LESÖN 26
Kūö Yòh Ön Në Ötlanöökö Hēk Në Kanihngen Nö Ikūö Ngih Panam?
Ngö ṙô lōn ṙung tarik yěn fukkui tö nup kanihngen. Kūö yòh öi vö ngatī kanihngen? Akahalōn öm töm sanapṙô ngih intöönö nöng imat ngam Paipöl, öt hō man min öt teūngen tö hanöhlö re yěm akahakūö tö e!
1. Sitih löktö yanīhi öng ngam ötlanöökö nö ing panam tö tī ngam Sī-ö?
Ahôngen Yāvē ngam Sī-ö kūö ò nö yal tö ngam mina-aṅ. Angū-ö chö-öny lōn ò nö halō-ongkūö nak raneh tarik na Ātöm na Ēva. Nö sitih inlahen? Milichngen ṙô ngam Sī-ö nö ikūö Ēva nö haṙöingen ò. (Ranehlö 3:1-5) Ngö ṙô anga-aṅ höng tölngenre an ngam Tēv nö öt hòṅ kē-ěkūö na tö nup tölöök chehen. Yēḵ na min öt hang chööngö ò ngaich ṙamlōn min na-a. Ṙūöhnyö ṙôre hēk ngam Sī-ö nö minyôiny nö in Ēva nö ngö ṙô, öthō nan min kapah, ngam raneh minyôinyaṅ tö ṙô hī. Lökten ngam Paipöl nö vë-eny inlahen ngam ‘Sī-ö tö ò nö töminyôinyaṅ hēk yōm minyôinyaṅ inrē.’—Yôhan 8:44.
2. Achīö ök Katöllö na Ātöm na Ēva tö hāngö ṙô tö cha?
Keuheūttöre tī ngam Tēv Yāvē nö kē-ěkūö na Ātöm na Ēva tö nuk aṅ ngam panò-òṅ, öt hēngö hanakten cha-a. Ngö ṙô anga-aṅ nö in cha: chuhēṙenkūö nan kò-òren nyā minë ṙòng minë chōn el ngam panò-òṅ, höng hěng hang maha ngam chōn tötkô nö nyā-aṅ ṙòng tö na. (Ranehlö 2:15-17) Sönngenre cha-a nö nyā ṙòng ngam chōn ngam sinôngen cha nö nyā tö Yāvē. Kūichi an nö imat ngam Paipöl ‘tö Ēva nö urěh nö köch ṙòng ngam chōn ngaich nyā-aṅ e unôichngöre inrē ang Ātöm nö nyā-aṅ e.’ (Ranehlö 3:6) Töhëtö vinī-i nak na Ātöm na Ēva tö ngam Tēv lökten cha nö mihôiṅ nö lööngö kahëken tö nup la-en re. Hē cha pöri nö tölngenre nö öt hang chööngö Yāvē, hēten tö e ngaich cha-a nö köölö fālen. Hameuktöre cha-a nö sō-en Yāvē nö yöng cha, kihngen ngaich cha-a pön vāichö katöllö tö talöökö re.—Ranehlö 3:16-19.
3. Asuh öp ṙòng ngam la-en nā Ātöm Ĕva?
Hē na Ātöm na Ēva ngaich nö köölö fālen öt köp ngaich ngam hanëtö cha. Lökngöre inrē më kūön cha tö ngam tökööl kahëken cha. Ngö ṙô ngam Paipöl nö vë-eny inlahen Ātöm. “Lökten sā ngam tökööl nö yih nö ing panam nö lökten i tö hĕng tak tarik, lökten im tökööl inrē ngam kinpaha; ngaich ngatī ngam kinpaha nö söl i taṙòkhöre tarik.”—Rōma 5:12.
Ōt nup muh inrē lāinyngen hī mihôiṅ öi fukkui tö kanihngen, vāichö katöllö tö talöökö re, hēk tī yip hol hī inrē yēḵ cha nö vāichö katöllö, mihôiṅ inrē öi fukkui tö kanihngen yěi lönglö chūök hēk ṙētak öi ichūök nup pinlāngen.—Vë-evkūö Mumkahten 9:11.
MIKAHTÖKŪÖRE HĒK
Kūö yòh öi mihôiṅ ngö ṙô tö në tötlöök la-en hēk kanihngen ikūö ngih panam nö öt pòkūö tī ngam Tēv. Sitih mufē ang ngam Tēv yěn meūkö hī öi kihngen? Ta-a töi mikahtökūöre.
4. Ngam tö pò-òvkūö tö në kanihngen miṙivlōn inrē
Pōyen tarik tö ngö lōn tö ngih panam nö eltī ngam Tēv, kô-en hòng angū-ö nö ngatī? Röngnyöm VITIŌ.
Vë-evkūö Inrāmöre 1:13 hēk 1 Yôhan 5:19, ngaich kakkö ngih intöönö yamih:
Kô-en ön në kanihngen hēk miṙivlōn hī nö pòkūö tī ngam Tēv?
5. Ngëichkö në ṙòng la-en ngam inyööngö töm Sī-ö
Vë-evkūö Ranehlö 3:1-6, ngaich kakkö minë intöönö yamih:
Asuh ök ṙô ngam Sī-ö nö minyôiny?—Ngëichkö minë miröökö 4 töm 5.
Sitih ṙô ang ngam Sī-ö nö vīlö fālen Yāvē, tö ò nö hayuntö mat tarik tö nup tölöök, pön sō nö kē-ěkūö cha tö u?
Sūöichkö inlahen ngòh tarik ngam Sī-ö tö ò nyin nö mihôiṅ nö ṙamlōn, yěn öt hayöngkaṙen tö Yāvē. Kô-en hòng angū-ö nö ngatī?
Vë-evkūö Mumkahten 8:9, ngaich kakkö ngih intöönö yamih:
Sitih inlahen öng ngaich ngih panam kūö e nö öt hayöngkaṙen tö Yāvē?
Töhet nak sin na Ātöm na Ēva hē cha nö el ök Peretāis, kūö cha pöri nö hang ṙô ngam Sī-ö, lökten cha-a ngaich nö köölö fālen pön söklöre nö la-al Yāvē.
Kūö inhôngen ngaich ngam tökööl, tö në kanihngen hēk töm kinpaha nö yih nö ing panam
Yēḵ në kanihngen, töm tökööl hēk töm kinpaha nö kē-ěyö min tö Yāvē ngaich möl min hēk ngòh tarik nö het nö el öp Peretāis
6. Chumkūöṙen Yāvē tö hī yěi kihngen
Kô-en ang ngam Tēv nö lökngöre tö nup kanihngen hī? Töi hang ṙô tī ök Rācha Tāvit hēk Pītör inrē nö kūich? Vë-evkūö Salmai 31:7 hēk 1 Pītör 5:7, ngaich kakkö ngih intöönö yamih:
Sitih mufē öm, yěm hāngö Yāvē nö tö kirööngö chumkūöṙen hēk akahakūö inrē tö nup kanihngen hī?
7. Ṙòkhöre min në kanihngen hī nö kē-ěyö tö ngam Tēv
Vë-evkūö Isayā 65:17 hēk Inmeukhömat 21:3, 4, ngaich kakkö ngih intöönö yamih:
Kilēḵngôre ang Yāvē tö ò min ngaich nö kēngen në taṙòkhöre kanihngen hī. Kūö yòh öm teūngen tö hanöhlöre yěm hang ngih kinlēḵngô?
Akahakūö öm?
Chōich ngöre ngam minë-eny Yāvē tö kūö ök raneh minyôinyaṅ ngam Sī-ö nö el ök panô-òṅ Ēten. Vënyen Yāvē anga-aṅ nö töt heuveū-en nö hayöng, töt hangenlōn inrē tö tarik. Veūten an min ngam Tēv ngaich nö kēngen në taṙòkhöre kanihngen hī ngaich ahetlö ngam minë-enyre, tö ngö manah angū-ö tö Yāvē min ngaich nö hameukhömat hī töm inyööngö tö ò nö töt insa-av. Tökiröng nö imat Yāvē ngam inhetlö ngam minë-eny ò nö keuheūtngöre chūök nö ikūö ngih panam.—Mëtiv 6:9, 10.
ṘÔ YIP TAHËNG: “Yěn mihôiṅ ngam Tēv nö kētö kumchikṙen hī ngaich mihôiṅ inrē nö kētö kanihngen hī.”
Sitih ṙô öm min öm kētö sanapṙô ngih intöönö?
MINË HAKÖP HĪ NGAICH
Keuheūtngöre chūök nun në kanihngen töngamuh nö ikūö ngih panam, nöng tī ngam Sī-ö, tö nak raneh inrē tarik. Akahakūö pöri Yāvē tö kanihngen hī pön tö chumkūöṙen. Ngaich an min nö kēngen në taṙòkhöre kanihngen hī.
Sitih ṙô öm më-eṅ?
Asuh ök minyôinyaṅ ngam Sī-ö nö in Ēva?
Asuh ök ngaich ṙòng ngam la-en na Ātöm na Ēva kūö cha nö ahôngen chööngö?
Sitih löktö mikahkūö öi tö Yāvē nö tö chumkūöṙen tö hī?
NGËICHKÖ NË INRĒ
Ngëichkö ṙô ngam Paipöl nö vënyö manah ngam tökööl.
Yěm hòṅ ṙūöhtö mikahkūöre tö inlahen ngam Sī-ö nö vīlö fālen ngam Tēv nö el ök panò-òṅ Ēten, ngaich vë-ekūö në ātiköl.
“Kūö Yòh Ang Ngam Tēv Nöng Hökngen Hī öi Kihngen?” (Chūökamahati, Chönvörī 1, 2014)
Ngam intöönö, kamëtö hanöhlö hī yěi teūngen tö sanap ṙô e.
“Kūö Yòh Yik Yahūti Nö Fëli? Kūö Yòh Ngam Tēv Nö öt Laklen Cha?” (El vepsāit töhakööpö)
Hē ngam tarik nö akahakūö tö löktö në kanihngen nö ing panam, ngaich sitih mufē anga-aṅ.