameuktöre nö ṙatö-ellōnre nö yik haköptöre hēk sitih inlahen ayī-ö mihôiṅ asīnken ò?

¹⁹ Urēhěkūö Yēsū nö chuh el halīöngö ngöṙô anga-aṅ nö in yik haköptöre, meukkūöre in min hēk iyöng in chu inrē min yīö. Öt akaha elnang pöri më mahaköp, tö cha min inrē nö chuh el halīöngö nö in ò. Katöngö ellōn cha-a nö in ngam ṙô ò. Öt ngëichkö ngam kintööḵngö ellōn cha pöri ang Yēsū, pò ò nö ngëichkö ngam chaniplö cha nö ò. (Yôh. 14:1-5, 8) Akahakūö ang Yēsū tö cha misī nö öt ilööṙen min nö akaha elnang tö nup rīkre ṙô ò, tö sā cha min nö maheukkūö nö chuh el halīöngö. (Yôh. 16:12) Mihôiṅ ayī-ö inrē asīnken Yēsū öi vë-eny nang yip kahë istötī re tö hī öi ṙinatu-ellōn tö ò min nö haṙamlōn Yāvē.

20. Sitih inlahen ngam sistör aṅ Malavī nö hameuktöre nö ṙatö-ellōnre nö in ngam kahë istötīre?

²⁰ Hòṅ ṙatö-ellōnre ayī-ö in ngam kahë istötīre tö ò min nö löngö kahë tö fëslare. Chumkūöṙen tö ngih inlahen sistör Chifuntō ngòh mi-iyöng Malavī. Rultenre anga-aṅ nö kē istötī ngam kikānö tö Ĕlinafē minë-eny ngam töhěng tak nö Kētòlik nö im līpöre Mihôiṅ Man Örheūheu Ṙamlōn! Ik sā cha nö keuheūt ṙô nö haköp ngam lesön 14 ngaich hatöönö Ĕlinafē anga-aṅ nö ngöṙô, tölöng hòng ngam inlahen hī yūs minë insā yěi hòṅ vë-ekūö ngam Tēv. Öt ṙamlōn ang Ĕlinafē tö ngam ṙô ò ngaich ngöṙô nö in ò: “Töng kanahngen hī ön angū-ö!” Ngöṙô lōn ngaich ang Chifuntō tö Ĕlinafē min nö ṙāngenre nö istötī. Aṅhav in pöri ang Chifuntō tö ngam manöönyö, höng iṙūöhen anga-aṅ nö kē istötī ò. Ṙinatu-ellōn anga-aṅ tö Ĕlinafē min nö hěngheuh nö akaha elmat tö ngam ṙô, nö tövaich ngam inlahen hī yūs minë insā. Unôichrit minë chingëṅt ang Chifuntō nö hatön kūö Ĕlinafē tö ngam intöönö im lesön 34 ngam tö ngö: “Im rò-òten meh ngaich haköp mat ngam Paipöl, haköp inlahen ngam tökô-en Tēv inrē Yāvē, asuh nup ngaich yanöölen meh?” Ngöṙô ang Chifuntō nö vënyö ngam sanapṙô re tö Ĕlinafē, “Vënyö minë tövai anga-aṅ haköplöre. Sā ngih töhěng, tö më Vamënyen nö öt kēken minë la-en tövaich nö vënyu nö imat ngam Paipöl.” Unôichngöre ngaich ang Ĕlinafē nö ṙāngenre nö vë-ekūö minë insātēv ngaich kētöre nö vōkö.

21. Asūp mihôiṅ inlahen hī hayööken ngam kahë istötīre, hòṅ ò nö kēḵ fëslare nö löklōn Yāvē?

²¹ Höng Yāvē an tö mihôiṅ nö “ma-asīöp” ngam kulöl kanô-en nö ellōn ngòh tarik, ngatī in inrē ayī-ö hayööken ngam tökē-ě istötī nö kū-ö urěh. (1 Kòr. 3:7) Öt höng haköpten ò ayī-ö tö minë kuilōn ngam Tēv nö in ò, pöi hayööken ò nö ṙūöhlö ngam hanangenlōnre nö in Yāvē. Ṙūöhlö alaha ò ayī-ö nö urěhlö ngam linökölōn Yāvē hēk hameuktö ngam tökiröngen inrē hanangelōnre tö ò. Haköpten ò inrē nö hayöönglenre nö in Yāvē el ṙētak minë kanihngen. Yēḵ ò min nö meuk inlahen hī öi ṙatö-ellōnre in tö ò nö hòṅ haṙamlōn Yāvē, ngaich reuslöre alaha min anga-aṅ nö asīnken minë inchöngtenre tö Yāvē hēk kēḵ fëslare inrē min nö löklōn ò.