Lēntöhëich Öm Më-eṅ Kētöre In Yāvē?

1-2. Asūp tötṙanāngen urēhěkūö hī kēḵ ngam vinôkö?

PŌYEN tö tö söm lëk yik tarik kamëtöre nö im vinôkö hēk vītöre inrē nö Vamënyen Yāvē nö inuk tö taneūi samyeūheu. In cha inrē më tö sā Timôtī nö löktökūö nyinī-ö re nö haköptu tö ngam kanô-en. (2 Tim. 3:14, 15) Ōtre in cha töng im kinröngöre nö teūngen tö ngam kanô-en hēk in cha inrē yip rīkre tö kööinyö ṙēḵti nö akahakūö tö Yāvē. Tö sā öp ihih tö hěngtak sistör tö 97 samyeūheu tö fömngöreṙen nö kēḵ ngam vinôkö ngaich vītöre nö Vamënyen Yāvē.

² Yēḵ meh römöng kē-ě istötī tö nap yöngre hēk tö yip tahëng inrē, fēkö ngam inlahenre hòng më-eṅ öm kētöre im vinôkö? Yěn heūṅ, ngaich tövai angū-ö nö kuilōn meh. Tötṙanāngen pöri ngam inlahen meh kētöre in Yāvē urēhěkūö meh kēḵ ngam vinôkö. Mikahtökūö min më-eṅ in ngih ātiköl tö manah ngam kinëtöre hēk sitih inlahen inrē yěm kētöre. Mikahtökūö inrē min më-eṅ töre, kūö yòh öm ötkô heūlngöre im kinëtöre i linökölōn Yāvē hēk vōkö inrē.

TÖ SITIH MANAH ÖNG NGAM KINËTÖRE?

3. Vënyö inlahen yik rēkre tarik kamëtöre nö in Yāvē.

³ Vënyu nang in tö ngam Paipöl tö yik tarik misī kamëtöre nö in Yāvē, tö chööinyu cha-a nö töhaköhöiṙen. Ngatī inlahen yik inrē aṅ Israel nö kētöre nö in Yāvē. In cha inrē më tarik töhaköhöiṙen tö Yāvē, tö sā Āròn. Sapīövu anga-aṅ töm tö aṅhav kui tö tö mitāk humlum. Angū-ö ön minkahngö ngam “töhet kinëtöre.” Löktö in ngih tö mitāk humlum ayī-ö öi akahakūö tö ò nö töhaköhöiṙen tö Yāvē, tö ngö manah tö ò nö mākūö kūönṙô më aṅ Israel. (Lēv. 8:9) Ngatī yin inrē më Nāsīr nö kamëtöre nö in Yāvē. Löknyö im ṙô Heprāi ön ngam “nāsīr” ngam tö ngö manah “töhaköhöiṙen” hēk “kamëtöre.” Ōt nuk inrē inlēnö më Nāsīr in nuk chööngö Môsös nö tö hòṅ hāngö tö cha.—Kin. 6:2-8.

4. (a) Asuh öp töt ṙanāngen chö-öiny më kamëtöre nö in Yāvē? (b) Asuh öp manah ngam inlahen meh hòṅ hayëḵngenre? (Ngëichkö ngam nyat.)

⁴ Unôichrit meh öm kētö ngam nômöre nö eltī Yāvē, kiröng ngaich ngam chö-öny meh öm aṅ. Asuh angū-ö? Kaheuktu ngaich öm mahaköp öm in Yēsū Kristū, töt ṙanāngen inrē ngaich nö la-en ngam inteungngö nup lōn ngam Tēv nö in meh.. Asuh nup tömeūkka tö hī öi in yip tarik mahaköp nö in Yēsū Kristū? Ngöṙô ang Yēsū: “Yěn tarīku tö hòṅ tömkörit chu hökngen ò yēḵ nö hayëngenre.” (Mët. 16:24) Tö ngö manah angū-ö, tö meh yēḵ meh ngaich öm kētö ngam nômöre nö eltī Yāvē ngaich hòṅ sō-en nup la-en më-eṅ nup töt ṙamlōn tī tö Yāvē. Tö sā nup la-en, “lōn ngam alaha” insěha hēk tötlöng la-en inrē.(Kal. 5:19-21; 1 Kòr. 6:18; 2 Kòr. 5:14, 15) Ngölōn öm min ngaich tö u nöng inkihten meh pöm sō-oiṙen öm kēken u? Yěm ṙatö-ellōnre min tö minë chöngö Yāvē nö tö yöölen tī tö meh yěm hāngö u, ngaich öthō min öm ngatī mufē. (Sal. 119:97; Isa. 48:17, 18) Ngö ṙô ngòh hol hī ang prötör Nikòles, “mihôiṅ man kaheukhten minë tölēnngen tinrīken Yāvē nö sā chēl chūök chinaphöt meh, hēk mihôiṅ öm kaheukten u nö sā öp kinlōngö chūök öp layön tö kalōngi, nö linaklö ngam nômö meh.”

5. (a) Sitih inlahen öm mihôiṅ kētöre in Yāvē? (b) Asuh öp inrīkngöre ngam kinë-etī tö ngam vinôkö? (Ngëichkö ngam nyat.)

⁵ Sitih inlahen öm më-eṅ mihôiṅ kētöre in Yāvē? Mihôiṅ öm vë-ekūötēv öm kilēḵngôre töre öm höng hòṅ ha-öinyö ò hēk urěhlö ngam kuilōn ò inrē. Yēḵ meh min ngatī inlahen, ngaich sā tö ngöṙô min më-eṅ ‘holtö ellōnre, nômöre, kuilōnre hēk kumlēḵ re chin’ öich hangenlōn tö meh. (Māk. 12:30) Yēḵ meh kētöre in Yāvē, ngaich höng ihôi meh angū-ö tö Yāvē an vë-ekūöre. Ikūö taṙòkhöre pöri më-eṅ yěm kēḵ ngam vinôkö, ngaich löktö in e më tarik nö akahakūö tö meh öm ngaich kētöre löklōn Yāvē. Ötkô öm höhölōn tö ngam kinlēḵngôre öm kētöre in Yāvē. Lōnu inrē më-eṅ töre öm asīnkö ngam kinlēḵngôre hēk ngatī maheukkö inrē ang Yāvē nö in meh.—Mum. 5:4, 5.

SITIH INLAHEN ÖM KĒTÖRE IN YĀVĒ?

6. Kūö yòh öng nö tökiröng ngam chö-öiny meh kētöre i linökölōn Yāvē?

⁶ Kūö ngam hanangenlōnre më-eṅ tö Yāvē lökten öm kētöre in ò. Öt kūö meh pöri höng hangenlōn tö ò, pò meh hòṅ mikahtökūöre tö ngam kuilōn ò öm kēḵ ngam ‘tökô-en mikah’ hēk ‘mikah elmat aṅ im töhet kumlēḵ’ inrē. Löktö in e inrē min ngam hanangenlōn meh tö ò nö ṙūöhölre. (Kòl. 1:9) Yěm hakūöten re min öm haköp (1) ngaich ṙātö-ellōnre min më-eṅ tö Yāvē nö kô-en nö ōt, (2) tö ngam Paipöl inrē nö kahūich ò, hēk (3) löktö in ngam söngkötönre inrē anga-aṅ nö hateungngö ngam kuilōnre.

7. Asūp tö hòṅ urěh inlahen meh urēhěkūö meh kētöre in ngam Tēv?

⁷ Yēḵ ngòh tö hěngtak tarik nö kētö ngam nômöre nö in Yāvē, ngaich hòṅ haköp minë tötṙanāngen inköphöti aṅ mat ngam Paipöl hēk lök in minë inchō-okūöre inrē tö ngam Tēv. Asā öp tölngö inlahen cha pöri ngaich ngatī inlahen cha-a nö vë-eny nang yip tahëng tö minë haköpre. (Mët. 28:19, 20) Hireūtken re ngam hanangenlōn cha tö Yāvē nö ṙūöhölre hēk lōnu inrē cha-a töre nöng hòṅ ha-öinyö ò. Ngatī mufē öm më-eṅ? Yēḵ meh öm holtö ellōnre hangenlōn tö Yāvē, ngaich rö-ö min angū-ö nöng kūö meh hòṅ haṙamlōn nap yöngre hēk töp kamë istötī meh, ötkūö meh höng meuk inlahen yip tahëng holre lökten öm kētöre. Kūö ngam hangenlōnre pöri më-eṅ tö Yāvē lökten öm kētöre löklōn ò.

8. Asuh nup mihôiṅ ṙô tö afēkö tö meh töp lökten kētöre meh kētöre löklōn Yāvē? (Salmai 116:12-14)

⁸ Yěm fēkö nup tī Yāvē min nö hayööken meh, öt ansökngen min më-eṅ öm kētö ngam nômöre in Yāvē. (Vë-evkūö Salmai 116:12-14.) Ngöṙô ngam Paipöl, “ṙòkhöre nup tölöök inlōnti, nup töteung inlōnti inrē” nö lömöktö in Yāvē. (Yāk. 1:17) Angū-ö ngih tö kiröng nö inlōnti nö kahëtö Yāvē nö kēngö ngam töng hěng maneuk kūöre nö ṙāi ṙinānyi hī! Fēkö inlahen e man tö meh öm ṙòngnyöre kūö talöökö öm löktö in ngam ṙāi ṙinānyi öm teungten hanôlö Yāvē hēk teūngen inrē tö ngam nômö tö örheūheu aṅ. (1 Yôh. 4:9, 10, 19) Kô-en angū-ö nö töt insā-av nö inmeuktö ngam hangenlōn ò. Yēḵ meh pöri min fēkö minë inkòlô re kahëtö Yāvē, ngaich ṙūöhölre min ngam hanangenlōn meh tö ò hēk lōnu inrē min më-eṅ töre hòṅ kētöre löklōn ò. (Chöö. 16:17; 2 Kòr. 5:15) Kò-òren inrē öi ṙūöhtö mikahkūö in ngam līpöre Mihôiṅ Man Örheūheu Ṙamlōn! in ngam lesön 46 point 4. Kētu inrē ngam tö lūöi minit vitiō ngam tö ngö kui Asuh Öp Kahëtö Hī Inlōnti öi In Ngam Tēv.

LĒNTÖHEICH ÖM MË-EṄ KĒTÖRE HĒK VŌKÖ INRĒ?

9. Kūö yòh ang ngòh töhěngtak nö ötkô nö asātöre nö in yip tahëng yěn hòṅ kēḵ ngam vinôkö?

⁹ Lohten më-eṅ öm ngölōn töre öm öl hòṅ kēḵ ngam vinôkö hēk kētöre inrē. Lohten inrē më-eṅ öm hòṅ halööktit minë lamātuhēt tinrīkenre hēk öt ilööṙen inrē më-eṅ asīöp ngam ṙinātö-ellōnre. (Kòl. 2:6, 7) Köpölōn tö më tö kē-ě istötī nö öt hěngren tinrīken. Pön ōt më tö ilööṙen nö asīöp ngam hanangenlōn nö in Yāvē. Ngaich lohten yip tahëng nö öt lööṙen nö kētöre. Öt ṙòkhöre yin më ṙālö nö hěngren ṙēḵti nö kētöre nö in Yāvē hēk kēḵ ngam vinôkö. Lökten öi ötkô asātöre in yip tahëng, pöi hòṅ ngëichkö nup tö halööktitvö nö in re ngaich kētöre ayī-ö halööktit u.—Kal. 6:4, 5.

10. Asūp mihôiṅ inlahen meh yěm öl lōnu töre hòṅ kētöre? (Ngaichkö ngam pòks “Inyööken Më Ṙālö Lamöktö Kūö Nyinī-i Re Nö Haköp Ngam Kanô-en.”)

¹⁰ Yěm sön öm ngölōn, öl chin öich lēn kētöre i linökö lōn Yāvē, ngaich um haṙivlōn. Ma-ainyren më-eṅ iṙūöhen hateung töre im chö-öinyre. Ngaich havëkökūö Yāvē tö inyöökenre öm halööktit nup lamātuhēt tinrīkenre. (Filip. 2:13; 3:16) Ṙātö-ellōnre man tö ò nö hangṙô meh öm vë-ekūötēv hēk hayööken meh inrē.—1 Yôh. 5:14.

KŪÖ YÒH YIP RĪKRE NÖ HEŪLNGÖRE NÖ IM KINËTÖRE

11. Sitih inlahen ang Yāvē nö hayööken hī öi chiplö?

¹¹ Ōt yip rīkre tölēntöhëich nö kētöre hēk kēḵ ngam vinôkö inrē, sön pöri cha-a nö piyū-en nö kētöre. Ngö mufē cha-a, ‘Yěn ōt min tö kiröng vanāichö chu ngaich ha-uknyu min chū-ö öich el ngam māṅ?’ Yēḵ meh ngatī mufē, ngaich um haṙivlōn. Ṙātö-ellōnre man tö Yāvē nö hayööken meh min vī ngam tövai ‘tinrīken’ re ngam tö hòṅ tinrīken yik ‘tarik alaha ò.’ (Kòl. 1:10) Kētö nganöönö meh min anga-aṅ kēken minë tölöök la-en, tö sā ò nö kē-ěkūö yip tö pōyen tarik re. (1 Kòr. 10:13) Hayööken më tarikre ang Yāvē lökten nö kūönen më tarik tö ha-euknyu nö ṙā-ang el ngam māṅ. Kô-en Yāvē nö lēntöhëichṙen tī tö më tarik re hòṅ cha nö köp nö i linökölōn ò.

12. Sitih inlahen mihôiṅ öm lāköre tö minë tökiröng fālen?

¹² Mihôiṅ nö ṙòkhöre më töthet tarik nö halō-oikūö nö in minë tötlöök la-en, më-eṅ inrē. (Yāk. 1:14) Eltī meh pöri angū-ö yěm hòṅ kēken ngam tötlöök la-en hēk yěm hö-ö. Hòṅ kahngenre më-eṅ lēnngen tī töp inlahenre öm hòṅ havai minë tinrīken. Lohten nö ngöṙô yip rīkre töre nö ötkô nö ṙap minë kuilōnre. Öt ngatī pöri angū-ö. Pön mihôiṅ cha-a nö ṙap minë kuilōnre hēk ngatī inrē më-eṅ. Pòrô yěn ōt minë tötlöng elkuilōn meh, ngaich um kētöre asīnken u. Asūp mihôiṅ mahayööken meh ngatī inlahen? Kaheuk sakāmö man vë-ekūötēv öm vë-ekūö Yāvē, örheūheu öm haköp ngam ṙô ò, chuh el mīting inrē. Vënyö inlahen ngam ṙinātö-ellōnre inrē öm in yip tahëng. Yēḵ meh min iṙūöhen ngatī inlahen, ngaich asā ngam kinlēḵngôre min më-eṅ öm kētöre. Köpölōn tö Yāvē nö holtöṙah meh, ngaich hayööken meh inrē.—Kal. 5:16.

13. Asūp mihôiṅ haköplö hī in Yôsěf?

¹³ Yěm urěhngöre mufē tö ngam inlahen re min öm la-al minë inlō-ongkūö, ngaich öt kihngen min më-eṅ asīnkö ngam kinlēḵngôre öm kētöre. Pōyen yik tarik tö ngatī inlahen tö vënyö nö imat ngam Paipöl. Töt het yik inrē cha-a nö sā hī. Köp pöri cha-a nö in Yāvē pòrô nö ōt minë inlō-ongkūö cha. Töi ngëichkö inlahen Yôsěf. Ma-anyre ök pīhö Pòtiför nö kalaha ò. Akahakūö pöri ang Yôsěf tö ngam inlahen re. Vënyu nang ayī-ö tö ngam Paipöl tö ò nö öt halöngngen re nö ngatī inlahen. Ngöṙô anga-aṅ: “Sitih kanô-òṅ öich la-evṙen tö ngih tökiröng ötlanöökö, tökööl inrē nö im Tēv?” (Ran. 39:8-10) Urěhngöre mikahkūö ang Yôsěf tö ngam tö hòṅ inlahen re, lökten anga-aṅ nö lööṙen nö sōḵ nö hangṙô ngam pīhö Pòtiför.

14. Asuh öp tö hòṅ inlahen hī mihôiṅ hòṅ hī öt kēken tötlöök yěi halō-oikūö?

¹⁴ Asuh öp inlahen meh mihôiṅ asīnken Yôsěf? Mihôiṅ man löktö ing töngamuh öm fēkö ngam tö hòṅ inlahenre min yěm halō-oikūö. Ilööṙen mihôiṅ öm sō-en nup la-en töt ööilōn Yāvē hēk um fēken u inrē. (Sal. 97:10; 119:165) Yěm ngatī inlahen min, ngaich köp min më-eṅ im inlahenre pòrô öm halo-oikūö, kūö meh min öm urēhěten öm akahakūö tö öp tö hòṅ inlahenre.

15. Sitih inlahen ang ngòh tö hěngtak tarik nö ‘holtö ellōnre’ nö chöh ngam Tēv Yāvē? (Heprāi 11:6)

¹⁵ Lohten më-eṅ öm ṙatö-ellōnre tö nup haköpre nö anū-ö kanô-en ngaich lōnu më-eṅ töre öm keuheūttö ellōnre löklōn Yāvē. Sön pöri lohten nö ōt öp lāinyngen meh öm vöö öm kētöre ngaich kē ngam vinôkö. Yěm ngatī mufē ngaich mihôiṅ öm vë-ekūö Yāvē öm asīnken Tāvit nö ngö ṙô: “Kiluhu chu Man, Ō Mā Tēv, akah ellōn chu inrē! Kalaha chu, akah mufē chu inrē! Ngëicha yĕn talööku öp öt lanöökö nö in chu: ngaich hachō-o chu el talöökö tö örheūheu-aṅ.” (Sal. 139:23, 24) Yēḵ meh min vë-ekūötēv öm vë-ekūö Yāvē hēk ma-ainyre kēḵ ngam kuilōnre öm kētöre im Tēv hēk kēḵ ngam vinôkö, ngaich hameuktöre min më-eṅ öm ‘holtö ellōnre chöhö’ ò. Ngaich mihôiṅ öm ṙatö-ellōnre tö Yāvē nö öthō nö öt kētö inkòlô meh.—Vë-evkūö Heprāi 11:6.

IṘŪÖHEN MAN HARÖHTÖRE IN YĀVĒ

16-17. Kūö yòh öi mihôiṅ ngö ṙô tö yip nyīö haruklöng nö im kanô-en tö yip yöngre nö tūöktu inrē cha-a tö Yāvē? (Yôhan 6:44)

¹⁶ Vënyen yik haköptöre ang Yēsū nö tūöktu cha-a tö Yāvē. (Vë-evkūö Yôhan 6:44.) Ngëichkö nup tövai ang Yāvē nö in ngòh töhěng tak tarik, lökten anga-aṅ nö tūökten cha nö in re. Ōt inrē öp tövai maheuk ò nö in meh. Ṙòkhöre vē tarik nö tö ‘mötlö’ hēk ‘töpōiṙāi nö kanòlô’ nö imat Yāvē. (Chöö. 7:6) Ngatī man më-eṅ inrē.

¹⁷ Yěn mi-in ngam kanô-en nap yöng meh, lohten më-eṅ ngölōn töre öm höng kūö tī minā yöngre öm löklōn Yāvē, rö-ö nö kūö Yāvē nö tūökten meh. Chumkūöṙen pöri tö ṙô ngih tö kūichö imat ngam Paipöl: “Ṙūötöre im Tēv, ngaich ṙūötöre min anga-aṅ nö in yīö.” (Yāk. 4:8; 1 Kin. 28:9) Yěm meh min haröhtöre in Yāvē, ngaich haröhtöre min anga-aṅ nö in meh. Öt kūö minā yöng meh ngaich nö tūöktu tö Yāvē ngaich in cha më-eṅ. Pöi ṙòkhöre öi tūöktu tö Yāvē, cha-a inrē yip tö haköptu tö yip yöngre tö ngam kanô-en. Lökten yěn ngòh tarik nö haröhtöre nö in Yāvē, ngaich haröhtöre inrē anga-aṅ nö in ò, sā ṙô ngam Yāköp 4:8 taheui.—Asātô e im 2 Tösalònikē 2:13.

18. Asuh öp min haköp hī ip yamih ātiköl? (Salmai 40:8)

¹⁸ Yěm kētöre öm in Yāvē öm kē ngam vinôkö, ngaich hameuktöre min më-eṅ sa kumlēḵlōn Yēsū. Holtö ṙanamlōnre ang Yēsū nö keuheūttö ngam nômöre nö in Yāvē, pön hòṅ hateungngö nup kuilōn ò. (Vë-evkūö Salmai 40:8; Hep. 10:7) In öp yamih ātiköl in min hēk mikahtökūöre tö inlahen hī öi sitih inlahen mihôiṅ iṙūöhen löklōn Yāvē öi haköpngöre in ò.