LESÖN 37
Sitih Ṙô Ngam Paipöl Töm La-en Hēk Töm Pësa
Hēṙu öm ṙung yahlö piṙūtka tö ngam la-en re hēk töm pësa? Kô-en in öt lööṙen ha-aṅ nômö ngam mikūönöre, löklōn Yāvē inrē. Asuh nup inlēnö hī aṅmat ngam Paipöl. Töi mikahtökūöre.
1. Sitih ṙô öng ngam Paipöl tö ngam la-en?
Lōnu Yāvē tö hī öi ṙamlōn inup töng la-enre. Ngö ṙô an ngam Paipöl: “Ngaich chū-ö meuk tö tö rö-övö tö ĕhten nö umuh tö ngam tarik nöng i nup la-en re tölngö nö kumchikngen re.” (Mumkahten 3:22) Ṙòngmö la-evṙen an inrē Yāvē töngamuh. Yēḵ hī min öi asīnken ò, ngaich ṙamlōn min anga-aṅ, ngatī min ayī-ö ṙamlōn.
Kô-en ngam la-en nö tötṙanāngen, yēḵ hī pöri min öi yahlö lōn tö e ngaich öt ṙētakvö min öi löklōn Yāvē. (Yôhan 6:27) Kilēḵngôre an nö in hī, tö hī yěi urěhlö nup lōn ò, ngaich chumkūöṙen min anga-aṅ tö nup hanāten hī.
2. Hòṅ yahlö lōn öi tö ngam pësa?
Vënyu nang in tö ngam Paipöl tö ngam ‘pësa nö lanaklö.’ Ngöṙô pöri inrē ngam Paipöl nö fēlen hī tö minë ṙanamlōn nö öt ṙòkhöre nöng löktö im pësa. (Mumkahten 7:12) Lökten in öi halēnö öi ‘ui yahlö hanangenlōn tö ngam pësa’ hòṅ ṙamlōn pöri tö nup töng aṅ in re. (Vë-evkūö Heprāi 13:5.) Yēḵ hī min höng ṙamlōn, ngaich öt yahlö afēka min ayī-ö tö ngam inmūlö pësa. Öt lök inlahen re inrē öi kēḵ hötṙeh. (Inchōḵ-oṙô 22:7) Lāköre pöri ayī-ö tö nup tö ngatī iskīm nup vamī kanôlò nö veut hēk tö ngam nyinamkö chuā.
3. Sitih inlahen öi min hayööken yip tahëng tö nup pësa re?
Öt tö milip an ngam Tēv Yāvē. Hòṅ asīnken ò ayī-ö ‘höngöre öi meukṙen yip holre.’ (1 Timôtī 6:18) Sitih inlahen öi min? Mihôiṅ öi kahanglōn re kētö pësa nö mineukṙen minë la-en el ngam māṅ. Mihôiṅ öi meukṙen yip holre tö kihngen, mötlö pöri yip ṙamatö-ellōnre holmaneuk hī. Öt ngëichkö ṙôken nup kahëtö hī ang Yāvē, ngëichkö ngam ellōn hī pöri anga-aṅ öi kēten u. Yēḵ hī min holtö ellōnre öi meukṙen yip tahëng, ngaich ṙamlōn min ang Yāvē, teūngen min inrē ayī-ö tö ngam ṙanamlōn.—Vë-evkūö Inlahen 20:35.
MIKAHTÖKŪÖRE HĒK
Yēḵ hī lööngö mufē in minë la-en, ṙamlōn tö nup töng aṅ in re ngaich asuh min nup yanöölen hī? Töi mikahtökūöre.
4. Ha-öönyö Yāvē yěi lööngö mufē in minë la-en
Yěn vai ngam innôlö hī nö in Yāvē, ngaich sā mat Yāvē min ayī-ö öi ngëichkö minë la-en. Röngnyöm VITIŌ, ngaich kakkö ngih intöönö yamih.
Asuh öp tinrīken Chēsön tö lökngöre tī tö meh im chūök ò nö la-evṙen, ngam tö meūkö nö el ngam vitiō?
Sitih löktö mikahlōn öi tö Chēsön nö öt yahlö lōn tö ngam kinmānöre?
Vë-evkūö Kòlòsi 3:23, 24, ngaich kakkö ngih intöönö yamih:
Hòṅ sitih inlahen öi yěi kē-ěvkūö tö minë la-en?
Kô-en an ngam la-en nö tötṙanāngen. Yēḵ hī pöri min yahlö lōn tö e ngaich öt ṙētakvö min öi löklōn Yāvē
5. Asuh nup yanöölen hī yěi höng ṙamlōn tö nup töng aṅ in re?
Pōyen tarik tö mötlö lōn tö inmūlö kanôlò. Harīkngöre ṙô pöri ngam Paipöl nö kētö inlēnö hī. Vë-evkūö 1 Timôtī 6:6-8, ngaich kakkö ngih intöönö yamih:
Asuh nup inlēnö hī kahëtö ngam Paipöl?
Sitih inlahen öi min köpsören höng ṙamlōn, pòrô öi kihngen ha-aṅ nômö re kaheuk sakamö. Röngnyöm VITIŌ, ngaich kakkö ngih intöönö yamih.
Kūö yòh minë mikūönö tö nët nöng ṙamlōn, pòrô nöng öt yaha ṙôken aṅ in tö pësa?
Lohten öi öt hanaktuṙen, sön öi höng öltöre lōn tö nup chehen. Hachō-elmat hī ang Yēsū misī tö hī yěi öltöre lōn, ngaich kūö yòh mihôiṅ öi pala-aiṙen yěi ngatī mufē. Vë-evkūö Lūkös 12:15-21, ngaich kakkö ngih intöönö yamih:
Asuh öp haköplö meh in ngam inchōḵ-oṙô Yēsū?—Ngëichköm 15 miröökö.
Vë-evkūö Inchōḵ-oṙô 10:22 hēk 1 Timôtī 6:10. Ngaich kakkö minë intöönö yamih:
Asuh öp tö mötlö nö in meh ngam innôlö meh in Yāvē, ngam rupīö ṙöng? Kūö yòh öm ngatī mufē?
Asuh nup min kanihngen meh yěm yahlö lōn töm rupīö?
6. Meukṙen hī min Yāvē tö nup hanāten hī
Pī-a nup kanihngen hī min nö yih, kūö infēkö ngam kinmānö hēk ngam pësa inrē. Kihngen lohten öi hayönglenre in Yāvē. Sitih inlahen öi min la-al minë tö ngatī kinlaha ngam ṙinatö-ellōnre. Yěm hòṅ mikahtökūöre röngnyöm VITIŌ, ngaich kakkö minë intöönö yamih.
Asuh ök kanihngen yamihen ngam prötör ngam tö hameuknyu nö el ngam vitiō?
Ngaich sitih inlahen anga-aṅ nö vayö inlahen nö la-al u?
Vë-evkūö Mëtiv 6:25-34, ngaich kakkö ngih intöönö yamih:
Asuh nup kinlēḵngô Yāvē nö in yip tarik, yip mu-urěhlen ò tö nup kuilōn re?
RÔ YIP TAHËNG: “Akahalōn öm tö lumrāḵ chu öich meukṙen ngam mikūönö re. Sitih inlahen öich min kaheuk afta öich chuh el mīting?”
Öp yòh öp miröökö ṙinatö-ellōn meh tö e nö löng yēḵ hī urěhlen Yāvē tö nup kuilōn re?
MINË HAKÖP HĪ NGAICH
Kô-en an nö tötṙanāngen ngam kinmānö tö ngam rupīö nö in hī, ötkô pöri anū-ö nö mötlö tö ngam linöklōn Yāvē.
Sitih ṙô öm më-eṅ?
Asuh öp min mahayööken meh öm vāyö mufē tö minë la-en?
Asuh öp min yanöölen meh, yěm höng ṙamlōn tö nup töng aṅ in meh?
Kilēḵngôre Yāvē tö ò min nö meukṙen yip tarik re tö nup hanāten cha. Sitih inlahen öm min më-eṅ ṙatö-ellōnre in minë kinlēḵngô ò?
NGËICHKÖ NË INRĒ
Kô-en öng ngam pësa nö vënyu tö ngam Paipöl nö ṙěh nup tökeuheūttöre tötlöök? Töi mikahtökūöre.
“Kô-en Öng Ngam Pësa Nö Ṙěh Nup Tökeuheūttöre Tötlöök?” (El vepsāit töhakööpö)
Nup yòh nup tökētu inyööken tarik tö ṙamölōn tī tö ngam Tēv.
“Sitih Ṙô Öng Ngam Paipöl Tö Ngam Kinë-eti?” (El vepsāit töhakööpö)
Tövaich öng ngam nyinamkö chuā?
“Sitih Ṙô Öng Ngam Paipöl Tö Ngam Nyinamkö Chuā?” (Hīnöre!-Hi, Ĕprěl-Chūn, 2015)
Asuh öp tö lökngöre tī tö ngam tarik mu-ulāya hēk nyamamkö chuā sin nö haṙīngö ngam tinrīken re?
“Töyahlö Lōn Chū-ö Misī Tö Ngam Insōlö Kōra” (Chūökamahati-HI, Ĕprěl-Chūn, 2012)