Lēntöhëichṙen Öm Më-eṅ Hòṅ “Amīnu Tö Ngam Panam”?

LĒNTÖHËICHṘEN ÖM MË-EṄ ÖM VĪ NGIH PANAM MIN PERETĀIS?

Unôichrit vinī-i ngòh tarik ngaich ngöṙô ngam Tēv, “hatöölö ngam tumlat, hayöngö e.” (Ran. 1:28) Tö ngö manah angū-ö tö Yāvē min lōnu tö ngih panam nö keuheūtngöre min nö vī-i nö peretāis. Ngaich yēḵ yip tarik min ṙòkhöre nö amīnu tö ngih panam, ngaich hateungngö ngam kuilōn ngam Tēv min cha-a nö vī ngih panam nö peretāis. Īnup nak nā Ātöm nā Ēva misī tö ngam panò-òṅ Ēten, ngaich asīöpnyö ngam ṙòkö e öre cha-a. Unôichrit ngam Armekētön pöri min më tarik hēk min nö hòṅ löktökūö im urěh nö hòṅ havailen e. Hòṅ ha-et min cha-a hē e hēk vī ngih panam inrē vai. Kô-en nö pōyen hē e nup la-en tö hòṅ kēkaren.

Ik sā yik aṅ Israel nö havan nö löktö panam re chuh Pēpilön, ngaich ngatī inlahen cha-a. Pön 70 samyeūheu ngam panam nö öt aṅhav kūö. Ngam vahënyö pòfět Isayā pöri tö cha-a nö löktö in Yāvē inyööken nö havantö inlahen ngam panam nö vai. Ngöṙô tī Isayā nö kūich: “Ngaich vī ngam tönyalnyi ò min nö sā Ēten, ngam kuyāyö tönyalnyi inrē nö sā ngam panô-òṅ ngam Mā Tēv.” (Isa. 51:3) Ngaich kô-en angū-ö nö ngatī inlahen. Ngatī inlahen min angū-ö ip yamih ṙētak tö yip tarik min nö amīnu tö ngam panam, ngaich löktö im inkòlô re min cha-a tö Yāvē nö vī ngih panam nö peretāis. Mihôiṅ pöri më-eṅ töngamuh öm kēken nup taṙòkhöre la-en hòṅ meh min öm kētöre holṙen cha ip vinī-i ngih panam min nö tufömngöre.

Mihôiṅ man öm ha-et taseū ngam patī re. Pòrô yip aṅ chīrö patī meh nö öt ngatī inlahen hòṅ chumkūöṙen më-eṅ i inlahen ngam hanëtö. Mihôiṅ inrē öm kētöre ha-et ngam patī pūlngö hēk ngam chūök hī inrē öi könvensön. Mihôiṅ inrē öm fīl ngam fôm hòṅ meh kētöre holṙen yip kamëtö rīlif. In e min yip prötör nö akahakūö tö nup inyööken tö hòṅ lōnu, ngaich lētöhëichṙen min öm hayööken yip tahëng. Kò-òren man öm hatöönö re, ‘Asuh nup mihôiṅ tö asīöpö heuneū-en chu hòṅ chu min öich kētöre in nup la-en ikūö ngam tufömngöre panam?’

LĒNTÖHËICHṘEN ÖM MIN MË-EṄ ÖM HAYÖÖKEN YIP TÖ HA-AṄLÖNG?

Töi chumkūöṙen ngëichkö inlahen Yēsū ik sā ò nö ha-aṅlen öp kūön Yāirö, ngaich asuh ök inlahen hē e. Unôichrit inlahen ò nö ha-aṅlöng ilööṙen ang Yēsū nö ngöṙô kē-ěkūö ngam kikānö yin tö nyā-aṅkūö. (Māk. 5:42, 43) Öt tö kihngen ön ngam inlahen hī öi hanëlen ngam 12 samyeūheu kikānö, pön höng rahëichyen lōn anga-aṅ tö ngam nyā-aṅkūö. Fē-a pöri më-eṅ, ‘yěn ṙòkhöre min yip tö ha-aṅlöng nö löktö el ngam anūlö nö hang ṙô Yēsū ngaich kunyi-inyre min cha-a.’ Ngaich hòṅ iṙòken inlahen nginëichka min cha-a ip ṙētak e. (Yôh. 5:28, 29) Hö-ö ön ngam Paipöl nö keuheūtnyöre ṙô nö vënyen e, Akahakūö pöri min ayī-ö tö cha nö hòṅ lōnu tö nyā-aṅkūö, chūök cha inrē nö iyöng hēk tö minë chehen cha inrē. Ngaich hòṅ halēnlöng në chehen ip hē e. Asūp mihôiṅ la-en meh ing töngamuh hòṅ hī min öi hayööken yiptarik min in öp tufömngöre panam? Ta-a töi chumkūöṙen ngëichken nup ihih inlahenre.

Yěn vënyu ngam minkahtölōn nö el ngam māṅ nö röhta ngam sörkit visit, ngaich mihôiṅ më-eṅ öm havëten cha nö nyā nö chuh patī re. Kò-òren inrē öm fēkö inlahen yip prötör sistör el ngam māṅ re yip tö la-evṙen sin nö el Pētěl hēk sörkit ovösīör inrē, öt hòṅ hayööken cha hòng më-eṅ öm chöh patī cha? Yěn kēkaṙen minë könvensön, ësemplī, ngaich pōyen minë la-en. Yěn ōt nup könvensön tö kēkaṙen nö i kamngö meh, mihôiṅ hòng öm kētöre in minë la-en urēhěkūö kinëken e hēk unôichrit e inrē? Mihöiṅ ṙöng öm höng ha-öiny tö yihi yip prötör sistör yamihtökūö?

LĒNTÖHËICHṘEN ÖM MË-EṄ ÖM HAKÖPTEN YIP TÖ HACHOHLÖNG MIN

Sa ṙô ngam Inlahen 24:15, in e mikahkūö ayī-ö tö yip tö hachohlöng min ip tufömngöre panam nö lohten nö köiṅnyu köiṅnyu(billion) ṙôken. Pōyen min yip in cha tö kētu ṙētak nö haköp inlahen Yāvē. Lökten yěn hachohlöng min cha-a, ngaich mikahtökūöre tö inlahen Yāvē.a Achīö yip min mahaköpten cha? Cha-a yip tö chiplö nö i linökölōn Yāvē. (Isa. 11:9) Töi chumkūöṙen ngëichkö ṙô sistör Sarlět, ngam ma-ahangkö ngam tölöök inhānga nö i Yūrop, Amerikā hēk Afrīka inrē. Höng hökkö öp ṙētakre cha-a hē cha min nö haköptö yip holre ip tufömngöre panam. Ngö ṙô anga-aṅ: “Höng höktöre chū-ö öich hòṅ haköptö yip tarik tö ha-aṅlöng min ip tufömngöre panam. Yěich fēkö inlahen yik mu-urěhngöre tarik, ngaich ngö lōn chū-ö, ‘Yěn akahakūö öre anga-aṅ tö inlahen Yāvē, ngaich harīkngöre öre ök tinrīken ò.’ Kalē-ěḵ lōn chin öich hòṅ vë-eny nang cha tö inlahen Yāvē hēk vë-eny nang cha inrē tö inlahen nga, tinrīken cha nö vai yěn löklōn Yāvē.”

Pōyen yip min inrē tarik ngam Tēv Yāvē tö hachohlöng yip mu-urēhěkūö Yēsū nö aṅ, cha-a inrē min tö haköptu tö hī. Kò-òren öi fēkö inlahen Tanīěl. Pōyen nuk kahuich ò tö-euka kinlēḵngô nup töt mikah elnang ò. In öp tufömngöre panam min ayī-ö öi vë-eny nang ò tö manah minë tö-euka kinlēḵngô nö sitih inlahen inrē anū-ö nö teungtakūö. Iṙôken ṙanamlōn min ayī-ö ip hē e öi haköpten cha, tökiröng min inrē angū-ö nö minlēken hī ip hē e. (Tan. 12:3) Fēkö inlahen hī inrē yēḵ hī min öi vë-eny nang nā Rūt Naomi tö ngam tö-eunyu nö löktö in cha ang Yēsū töu öi ò, sitih mufē öi min ip hē e. Pōyen min yip tö haköptu nö el öp tö tufömngöre panam. Öt ōtre min minë mufē elkuilōn hī hēk tö minë kanihngen. Kirööngen ṙanamlōn min ayī-ö ip hē e öi haköpten yip tarik!

Asūp mihôiṅ töngamuh la-en meh, hòṅ meh haköpten yip tö ha-aṅlöng min ip tufömngöre panam? Ma-anyre man öm harunöre haköpten yip tahëng hēk örheūheu ahangkö ngam tölöök inhāngö. (Mët. 24:14) Yēḵ meh ngaich öm ṙēḵtivö hēk öt kalē-ěn inrē, ngaich öt sā re öm keuheuttö ṙētak re öm ahangkö ngam tölöök inhāngö, um haṙivlōn. Öp tölngö kanò-òṅ meh pöri ngatī inlahen më-eṅ. Yěm ngatī inlahen min ngaich hööngöre min më-eṅ öm haköpten yip tahëng in öp tufömngöre panam.

Hatöönöre man, ‘Lēntöhěich öich chū-ö öich iyöng kūö ngih panam? Hökkö ngam ṙētak re öich röng vīnyö ngih panam nö peretāis öich hayööken yip tö ha-aṅlöng öich hakööpten?’ Ṙultenre öm chěi öm kēken nup la-en, nup la-en meh min ip tövai panam? Ngaich möl min më-eṅ öm hööngöre iyöng ikūö ngih panam!