Tökiröng nö kaha ṙô ngam Paipöl, ngam Pūlngö ngam Tēv. Löktö in e tī min Yāvē nö vī ngih panam nö tövai nö peretāis, sā ngam lōn ò misī. Asuh öng rih ngam Pūlngö ngam Tēv? Sitih löktö mikahlōn öi tö e ngaich nö hayöng? Asuh nup ngaich la-en e? Hēk asuh min nup la-en e ip yamih ṙētak? In ngih lesön hēk in nup yamih min tö nët lesön öi mikahtökūöre tö nup sanapṙô u.

1. Asuh öng ngam Pūlngö ngam Tēv, ngaich achīö ngam Rācha e?

Vīlö ngam töhěng inyööngö Yāvē nö el halīöngö, ngam Pūlngö ngam Tēv tö ṙô hī. Ngaich vīlen Yēsū Kristū nö Rācha e. (Mëtiv 4:17; Yôhan 18:36) Ngö ṙô ngam Paipöl: ‘Rācha min anga-aṅ . . . ngaich örheūheu ngam Pūlngö ò min nö hayöng.’ (Lūkös 1:32, 33) Ngaich elkatòh chööngö Yēsū min yip taṙòkhöre tarik nö ing panam.

2. Achīö yip hol Yēsū nö hayöng?

Öt höng hěng tak min Yēsū nö hayöng. Pön ‘havah yip miyöngö, tum mi-ëlô tarik hēk tömaṙôngö tarik inrē . . . nö hayöng nö el ngam Pūlngö ò.’ (Inmeukhömat 5:9, 10) Ngaich yin nö lāku ṙôken më haköptö Yēsū, hēten tö ök yanīhi ò misī nö ing panam. Ṙòkhöre hòng min cha-a nö chuh el halīöngö nö hayöng? Hö-ö, pön höng 144,000 ṙôken min yip hol ò nö hayöng. (Vë-evkūö Inmeukhömat 14:​1-4.) Ngaich iyöng kūö ngih panam min yip tö ōttit [tölöök tarik] nö hayöngkaṙen tö ngam Pūlngö ò.​—Salmai 37:29.

3. Sitih inlahen ngam Pūlngö ngam Tēv nö mötlö tö në inyööngö tö tarik?

Lōnu lang vē mā mahayöng ing panam nö hòṅ meuklökui yip tarik hayöngkenre, ötkô pöri pön öt kalēḵ. Öt höng angū-ö, pön öt köp inrē ngam inyööngö nö eltī cha. Pön kēḵ chūök cha yip tahëng, yip töng öt uroh inrē nö hòṅ meuklökui tarik. Öt hěngtak pöri tökô min nö kēḵ chūök ngam Rācha ang Yēsū, pò ngam Tēv nö ‘asöklö ngam Pūlngö ò nö töt hētu nö payāyi min.’ (Tanīěl 2:​44) Ṙōngö kui min yip tarik hayöngken Yēsū nö ing panam. Kūö ò nö töhangenlōn, tö aṙē-ělōn hēk tö akaha inrē nö rācha. Haköptö yip tarik re min anga-aṅ nö hangenlōn, aṙē-ělōn hēk milēḵṙen inrē tö höö.​—Vë-evkūö Isayā 11:9.

4. Keuheūtngöre chūök min ngam Pūlngö ngam Tēv nö hayöng nö ing panam

Öt hěng tak tarik tö sā ṙôken kinë-ekūö Yēsū töm minā-aṅ hēk kumlēḵ inrē nö hayöng. Vë-evkūö Mëtiv 28:18, ngaich kakkö ngih intöönö yamih:

• Kūö yòh öi mihôiṅ ngö ṙô tö Yēsū tö ò nö mötlö ṙôken aṅ in tö minā-aṅ tö yip tarik mahayöng?

Töng haṙīka yin vē mā mahayöng ing panam. Tölngu inrē minë kamtö chūök cha yěn hayöng. Öt ngatī pöri ngam Pūlngö ngam Tēv. Vë-evkūö Tanīěl 7:​14, ngaich kakkö minë intöönö yamih:

• Vënyu ngam Pūlngö ngam Tēv nö “töt chanūhuvṙen,” asuh öp min yanöölen hī tö lōn meh, kūö e nö ngatī?

• Keuheūtngöre chūök min ngam Pūlngö ngam Tēv nö hayöng nö ing panam? Asuh öp min yanöölen hī tö lōn meh, kūö e nö ngatī?

5. Inyööngö tö tarik hēk inyööngö töm Tēv?

Kūö yòh öi mötlö lōn tö ngam inyööngö tö ngam Tēv tö në inyööngö tö tarik? Röngnyöm VITIŌ, ngaich kakkö ngih intöönö yamih.

VITIŌ: Asuh Öng Ngam Pūlngö Ngam Tēv?​—Rahëichtamat (1:​41)

• Asuh öp ṙòng ngam inyööngö tö tarik nö ngaich?

Vë-evkūö Mumkahten 8:9, ngaich kakkö minë intöönö yamih:

• Kūö yòh öi hòṅ mötlö lōn tö ngam inyööngö töm Tēv, tö në inyööngö tö tarik? Kūö yòh öm ngatī ṙô?

6. Akahakūö më rācha ngam Pūlngö tö hī

Mihôiṅ ngam rācha hī ang Yēsū nö ‘hameuktö miṙēḵlōnre nö i nup öt kumlē-en hī.’ Kūö ò nö akahakūö tö hī, pön ngaich misī nö kēḵ alaha tarik nö ing panam. (Heprāi 4:​15) Katöllö më tö 144,000 ang Yāvē nö hol Yēsū min nö hayöng nö ing panam. Kē-ě yin nö ṙā-ang in minë ‘tum mi-ëlô tarik hēk tömaṙôngö tarik inrē.’​—Inmeukhömat 5:9.

• Akahakūö Yēsū, tö më hol ò inrē tökatöllöng tö nup kanihngen hī, kūö yòh öm höhlö yěm hāngö e?

7. Mötlö vanāyö minë chööngö ngam Pūlngö ngam Tēv tö minë tahëng

Vī chööngö yin më tarik mahayöng nö mineuklökui hēk lanaklö më tarik hayöngken cha. Ngatī ngam Pūlngö ngam Tēv nö vī chööngö nö chö-öny tö mineuklökui hēk linaklö më tarik hayöngken cha. Vë-evkūö 1 Kòrin 6:​9-​11, ngaich kakkö minë intöönö yamih:

• Yěn ṙòkhöre min yip tarik nö hang chööngö ngam Tēv, ngaich sitih inlahen mineūkö min ngih panam?a

• Lōnu Yāvē tö yip tarik ngam Pūlngö nö hang nup chööngö ò, tölöng öng tölōn meh nö ngatī? Sitih ṙô öm më-eṅ?

• Asūp löktö mikahlōn hī tö yip tarik töt hamang chööngö ngam Tēv nö mihôiṅ nö halööktitre?​—Ngëichköm miröökö 11.

MINË HAKÖP HĪ NGAICH

Tökô-en an ngam Pūlngö ngam Tēv nö töhěng nö inyööngö. Löktö el halīöngö an min nö hayöng nö ikui ngih panam.

Sitih ṙô öm më-eṅ?

• Achīö öp rācha ngam Pūlngö ngam Tēv?

• Kūö yòh öng ngam inyööngö tö ngam Tēv nö mötlö tö minë inyööngö tö tarik?

• Asuh öp lōn Yāvē nö in yip tarik ngam Pūlngö ò?

NGËICHKÖ NË INRĒ

Hang ṙô Yēsū nö vë-eny kamtö chūök ngam Pūlngö ngam Tēv.

“Kô-en Öng Ngam Pūlngö Ngam Tēv Nöng Ellōn Hī?” (El vepsāit töhakööpö)

Kūö yòh aich më Vamënyen Yāvē nö mötlö ṙinatö-ellōn nö in ngam Pūlngö ngam Tēv tö minë inyööngö tö tarik?

Haköpngöre Im Pūlngö Ngam Tēv (1:​43)

Asūp vinënyö inlahen vē tö 144,000 tarik nö imat ngam Paipöl më tö katöllöng tö Yāvē nö hol Yēsū nö hayöng? Töi mikahtökūöre.

“Achīö Yip Chamuh El Halīöngö?” (El vepsāit töhakööpö)

Asuh ök löktö ṙinatö-ellōn ök yöngnyīö më-el chěl tö ngam Tēv nöng anga-aṅ min tö kô nö ahetngö në intölten nö ikūö ngih panam?

“Akahakūö Ngaich Chū-ö Töm Intölten Nö Sitih Inlahen Nö Kē-ěyö” (Hīnöre!-E, ātiköl)

Rultenre ngam Inyööngö töm Tēv nö el halīöngö ik 1914. Angū-ö ṙētak ranehtökūö manāngen në inyööngö tö tarik. Kūö yòh öi ngatī ṙô? Töi hang ṙô minë tö-eūka aṅmat Paipöl nö vë-eny nang hī, töm inlahen ngih panam nö ötlöng, sīöp inrē në öt lanöökö tarik löktökūö ik 1914.

1. Asuh nuk tö-eūka kinlēḵngô tö ngam Paipöl?

Eūka ngam rôtòng ngam tö “sat ṙētak” nö im līpöre Tanī-ěl, ngaich im mana-angrit e min ngam Pūlngö ngam Tēv nö rultenre nö hayöng. (Tanīěl 4:​16, 17) Unôichrit e Yēsū nö ngö ṙô: “hanöng saha kinheūten ap ṙētak cha.” Vë-eny nang hī Yēsū töm ṙētak nö ṙònghöichröön, hē ò misī nö ing panam. (Lūkös 21:24) Kakkö rôtòng ngam tö sat ṙētak in min nö sitih inlahen angū-ö nö keuheūt im 1914.

2. Sitih inlahen mineūkö öng ngih panam hēk ngam tinrīken vē tarik löktö kūö ik 1914?

Hatöönö Yēsū yik mahaköp nö ngö ṙô: “Asuh öp min minkahngö yanihih Meh, öp manāngen ngih panam inrē?” (Mëtiv 24:3) Ngaich vë-eny nang cha anga-aṅ tö yip tarik min nö kiyūngö höö, ṙōlkang chūök min nup inyāichö, kumyeūnö inrē. (Vë-evkūö Mëtiv 24:7.) Eūka ngam tötvai tinrīken tarik nö imat ngam Paipöl ing “manā-aṅ sakāmö,” ngaich kūö e ‘yip tarik nö kihngen’ min. (2 Timôtī 3:​1-5) Mötlö sanīöpö ngam ötlanöökö löktö kūö ik 1914.

3. Kūö yòh öng ngaich ngih panam nöng ötlöng, hēten tö ngam Inyööngö tö ngam Tēv nö el halīöngö?

Unôichrit vinīlö Yēsū nö rācha nö el halīöngö ilööṙen anga-aṅ nö kiyung nö la-al ngam Sī-ö, tö yip tötlöök ma-ahānga ò inrē. Ötkô ngaich ngam Sī-ö. Ngö ṙô ngam Paipöl töm Sī-ö, “Suktu ngaich ngam tökiröng tulan, ngam pēch misī, ngam Sī-ö. Suktu anga-aṅ nö el tumlat; hol ò nö ṙòkhöre yip Ma-ahānga ò, nö suktu.” (Inmeukhömat 12:​9, 10, 12) Tainy ngam Sī-ö pön akahalōn töre nöng rahëichtöreṙen. Kūö tanānyö ò nö ngatī sanīöpö në kanihngen hēk miṙivlōn nö ing panam. Angū-ö lānyngen ngih panam ngaich nö ötlöng takô. Ahëti pöri min ngaich në taṙòkhöre kanihngen hī tö ngam Pūlngö ngam Tēv.

MIKAHTÖKŪÖRE HĒK

4. Sā ṙô ngam tö-eūka aṅmat ngam Paipöl, hayöng ngaich ngam Pūlngö ngam Tēv ik 1914

VITIŌ: Löktö Kūö Ik 1914 Ngaich Ngam Pūlngö Ngam Tēv Nö Hayöng (5:​02)

Ha-ehangen Nēpukatnēsar, rācha aṅ Pēpilön nö hameukhumat tö ngam Tēv nö i heūvö tö inlahen nup yamih min ṙētak. Hē Tanīěl nö vë-eny manah ngam heūvö, akahakūö ngaich ayī-ö tö ngam heūvö nö nët heuh min nö teungtökūö. Ngam raneh, hē ök Rācha Nēpukatnēsar nö hayöng. Ngam innëtö, yěn hayöng min ngam Pūlngö ngam Tēv.​—Vë-evkūö Tanīěl 4:​17.a

Vë-evkūö Tanīěl 4:​20-​26, ngaich ngëichkö ngam chāt ngaich kakkö minë intöönö yamih:

• (A) Asuh öp maheuk Nēpukatnēsar nö el ök heūvö ò?​—Ngëichkö minë miröökö 20 töm 21.

• (B) Sitih inlinken ang ngam tö meūkö chōn nö el ngam heūvö?​—Ngëichköm miröökö 23.

• (C) Sitih inlahen ang min ngam chōn yěn keuheūt ngam tö “sat ṙētak”?​—Ngëichköm miröökö 26.

Vënyö Inlahen Ngam Pūlngö Ngam Tēv Ngam Chōn El Ngam Heūvö

TÖ-EŪKA KINLĒḴNGÔ (Tanīěl 4:​20-​36)

Inyööngö

(A) Ngam tökiröng chōn

Asökiröön ngam inyööngö

(B) “Kūöltö ngam chōn,” ngaich hökngen ‘minë tö sat ṙētak nö chööḵngö kui ò’

Havantu hēk ngam inyööngö

(C) ‘Havantu hēk ngam pūlngö nö in meh’

Ihē öng ngam raneh taneungtökūö ngih kinlēḵngô, ngaich sitih inlahen angū-ö nö teung?

• (D) Inmeuktö yòh ang ngam chōn misī?​—Ngëichköm miröökö 22.

• (E) Kūö yòh ngam inyööngö tö ò nö sökngöre? ​—Vë-evkūö Tanīěl 4:​29-​33.

• (F) Sitih inlahen ök rācha Nēpukatnēsar hē kinheūtö minë tö “sat ṙētak”?—Vë-evkūö Tanīěl 4:​34-​36.

NGAM RANEH ṘĒTAK TANEUNGTÖKŪÖ MANAH NGAM HEŪVÖ

Inyööngö

(D) Nēpukatnēsar, Rācha aṅ Pēpilön

Asökiröön ngam inyööngö

(E) Unôichrit ngam tö 606 B.C.E., ngam rācha Nēpukatnēsar nö yīhi öt kanôlò elkui lökten anga-aṅ nö ötkô nö hayöng im rôtòng ngam tö sat samyeūheu

Havantu hēk ngam inyööngö

(F) Lööklö elkui ang Nēpukatnēsar ngaich havantenre hēk anga-aṅ nö hayöng

Ihē öng ngam innëtö taneungtökūö ngih kinlēḵngô, ngaich sitih inlahen angū-ö nö teung?

• (G) Inmeuktö yòh ang ngam chōn misī? ​—Vë-evkūö 1 Kinṙötngö 29:23.

• (H) Kūö yòh öng ngam inyööngö tö ò nö asökiröön? Sitih inlahen ayī-ö öi akahakūö tö ngam inyööngö nö asökiröön, hē Yēsū misī nö ing panam? ​—Vë-evkūö Lūkös 21:24.

• (I) Ihē hēk isuh ngam inyööngö hēk nö havantenre?

NGAM INNËTÖ ṘĒTAK TANEUNGTÖKŪÖ MANAH NGAM HEŪVÖ

Inyööngö

(G) Më tö kētu ṙētak tö ngam Tēv nö hayöng, rācha aṅ Israel

Asökiröön ngam inyööngö

(H) Piyāyi Yērusalem, sökngöre ngam inyööngö tö më aṅ Israel im rôtòng ngam 2,520 samyeūheu

Havantu hēk ngam inyööngö

(I) Vīlöng ngaich Yēsū nö rācha ngam Pūlngö ngam Tēv nö el halīöngö ngaich hayöng anga-aṅ

5. Harīkngöre Ngaich Ngih Panam Löktö Kūö Ik 1914

Röngnyöm VITIŌ.

VITIŌ: Harīkngöre Ngaich Ngih Panam Löktö Kūö Ik 1914 (1:​10)

Urěhnyi ṙô ang Yēsū tö ò min yěn ūichlöre nö rācha, ngaich sitih inlahen min ngih panam unôichrit e. Vë-evkūö Lūkös 21:​9-​11, ngaich kakkö ngih intöönö yamih:

• Minë tö vënyu inlahen ngih panam im vahë-ekūö meh, asuh nup ngaich tö teung maheuk meh hēk ahang meh inrē?

Vënyu misī tö Pôl ngam inlahen yip tarik min im mana-angrit ngam inyööngö tö tarik. Vë-evkūö 2 Timôtī 3:​1-5, ngaich kakkö ngih intöönö yamih:

• Sā ṙô ngam vahë-ekūö meh, sitih inlahen mat öm ngaich meuk tinrīken yip tarik?

6. Hòṅ sitih inlahen öi, pöi akahakūö ngaich tö ngam Pūlngö ngam Tēv nö hayöng?

Vë-evkūö Mëtiv 24:3, 14, ngaich kakkö minë intöönö yamih:

• Asuh öp tötṙanāngen la-en töngamuh nö inmeuktö ngam Pūlngö ngam Tēv ngaich nö hayöng?

• Sitih inlahen öm më-eṅ kò-òren kētöre in ngih la-en?

Hayöng an ngaich ngam Pūlngö ngam Tēv nö löktö el halīöngö, hayöng inrē min ngaich angū-ö nö keuheūtngöre chūök nö ing panam. Vë-evkūö Heprāi 10:24, 25, ngaich kakkö ngih intöönö yamih:

• Sā mat hī ‘meuk ranöhta yanīhi ngam sakamö,’ hòṅ sitih inlahen öi yěi hòṅ hīnöre?

MINË HAKÖP HĪ NGAICH

Löktö in minë tö-eūka kinlēḵngô aṅmat Paipöl hēk töm inlahen ngih panam nö ngaich, öi akahalōn töm Pūlngö ngam Tēv ngaich nö hayöng nö el halīöngö. Ṙatö-ellōnre inrē ayī-ö, lökten öi ahangkö ngam Pūlngö ngam Tēv, ngaich chuh el mīting minë tö kēkaṙen el minë māṅ.

Sitih ṙô öm më-eṅ?

• In ngam tö-eūka kinlēḵngô Tanīěl, asuh öp tö meūkö tö hī hē kinheūten ngam tö sat ṙētak?

• Asūp löktö ṙinatö-ellōn meh tö ngam Pūlngö ngam Tēv nö rultenre ngaich nö hayöng ik 1914?

• Yěm ṙatö-ellōnre ngaich tö ngam Pūlngö ngam Tēv nö hayöng, ngaich hòṅ sitih inlahen më-eṅ?

NGËICHKÖ NË INRĒ

Sitih inlahen öng ngih panam nö haṙī-ingre nö ngaich löktö kūö ik 1914, sitih ṙô më vamë-eny nuk tö ngaichngen inlahen tö më tahëng inrē nö vë-eny inlahen e? Töi mikahtökūöre.

“Asuh Ök Hēngen Minë Tövai Tinrīken Tarik Nö Sā Tö Hö-öv Nö Ngaich” (Hīnöre!-HI, Ĕprěl 2007)

Sitih inlahen lanökngöre ang ngam töhěng tak tarik, hē ò nö vë-ekūö ngam tö-eūka kinlēḵngô im Mëtiv 24:14? Töi ngëichköm istōri ò.

“Kuchīken Öich Nyamkö Pēspôl Misī!” (Chūökamahati-HI, Öngk. 3 2017)

Sitih löktö mikahlōn öi tö ngam tö-eūka kinlēḵngô im tö 4 mirūlö Tanīěl tö e nö ṙô tö ngam Pūlngö ngam Tēv?

“Kūö Yòh Öng Ngam Samyeūheu 1914 Nö Tökiröng Nö In Më Vamënyen Yāvē? (Pāt 1)” (Chūökamahati-HI, Chönvöri-Māch, 2015)

Sitih löktö mikahlōn öi tö ngam tö “sat ṙētaḵ” ngam tö vënyu tö ngam tö 4 mirūlö Tanīěl tö e nö keuheūt ik 1914?

“Kūö Yòh Öng Ngam Samyeūheu 1914 Nö Tökiröng Nö In Më Vamënyen Yāvē? (Pāt 2)” (Chūökamahati-HI, Ĕprěl-Chūn, 2015)

Ngaich an ngam Pūlngö ngam Tēv nö hayöng nö el halīöngö. Hayöng ngaich inrē angū-ö min nö ing panam, nö halööktit në tötlöng ikūö e. Pōyen nup min inkòlô hī kumṙen ngam Pūlngö ngam Tēv. Ta-a töi ngëichkö në tö haroh tūmö inkòlô hī min.

1. Sitih inlahen öng min ngam Pūlngö ngam Tēv nö vītö ngam lanāmö töm öt intölten nö ing panam nö hēk?

Ahëtiyö min yip tötlöök tarik tö në inyööngö inrē tö ngam Rācha ngam Pūlngö ang Yēsū, ip Armakētòn. (Inmeukhömat 16:14, 16) Ngaich teung min ngih ṙô ngam Paipöl, “Pòn höng rahëichtöreṙen ngaich öt ōtre min yip tötlöök.” (Salmai 37:10) Ngatī inlahen min Yēsū nö vītö ngam lanāmö töm öt intölten nö ing panam.​—Vë-evkūö Isayā 11:4.

2. Sitih inlahen tinrīken yip min tarik, yěn teung ngaich ngam kuilōn ngam Tēv nö ing panam?

Yěn hayöng min ngam Tēv, ngaich ‘Amin tö panam min yip tölöök ngaich örheūheu nö iyöng in e.’ (Salmai 37:29) Asehkūöre man, tö yip tarik ing panam nö ṙòkhöre nö löök, hangenlōn tö Yāvē, hangenlōn tö höö, öt hěngtak tö vahavö, örheūheu inrē nö aṅ!

3. Asuh öp min la-en ngam Pūlngö ngam Tēv unôichrit inhetngö yip tötlöök tarik?

Unôichrit inhetngö yip tötlöök tarik, hayöng min Yēsū nö 1000 samyeūheu rò-òten. Hē e min Yēsū, tö yip hol ò tö 144,000 nö hayööken hī öi chuh im hanëtö. Im mana-angrit ngam tö kööinyu samyeūheu min ngih panam ngaich nö peretāis, ṙòkhöre min yip tarik aṅkūö e nö ṙamlōn, kūö cha nö hang chööngö Yāvē. Unôichrit e min Yēsū nö havantö ngam inyööngö nö eltī ngam Yöngre Yāvē. Möl min ngam ‘minënyö Yāvē nö ahetlöngö’ ngam töt ha-eh nö ngatī. (Mëtiv 6:​9, 10) Hameuktu ngaich Yāvē nö tö akaha nö rācha tö chumkūöṙen inrē tö tarik re. Ngaich ahëtiyö min ngam Sī-ö tö yip tötlöök ma-ahānga ò inrē. Keuheūtngörevah min yip tarik tö sō nö hang chööngö Yāvē. (Inmeukhömat 20:​7-​10) Köp pöri nup tövai inkòlô hī nöng örheūheu.

MIKAHTÖKŪÖRE HĒK

4. Kētö manāngen në inyööngö tö tarik min ngam Pūlngö ngam Tēv

“Ngòh tarik yěn hayöng nö ikui tarik ngaich höng kumtö kanihngen anga-aṅ.” (Mumkahten 8:9 NW) Ahëtiyö min ngaich tö Yāvē në inyööngö tö tarik nö holre tö nup kanihngen hī tö tī u.

Vë-evkūö Tanīěl 2:​44 hēk 2 Tösalònikē 1:​6-8, ngaich kakkö minë intöönö yamih:

• Sitih inlahen tī ang min Yāvē töm kūön ò inrē Yēsū tö në inyööngö tö tarik nö ṙòkhöre, tö yip hamòlṙen u inrē?

• Ngaich man akahakūö tö Yāvē hēk Yēsū inrē. Kūö yòh öm mihôiṅ ṙatö-ellōnre tö nup töng sitih la-en cha min nö ṙòkhöre nö löng?

5. Öt hěng tak tö sā mikah Yēsū nö Rācha!

Pōyen la-en min Yēsū tö tölöök nö mineuklö kui yip tarik ò. Hameukten u anga-aṅ misī hē ò nö ing panam. Nö vamënyen ò nö tö chumkūöṙen tö tarik. Löktö in e mikahkūö inrē ayī-ö tö ngam Tēv nö kē-ěkūö ò tö kumlēḵ, nö hayööken tarik. Yěm hòṅ mikahtökūöre. Röngnyöm VITIŌ

VITIŌ: Törahëichnyen Hameuknyö Yēsū La-en Ngam Pūlngö Ngam Tēv Min (1:​13)

Minë la-en Yēsū misī hē ò nö ing panam, nöng inmeuktö inlahen ò min yěn hayöng nö im Pūlngö ngam Tēv. Ōt nun minë tö-eūka kinlēḵngô nö ihih, tö teung min yěn yih ngam Pūlngö ngam Tēv. Asuh nup kinlēḵngô tö hòṅ meūkö tö meh nö teung töngamuh? Vë-ekūö minë miröökö man minë tökētu nö ikūö minë kinlēḵngô.

6. Kē-ěkūö yip tarik min ngam Pūlngö ngam Tēv tö nup tövai inkòlô

VITIŌ: Törahëichyen Inmeuknyi Pinngangkūö Ip Yamih Ṙētak (4:​38)

Vë-evkūö Salmai 37:4, ngaich kakkö ngih intöönö yamih:

• Sitih mufē öm, hang inlahen Yāvē nö “kētö nup havëkö meh min”?

MINË HAKÖP HĪ NGAICH

Hateungngö ngam kuilōnre min Yāvē nö löktö im Pūlngö re. Ngaich keuheūtngöre chūök min ngih panam nö tövai nö Peretāis. Höng yip tölöök tarik min mi-iyöng kūö ngih panam, ngaich örheūheu min nö ha-öinyö Yāvē.

Sitih ṙô öm më-eṅ?

• Sitih inlahen öng min ngam Pūlngö ngam Tēv nö ahetlö ngam minënyö Yāvē?

• Kūö yòh öi mihôiṅ ṙatö-ellōnre tö minë taṙòkhöre kinlēḵngô aṅmat ngam Paipöl nö teungtökūö min nö löktö im Pūlngö?

• Asuh nup kinlēḵngô tö hòṅ meūkö tö meh nö teungtökūö, nö löktö im Pūlngö ngam Tēv?

NGËICHKÖ NË INRĒ

Mikahtökūöre töm Armakētòn.

“Asuh Öng Ngam Kinyūngö Armakētòn?” (El vepsāit töhakööpö)

Mikahtökūöre tö ngam ṙô Yēsū nö vënyö inlahen ngam “tökiröng kanihngen” sitih inlahen öi min ip hē e angū-ö ṙētak?

“Asuh Öng Ngam Tökiröng Kanihngen?” (El vepsāit töhakööpö)

Ngëichköm vitiō ngaich asehkūöre tö meh öm hol tö yip aṅ ngam mikūönöre öm el öp tövai panam.

Ngëichköre Man Yěm El Öp Peretāis (1:​50)

“Pōyen Nup Intöönö Mahakihten Chu,” vënyu istōri ök tarik tö hòṅ halööktit minë inyööngö nö i panam re. Teūngen pöri ngaich anga-aṅ tö sanap ṙô minë intöönö minë mahakihten ò.

“Vailöre Tinrīken Tīm Paipöl” (Chūökamahati-E, ātiköl)