LESÖN 46
Kūö yòh Öm Hòṅ Kētöre Ngaich Kēḵ Ngam Vinôkö?
Yěn kētöre ngòh töhěng tak tarik nö in Yāvē ngaich vë-ekūötēv anga-aṅ, kilēḵngôre inrē nö in ò tö ò min nö örheūheu nö lök lōn Yāvē, urěhlö nup kuilōn ò inrē tö nup kuilōn re. (Salmai 40:8) Ngaich möl min anga-aṅ nö kētöre nö vōkö. Löktö im vinôkö ò më tahëng min nö akahalōn tö ò nö kētö ngam nômöre nö eltī Yāvē. Tötṙanāngen an ngam kinëtöre tö meh öm in Yāvē nö in minë tökiröng katöllö meh. Pön lökten in e nö haṙī-ingre ngam tinrīken meh. Kūö yòh öm hòṅ kētöre ngaich kēḵ ngam vinôkö? Töi mikahtökūöre.
1. Kūö yòh öp min tarik nö kētöre?
Kūö hanangenlōn re öp min tarik nö kētöre nö löklōn Yāvē. (1 Yôhan 4:10, 19) Tölṙô hī an ngam Paipöl nö ngö ṙô: ‘Hāngenlōn man tö ngam Mā Tēvre, holtö nômöre, holtö kuilōnre, holtö kumlēḵ re inrē.’ (Mākös 12:30) Rö-ö in höng ṙô-òv töre öi hangenlōn tö Yāvē, hameukten u pöri öi inup la-en re tö hī öi hangenlōn tö ò. Sā öp tö hěng tak kikōnyö yěn kô-en hanangenlōn anga-aṅ töp kikānö ngaich hapīhö min cha-a. Ngatī ṙēngen ayī-ö yěi kô-en hanangenlōn min tö Yāvē ngaich kētö ngam nômöre min ayī-ö öi in ò ngaich vōkö.
2. Asuh nup min inkòlô kinë-ekūö meh tö Yāvē yēḵ meh öm kēḵ ngam vinôkö?
Yēḵ meh ngaich öm kēḵ ngam vinôkö hēten tö e Yāvē nö yöng meh, kaheuktu më-eṅ inrē öm aṅ ngam mikūönö ò. Akahaiṙen ngaich më-eṅ tö tumkangen minë hanangenlōn Yāvē tö meh. Ngönlöre ngam innôlö meh öm in ò. (Vë-evkūö Malakī 3:16-18.) Teūngen inrē më-eṅ tö më holmaneukre tö keuheūtngöre chūök, më tö hangenlōn tö Yāvē hēk tö hangenlōn inrē tö meh. (Vë-evkūö Mākös 10:29, 30.) Kô-en man hòṅ la-evṙen urēhěkūö meh öm kēḵ ngam vinôkö, hòṅ haköp inlahen Yāvē min më-eṅ, hòṅ hangenlōn tö ò, hòṅ ṙatö-ellōnre inrē öm in ngam Kūön ò. Ngaich hòṅ kētö ngam nômöre öm eltī Yāvē. Unôichrit u nö ṙòkhöre, yēḵ meh min öm kēḵ ngam vinôkö, ngaich ṙòngnyöre kūö talöökö min më-eṅ öm teūngen tö ngam nômö tö örheūheu-aṅ. Lökten ngam Paipöl nö ngö ṙô: “Mahayööken hī inrē ngam . . . vinôkö.”—1 Pītör 3:21.
MIKAHTÖKŪÖRE HĒK
Kūö yòh öng nö tötṙanāngen nö in meh ngam inlahen meh öm kētö ngam nômöre nö eltī Yāvē ngaich kēḵ ngam vinôkö? Ta-a töi mikahtökūöre.
3. Ṙòkhöre in hòṅ katöllö lōnre tö öp lahök lōnre
Ngölōn yik Israel misī tö cha nö mihôiṅ nö löklōn Yāvē, löklōn Pē-āl inrē. Tīnten ök prôfět Ĕlaicha pöri ang Yāvē nö mahalööktö ngam tövaich mufē cha. Vë-evkūö 1 Rācha 18:21, ngaich kakkö ngih intöönö yamih:
Hòṅ asuh ök öre katöllö yik aṅ Israel?
Hòṅ sā yik Israel in ayī-ö inrē öi hòṅ katöllö lōnre tö öp lahök lōnre min. Vë-evkūö Lūkös 16:13, ngaich kakkö minë intöönö yamih:
Kūö yòh öi ötkô hěnghöre löklōn Yāvē hēk löklōn yip tahëng?
Sitih inlahen öi min hameuktöre öi höng katöllö ngam linöklōn Yāvē?
4. Afēkö ngam hanangenlōn Yāvē tö meh
Pōyen nun minë kinë-ekūö hī töpōiṙāi inlōnti tö Yāvē. Sitih tī öi min haṙënngen u? Röngnyöm VITIŌ.
Töi ngëichkö minë tumkangen inlahen tī Yāvē nö hameuktö ngam hanangenlōnre tö meh? Vë-evkūö Salmai 104:14, 15 hēk 1 Yôhan 4:9, 10, ngaich kakkö minë intöönö yamih:
Asuh nup inlōnti taneūngen meh aṅ in Yāvē töp lökten meh öm ha-öinyan?
Sitih inlahen mufē öm in Yāvē kūö ò nö kē-ěkūö meh tö në inlōnti?
Yěn hěng tak öp ma-alōnten hī töp inlōnti, ööilōn hī inrē öp inlōnti kahëtö ò, ngaich öthō min ayī-ö öi öt ha-öiny ngam kamë-ekūöre tö ngam inlōnti. Vë-evkūö I.Chööngö 16:17, ngaich kakkö ngih intöönö yamih:
Yēḵ meh chumkūöṙen öm afītöre tö ṙôken minë inlōnti kahëtö Yāvē nö in meh. Asuh öp min kahëtö meh in ò yēḵ meh hòṅ haṙënngen u?
5. Pōyen inkòlô in yěi kētöre löklōn Yāvē
Pōyen tarik tö ṙamlōn tölōn re yěn kirööngö minë-eny, kirööngö ineū-euṅ, kirööngö kamtö chūök hēk kirööngen pësa inrē? Kô-en hòng anū-ö nö ngatī? Röngnyöm VITIŌ, ngaich kakkö minë intöönö yamih.
Töyal misī ngam tarik nö nyamkö sut ngam tö hameuknyu nö el ngam vitiō. Kūö yòh pöri anga-aṅ nö ṙāngen ngam kamtö re?
Keuheūttö ellōnre ngaich anga-aṅ nö löklōn Yāvē ngaich ṙāngen ngam nyinamkö sut. Tölöng öng ngam katöllö ò tö lōn meh? Kūö yòh öm ngatī ṙô?
Urēhěkūö Pôl nö vītuṙen nö Kristīön, pōihöl misī anga-aṅ nö haköp, kūö ò nö hòṅ kirööngö kamtö chūök nö la-evṙen. Haköptu anga-aṅ tö ök töheuveū-en mahaköptö chööngö më Yahūti. Ṙāngen u pöri anga-aṅ nö ṙòkhöre urēhěkūö ò nö kētöre nö Kristīön. Haṙivlōn ök Pôl, kūö ò nö ngatī inlahen? Vë-evkūö Filipī 3:8, ngaich kakkö minë intöönö yamih:
Kūö yòh ök Pôl nö kaheuk nuk taṙòkhöre la-en kahëken ò sin nöng sā “sôḵ nuā,” urēhěkūö inlahen ò nö Kristīön?
Asuh ök taneūngen Pôl hē ò nö ṙāngen u nö ṙòkhöre?
Löktö in nup yòh öm mihôiṅ teūngen töm tö pōyen ṙanamlōn, löktö im linökö lōn Yāvē hòng löktö inup tahëng ṙöng la-en kahëken meh? Kūö yòh öm ngatī ṙô?
Mötlö ṙôken nuk inkôlò taneūngen Pôl tö nuk ṙahāngö ò, kūö ò ngaich nö löklōn ngam Tēv
ṘÔ YIP TAHËNG: “Urěh man sin më-eṅ tarik öm ngëichkö ngam tinrīken re ngaich möl min öm fēken ngam Tēv.”
Kūö yòh öng nö tötṙanāngen ngam inlahen hī öi kētö ngam nômöre nö eltī Yāvē?
MINË HAKÖP HĪ NGAICH
Kūö hanangenlōnre in min tö Yāvē öi kētöre löklōn ò ngaich kēḵ ngam vinôkö.
Sitih ṙô öm më-eṅ?
Kūö yòh ang nöng Yāvē tö hòṅ teūngen töm hanangenlōn hī hēk höng anga-aṅ tö hòṅ ha-önyö tö hī?
Asuh nup inkòlô kinë-ekūö yip tarik kamë ngam vinôkö, ngaich kētöre nö lök lōn Yāvē?
Hòṅ kētöre öm më-eṅ öm löklōn Yāvē?
NGËICHKÖ NË INRĒ
Ngëichkö minā tö nët tak ṙāl tarik ṙamāngen minë kamtö chūökre nö tumkökṙôre hēk mumnyam sin, kūö cha nö hòṅ löklōn Yāvē.
Hatön Yip Ṙālö Tarik—Sitih Tī Öich Min Töng Tinrīkenre?—Tinrīken Chu Urěh (6:54)
Töi ngëichkö minë tahëng hēk lāinyngen hī öi hòṅ kētöre.
“Kūö Yòh Öich Hòṅ Kētö Ngih Nômöre Eltī Yāvē?” (Chūökamahati, Chönvörī 15, 2010)
Meuk ṙanamlōn më tarik kamëtöre ngaich kēḵ ngam vinôkö nö löklōn Yāvē ngam tö hameuknyu nö imat ngam vitiō.
El ngih istōri “Samyeūheuvö Öich Höng Chöh Sanapṙô Ngih Intöönö, ‘Kūö Yòh Öi Ihih?’” vënyu inlahen ngam yöngnyīö nö töng ngamëichköre sin. Asuh pöri ngaich mahalööktö mufē ò nö akahakūö tö nup tötṙanāngen la-en? Töi mikahtökūöre töp mahayööken ò.
“Vailöre Tinrīken Tīm Paipöl” (Chūökamahati, Nòvempör 1, 2012)