Ṙatö-ellōnre Tö Yāvē Nö Hangenlōn Tö Meh

1. Kūö yòh öm më-eṅ kētöre löklōn Yāvē? (Ngëichkö ngam nyat.)

LOHTEN man köplōn tök inlahenre ik sā meh kētöre löklōn Yāvē. Asā rò-òten meh öm haköp inlahen Yāvē, ngaich ṙūöhlöre hēk ngam hanangenlōn meh tö ò, lökten öm kētöre öm löklōn ò. Kilēngôre më-eṅ töre öm löktökūö ing töngamuh öm urěhlö ngam kuilōn ò hēk hangenlōn tö ò öm keuheūttö ellōnre, keuheūttö nômöre, keuheūttö kuilōnre hēk keuheūttö kumlēḵre inrē. (Māk. 12:30) Löktökūö ik hē e ngaich nö ṙūöhlöre ngam hanangenlōn meh tö Yāvē. Ngaich yěn hěngtak öp mahatöönö meh nö ngöṙô, “Kô-en hòng më-eṅ öm hangenlōn tö Yāvē?” Ngaich sitih ṙô min më-eṅ öm sapṙô ò? Öt piyū-u ṙô min më-eṅ öm ngöṙô, “Heūṅ, kirööngen hanangenlōn chin tö Yāvē, mööḵlö tö nup töng sitih chehen.”

2-3. (a) Hòṅ asūp ṙinatö-ellōn hī? (Yarimiā 31:3) (b) Asuh öp min haköp hī in ngih ātiköl?

² Yěn hěngtak öp töngö ṙô nö hatöönö meh, “Ṙatö-ellōnre hòng më-eṅ tö Yāvē nö hangenlōn tö meh?” Sitih ṙô öm min sapṙô ò? Piyū-u ṙô hòng min më-eṅ öm sapṙô ò hēk ngöh mufē ṙöng tö Yāvē nö öt hangenlōn tö meh? Hěngtak ön ngòh sistör vamë-eny inlahenre nö öt hanghuṙen tö yik aṅ patīre ik nyinī-öre, ngöṙô anga-aṅ, “Hangenlōn takô chin tö Yāvē hēk öt kintöngulōn inrē öich in e. Hēṙu pöri ṙung öich kihngen öich ṙatö-ellōnre tö Yāvē nö hangenlōn inrē tö chu.” Ngih pöri intöönö, sitih inlahen öm mihôiṅ mikahtökūöre töp mufē Yāvē tö inlahen meh?

³ Lōnu ang Yāvē tö meh öm ṙatö-ellōnre tö ò nö hangenlōn tö meh. (Vë-evkūö Yarimiā 31:3.) Kô-en anga-aṅ nö tūökten meh nö in re, ngaich ik sā meh öm kētöre öm löklōn ò hēk kēḵ ngam vinôkö ngaich kilēngôre ang Yāvē nö in meh tö ò min nö hameuktö ngam tötchanūhuvṙen hanangenlōnre tö meh, chumkūöṙen min anga-aṅ tö meh, örheūheu inrē min nö holṙen meh. Hameuktö ngam tötchanūhuvṙen hanangenlōnre ang Yāvē nö in më tarikre hēk in meh inrē. Lökten anga-aṅ nö kaheūkö hī öi ṙòkhöre öi tö “pōiṙāi chehen” ò. (Mal. 3:17.) Öt kintöngulōn ök misī Pôl tö ngam hanangenlōn Yāvē. Töp lökten ò nö ngöṙô, “Pò chu öich ṙatö-ellōnre nö ötrēhěn ngam kinpaha, ötrēhěn nö ngam nômö, ötrēhěn ma-ahānga, ötrēhěn më mahayöng, ötrēhěn minë chehen töngamuh, ötrēhěn nup yamih chehen, ötrēhěn nö kumlēḵ, ötrēhěn nö rôlòng, ötrēhěn nö ṙū-uti, ötrēhěn nup tahëng tövīlöng tökô min nö haköhngen hī tö ngam hanangenlōn hī tö ngam Tēv.” (Rōm. 8:38, 39) Lōnu an Yāvē tö meh öm sā ṙinatö-ellōn Pôl öm ṙatö-ellōnre tö ò nö hangenlōn tö meh. In ngih ātiköl in min öi mikahtökūöre tö hī kūö yòh öi hòṅ ṙatö-ellōnre tö Yāvē nö hangenlōn tö hī hēk sitih inlahen ayī-ö öi ṙūöhlen e angū-ö ngih ṙinatö-ellōn.

KŪÖ YÒH ÖI HÒṄ ṘATÖ-ELLŌNRE TÖ YĀVĒ NÖ HANGENLŌN TÖ HĪ?

4. (a) Asūp ihih ṙô ngam Satān nö minyôny-aṅ nö vīhöt ṙinatö-ellōn hī? (b) Sitih inlahen pöri mihôiṅ öi la-al ò?

⁴ Heuveū-en min öi lā-al minë “tinngöp tī” ngam Satān. (Efi. 6:11) Kalēḵ alaha an töngamuh ngam Satān nö hōten hī öi ṙāngenre löklōn Yāvē. Ngih ön töhěng tī ò nö halō-ongkūö hī, ma-ainyre anga-aṅ nö kētö ṙinatö-ellōn hī tö Yāvē nö öt hangenlōn tö hī. Höng minyôny-aṅ pöri anga-aṅ. Asātu anga-aṅ tö ngam Paipöl nö in öp layön öp chamöh kahāngöre töp tötkalēḵen öp tötkô nö laklöre. Ngatī inlahen ngam Satān nö halō-ongkūö hī yēḵ hī ötkalēḵen. Sā hī yěi haṙivlōn öi fēkö nuk tö urěhngöre inlahenre hēk yěi la-al minë kanihngenre hēk yěi paṙūtalōn tö inlahen öp yamih ṙētak. (Inch. 24:10) Mihôiṅ min hē e ngam Satān nö kalēḵ alaha nö miṙivngölōn hī, hòṅ hī öi ṙāngenre löklōn Yāvē. Yēḵ hī pöri min öi ṙatö-ellōnre tö Yāvē nö hangenlōn tö hī. Ngaich kalēḵ min ayī-ö öi ‘la-al’ ngam Satān hēk ötkô-òngvah inrē min tö minë tinngöptī ò.—1 Pīt. 5:8, 9; Yāk. 4:7.

5. Kūö yòh öng nö tötṙanāngen ngam inlahen hī hòṅ ṙatö-ellōnre tö Yāvē nö hangenlōn tö hī?

⁵ Röhta hēk min ayī-ö öi in Yāvē. Kūö yòh mihôiṅ öi ngatī ṙô? Tö vī-i in ayī-ö tö Yāvē öi töhangenlōn tö yip tahëng hēk teūngen inrē tö hananghuṙenre tö yip tahëng. Yěn hěngtak öp mahameuktö hanangenlōnre tö hī, ngaich ngatī inlahen min ayī-ö öi hameuktö ngam hanangenlōnre tö ò. Lökten yěi kirööngen ṙinatö-ellōnre min tö Yāvē nö hangenlön tö hī, ngaich ngatī ṙôken min ngam hanangenlōn hī tö ò. (1 Yôh. 4:19) Ngaich asā ṙôken ngam hanangenlōn hī min tö ò, ngaich ngatī ṙôken min ngam hanangenlōn ò tö hī. Ngöṙô an ngam Paipöl, “Ṙūöhtöre im Tēv, ngaich ṙūöhtöre min anga-aṅ nö in yī-ö.” (Yāk. 4:8) Ngih pöri intöönö, sitih inlahen öi mihôiṅ ṙūöhlö ngam ṙinatö-ellōnre tö Yāvē nö hangenlōn tö hī?

ASŪP MAHAYÖÖKEN HĪ ṘATÖ-ELLŌNRE TÖ YĀVĒ NÖ HANGENLŌN TÖ HĪ?

6. Asūp mihôiṅ inlahen meh yēḵ meh öt ṙatö-ellōnre tö Yāvē nö hangenlōn tö meh?

⁶ Örheūheu öm vë-ekūötēv öm tölṙô Yāvē nö kētö ṙinatö-ellōn meh tö ò nö hangenlōn tö meh. (Lūk. 18:1; Rōm. 12:12) Ṙōlheuh ṙô man i töhěng sakāmö öm vë-ekūötēv. Vë-eny nang ò töre öm hòṅ sā mat ò öm ngëichköre. Yěm ngölōn töre öm töng fāluṙen, ngaich lohten më-eṅ öm kihngen öm ṙatö-ellōnre tö Yāvē nö hangenlōn tö meh. Köplōn pöri më-eṅ tö Yāvē nö kiröng tö në ellōn hī. (1 Yôh. 3:19, 20) Öt uroh man më-eṅ keuheūtlöre mikahkūö tö inlahenre. Yāvē pöri tö keuheūtlöre mikahkūö tö meh. Akahakūö anga-aṅ tö minë tinrīken meh minë tötmaheuk meh. (1 Sa. 16:7; 2 Kin. 6:30) Lökten öm ‘luvënyö kūö ngam ellōnre’ öm i kūö ò, ngaich tölṙô ò nö kētö ṙinatö-ellōn meh tö ò nö hanangenlōn tö meh. (Sal. 62:8) Minë ṙô meh öm vë-ekūötēv, ngaich ngatī inlahen më-eṅ la-evṙen. Asuh öp mihôiṅ inlahen meh? Ta-a töi ngëicha.

7-8. Sitih inlahen öi löktö in minë miröökö imat ngam Salmai öi ṙatö-ellōnre tö Yāvē nö hangenlōn tö hī?

⁷ Ṙatö-ellōnre in nup töng ṙô Yāvē. Vënyö inlahenre ang Yāvē nö löktö in yik kamūich ngam Paipöl tö ò nö tö sitih inlahen nö Tēv. Vënyö ṙôken ngam hanangenlōn Yāvē ang Tāvit nö in ngam töhěng līpöre Salmai. Ngö ṙô anga-aṅ, ‘Röhta an Yāvē nö in yip töpaṙööyi ellōn, hayööken cha inrē, yip tökô-en nö haṙivlōn tötököölre.’ (Sal. 34:18) Yēḵ meh öm kalē-ě miṙivlōn, ngaich lohten më-eṅ ngölōn töre öm höng hěngtak, in u anū-ö pöri ṙētak ang Yāvē nö röhta nö in meh, pön akahakūö anga-aṅ tö meh öm hòṅ hayöökaṙen tö ò. Ngöṙô tī hēk ang Tavit nö kūich nö in ngam tahëng līpöre Salmai, ‘el pilönre tī man asëhöt minë makmat chu.’ (Sal. 56:8) Yēḵ meh kihngen, ngaich akahakūö ang Yāvē tö ngam miṙivlōn meh, pōiṙai minë makmat meh nö in ò. Sā mahamūlngen minë makmat meh anga-aṅ nö el ngam pilönre. Sā inlahen yik tarik misī yěn kiröönngöre nö chuh in nup chahuhure, ngaich kumtö òkre cha-a tö mak nö el pilön. Pōiṙāi misī ngam tö hěng-hěng kintākö mak nö in cha. Vënyu inlahen ang Yāvē nö in ngam līpöre Salmai 129:3 ngam tö ngö, ‘Keuheūtlöre mat man öm meuk minë tinrīken chu.’ Meuk nup töng sitih kahëken meh la-en ang Yāvē. Chumkūöṙen pöri anga-aṅ tö nup tövai la-en meh. (Hep. 6:10) Kūö yòh? Kūö ò nö pōirāi mat tö nup töng inlahen meh öm kalēḵ alaha öm haṙamlōn ò.a

⁸ Kò-en in öi teūngen tö nganöönöre öi löktö in në tö ngatī miröökö aṅmat ngam Paipöl! Sā tö ngöṙô ang Yāvē nö in meh, “Kirööngen hanangenlōn chin tö meh hēk kalē-ě mufē inrē tö meh.” Sā maheuk hī pöri taheūi ik lā urěh, tö ngam Satān nö ma-ainyre nö vīhöt ṙinatö-ellōn hī nö minyôny-aṅ tö Yāvē nö öt hangenlōn tö hī. Lökten yěn yih ngam tö ngö mufē elkuilōn meh, ‘Öt akahakūö chin tö Yāvē, yěn hangenlōn tö chu hēk yěn hö-ö,’ ngaich kò-òren öm afītöre öm ngö ṙô, ‘Achīöp min chūök chu ṙatö-ellōnre, in ngam ‘yöng minyôny-aṅ’ hòng in ngam “Tēv kanô-en” ṙöng?’—Yôh. 8:44; Sal. 31:5.

9. Asūp kinlēngô Yāvē nö in yip tö hangenlōn tö ò? (Maneutnyi 20:5, 6)

⁹ Afēkö inlahen Yāvē nö sitih mufē nö in hī yēḵ hī öi hanangenlōn tö ò. Chumkūöṙen tö ṙô Yāvē misī nö in Môsös hēk in yik Israel. (Vë-evkūö Maneutnyi 20:5, 6.) Kilēngôre misī anga-aṅ tö ò min nö hangenlōn tö cha yip tö hangenlōn tö ò, öt chanuhuvṙen hanangenlōn min anga-aṅ tö cha. Löktö in ngih ṙô ayī-ö öi teūngen tö ṙinatö-ellōnre tö Yāvē nö ötlöktu nö öt hangenlōn tö hī yēḵ hī öi hangenlōn tö ò. (Nah. 1:5) Yěm hēṙu öm ngö mufē, ‘Öt akaha kūö chin tö Yāvē yěn hangenlōn tö chu hēk yěn hö-ö,’ ngaich kò-òren öm hatöönöre öm ngöṙô, ‘hangenlōn öich chū-ö tö Yāvē?’ Yēḵ meh öm hangenlōn tö Yāvē hēk ma-ainyre öm haṙamlōn ò, ngaich mihôiṅ më-eṅ kiröngen ṙinatö-ellōn tö Yāvē nö hangenlōn tö meh. (Tan. 9:4; 1 Kòr. 8:3) Hēk yěi ngöṙô öre tö meh öm öt kintööngulōn töre öm hangenlōn tö Yāvē, ngaich hòṅ katööngalōn hòng më-eṅ tö Yāvē nö öt hangenlōn tö meh? Köplōn tö ngam hanangenlōn Yāvē nö töt chanuhuvṙen öthō anga-aṅ min nö ṙāngenre nö hangenlōn tö meh.

10-11. Asūp lōn Yāvē tö hòṅ kanöpölōn meh i alaha ngam ṙāi ṙinānyi? (Kalatī 2:20)

¹⁰ Afēkö ngam ṙāi ṙinānyi. Kēten Yēsū Kristū ang Yāvē nö chö-önyten hī öi taṙòkhöre tarik, töt insā-av angū-ö ngih nö inlōnti hī nö kahëtö ò. (Yôh. 3:16) Kē-ěkūö meh hòng inrē anga-aṅ tö e? Heūṅ. Töi ngëichkö ngih töhěng inchōḵelmat, köplōn man lohten tö inlahen Pôl urěhēkūö ò nö haköp nö in Yēsū, ngaich ōtre nuk tökiröng tökööl kahëken ò, lā-al nuk rīkre inrē anga-aṅ ötkumlēḵenre unôichrit inlahen ò nö vītöre nö Kristīön. (Rōm. 7:24, 25; 1 Tim. 1:12-14) Sön pöri anga-aṅ nö ṙatö-ellōnre tö Yāvē nö kētö ngam kūönre nö chö-önyten ò. (Vë-evkūö Kalatī 2:20.) Köplōn tö Yāvē nö löktö in Pôl tī nö kūich në ṙô, ngaich minë ṙô tö kūichi nö imat ngam Paipöl, ngaich chö-önyten hī anū-ö, hòṅ hī öi haköplu öi in u. (Rōm. 15:4) Töngö manah, lōnu an inrē Yāvē tö meh öm sā ṙinatö-ellōn Pôl öm ṙatö-ellōnre tö ò nö chö-önyten meh nö kēngö ngam kūönre. Yēḵ meh min öm fēkö inlahen Yāvē nö kē-ěkūö meh töm töt insā-av inlōnti meh, ngaich sīöplöre min ngam ṙinatö-ellōn meh tö ò nö hangenlōn tö meh.

¹¹ Kētö nöönyö Yāvē in öi ṙòkhöre kūö ò nö tīntö ngam kūönre nö ing panam nö kēngö nômöre töpôkūö hī. Ōt pöri ngam tahëng chö-öny Yēsū misī nö yih nö ing panam nö mahaköpten hī tö ngam kanô-en inlahen ngam Tēv. (Yôh. 18:37) Hěng ön ngih vahënyö ò tö nôlhöt nö i minë kanô-en, tö Yāvē nö hangenlōn tö më kūönre, töngö manah kiröngen hanangenlōn anga-aṅ tö hī öi tarik.

SITIH INLAHEN ANG YĒSŪ NÖ KĒTÖ ṘINĀTÖ-ELLŌN HĪ TÖ YĀVĒ NÖ HANGENLŌN TÖ HĪ?

12. Kūö yòh öi mihôiṅ ṙatö-ellōnre in minë ṙô Yēsū nö vë-eny inlahen Yāvē?

¹² Ik sā Yēsū misī nö ing panam, ngaich vë-eny minë tövai tinrīken Yāvē anga-aṅ nö in yik tarik. (Lūk. 10:22) Mihôiṅ ayī-ö öi ṙatö-ellōnre öi in minë ṙô ò nö vë-eny inlahen Yāvē. Kūö yòh? Pò ò misī nö samyeūheuv rò-òten nö in Yāvē nö el halīöngö, urēhěkūö yanīhi ò nö ing panam. (Kòl. 1:15) Meukö Yāvē anga-aṅ nö kiröngen hanangenlōn tö ò hēk kirööngen hanangenlōn inrē tö më töchiplö kūönre ma-ahānga hēk tö më töchiplö kūönre ing panam. Sitih inlahen anga-aṅ nö kētö ṙinatö-ellōn më tarik tö Yāvē nö hangenlōn tö cha?

13. Sitih mufē ök misī Yēsū tö inlahen Yāvē, ngaich hòṅ sitih mufē inrē ayī-ö?

¹³ Lōnu ang Yēsū tö hī öi sā mufē ò tö inlahen Yāvē. In minë līpöre Tölöök Inhānga anga-aṅ nö pōyen tö tö 160 tumheuh ṙô nö ‘Kayööngö’ ngöṙô tö Yāvē. Yěn vë-ekūö yik haköptöre misī anga-aṅ nö kakkö inlahen Yāvē, ngaich tö chöngṙen ngam ṙô ò nö ngöṙô Yāvē, “ngam Yöng yīö ngam aṅ el halīöngö.” (Mët. 5:16; 6:26) Ngöṙô ön ngam istöti nōt ngam Mëtiv 5:16, “Pōyen misī nuk tökiröng invëkö Yāvē tö yūsö tö yik tarik ò, tö sā ngih, ‘Tökalēkūö Tökalēḵ,’ ‘Lamātulöng tö në Taṙòkhöre’ hēk ‘Tökiröng nö Vamīlen në Taṙòkhöre.’ Höng ‘Kayööngö’ ngöṙô pöri misī ang Yēsū nö havëken ò, ngam löktö mikahkūö hī töm innôlö ihôi ngam Tēv tö më tarik ò nö ngön.” Lōnu ang Yēsū tö hī öi sā ṙô ò öi Yöngre vöh ṙô tö Yāvē, ngam tö kiröngen hanangenlōn tö më kūönre. Ta-a chěi töi ngëichkö nup ihih tö nët inlahngen imat ngam Paipöl minë chūök Yēsū nö ‘Kayööngö’ ngö ṙô tö Yāvē.

14. Sitih ṙô ang Yēsū nö vënyö inlahen Yāvē nö pōiṙāi mat tö ngòh töhěng tak lamöklōnre? (Mëtiv 10:29-31) (Ngëichkö ngam nyat.)

¹⁴ Ta-a töi urěh chumkūöṙen tö minë ṙô Yēsū in ngam Mëtiv 10:29-31. (Vë-evkūö.) In në miröökö ang Yēsū nö hachōḵ ṙôre nö kakkö minë chehechōn. Hö-ö nun në chehechōn nö hangenlōn tö Yāvē, ötrēhěn inrē nö ha-önyö ò, sön ngam Yöng hī nö keuheūtlöre mikahkūö tö inlahen u. Yěn hěng nòng öre öp tö suktöre nö in u nö el tumlat, ngaich chumkūöṙen ang Yāvē tö ò. Yēḵ Yāvē nö pōiṙāi mat tö minë töng kun-kun chehechōn, ngaich kò-òren öm fē-a tö ò nö pōiṙāi mat takô tö më tö chiplö tarikre, më hamòltö hanangenlōnre nö löklōn ò. Ngöṙô ön ngam tö 30 miröökö, “Kaheūki nun minë keūyö yīö nö ṙòkhöre.” Vënyu nang in tö ngam istötī nōt ngih miröökö tö Yāvē nö kētö ṙinatö-ellōn hī nö löktö i minë tö aṙū-uti mikahkūöre tö ò nö chumkūöṙen tö ngòh töhěng tak mahaköp nö in Kristū. Hòṅ kētö ṙinatö-ellōn hī ang Yēsū nö löktö in minë ṙôre in në miröökö, tö ngam Yöng hī Yāvē nö pōiṙāi mat tö öi töhěng tak öi lamöklōn ò.

15. Asūp mikahkūö meh tö inlahen ngam Yöng hī aṅ el halīöngö öm löktö in minë ṙô Yēsū in ngam Yôhan 6:44?

¹⁵ Töi chumkūöṙen hēk tö ngih tahëng inlahngen ik sā Yēsū nö ‘Kayööngö’ ngöṙô tö Yāvē. (Vë-evkūö Yôhan 6:44.) In ngih miröökö an nö vënyu inlahen ngam Yöng meh aṅ el halīöngö nö kūö ngam hanangenlōnre tö meh nö tūökten meh nö in re. Kūö yòh anga-aṅ nö ngatī inlahen? Kūö ò nö meukö meh öm tö yāichö ellōn. (Inl. 13:48) Ngöṙô ngam (Ingki) istötī nōt ngam Yôhan 6:44 tö Yēsū lohten nö kakkö ngam ṙô Yarimiā nö ihih, ngam tö ngö, ‘Kūö ngam töt chanuhuvṙen chin hanangenlōnre tö meh öich tūökten meh in re, hēk iṙūöhen inrē öich hameuktö ngam töt chanuhuvṙen hanangenlōnre in meh.’ (Yar. 31:3; Asātô e im Hōsī 11:4.) Angū-ö ön ngih miröökö lökngörit ngih ātiköl. Löktö in minë ṙô Yēsū in öi akahakūö tö ngam Yöng hī ngam aṅ el halīöngö nö örheūheu nö ngëichkö minë tövai tinrīken hī, pòrô ayī-ö öi öt meukö u nö in re.

16. (a) Asūp ṙô Yēsū nö haköptö inlahen Yāvē, ngaich kūö yòh ayī-ö hòṅ ṙatö-ellōn in ò? (b) Sitih inlahen öm më-eṅ mihôiṅ ṙūöhlö ngam ṙinatö-ellōnre tö Yāvē nö tö akaha nö Inyöngö? (Ngëichköm pòks “Ngam Yöng Hī Lōn Hī Öi Ṙòkhöre.”)

¹⁶ Ik sā Yēsū nö vënyen Yāvē nö Yöng hī, ngaich sā tö ngöṙô anga-aṅ nö in hī öi ṙòkhöre, “Rö-ö an Yāvē nöng Yöng chu, pön Yöng meh inrē.” Mihôiṅ më-eṅ ṙatö-ellōnre tö ò nö hangenlōn takô tö meh hēk chumkūöṙen takô inrē tö meh. Lökten yěm ngöṙô lōn, ‘öt akahkūö chin tö Yāvē yěn hangenlōn tö chu hēk yěn hö-ö,’ ngaich kò-òren öm afītöre öm ngöṙô, ‘hö-ö öich chū-ö hòṅ ṙatö-ellōn tö ṙô Yēsū, ngam tö keuheūtlöre mikahkūö tö inlahen ngam Yöng hēk tö örheūheu nö kò-òṙô?’—1 Pīt. 2:22.

IṘŪÖHEN ṘŪÖHLÖ NGAM ṘINĀTÖ-ELLŌNRE

17. Kūö yòh öi hòṅ iṙūöhen ṙūöhlö ngam ṙinatö-ellōnre tö Yāvē nö hangenlōn tö hī?

¹⁷ Hangenlōn ang Yāvē tö hī, ngaich hòṅ iṙūöhen ayī-ö ṙūöhlö ngam ṙinatö-ellōnre tö e. Sā maheuk hī ngaich taheūi in ngih ātiköl tö ngam Satān ngam tö kunyaha elmat tö hī hēk ngam tö minyôiny-aṅ nö kalēḵ alaha anga-aṅ nö sōngen hī löklōn Yāvē. Hòṅ hakūönrngen ngam kuilōn hī anga-aṅ öi lōn Yāvē, lökten nö örheūheu nö ma-ainyre nö vīhöt ṙinatö-ellōn hī tö Yāvē nö öt hangenlōn tö hī. Ta-a töi ui ṙatö-ellōn in minë tö minyôiny ṙô ngam Satān!—Yōp 27:5.

18. Asūp mihôiṅ inlahen meh ṙūöhlö ngam ṙināto-ellōnre tö Yāvē nö hangenlōn tö meh?

¹⁸ Yēḵ meh hòṅ ṙūöhlö ngam ṙinatö-ellōnre tö Yāvē nö hangenlōn tö meh ngaich hòṅ örheūheu më-eṅ vë-ekūötēv havëkö kūö ò tö inlahenre öm sā mat ò öm ngëichköre. Afēkö minë kahūich yik kamūich ngam Paipöl man, nö vënyö inlahen Yāvē nö kiröngen hanangenlōn tö më tarikre. Afēkö inlahen hī man tö hī yěi hangenlōn min tö Yāvē, ngaich hangenlōn min anga-aṅ tö hī. Afītöre man tö inlahen Yāvē nö kēḵngö ngam hanangenlōn kūönre nö chö-önyten meh hēk ṙatö-ellōn inrē öm in ngam ṙô Yēsū nö vënyen Yāvē nö Yöng meh. Iṙūöhen man öm aṙū-uti mufē öm fēken u. Ngaich yěn ōt min mahatönkūö meh nö ngöṙô, “Ṙatö-ellōnre öm më-eṅ tö Yāvē nö hangenlōn tö meh?” ngaich heuveū-eu ṙô min më-eṅ öm sapṙô ò öm ngöṙô, “Heūṅ, ṙatö-ellōnre chin! Lökten öich ma-ainyre öich kaheuk sakāmö öich hameuktöre öich kiröngen hanangenlōn tö ò.”