“Iṙūöhen Tömrit” Yēsū Pòrô Ngaich Öm Kēḵ Ngam Vinôkö

1-2. Asuh nup taneūngen hī inkòlô unôichrit hī kē ngam vinôkö?

KIRÖNGEN ṙanāmlōn ayī-ö ik sā hī kē ngam vinôkö, pöi kaheukhötre el ngam mikūönö Yāvē. Sā mufē Tāvit ayī-ö tö ngam minlēḵkenre. Ngöṙô tī anga-aṅ nö kūich ngam Salmai: “Tökôlò öp tarik öp atöllö Meh, ngaich vītu nö iyöng in Meh: pòn hōtu nö iyöng el nup patī Meh.”—Sal. 65:4.

² Achīö yip tö havëtu tö Yāvē nö el ngam patī ò hēk tö kaheukhötvö inrē nö el ngam mikūönö ò? Sā öp haköp hī inuk raneh ātiköl tö ngam Tēv nö tūökten yip tarik yip tö kô-en lōn nö hòṅ haröhtöre nö in ò. (Yāk. 4:8) Yēḵ meh öm kētöre in Yāvē hēk kēḵ ngam vinôkö inrē mahanôltöre ngaich më-eṅ öm in Yāvē. Mihôiṅ öm ṙinātu-ellōn tö ‘meh min öt hěngö hanakten pò ngam Tēv min nö kē-ěkūö meh tö minë töpōyen inkòlô.’—Mal. 3:10; Yar. 17:7, 8.

3. Hòṅ asuh öp inlahen ngòh Kristīön unôichrit ò nö kēḵ ngam vinôkö? (Mumkahten 5:4, 5)

³ Ranehlö röön hī ön ngam inlahen hī yěi kēḵ ngam vinôkö. Hòṅ asuh öp inlahen meh unôichrit e? Hòṅ asīnkö ngam kinlēḵngôre më-eṅ öm la-evṙen, pòrô öm halō-oikūö hēk kihngen inrē pò meh öm tamömrit Yēsū. (Vë-evkūö Mumkahten 5:4, 5.) Lökten öm hòṅ ma-ainyren asīnken ò hēk hang minë chööngö ò inrē. (Mët. 28:19, 20; 1 Pīt. 2:21) Mikahtökūöre inrē min më-eṅ in ngih ātiköl tö nup tö hòṅ inlahen re.

“IṘŪÖHEN TÖMRIT” YĒSŪ PÒRÔ ÖI HAKIHTUṘEN HĒK KIHNGEN

4. Asūp manah ngam ṙô Yēsū nö ngöṙô tö më haköptö ò min nö hòṅ “hayëḵngenre nö keun ngam chōn inkihten”? (Lūkös 9:23)

⁴ Yē hī öi kēḵ ngam vinôkö, öt töngö manah angū-ö tö hī min öt kihngen. Ngöṙô misī Yēsū nö in yik haköptöre tö cha nö hòṅ “hayëḵngenre nö keun ngam chōn inkihten.” Ngöṙô inrē anga-aṅ tö cha min nö hòṅ “örheūheu” nö ngatī inlahen. (Vë-evkūö Lūkös 9:23.) Töngö manah hòng ngam ṙô Yēsū tö më haköptö ò min nöng örheūheu nö kihngen? Hö-ö. Mikahtö elnang hī pöri anga-aṅ tö cha min nö teūngen tö inkòlôre, hěnghöre lā-al minë kanihngenre inrē. Ōt pöri min nup kanihngen chūök cha nö öt lööṙen nö lā-al u.—2 Tim. 3:12.

5. Asuh nup min inkòlô yip maharööḵngenre nö tömrit Yēsū?

⁵ Lohten më-eṅ min hakihtuṙen tī yip aṅ patī re hēk ṙāngen öp kinmānö inrē më-eṅ tö pōi rineūsö kūö lōn meh hòṅ urěhlö minë la-en ngam Tēv. (Mët. 6:33) Yěn ngatī, ngaich öt vāichngö min Yāvē tö minë inlahen meh harööḵngöre. (Hep. 6:10) Meuk ngam ṙô Yēsū inrē min më-eṅ nö teungtakūö yēḵ meh öm harööḵngen re. Ngam tö ngöṙô: “Öt tarīkuvö öp ṙamā-ang patīre, mëmre, kahëmre, kanānöre, yöngre, pihöre, kūönre, panamre, töpòkūö Chu, pòkūö ngam tölöök inhānga inrē; Öp töhēngòng taneūngen min i ngih tūmö . . . nö holtö ötinkôlò; ngaich im töyihihvö panam, nö nômuvö tö-örheūheu-aṅ.” (Māk. 10:29, 30) Sön më-eṅ lohten inrē öm akahaiṙen tö ṙôken nup inkòlôre, nö pōyen tö nup inlahen meh harööḵngen re.—Sal. 37:4.

6. Kūö yòh öi hòṅ iṙūöhen lā-al minë ‘kuilōn ngam alaha’ pòrô ngaich öi kēḵ ngam vinôkö?

⁶ Yē hī ngaich kēḵ ngam vinôkö, öt töngö manah angū-ö tö hī ngaich öi öt īnu tö ngam tökööl. Pöi ṙömöng köpsöṙen öi lā-al minë töchōich kuilōn ngam alaha. (1 Yôh. 2:16) Hē e lohten ayī-ö öi sā mufē Pôl. Ngöṙô anga-aṅ: “Pò chu kuchīken im chöngö ngam Tēv, nö sā ngam latuhēt tarik. Meuk tö harīkngöre pöri chu-ö chöngö i në tūmö alaha chu, lā-al kūö ngam chöngö ellōn chu, ngaich kēten chu hakövö elkatòh ngam chöngö tökööl, ngam aṅ i në tūmö alaha chu.” (Rōm. 7:22, 23) Ngatī ayī-ö mihôiṅ öi kihngen sā inlahen Pôl öi lā-al minë tötlöng kuilōnre hēk hēṙu inrē mihôiṅ öi haṙivlōn. Yē hī pöri min köpölōn tö ngam kinlēḵngôre, ngaich lööṙen min öi löngö katöllö pòrô nö ōt min nupinlō-ongkūö hī. Öi sitih inlahen?

7. Sitih inlahen öm min köp in Yāvē yēḵ meh kētöre im linöklōn ò?

⁷ Yē hī öi kētöre in Yāvē, ngaich vamë-enyre ayī-ö öi harööḵngen re in nup kuilōnre nup töt öi lōn Yāvē. (Mët. 16:24) Lökten yēḵ meh pòrô halō-oikūö hēk hakihtuṙen inrē, ngaich akahakūö min më-eṅ tö inlahen re öm lā-al u pò meh urěhangen fēkö minë inlahen re öm chiplö i linöökö lōn Yāvē. Ngaich la-evṙen min më-eṅ tö nup tö ṙamölōn tī tö Yāvē. Yēḵ meh min ngatī inlahen ngaich mahameuktöre min öm sā kumlēḵ lōn Yōp. Pōyen nuk misī kanihngen Yōp sön pöri anga-aṅ nö ngöṙô: “Söl kinpahare chin min chiplö!”—Yōp 27:5 NWT.

8. Yēḵ meh köpölōn tö ngam ṙôre vë-ekūötēv ik sā meh öm kētöre, sitih inlahen më-eṅ īnu tö ngam chaniplen yěm pòrô halō-oikūö?

⁸ Yēḵ meh köpölōn töp ṙô re öm vë-ekūötēv ik sā meh öm kētöre in Yāvē, ngaich angū-ö min mahayööken meh chiplö yēḵ meh halō-oikūö. Tö sā meh min öthō öm fēkö inlahen re yikngö pīhö holre, pò meh ngaich kilēḵngôre in Yāvē tö meh min haköpngöre in ò. Öthō inrē min nö yih minë tötlöng elkuilōn meh hēk öt höng haṙivlōn inrē min më-eṅ fēken u. Sā ‘mahavöngö kūöre’ min më-eṅ tö ngam ‘talöökö tötlöök’ yěm ngatī inlahen.—Inch. 4:14, 15.

9. Sitih inlahen öm min urěhlö ngam linökölōn Yāvē yěm köpölōn töp ṙôre öm vë-ekūötēv ik sā meh kētöre in ò?

⁹ Asehkūöre man töre yěm teūngen töp tövai kinmānö, ngaich öt ṙētakvö pöri më-eṅ chu el mīting tö kūö e. Öt kihngen inlahen më-eṅ öm sō-en ngam kinmānö. Pò meh urěhngöre tīfēkö ngam inlahen re köp im linöökö lōn Yāvē. Öt ngö mufē min më-eṅ, ‘öthō chin min sökngöre röön mīting yěich kēḵ ngih kinmānö.’ Köpölōn pöri më-eṅ tö ngam inchō elmat Yēsū ik sā ò misī nö ing panam, tö ò nö hòṅ örheūheu nö haṙamlōn ngam Yöngre. Ilööṙen min më-eṅ öm sō-en nup la-en nup tö kihngen tī tö meh im linöklōn Yāvē.—Mët. 4:10; Yôh. 8:29.

10. Sitih inlahen ang Yāvē nö hayööken meh öm tömrit Yēsū unôichrit meh kētöre im vinôkö?

¹⁰ Yēḵ meh halō-oikūö hēk pōyen inrē minë kanihngen meh, hē e më-eṅ kô-òren hameuktöre öm hòṅ ‘tömrit’ Yēsū. Ṙinātu-ellōn min më-eṅ tö Yāvē nö hayööken meh. Ngöṙô an ngam Paipöl: “Tökô-en pöri ngam Tēv, ngam töt hō nö halöngten yīö, mötlö kinlaha, tö kanô-òṅ yīö; hē ngam kinlaha min Anga-aṅ nö vītö talöökö öt kanô-òngvah, hòṅ yīö kalēḵ keūnö e.”—1 Kòr. 10:13.

SITIH INALHEN ÖI TÖMRIT YĒSŪ

11. Asūp tö hěng inlahen hī yěi hòṅ tömrit Yēsū? (Ngëichkö ngam nyat.)

¹¹ Holtö nganöötöre misī ang Yēsū nö löklōn Yāvē hēk örheūheu inrē nö vë-ekūö ò. (Lūk. 6:12) Lökten anga-aṅ nö röhta nö in ò. Sitih inlahen öm më-eṅ mihôiṅ tömrit Yēsū unôichrit meh kēḵ ngam vinôkö? Mihôiṅ öm iṙūöhen la-evṙen tö nup la-en tö röhta tī tö meh in Yāvē. Ngöṙô ngam Paipöl nö in hī: “Höng lökten im taneūngen hī ngaich, ta-a töi lök in e angū-ö chöngö.” (Filip. 3:16) Pōyen yin töngamuh më prötör sistör ṙamūöhlö inlahen re nö i linökölōn Yāvē. Tö sā ṙēngen më chamuh el minë iskul ma-ahangkö ngam tölöök inhānga, ōtre inrē chamuh in nup panam tö öl nö teunghu tö ngam tölöök inhānga. Mihôiṅ inrē më-eṅ vī minë tö ngatī inlahen chö-önyre i linöökö lōn Yāvē. (Inl. 16:9) Um haṙivlōn pöri yēḵ meh öt teungten. Um ngö mufē inrē tö meh ötkô sā inlahen kumlēḵ alaha yip tahëng prötör sistör öm löklōn Yāvē. Holtö manööyöre pöri më-eṅ iṙūöhen. (Mët. 10:22) Um kūön elmat tö minë heuneū-enre hēk ngam tölngö kanô-òṅ meh im linökölōn Yāvē. Pön pōiṙāi mat ang Yāvē tö minë inlahen meh löklōn ò. Yěm holtö ellōnre min löklōn Yāvē, ngaich teungten min më-eṅ tömrit Yēsū unôichrit ngam inlahen meh kēḵ ngam vinôkö.—Sal. 26:1.

12-13. Sitih inlahen öm mihôiṅ yěn kūönngöre ngam nganötö meh? (1 Kòrin 9:16, 17) (Ngëichkö ngam pòks “Iṙūöhen Im Finālö.”)

¹² Hēṙu man lohten öm ngölōn töre öm höng hěngren ṙô yěm vë-ekūötēv? Öt kuchīken inrē yěm chuh el fīl hēk pōring inrē yěm vë-ekūö ngam Paipöl? Um ngö mufē pöri tö Yāvē nö öt ṙamlōn nö in meh. Öt hěngren in öi tarik pò hī töthet, hēṙu minë mufē elkuilōn hī nö harīktöre hēk öt hěngren inrē ngam nganöötö hī im linöklōn Yāvē. Um ngöṙô lōn pöri töre öm höng hěngtak öm tö ngatī mufē. Ngatī inlahen ök inrē misī Pôl. Ma-ainyre anga-aṅ nö tömrit Yēsū, hēṙu pöri anga-aṅ nö öt kūyulōn nö im linöklōn Yāvē. (Vë-evkūö 1 Kòrin 9:16, 17.) Ngöṙô anga-aṅ: “Yē chu pöri öt kanahanglōnre, ngaich höng tökē-ĕvkūö chū-ö tö inyōmö chehen.” In ngam ṙô ò ayī-ö öi akahakūö tö ò nöng hòṅ iṙūöhen nö löklōn Yāvē pòrô nö öt kūyulōn.

¹³ Asūp haköplö hī in Pôl? Ötkô öi lōmngö inup tö vaich mufē re öi katöllö nup lōnre. Hòṅ iṙūöhen pöri më-eṅ la-evṙen tö nup tölöng la-en. Yēḵ meh pöri min ngatī inlahen, ngaich kuchīken min më-eṅ la-evṙen tö minë tölöök la-en. Lökten öm hòṅ örheūheu haköp mat ngam Paipöl, vë-ekūötēv, chuh el minë mīting hēk iṙūöhen inrē ahangkö ngam tölöök inhānga. Yěm la-evṙen min tö në la-enngaich iṙūöhen min më-eṅ tömrit Yēsū pòrô ngaich öm kēḵ ngam vinôkö. Yěn meuk inlahen meh min më prötör sistör aṅ el ngam māṅ öm iṙūöhen i linöklōn ngam Tēv, ngaich reuslöre alaha min cha-a.—1 Tös. 5:11.

“KALAHARE YIN . . . HAMEUKTÖRE YIN”

14. Asuh nup tö hòṅ örheūheu nö fēka inlahen tö meh hēk kūö yòh? (2 Kòrin 13:5)

¹⁴ Töt ṙanāngen ön ngam inlahen hī ngëichkö ngam tinrīken re pòrô ngaich öi kēḵ ngam vinôkö. Lökten öi kaheuk ṙētakre öi ngëichkö nup tö hòṅ tinrīken re. (Vë-evkūö 2 Kòrin 13:5.) Fē-a man, ‘Örheūheu öich chū-ö vë-ekūötēv? Haköp mat ngam Paipöl hòng chū-ö hēk istötī ngam Paipöl inrē? Örheūheu hòng chū-ö im la-en inhānga hēk chuh el mīting inrē?’ Mihôiṅ öm fēken re ṙūöhlö inlahen re in në tö ngatī la-en. Tö sā ṙēngen meh mihôiṅ ngöṙô hatönöre: ‘Vayö ṙô öich chū-ö mikahtö elnang yip tahëng tö minë haköpre imat ngam Paipöl? Sitih inlahen öich mihôiṅ vī ngam inlahen re öich kuchīken im la-en inhānga? Keuheūtnyö ṙô re ellōnre hòng chū-ö öich vë-ekūö Yāvē yěich vë-ekūötēv? Löktö in minë ṙô re hòng inrē öich vë-ekūötēv nö meūkö ngam inlahen chu hayönglen in Yāvē? Örheūheu röön hòng chū-ö ṙung chuh el mīting? Sitih inlahen chū-ö mihôiṅ chumkūöṙen el minë mīting hēk kētöre inrē in minë la-en?’

15-16. Asūp haköplö meh in ngam ekspirīön prötör Ròpört?

¹⁵ Töt ṙanāngen ön ngam inlahen hī hòṅ akahakūö tö minë öt kumlēḵ-en re. Kūö yòh? Töi chumkūöṙen ngëichkö ngam inlahen prötör Ròpört. Ngöṙô anga-aṅ: “Pāt taëm chôp (part-time jop) chū-ö ik sā chu öich 20 samyeūheu. Hěngheuh chū-ö öich havëka tö öp kikānö aṅ el ngam òfis öich chuh patī ò. Vë-enyre anga-aṅ nöng hěngtiṙah nö i patī. Urěh chin chū-ö öich höng vīkö inlahenre. Unôichngöre pöri ngaich chū-ö vë-eny nang ò töre öich sōḵ hēk vënyö ngam lāinyngen inrē öich sōḵ chuh patī ò.” Lööngö inlahen ang prötör Ròpört nö sōḵ nö hang ṙô ngam kikānö. Unôichngöre pöri anga-aṅ nö fēkö ngam inlahenre, ngöṙô lōn anga-aṅ töre nö mihôiṅ hēk öre nö heuveū-en nö lā-al nup tö ngatī kinlaha re. Ngöṙô anga-aṅ: “Ilööṙen hē e ang Yôsěf nö sōḵ nö hang ṙô ngam pīhö Pòtiför, öt sā inlahen ò pöri chū-ö. (Ran. 39:7-9) Pingangkūö chū-ö töre öich kihngen ṙô öich sō-en ṙô ngam kikānö. Haköplu chū-ö öich in e tö chu öich hòṅ hangön ngam innôlöre öich in Yāvē.”

¹⁶ Pōyen nup min yanöölen meh yěm sā inlahen prötör Ròpört öm kalahare. Yēḵ meh öm heuveū-en lā-al nup inlō-ongkūö re, ngaich sön më-eṅ hòṅ hatönöre tö ngih intöönö, ‘ilööṙen hòng më-eṅ ṙung ngöṙô, sōḵ chin?’ Yěm ngöṙô lōn hēk töre öm hòṅ halööktit ngam inlahen re, ngaich um afuk kui re tö nup vanāichöre, pöm hòṅ ṙamlōn töre öm akahakūö tö ngam öt kumlēḵ-enre. Vë-ekūö Yāvē më-eṅ öm vënyö inlahen u. Ngaich hangön ngam kuilōnre öm asīnkö minë chööngö Yāvē.—Sal. 139:23, 24.

17. Sitih inlahen ang prötör Rôpört nö harōilö ngam minë-eny Yāvē?

¹⁷ Öt ngatī tölngö öng ngam ekspirīön prötör Ròpört. Ngöṙô anga-aṅ nö vë-eny: “Ik sā chu öich sōḵ ṙô ngam kikānö ngaich ngöṙô anga-aṅ, ‘pās man ngaich in ngam kinlahare.’ Ngöṙô chū-ö öich hatöönö ò, ‘asūp manah ngam ṙô meh?’ Vë-enyre anga-aṅ nö hōlu töp mu-urěh sin nö Vamënyen Yāvē. Ngöṙô öp hol ò nö in ò tö më Vamënyen Yāvē ṙālö nö töng hěngren inlahen, höng havai mineūköre cha-a tahëng pöri nup kahëken cha la-en. Hēk töng hō inrē cha-a nö la-evṙen tö minë tötlöng la-en. Ngöṙô ngaich ngam kikānö nö in öp holre, töich ngëicha chěi yěn tö ngatī inlahen ang Ròpört hēk yěn hö-ö. Ik sā chu öich hang ngih ṙô ò, ngaich ṙamölōn chū-ö pò chu öich öt teungten hachōichngö ngam minë-eny Yāvē.”

18. Asūp tö hòṅ iṙūöhen inlahen meh unôichrit meh kēḵ ngam vinôkö? (Ngëichkö ngam pòks “Vë-ekūö Në Tönët Ātiköl, Kū-ö Urěh Im Finālö Tö Kristīön.”)

¹⁸ Yēḵ meh öm kētöre in Yāvē hēk kētöre inrē im vinôkö, ngaich hameuktöre min më-eṅ hòṅ örheūheu ha-etlö ngam minë-eny Yāvē. Meuk ngam inlahen meh ang Yāvē yěm ma-ainyre köp ilinöökö lōn ò pòrô öm hakihtuṙen hēk halō-oikūö, kē-ěkūö meh min anga-aṅ tö inkòlô. Hěnghöre kētö ngam töhet kumlēḵ inrē anga-aṅ nö in meh, hòṅ meh chiplö löklōn ò. (Lūk. 11:11-13) Kô-en më-eṅ öm höng löktö in ngam inyööken re tö Yāvē öm iṙūöhen mihôiṅ tömrit Yēsū unôichrit meh kēḵ ngam vinôkö.