Ṙanūöhlöre Ṙôken Ngam Ṙanāchö Nö Ikūö Në Taṙòkhöre Panam—Sitih ṙô öng ngam Paipöl?

Ṙūöhölre ṙôken takô ön ngam ṙanāchö nö ikūö në taṙòkhöre panam ik Chulāi 2022:

• Innët heuh ṙô më òfisör an ngih nö tölṙô më tarik nö hīnöre, pön ṙūöhölre ṙôken min hēk ngam ṙanāchö nö el ngòh chingëṅt nö ikūö minë tö 70 panam i Chainā.”—Chulāi 25, 2022, CNN Wire Sörvis.

• “Öktī kūö minë el inchōnngö i minë panam Yurōp, kūö ṙanūöhlö ṙôken ngam ṙanāchö.”—Chulāi 17, 2022, Tö Kartīön.

• “Öt hěngheuh in meuk tö ngatī ṙôken ṙanāchö nö keuheūtngöre chūök i Amerikā ik Söntē. Kalēḵ ṙanāchö röön ngam kuföt nö föököre nö lā chuhöt, lòhngö hēk ellōn ngam panam i Amerikā.”—Chulāi 24, 2022, Tö Niū Yòrk Tāims.

Tö sitih manah ön anū-ö? Kihngen öi min ngaich öi aṅ ikūö ngih panam? Sitih ṙô öng ngam Paipöl?

Kūchi ṙanūöhölre ṙôken öng ngam ṙanāchö nö imat ngam Paipöl?

Heūṅ. Tö hěng ön ngih nö in minë tö-eūka aṅmat ngam Paipöl nö tö teungtakūö nö i në ṙētak hī. Tö sā ngam kinlēḵngô Yēsū, tö hī min meuk “nup pinheṅ-eṅkūö ane inrē yöng minkahngö.” (Lūkös 21:11) Kihngen yip ngaich tarik nö aṅ tölōnre nö ikūö ngih panam tö kūö ṙanūöhöl ṙôken ngam ṙanāchö.

Kihngen öi min ngaich öi aṅ ikūö ngih panam?

Hö-ö. Tö vī-i an ngih panam tö ngam Tēv nö tö köpsöröṙen nö chūök hī öi iyöng. (Salmai 115:16; Mumkahten 1:4) Öt halöngtuṙen yin min më tarik tö ngam Tēv nö piyayngö ngih panam. Ahëtngö yip tarik pöri min anga-aṅ “yip mahalëlngö ngih panam.”—Inmeukhömat 11:18.

Töi ngëichkö në tö nët kinlēḵngô ngam Tēv, inlahen tī ò min nö halööktit ngih panam:

• “Ṙāmölōn min öp elinchōn töp chūökö inrē töngesngö; ṙāmölōn ngam tönyalnyi inrē, pöpnyöre kūö ṙòng inrē sā pūl.” (Isayā 35:1) Hö-ö ön min ngih panam nö hökiṙen tö ngam Tēv nö ngatī inlahen, pön halööktitvö min nup tö pasū tö ò.

• ‘Haṙūötken ngih panam man, vī ngih tumlat nö kôlòkūö, ngaich pōyen tī öm kētö ṙòng taneūich.’ (Salmai 65:9) Vī-i min hēk ngih panam nö tövai nö peretāis.

Sitih inlahen ön minë kinlēḵngô aṅmat ngam Paipöl nö teungta ṙô, tö inlahen ngam ṙanāchö nö ṙūöhölre röön. Yěm hòṅ ṙūöhtö mikahtökūöre ngaich haköp ngih ātiköl “Inlahen ngih Panam Min Kūö Inṙīköre Minë Kumföötö—Sitih Ṙô öng Ngam Paipöl.”

Vī-i min hēk ngih panam nö tövai nö peretāis, ngëichkö ngam ātiköl “Höng ngam Tēv an tö mihôiṅ nö laklö ngih panam?”