Milēḵṙen Tö Yip Tahëng

1. Kūö yòh öi ṙung ṙamlōn yěi milēḵkaṙen tö yip tahëng? (Inchōḵ-oṙô 22:1)

SITIH mufē öm ṙung yěm milēkaṙen tö yip tahëng? Lohten man ṙung öm ṙamölōn. Kô-en in öi ṙòkhöre lōnu töre öi hòṅ milēḵkaṙen. Lökten ṙung öi ṙamlōn yěn milēṙen yip tahëng tö hī. Ngö ṙô an ngam Paipöl, “mötlö an ngam minlēḵken meh tö nup töpōiṙāi chehen”!—Vë-evkūö Inchōḵ-oṙô 22:1.

2-3. Kūö yòh öng nö töt lööṙen ngam inlahen hī öi milēḵṙen tö yip tahëng? Asuh öp min haköp hī in ngih ātiköl?

² Hö-ö ön nö tö lööṙen ngam inlahen hī öi milēḵṙen tö yip tahëng. Ṙënten angū-ö nö ngatī, pöi öt lōnu ṙung töre öi ngëichkö nup vanāichö yip holre, sön ṙung öi ngatī inlahen. Rö-ö nöng angū-ö, pön kūö hī inrē el ngih ṙētak yip tarik töngamuh töt milēḵṙen tö holre, hö-ö pöri ayī-ö öi hòṅ sā inlahen cha. Pöi pītnyöre ayī-ö öi hang ngam ṙô Yāvē nö tölṙô hī öi “milēḵṙen tö taṙòkhöre tarik.”—1 Pīt. 2:17.

³ Mikahtökūöre in min in ngih ātiköl tö manah ngam inlahenre yěi milēḵṙen tö yip tahëng hēk ngëichkö ngam inlahenre min ayī-ö öi sitih inlahen mihôiṅ milēḵṙen (1) töm mikūönöre, (2) tö më prötör, sister el ngam māṅ, hēk (3) tö më tarik töt lamöklōn Yāvē. Ngamuh min tö uröṙen ngahëichkö hī, yěi kihngen öi milēḵṙen tö yip tahëng. Sön pöri ayī-ö öi hòṅ sitih inlahen milēḵṙen tö cha.

ASUH ÖP MANAH NGAM INLAHEN HĪ MILĒḴṘEN TÖ YIP TAHËNG?

4. Asuh öp manah ngam inlahen hī öi milēḵṙen tö yip tahëng?

⁴ Ngih ön manah ngam inlahen hī yěi milēḵṙen tö yip tahëng öi hòṅ vāyö mufē tö inlahen cha hēk vāyö tinrīken öi in cha. Mihôiṅ öi ngëichkö nup tövai tinrīken cha hēk ngëichkö nup tövai la-en cha yěi hòṅ milēṙen tö cha. Rö-ö nöng anū-ö, pöi milēḵṙen inrē tö yip tarik tö minā-av. Holtö ellōnre in öi milēḵṙen tö yip tahëng, rö-ö öi höng mahanyatkö elmat cha.—Mët. 15:8.

5. Kūö yòh öi ayī-ö milēḵṙen tö yip tahëng?

⁵ Lōnu ang Yāvē tö hī öi milēḵṙen tö yip tahëng, tölṙô hī anga-aṅ öi milēḵṙen tö yip “tö kētu minā-aṅ.” (Rōm. 13:1, 7) Lohten pöri nö rīkre yip tarik tö ngö ṙô, “Yēḵ cha min nö vāyö inlahen nö in chu ngaich möl min chū-ö milēḵṙen tö cha.” Tölöng hòng ngam inlahen hī yěi ngatī mufē? Hö-ö. Pòrô öp tö yòh tinrīken öp tarik hēk la-en ò inrē, sön ayī-ö öi hòṅ milēḵṙen tö ò. Kūö yòh? Pön lōnu ang Yāvē tö hī öi ngatī inlahen. Hangenlōn in ayī-ö tö Yāvē hēk hòṅ haṙamlōn ò inrē, lökten öi hòṅ milēḵṙen tö yip tahëng.—Yôs. 4:14; 1 Pīt. 3:15.

6. Mihôiṅ öi ayī-ö öi milēḵṙen tö yip tahëng, pòrô cha-a nö milēḵṙen tö hī? Mikahtö elmat hī. (Ngëichköm lama uk nyat.)

⁶ Hēṙu in ṙung öi kihngen öi milēḵken yip tarik, yip töt milēḵṙen tö hī. Ngö ṙô lōn ayī-ö tö hī min öi öt hěngheuh öi holtö ellōnre milēḵṙen tö cha. Hö-ö pöri angū-ö nö ngatī. Töi chumkūöṙen tö nup i rīkre inlahen imat ngam Paipöl. Miṙē-ěi hē e ang Yônatān tö ök yöngre Sôl nö ikūö yik tömaṙôngö, sön pöri ang Yônatān nö milēḵṙen tö ngam yöngre. (1 Sa. 20:30-34) Söl manā-aṅ anga-aṅ nö holṙen ngam yöngre nö la-al yik tö kunyaha elmat tö cha. (Man. 20:12; 2 Sa. 1:23) Kò-òren hēk öi chumkūöṙen tö inlahen Hëna. Sūöichka hē e anga-aṅ nö hiyōy tö ök makūö kūönṙô Ēli. (1 Sa. 1:12-14) Hö-ö pöri ang Hëna nö tainy, holtö minlēḵṙenre pöri anga-aṅ nö vë-ekūö ò. Ṙòkhöre hē e yik tarik aṅ Israel nö akahalōn tö inlahen Ēli nö öt halööktö nuk tövaich la-en kahëken nak kūönre hēk öt tövai anga-aṅ nö inchō-okūö nö inyööngö hēk mākūö kūönṙô, sön pöri ang Hëna nö milēḵṙen tö ò. (1 Sa. 1:15-18; 2:22-24) Töi chumkūöṙen hēk ngëichkö inlahen Pôl, öt milēḵṙen hē e yik tarik aṅ Ĕtens tö ò, kaheūkö hē e anga-aṅ nö tö sötöṙô tö yik tarik. (Inl. 17:18) Sön pöri ang Pôl nö holtö minlēḵṙenre nö vë-ekūö cha. (Inl. 17:22) Asuh öp haköplö hī öi löktö in në inchōḵ elmat? Yēḵ hī öi hangenlōn tö Yāvē hēk hòṅ haṙamlōn ò ngaich milēḵṙen min ayī-ö tö yip tahëng, pòrô öi kihngen öi ngatī inlahen. Töi mikahtökūöre hēk chěi tö yip tö hòṅ milēkaṙen hēk tö hī ngaich kūö yòh.

MILĒḴṘEN TÖ YIP AṄ EL NGAM MIKŪÖNÖRE

7. Kūö yòh öi mihôiṅ kihngen öi milēḵṙen tö höö öi el ngam mikūönö?

⁷ Kanihngen. Marò-òten in ṙung öi in më mikūönöre, lökten öi akahakūö tö nup tövai tinrīken cha hēk tö nup öt kumlē-en cha inrē. Tö sā inlahen ngih, lohten nö hěngtak öp aṅ el mikūönö hī tö īnu tö öp tökiröng invahre ngaich kihngen ayī-ö öi ngëichken ò, lohten inrē nö yahlö pirūtka öp tahëng aṅ el ngam mikūönö hī hēk īnu inrē tö ngam tipresön (Depression). Mihôiṅ inrē nö rīkre yip aṅ el ngam mikūönö hī mö miṙivngölōn hī nö löktö in nup ṙô re hēk inlahenre. Rö-ö nöng anū-ö, pön mihôiṅ inrē öp töhěngtak aṅ el ngam mikūönö hī töt milēḵṙen tö holre hēk höng la-alkūö holre inrē ngaich lohten min nö kūötī ò nö hö-öv ngam ṙanamlōn hēk lanāmö nö el ngam mikūönö. Anū-ö në mihôiṅ ṙētak hī öi kihngen milēḵṙen tö më aṅ el ngam mikūönöre. Tö sā ṙēngen hī yěi īnu tö ngam invah artöraitis (arthritis) ngaich örheūheu min minë tangëḵ hī nö chök kūö u nö kisichtöre nö in höö, ngatī ṙēngen më aṅ el ngam mikūönö yěn öt milēḵṙen tö höö ngaich mihôiṅ nö ötlöng ngam innôlö cha nö in höö hēk mihôiṅ inrē angū-ö nö pasū. Kô-en an ngam invah artöraitis nö öt tö lanöökuṙen, mihôiṅ pöri ngam innôlö hī in më aṅ ngam mikūönö hī nö löökta. Yēḵ më aṅ ngam mikūönö min nö milēḵṙen tö höö, ngaich mihôiṅ min nö hēk nö vailöre ngam innôlö cha nö in höö.

8. Kūö yòh öng nö töt ṙanāngen ngam inlahen hī öi hòṅ milēḵṙen tö yip aṅ ngam mikūönöre? (1 Timôtī 5:4, 8)

⁸ Kūö yòh öi hòṅ milēḵṙen? (Vë-evkūö 1 Timôtī 5:4, 8.) Ik sā Pôl hē e nö kūich ök raneh chitri chamuh in Timôtī ngaich ngö ṙô anga-aṅ nö in e tö më aṅ el ngam mikūönö nö sitih inlahen mihôiṅ nö chumkūöṙen tö höö. Mikahtö elmat hī anga-aṅ tö ngam inlahen hī yěi milēḵṙen tö yip aṅ el ngam mikūönöre nöng rö-ö angū-ö nöng la-en hī, inlahen hī pöri angū-ö yēḵ hī ha-öiny ngam Tēv, tö ngö manah, tö nôlhöt inrē ngam inlahen hī öi milēḵṙen tö yip tahëng nö in ngam inhööinyö Yāvē, pön anga-aṅ misī ramehlörit ngam mikūönö, halēnlö ò angū-ö. (Efi. 3:14, 15) Lökten yēḵ hī öi milēḵṙen tö yip aṅ ngam mikūönöre, ngaich tö milēḵṙen min ayī-ö tö Yāvē. Angū-ö ön ngih töt insā-av nö lāinyngen hī öi milēḵṙen tö yip aṅ ngam mikūönöre!

9. Sitih inlahen aich mihôiṅ më inpīhö kikōnyö hēk kikānö nö milēḵṙen tö höö? (Ngëichkö minë nyat.)

⁹ Sitih inlahen öi yěi milēḵṙen? Yēḵ ngòh inpīhö kikōnyö nö milēḵṙen tö ngam pīhöre kikānö ngaich pōiṙāi mat min anga-aṅ tö ò, milēḵṙen min anga-aṅ tö ò, pòrô nö elhôi yip tahëng hēk yěn höng nëttak cha-a. (Inch. 31:28; 1 Pīt. 3:7) Öt hěngheuh min anga-aṅ nö kē-ěl këlre nö in ò, öthěngheuh inrē min nö miṙēngen ò hēk kūöṅnö elmat tö ò. Ngö ṙô ön ngòh prötör ang Ĕrīöl:a “Tövahāvö ön ngòh pīhö chu ngaich hēṙu ṙung anga-aṅ nö chökhuṙô tö chu ngaich haṙivlōn chū-ö tökūö nup ṙô ò, yěn ngatī inlahen pöri anga-aṅ ngaich fē-ělre chū-ö tö ò nö öt tölngenre nö ngatī inlahen. Fē-ělre inrē chū-ö tö ṙô ngam 1 Kòrin 13:5, ngaich angū-ö mahayööken chu öich lāmö elkuilōn hēk milēḵṙenre öich vë-ekūö ò.” (Inch. 19:11) Yēḵ ngòh töhěngtak inpīhö kikānö nö milēḵṙen tö ngam pīhöre kikōnyö ngaich eū-an min anga-aṅ nö ikūö yip tahëng. (Efi. 5:33) Öthō min anga-aṅ nö ötlēḵkö elnang öp pīhöre, miyëḵṙô tö ò hēk vë-eng nang ò, pön akahakūö anga-aṅ tö ò min yěn ngatī inlahen ngaich mihôiṅ min nö hireūtkenre nö pasū ngam innôlö cha nö in höö. (Inch. 14:1) Kò-òren öi chumkūöṙen tö inlahen ngòh töhěngtak sistör aṅ Itali, tö vahav ngam pīhö ò hēk tö yahlö pinṙūtölōn inrē, ngö ṙô anga-aṅ: “Hēṙu chū-ö öich ngölōn tö ngam pīhöre nöng yahlö mufē nö in nup töng rahëichyen inlahen, yěn ngatī inlahen anga-aṅ ngaich im aṙëkūöre ṙung chū-ö öich meukiṙen öich tainy tö ò hēk höng ilök ṙôre inrē ṙung öich vë-ekūö ò. Hanôl yik tarik pöri ngaich chū-ö yik tö milēḵṙen tö holre hēk tövāyö ṙô inrē nö kakkö inlahen holre, lökngöre chū-ö tö inlahen cha, tö öp lökten chu ngaich öich milēḵṙen yěich vë-ekūö ngam pīhöre.”

10. Sitih inlahen aich më nyīö mihôiṅ nö hameuktö minlēḵṙenre tö më yöngre?

¹⁰ Yī-ö nyīö, sitih inlahen öi yī-ö mihôiṅ milēḵṙen tö më yöngre. Minë chööngö vahī cha nö chö-öinytö ngam mikūönö hāngu u yī-ö. (Efi. 6:1-3) Holtö minlēḵṙenre inrē yěi vë-ekūö cha. (Man. 21:17) Yēḵ mina yöng yīö ngaich nö ṙēḵtivö ngaich ṙūöhlö inlahenre hēk yī-ö öi chumkūöken cha. Kò-òren öi chumkūöṙen tö inlahen sistör Mariā, töt më-el ngam kanô-en an ngam yöng ò kikōnyö. Ik sā ngam yöng ò kikōnyö nö vahāvö ngaich pōyen tī anga-aṅ nö hakihten ò, kihngen ngaich hē e ang Mariā nö chumkūöken ngam yöngre. Ngö ṙô anga-aṅ: “Vë-ekūö Yāvē chū-ö hē e öich ngö ṙô, hayööken chu man öich milēḵṙen tö ngam yöngre kikōnyö hēk chumkūöṙen inrē tö ò. Ngöṙôlōn chū-ö tö Yāvē yěn tölṙô chu öich milēḵṙen tö ngam yöngre kikōnyö ngaich kētö kumlēḵ chu inrē min anga-aṅ öich ngatī inlahen. Iṙò-òten ngam inlahen chu ngaich, ngaich haköplu chū-ö tö inlahen ngam yöngre yěn pòrô nö öt halööktit minë inlahenre ngaich sön chū-ö öich höng hòṅ milēḵṙen tö ò.” Yēḵ hī pòrô akahakūö tö nup tötvai inlahen yip aṅ el ngam mikūönöre sön öi hòṅ milēḵṙen tö cha, ngaich mahameuktöre min ayī-ö öi milēḵṙen tö Yāvē ngam ramehlörit minë mikūönö.

MILĒḴṘEN TÖ MË PRÖTÖR SISTÖR EL NGAM MĀṄ

11. Asuh öp mihôiṅ lāinyngen hī öi kihngen milēḵṙen tö më prötör sistör?

¹¹ Kanihngen. Pītnyöre nyin më prötör sistör hī nö lök in minë ṙô ngam Paipöl, mihôiṅ pöri min öp töhěngtak prötör hēk sistör nö öt vāyö inlahen nö in hī hēk öt vāyö ṙô inrē nö kakkö inlahen hī hēk vīlö tanāinyö hī inrē. Yēḵ öp tahëng hol hī nö kunyahalōn nö in hī, ngaich mihôiṅ min ayī-ö kihngen milēḵṙen tö ò. (Kòl. 3:13) Yěn ngatī inlahen ngaich asuh mihôiṅ öp mahayööken hī?

12. Kūö yòh öng nö töt ṙanāngen ngam inlahen hī hòṅ milēḵṙen tö më prötör sistör el ngam māṅ? (2 Pītör 2:9-12)

¹² Kūö yòh öi hòṅ milēḵṙen? (Vë-evkūö 2 Pītör 2:9-12.) Vë-eny nang hī ang Pītör nö im innëtö chitri re tö inlahen yik rīkre vamī-ilre nö haköptö nuk tö minyôiny inköphöti ik raneh senchūri nö el ngam māṅ. Ötlēkôre cha-a tö yik minṙöinylen, yik “tökētu nööinyö tö ngam Tēv”. Meuk inlahen cha hē e më ma-ahānga, asuh pöri öp inlahen cha? “Milēḵṙen cha-a tö Yāvē,” lökten cha-a nö öt kaheuk më tö minyôiny mahaköphöti nö töfāluṙen hēk ötrēhěn nö ötlēkôre tö elnang cha. Kò-òren öi fēkö inlahen më ma-ahānga nöng öt hěng milôhò ṙô nö ötlēḵken cha. Höng ṙāḵlen u pöri cha-a nö in Yāvē, pön anga-aṅ min kamhòkken cha hēk kamëtö sācha cha. (Rōm. 14:10-12; asātô e im Yūt 9.) Asuh öp mihôiṅ haköplö hī öi löktö in më ma-ahānga? Höng vāyö inlahen cha-a nö in më tökunyaha elmat töre, hòṅ sitih inlahen öi pökeh ayī-ö. Hòṅ ötlēnö inlahen hòng ayī-ö öi in më prötör sistör re më tö hangenlōn tö Yāvē? Hö-ö, pöi hòṅ kahngenre öi rēhěre milēḵṙen tö cha. (Rōm. 12:10) Yēḵ hī min ngatī inlahen ngaich mahameuktöre min ayī-ö öi milēḵṙen tö Yāvē.

13-14. Sitih inlahen öi mihôiṅ hameuktö minlēḵṙenre tö më prötör sistör el ngam māṅ? Kētö inchōḵ elmat. (Ngëichkö minë nyat.)

¹³ Sitih inlahen öi mihôiṅ milēḵṙen? Yī-ö minṙöinylen, holtö hanangenlōnre yin yěi haköpten yip tahëng. (Filim. 8, 9) Yēḵ yīö öi hòṅ kētö inlēnö cha ngaich ui īnu tö ngam tanāinyöre öi halēnö cha, holtö hanangenlōnre pöri. Yī-ö sistör, mihôiṅ yin inrē yī-ö öi hayööken hī öi vī ngam tövai inlahen el ngam māṅ, mihôiṅ yī-ö öi kahngenre öi rēhěre öi milēḵṙen tö yip tahëng hēk ui ötlēköṙôre öi kakkö inlahen yip tahëng, uh rēhěn öi vë-eng nang cha. (Tai. 2:3-5) Mihôiṅ yin më prötör sistör aṅ el ngam māṅ nö milēḵṙen tö më minṙöinylen, pò më minṙöinylen nö mā-ainyre nö halēnkö minë mīting, hachōḵkūö ngam la-en inhānga hēk hayööken më prötör sistör inrē kamëken minë tövaich la-en. Mihôiṅ ayī-ö öi hameuktö minlēḵṙenre tö cha öi kētö tënga cha tökūö minë la-en cha hēk keuheūttö inlahenre öi holṙen cha.—Kal. 6:1; 1 Tim. 5:17.

¹⁴ Hěngtak hē e ngam minṙöinylen kamëtö inlēnö sistör Rōsiō, angū-ö ngaich lāinyngen ò nö öt milēḵṙen tö ò. Ngö ṙô ön ngam sistör: “Ngöṙô lōn chū-ö hē e tö ngam minṙöinylen nö kësöṙô nö vë-ekūö chu, lökten ngaich chū-ö öich ötlēkôre öich kakkö inlahen ò öich i patī. Höng hameuktöre chū-ö öich ngaich öich hang ngam inlēnöre kahëtö ò, ellōnre lōn pöri chū-ö öich höng vāchö mufē tö ngam inlahen ò nö halēnö chu hēk öt chumkūöṙen inrē chū-ö tö ngam inlēnöre kahëtö ò.” Sitih inlahen pöri ngaich ang Rōsiō? Ngö ṙô anga-aṅ: “Ik sā chu öich vë-ekūö ngam Paipöl ngaich vë-ekūö ngam 1 Tösalònikē 5:12, 13 chū-ö, in e ngaich chū-ö öich akahaiṙen töre öich öt milēḵṙen tö ngam prötör. Haṙivlōn chū-ö tökūö ngam inlahenre, lökten ngaich öich vë-ekūö Yāvē öich kakkö inlahen e hēk risörch öich in minë līpöre hī. Teūngen ngaich chū-ö tö yanöölenre öich löktö in minë risörchre, lökten ngaich öich halööktö ngam mufēre. In e ngaich chū-ö öich akahakūö tö e nö hö-ö nö vanāchö öp prötör, pön vanāchö chu. Ngam tanailölōn tö tī-iv tö chu öich öt hō-en ngam inlēnöre, in e chū-ö öich haköplūvö tö chu öich hòṅ īnu tö ngam inyāichngö yěich hòṅ milēḵṙen tö yip tahëng. Pītnyöre chin töngamuh öich ngatī inlahen hēk akahakūö chū-ö tö Yāvē nö ṙamlōn nö meuk ngam inlahen chu öich mā-ainyre.”

MILĒḴṘEN TÖ YIP TARIK TÖT LAMÖKLŌN YĀVĒ

15. Kūö yòh öi mihôiṅ kihngen milēḵṙen tö yip tarik tötlamöklōn Yāvē?

¹⁵ Kanihngen. Chöngṙen in ṙung öi meukkūö yip tarik yěi ahānga, yip töt ööire nö hang inlahen ngam Tēv hēk hang inlahen ngam Paipöl inrē. (Efi. 4:18) Rīkre ṙung yip muh mahalööknyôre nö sōḵ nö hang ṙô hī, pön ngö lōn cha-a tö nup inköptö cha ik nyinī-ö cha nöng anū-ö tölöng. Hěnghöre lohten nö öt vāyö inlahen nö in hī yip hol hī ichūök hī kamān hēk el iskūl hēk lohten inrē nö öt milēḵṙen tö minë kumlēḵ alaha hī öi la-evṙen öp yöngṙen hī kamān hēk öp tichör hī inrē el iskūl. Ngaich anū-ö mihôiṅ min në lāinyngen hī kihngen milēḵṙen tö cha hēk mihôiṅ min öi hireūt hireūtkenre öi öt vāyö inlahen in cha.

16. Kūö yòh öng nö töt ṙanāngen ngam inlahen hī öi milēḵṙen tö yip tarik töt lamöklōn Yāvē? (1 Pītör 2:12; 3:15)

¹⁶ Kūö yòh öi hòṅ milēḵṙen? Chumkūöṙen an Yāvē tö nup inlahen tinrīken hī öi in më tarik töt sā ṙinatö-ellōn hī. Ngö ṙô hē e ang Pītör tö yip tarik min nö mihôiṅ nö yihtöre nö ha-öinyö Yāvē yěn meuk minë tövai tinrīken hī. Lökten anga-aṅ nö kētö inlēnö cha tö cha yěn hòṅ laklö ngam ṙinatö-ellōnre ngaich hòṅ holtö ṙanëmenre hēk minlēḵṙenre cha-a nö ngatī inlahen. (Vë-evkūö 1 Pītör 2:12; 3:15.) Hòṅ örheūheu ayī-ö öi īnu tö ngam minlēḵṙenre yěi pòrô öi ikūö öp tarik tökirööngö minā-av hēk yěi pòrô öi ikūö öp chöch el chūök kamhôka hēk yěi pòrô öi ikūö yip tarik öi vë-eny ngam ṙinatö-ellōnre. Hòṅ köpölōn ayī-ö tö Yāvē nö keuheūtlöre mat nö meuk nup töng sitih, chumkūöṙen anga-aṅ tö nup ṙô hī öi ṙò-òv hēk sitih inlahen öi ṙò-òv. Angū-ö ön ngih töt insā-av nö lāinyngen hī öi hòṅ milēḵṙen tö yip tarik töt lamöklōn Yāvē!

17. Sitih inlahen öi mihôiṅ milēḵṙen tö yip tarik töt lamöklōn Yāvē?

¹⁷ Sitih inlahen öi milēḵṙen? Lohten yin më tarik ngam kamngö hī nö töt uroh nö akahakūö tö ṙô ngam Paipöl, hēk kūöṅnen mikahkūö inrē. Lökten yēḵ hī min öi ahānga ngaich öthō min ayī-ö öi öt löktö in minë tinrīkenre öi hameuktö cha nö kūöṅnö nö elmat hī. Örheūheu min ayī-ö öi mööḵlö mat tö cha hēk köpölōn min ayī-ö tö Yāvē nö Pōiṙai mat tö cha. (Hak. 2:7; Filip. 2:3) Yěi ötlēḵkaṙen im hē re ahānga hēk ötlēḵka elnang, ngaich öthō min ayī-ö öi havahalvah nup ötlinëkö elnangre, ötrēhěn öi sapṙô cha min öi sā yip tö mötlö mikah tö cha. (1 Pīt. 2:23) Yēḵ hī öi ṙônyö nup tötkô nö ṙahônyö hī ngaich hòṅ ilööṙen ayī-ö öi havëkö inṙē-ělre öi in cha. Sitih inlahen mihôiṅ ayī-ö öi milēḵṙen tö yip tarik ichūökre öi kamān? Yěi la-evṙen tö öp la-enre ngaich ma-āinyre ayī-ö öi la-evṙen tö e, chumkūöṙen min ayī-ö tö nup tövai tinrīken yip holre kammān hēk öp yöngṙenre inrē. (Tai. 2:9, 10) Yēḵ hī min aṅhavin töm töt michūṙen, kalēḵ alaha öi la-evṙen hēk holtö ellōnre inrē öi la-evṙen ngaich yěn pòrô yip tarik nö öt ṙamölōn nö in hī ngaich öt löktu ang Yāvē nö öt ṙamölōn.—Kòl. 3:22, 23.

18. Kūö yòh öi hòṅ ṙūöhlö ngam kuilōnre öi milēḵṙen tö yip tahëng?

¹⁸ In ngih ātiköl in ngaich taheui öi meuk minë lāinyngenre öi mihôiṅ milēḵṙen tö yip tahëng. Yēḵ hī öi milēḵṙen tö më aṅ el ngam mikūönöre ngaich milēḵṙen min ayī-ö tö Yāvē ngam kui ngam mikūönö hī. Yēḵ hī öi milēḵṙen tö më prötör sistör el ngam māṅ ngaich sön inrē min ayī-ö öi tö milēḵṙen tö Yāvē. Yēḵ hī öi milēḵṙen tö më tarik töt lamöklōn Yāvē, ngaich yihtöre min cha-a nö ha-öiny ngam tökiröng Tēv Yāvē. Yěn pòrô yip tarik nö öt milēḵṙen tö hī, sön ayī-ö öi ṙūöhlö ngam kuilōnre öi milēḵṙen tö cha. Kūö yòh? Pöi yěi ngatī inlahen min ngaich kē-ěkūö hī min ang Yāvē tö inkòlô, kilēḵngôre anga-aṅ nö ngö ṙô: ‘Yip tö milēḵṙen min tö chu, milēḵṙen min chū-ö tö cha.’—1 Sa. 2:30.