Vinënyö Inlahen Ngam Inreulngö Tarik Ikūö Në Taṙòkhöre Panam—Sitih Ṙô Öng Ngam Paipöl?

Pingangkūö in öi hang inlahen më mahareulngö holre nö ikūö në taṙòkhöre panam ik Chulāi 2022.

• “Haṙivlōn yik tarik nö hang finëlngö ök Prime Ministör sin ang Sinchō Āpē, kūö ò nö tö akahka nö mahayöng nö i Chapān.” Pingangkūö në taṙòkhöre panam nö hang inlahen finëlngö ò, pön öt yaha ṙôken famëlngö tarik nö i Chapān. Keūng inrē minë chööngö kinë-ekūö yip tö īnu tö minë inreul.—Chulāi 10, 2022, Tö Chapān Tāims.

• “Hěntak ök tarik mahareulngö yik tö lūöi tak el sôping môl nö i Těnmāk Kôpenhëkön, lökten ngaich yik tarik aṅ in e nö pa-ekūö.”—Chulāi 4, 2022, Reuters.

• “Saôt Afrikā: El ök töhěng chūök amòk ka-eūt i Sōvěto taonsip. Haroh tumtak yik tarik töt piyu-utī nö hareulngö yik holre. 15 tak ṙôken yik tarik tökapah hē e.”—Chulāi 10, 2022, Tö Kartīön.

• “Mötlö tö tö 220 ṙôken yik tarik tö hareulī i Amerikā. Hē el ṙētak haneūheu yik tarik ik 4 Chulāi.”—Chulāi 5, 2022, CBS Niūs.

Hēṙu öng min në finëlngö tarik nö keuheūt nö ikūö në taṙòkhöre panam? Sitih ṙô öng ngam Paipöl?

Ahëti yip min Famëlngö Tarik

Vë-eny nang hī an ngam Paipöl tö hī ngaich el ngih “manā-aṅ sakāmö,” ngam ṙētak tö pōyen tarik nö āngëṅ hēk töt piyū-utī inrē nö fëlngö holre. (2 Timôtī 3:1, 3) Lökten an ngam finëlngö tarik nö sīöplöre ṙôken, örheūheu tarik nöng vöö. (Lūkös 21:11) Hang ngam kinlēḵngô ngam Paipöl pöri ayī-ö, tö yip famël tarik nö ahëtiyö min nö ngaich, ‘möl min ngam lanāmö nö keuheūtngöre chūök hēk öt pa-ekūö min ayī-ö, höng kuchīken inrē.’ (Isayā 32:18) Sitih inlahen pöri min ngam finël tarik nö ahëtiyö?

Ngaich an min ngam Tēv nö ahëtngö yip tötlöök tarik nö holre tö nup chehetī cha nö ṙòkhöre.

• “Rökiṙen pöri öp tötlöök nö ṙā-ang im panam.”—Inchōḵ-oṙô 2:22.

• “Vīngen kinyūngö an nö ṙā-angre söl manā-angkūö ngih panam: likölngö linreny an, fangngö nup vöi inrē nö pinyënyi; föngngö nup inröl an nö i kūö tameūyö.”—Salmai 46:9.

Haköpten yip tarik min ngam Tēv töm lanāmö, ngatī inlahen min ngam finël tarik nö keuheūt nö ahëtiyö.

• “Hö-ö cha-a min nö chök öt rēhĕn nö kapah nö i kui minë töhet rôngö chu: pò ngam panam min nö tööḵlö tö inkaha aṅ im Mā Tēv, sā minë mak nö hatööḵlö ngam mai.”—Isayā 11:9.

• Haköpten më tarik an ngam Tēv töngamuh “nö röm nup fël re nö kunköh tumlat, nup vöi cha inrē nö kinmöp elkui chōn.” Tö ngö manah tö cha min nö ṙāngö minë chehetī famël holre.—Maika 4:3.

Vë-eny nang hī an ngam Paipöl töp tövai panam, ngam chūök yip tarik tötlöökö la-en min nö hö-öv. Öt pa-ekūö min yip tarik inrē nö inyöngkūö e. Yěm hòṅ ṙūöhtö mikahkūöre vë-ekūö ngih ātiköl “Lāköre Hòṅ Meh Öt Fukta In Nup Kanihngen.”

Ahëtiyö an min ngaich ngam finëlngö tarik, yěm hòṅ ṙūöhtö mikahkūöre vë-ekūö ngih ātiköl “Ngaich An Min Ngam Lanāmö Nö yih nö Ing Panam!”