Haköp Hī Im Līpöre Inmeukhömat

1-2. Kūöyòh öi hòṅ mikahtökūöre töm līpöre Inmeukhömat?

ASEHKŪÖRE man yěm chöhkö öp töhěng mikūönö, ngaich kē-ěkūö meh cha-a töp Fotō Elpöm re. Ngëichkö nup nyat ngaich më-eṅ imat e. Chalô ngaich tö meh öm meuk öp nyat re öm el öp elpöm ngaich chumkūöṙen öm ngëichken e, ngëichken yip hol re inrē öm el ngam nyat. Fě-ělre ngaich më-eṅ tö hē re öm kě-ě nyat hēk töp kamngö meh inrē.

² Sā ṙēngen ngam nyat ngam līpöre Inmeukhömat. Kūöyòh öi ngatī ṙô? Nët nun minë lāinyngen hī. Ngam raneh, chö-önyten tö hī angū-ö nö kūichiyö. Ngö kinūichngö ön nö im raneh miröökö, “Ngam inmeukhömat aṅ in Yēsū Kristu ngam kahëtö ngam Tēv nö in ò, töhameuktu nö in yip tanöölöṙô ò, anū-ö nup töt ṙôktörevö nö yih min.” (Inm. 1:1) Sā ngih ṙô ahang hī nö rö-ö ngih līpöre nö chö-önytö taṙôkhöre tarik nö kūichö, pön chöönyö tö yip tarik ngam Tēv. Ṙamölōn ayī-ö inrē pöi hateungngö ṙô ngam līpöre Inmeukhömat. Sā mameuk ngam nyat re ayī-ö el ngam elpöm.

3-4. (a) Ihē ön nö teungtökūö minë ṙô ngam līpöre Inmeukhömat? (b) Hòṅ asuh nup inlahen hī ayī-ö töngamuh?

³ Ngam innëtö lāinyngen hī öi hòṅ chumkūöṙen ngëichkö mat ngam līpöre Inmeukhömat, pô nup ṙô e nö teungtökūö nö in në ṙētak hī töngamuh. Kūöyòh öi mihôiṅ ngatī ṙô? Ngöṙô ang Yôhan: “Löktö in ngam töhet fanöinylö chū-ö öich teunghöt im sakamö ngam Mā.” (Inm. 1:10, NW) Ik 96 C.E., ang Yôhan nö ṙô-òvö tö ngih, öl pöri hē e ngam “sakamö ngam māṅ.” (Mët. 25:14, 19; Lūk. 19:12) Sā ṙô ngam tö urěhnyi vinënyi imat ngam Paipöl, nö 1914 ngam “sakamö ngam Mā” nö rultenre, ik sā Yēsū nö hayöng nö el halīöngö, lökten hē e inrē nö teungtökūö minë vinënyö më tarik ngam Tēv imat ngam līpöre Inmeukhömat!

⁴ Ṙòkhöre in ayī-ö töngamuh öi el ngih sakamö ngam māṅ. Lökten nö töhòṅ urööṙen ngam inlahen hī hòṅ chumkūöṙen töm inlēnö re imat ngam līpöre Inmeukhömat 1:3 ngam tö ngö kinūichngö, “Tökôlò öp anga-aṅ yēḵ, öp vame-eṅkūö e acha-a inrē yip hamang minë ṙô mu-urěhnyi, ngaich haköpö u nup tökūichi nö in e, pò ngam ṙētak nö röhta.” Hòṅ chumkūöṙen öi vë-ekūö e, hòṅ hangihtöre, asīnkö minë ṙô e inrē. Ta-a töi chumkūöṙen ngëichkö minë ṙô e?

ṘAMLŌN HÒNG ANG YĀVĒ TÖ MINË NÖÖNYÖ KAHËTÖ MEH

5. Kūöyòh ang Yēsū nö halēn nuk māṅ?

⁵ Im raneh tövënyu imat ngam Inmeukhömat, tö minë ṙô sahöömtö Yēsū nö in minë tö sat māṅ i Ēsiā Mainör. Yēḵ hī öi vë-ekūö u, akahakūö anga-aṅ tö tinrīken minë māṅ. (Inm. 1:12-16, 20; 2:1) Chipö ṙô anga-aṅ nö vë-ekūö minë māṅ, pön hōten Yāvē nö ṙamölōn nö i inlahen cha nö ha-öönyan. Akahakūö an inrē Yēsū töngamuh tö inlahen në māṅ pô ò nö mahayöngken hī hēk mahachōkūö hī inrē. Öt hayunngöre ayī-ö imat ò. Akahakūö anga-aṅ inrē tö inlahen hī yěi hòṅ hō-ovö töm Tēv Yāvē. Pōyen nun minë haköp hī kô-òren in minë inlēnö kahëtö ò nö in minë māṅ i Ēsiā Mainör. Ta-a töi ngëichkö minë ṙô ò nö in minë māṅ?

6. (a) Asuh öp kanihngen ngam māṅ i Efisös sā ṙô ngam Inmeukhömat 2:3, 4? (b) Asuh öp haköp hī in e?

⁶ Vë-evkūö Inmeukhömat 2:3, 4. Un kūönngöre ngam hanangenlōn hī tö ngam Tēv Yāvē. Ngam ṙô Yēsū nö in ngam māṅ Efisös, in e öi akahakūö tö inlahen cha nö pōyen kanihngen, söönen cha-a nö möi iṙūöhen inrē nö i linökölōn Yāvē. Hö-ö pöri ngam hanangenlōn cha tö Yāvē nö sā inlahen ngam urěh hanangenlōn cha. Lökten cha-a öre nö hòṅ asīöp ngam hanangenlōn re tö Yāvē, ngaich ṙamölōn ang Yāvē nö in minë inlahen cha öre nö ha-öinyö ò. Ngatī in ayī-ö ṙung öi hamöiyöre yěn ōt nup kanihngen hī. Rö-ö pöri nöng angū-ö tö ngëichka tö Yāvē ngam manöiyö hī, pön ngam chöönyö hī inrē. Lōnu anga-aṅ tö hī öi holtö ellōn re öi ha-öönyan. Ngaich ha-öiny minë tī ò inrē.—Inch. 16:2; Māk. 12:29, 30.

7. (a) Asuh öp maheuk Yēsū kanihngen el ngam māṅ i Sārtis sā ṙô ngam Inmeukhömat 3:1-3? (b) Asuh öp töhòṅ kanöplōn hī?

⁷ Vë-evkūö Inmeukhömat 3:1-3. Hòṅ höngöre ayī-ö. Ngöt sin yik Kristīön aṅ el ngam māṅ i Sārtis nö i linökölōn ngam Tēv. Kūöṅnngöre pöri ngaich angū-ö im rô-òten cha. Lökten ang Yēsū nö tölṙô cha nö “höngöre”. Akahalōn in tö ngam Tēv Yāvē nö öt vaichngö tö nup la-en hī. Ötkô pöri ayī-ö ngö lōn in re, samyeūheuvö chin chū-ö ngaich i linökölōn Yāvē, mihôiṅ chin höng rahëichyen la-en. (Hep. 6:10) Lohten in töngamuh öt ṙētakvö öi sā inlahen re öi kētö nöönyö ngam Tēv hēk öt sā re nö kô-òren në ṙētak hī öi i linökölōn ngam Tēv. Nup töng tölngö kanô-òṅ hī pöri in minë “la-en ngam Tēv” hòṅ kētöre ayī-ö in u. Yēḵ hī min ngatī inlahen ngaich höngöre min ayī-ö hanöng saha taneungtö ngam manā-aṅ sakāmö.—1 Kòr. 15:58; Mët. 24:13; Māk. 13:33.

8. Asuh öp haköp hī in ngam ṙô Yēsū nö halēn ngam māṅ i Laotisiā im Inmeukhömat 3:15-17?

⁸ Vë-evkūö Inmeukhömat 3:15-17. Hòṅ holtö ellōnre ayī-ö ha-öiny ngam Tēv Yāvē. Höng “feuk” yin më Kristīön aṅ el ngam māṅ i Laotisiā nö ha-öiny ngam Tēv. Lökten ang Yēsū nö ngöṙô nö in cha, höng öt kalě-en yin öi ngaich. Lökten anga-aṅ nö halēnö cha nö ngöṙô, hangötlöre yin i linökölōn ngam Tēv Yāvē. (Inm. 3:19) Asuh öp haköplö hī öi in e? Yēḵ hī öi kūṅnngöre inlahen öi ha-öiny ngam Tēv Yāvē ngaich hòṅ asīöpö e ayī-ö. Hòṅ köpölōn ayī-ö tö tī Yāvē hēk tö ngam söngkötön ò nö in hī. (Inm. 3:18) Ötkô ayī-ö höng hamūl nup töng intööḵngölōn re chehen pöi mihôiṅ min kūṅnngöre elmat tö minë la-en i linökölōn ngam Tēv Yāvē.

9. Asuh nup min yamih kanihngen hī nö sā inlahen yip Kristīön i Pörkamön hēk Taitiriā?

⁹ Hòṅ ṙūöhngöre ayī-ö tö më mahaköptö tövaich inköphöti. Keungö ṙô ang Yēsū nö halēn ngam māṅ i Pörkamön, pön ōt yik in cha maharēvöre nö el ngam māṅ. (Inm. 2:14-16) Ngaich eūḵ yip Kristīön pöri anga-aṅ el ngam māṅ i Taitirīa, pô cha nö ṙūöhngöre tö minë tö ‘aṙū-uti inköphöti ṙô ngam Sī-ö’. Ṙūöhlö alaha cha anga-aṅ nö ‘köptī töm Kanô-en.’ (Inm. 2:24-26) In në tönët māṅ, ōt yip Kristīön tö kūönngöre ṙinātö-ellōn, lökten cha-a nö hangṙô yip mahaköptö tövaich. Halööktit re öre cha-a. Ōtre yip töngamuh in në ṙētak hī mahaköptö tövaich inköphöti nö la-al ngam söngkötön ngam Tēv Yāvē. Tölēn cha-a tölōn hī nö kô-òren nö sā hamang ṙô ngam Paipöl. Hö-ö pöri cha-a nö sā ṙô ngam Paipöl. Lökten ayī-ö ötkô öi hang nup ṙô cha, yēḵ hī öi aṙū-uti ṙô öi haköpmat ngam Paipöl. (2 Tim. 3:5) Akahakūö min ayī-ö tö nup inköphöti tövaich ngaich ṙūhöngre min tö u.—2 Tim. 3:14-17; Yūt 3, 4.

10. Minë inlēnö kahëtö Yēsū nö in minë māṅ i Pörkamön hēk Taitiriā, asuh öp haköplö hī?

¹⁰ Hòṅ ṙūöhngöre ayī-ö tö minë tötlöök la-en. Hěng inrē ngam kanihngen el minë māṅ i Taitiriā hēk Pörkamön. Pô cha nö höhö elmat tö ngam insěha. Lökten Yēsū nö halēnö cha. (Inm. 2:14, 20) Asuh öp haköplö hī öi in e? Hòṅ ṙūhöngre in inrē ayī-ö tö minë tötlēn la-en. Un rěhěn nö höökiṙen anū-ö. Uh rěhěn öi ngölōn, ngaich chin chū-ö marô-ònyen i linökölōn ngam Tēv Yāvē, pōyen inrē nup la-en chu el ngam māṅ, öthō min ngam Tēv Yāvē nö öt aṙēlen chu. (1 Sa. 15:22; 1 Pīt. 2:16) Pôrò nö ötlēnngöre tinrīken ngih panam, lōnu pöri Yāvē tö hī kēken nup tölöng inchöngten kahëtö ò.—Efi. 6:11-13.

11. Asuh nup ngaich haköp hī? (Ngëichkö ngam pòks inrē, “Haköplö hī.”)

¹¹ Asuh nup ngaich haköp hī ing ātiköl? Hòṅ chumkūöṙen ayī-ö tö minë kahëtö re nöönyö Yāvē. Yēḵ hī öi kēken nup sahō-o ngam Tēv Yāvē ngaich hòṅ ilööṙen ayī-ö öi ṙāngen u pô hī min höng chök alaha lök la-en ngam Tēv. (Inm. 2:5, 16; 3:3, 16) Ōt nup inrē haköp hī i minë ṙô Yēsū nö i minë māṅ i Ēsiā Mainör. Ta-a töi ngëichken u.

HĪNÖRE LA-AL MINË KANIHNGEN.

12. Asuh öp haköplö hī in minë ṙô Yēsū nö in minë māṅ i Filitalfiā hēk Ismörnā inrē? (Inmeukhömat 2:10)

¹² Töi ngëichkö minë ṙô Yēsū chamuh in minë māṅ i Ismörnā hēk Filitalfiā inrē. Ngöṙô anga-ṅ nö in cha uh yin pa-ekūö tö minë inkihten, haköpöre pöri öi i linökölōn ngam Tēv Yāvē ngaich teūngen min yī-ö tö raneushöre. (Vë-evkūö Inmeukhömat 2:10; 3:10) Asuh öp haköplö hī in e? Öthō in ayī-ö öt hakihtuṙen, lökten öi hòṅ hīnöre öi la-al minë inkihten re. (Mët. 24:9, 13; 2 Kòr. 12:10) Hòṅ mööḵlö inlahen öi chumkūöṙen tö minë inlēnö inë ṙētak töngamuh.

13-14. Ik sā ngam Sī-ö ngaich nö suktu nö ing panam, asuh ngaich nuk inlahenken yik tarik ngam Tēv?

¹³ Imat ngam līpöre Inmeukhömat in akahalōn tö yip tarik ngam Tēv min nö hakihtuṙen ip “sakamö ngam Mā.” Töi ngëichkö inlahen ngam ranulten “sakāmö ngam Mā.” Asuh nup hē e tömeūkö. Vënyu ngam inyööngö tö ngam Tēv ngaich nö rultenre nö el halīöngö. Ilööṙen ngam kinyūngö nö el halīöngö tö Yēsū hēk tö yip ma-ahānga ò nö la-al yip tötlöök Sī-ö. (Inm. 12:7, 8) Asuh ngaich öp ṙòng e? Ötkô ngaich ngam Sī-ö, lökten nö suktu nö ing panam. Unôichrit e ngaich minë kanihngen nö ikui tarik. (Inm. 12:9, 12) Sitih inlahen pöri ngaich më tarik ngam Tēv.

¹⁴ Haköpikūö ngaich ngam talöökö ngam Sī-ö nö el halīöngö, lökten ngaich anga-aṅ nö tainy nö ikūi yip tö hachamö elkui, pô ò nö akahalōn inrē tö cha nö hayöng min nö im pūlngö ngam Tēv, hēk akahalōn inrē anga-aṅ tö cha nö kētu la-en tö ngam inhangkö Yēsū, lökten ngam Sī-ö nö mā-anyre nö hakihten cha. (Inm. 12:17; 2 Kòr. 5:20; Efi. 6:19, 20) Ta-a töi ngëichkö inlahen ò.

15. In ngam Inmeukhömat tö 11 mirūlö, achīö aich mina “tönët tak” ma-ahangköm tölöök inhānga, sitih inlahen cha-a cha?

¹⁵ Ngaich ngam Sī-ö nö hakihten më töhachamö elkui më mahayōmken ngam la-en inhangköm tölöök inhānga. Cha-a yin tövënyu nö im Inmeukhömat tö 11 mirūlö nö “tönët tak” ma-ahangköm tölöök inhānga, mina tö fëli.b (Inm. 11:3, 7-11) Sitih taneungtökūö öng ngih tö urěhnyi vinënyi? Ik 1918 yik töhëvöre tak prötör ngaich tö chaphötvö nö el chēl. Ik hē e ngam inhangköm tölöök inhānga nöng sā inlahen töng sökngöre röön.

16. Asuh nuk tömeukö ik 1919, hēk löktökūö in e söl ing töngamuh asuh nup la-en ngam Sī-ö?

¹⁶ Vënyu inlahen mina “tönët tak” ma-ahangköm tölöök inhānga i ngam līpöre Inmeukhömat tö 11 mirūlö tö cha nö hēk nö ha-aṅlöng. Ihē angū-ö nö teungtökūö? Unôichrit tö hěng samyeūheu ik sā yik prötör mahachōkūö ngam la-en nö ṙānyuvö nö ṙā-ang el chēl. Ik 1919 cha-a nö ṙānyuvö. Ik töng ṙinānyö cha nö ṙa-ang el chēl, ilööṙen cha-a nö ahangköm tölöök inhānga. Öt ṙāngenre pöri ngam Sī-ö, lökten ò nö farômnyöm mak “tahël” nö ikui më tarik ngam Tēv ngam tö ngö manah, ngam inlahen ò nö hakihten më tarik. (Inm. 12:15) Lökten in ayī-ö töngamuh öi hòṅ īnu tö ngam manöiyö hēk ngam ṙinātö-ellōn inrē.—Inm. 13:10.

CHUMKŪÖṘEN TÖ MINË LA-EN KAHËTÖ YĀVĒ

17. Achī-ö yip mahayööken më tarik ngam Tēv?

¹⁷ Vë-eny nang hī hēk ngam Inmeukhömat tö 12 mirūlö tö inlahen më tarik ngam Tēv, nö teūngen tö inyööken re ngam töt maheūṅkkö cha. Sā ṙô ngam tö 16 miröökö nö vë-eny inlahen ngam Sī-ö nö “farômnyö öp mak tahël” ngaich luva-anykūö re “ngam tumlat” nö ngeūkten e. Tö sitih manah angū-ö? Hakihten më tarik ngam Tēv ngam Sī-ö, ngaich më mahayöng ngih panam nö hayööken cha. Tö sā më Vamënyen Yāvē yěn kahòkkaṙen nö el Kōrt, ngaich ṙōlheuh cha-a nö mihôiṅ pön lā rītö cha më kamhôṅka. Lökten ngaich cha-a nö öt pinyū-uvṙen nö ahangköm tölöök inhānga. (1 Kòr. 16:9) Asuh ngam ahangkö cha?

18. Asuh öp töhòṅ la-en hī urěhěkūö ngam manāngen?

¹⁸ Vënyö inlahen yip haköptöre ang Yēsū nö ‘ahangkö ngam tölöök inhāngkö ngam pūlngö’ min nö i taṙòkhöre panam, urěhěkūö ngam manāngen nö yih. (Mët. 24:14) Hōluṙen cha-a nö im la-en re. Sā ṙô ngam līpöre Inmeukhömat, hěng tak ngam ma-ahānga tö ‘īnu tö ngam töt chanuhuvṙen tölöök inhānga hòṅ ò nö ahānga nö in cha yip mi-iyöng kūö në panam hēk pumnāmö tarik inrē, miyööngö, tum mi-ëlô tarik inrē.’—Inm. 14:6.

19. Asuh öp tö ahangka tö më tarik ngam Tēv Yāvē?

¹⁹ Rö-ö yin vē tarik ngam Tēv nöng ahangken ngam tölöök inhānga, pön ahangken ngam kinṙôka inrē nö i vē tarik ikūöng panam ngam Sī-ö. Sā ṙēngen ngam ‘tameūyö hēk tökënngöre kumṙah’ ngam ahangkö cha. (Inm. 8:7, 13) Ngatī inlahen cha-a nö holṙen më ma-ahānga nö ahangköm tölöök inhānga. Im Inmeukhömat tö 8 mirulö söl im tö 10 nö vënyu inlahen ngam ma-ahānga ma-ahangkö inlahen yip tarik töt më-elkatòh ngam pūlngö ngam Tēv min nö kihngen. Akahalōn yin vē Vamënyen Yāvē tö më tarik min nö mihôiṅ nö löhlö tī tö minë nômö re, lökten cha nö vë-eny nang më tarik. Yēḵ cha nö halööktit re urěhěkūö ngam mana-aṅ sakamö ngaich öthō min cha-a nö kô-òngvah töp tanainyö ngam Tēv. (Sef. 2:2, 3) Pōyen pöri yip tarik töt ööire yěn vënyu nang. Lökten ayī-ö hòṅ īnu töm öt pinhë-eṅkūö re. Möthë takô yěn rultenre min ngam yöng kanihngen. Pô hī min ip hē e öi ahangken ngam kinṙôka. Pōyen min yip tarik tö lamā-al hī ip hē e.—Inm. 16:21.

TŪÖNKUI MINË TÖ HA-EHANGEN VINËNYI

20. Asuh nup min mikahkūö hī inup yamih tö nët ātiköl?

²⁰ Pōyen nup ngaich tö teungta tö urěhnyi vinënyi in ngam līpöre Inmeukhömat. Öt höng angū-ö pöi hateung ngen e inrē ayī-ö. Lökten ayī-ö öi hang minë ṙô tökūichi nö imat e. (Inm. 1:3) Hòṅ hīnöre ayī-ö in minë kanihngen, ngaich iṙūöhen öi in ngam la-en inhānga, lökten ayī-ö öi hòṅ köplōn tö minë ṙô im Inmeukhömat. Ngam raneh, Sitih inlahen min yip tö kunyah elmat tö ngam Tēv? Ngam innëtö, yēḵ hī min öi köp i linökölōn Yāvē asuh nup min inkôlò taneunglen hī? Inup yamih min tö nët ātiköl in u min öi ṙūöhtö mikahkūöre re.