Hasamula otshe makungo a mipalavanya ma lwisanako ni wuzivi wa Txizimu!

1. Ngu txihi txialakanyiso atxi Paulo a nga bhalela Makristu ya i nga ti vasawuleki?

PAULO a ti khene “mi nga xengetelweni.” Se i ti kuxengetelwa ngu txani? I ti ‘kuxengetelwa ngu sa ditiko diya.’ (Var. 12:2) Paulo a wombile tiya a txi gela Makristu a dilembe dizana. Ngu kutxani Paulo a di ningete txialakanyiso ka Makristu ya i nga ti vasawuleki aya ma nga ti ti ningetete ka Txizimu?—Var. 1:7.

2-3. Sathani a maha txani kasi ku e hi hambanisa ni Jehovha? Hi nga hasamulelisa kutxani otshe makungo a mipalavanya?

² Paulo a ti thava nguko Makristu mamwani ma ti belelwa ngu moya wa mapimiselo o biha ni wutxhari wa vathu va ditiko diya da Sathani. (Vaef. 4:17-19) Eto ti nga hi humelela nathu. Kasi ku e hi hambanisa ni Jehovha, Sathani i ku txizimu txa mafu awa a thumisa tipulani to hambana-hambana. Ngu txikombiso Sathani a nga londola mkhanjo wa ku hi lava ku ti guletanyana. A nga thumisa to kari hi ku nato to fana ni wusikoti wathu, mdhawuko mwendo tigondo tathu.

³ Ina ti nga koteka kudula otshe “makungo a mipalavanya” ka mapimo athu? (2 Vak. 10:4) Wona to Paulo a ti khene: “Ha hasamula makungo a mipalavanya ni wotshe mtamo wa kutikulisa wu wu lwako ni kuziva ka Txizimu. Ha khozisa mialakanyo yotshe yi txi maha ya kuengisa Kristu.” (2 Vak. 10:4-5) Eto ti womba to ngu kuvhunwa ngu Jehovha hi nga sikota kuxula mialakanyo yo biha. Kufana ni mrende wo kari wu wu nga dayako mtamo wa vhenene, Bhiblia ni yona yi nga hi vhuna kudaya vhenene ya mafu awa a Sathani.

“PHINDUKANI AMU KA MAPIMO ANU”

4. Wungi wathu ti lavile hi maha txani mbimo yi hi nga ziva ditshuri?

⁴ Pimisa ngu ti ti nga lava u txitxa mbimo yi u nga ziva ditshuri ni kutshumela u thumela Jehovha. Wungi wathu ti lavile hi leka mahanyelo o biha. (1 Vak. 6:9-11) Ha m’bonga ngutu Jehovha kuva a di hi vhunile kuxula simaho soneso so biha!

5. Ngu tihi timhaka timbidi ati ti nga txhamuselwa ka Varoma 12:2?

⁵ Phela, kha hi na mbi zumbela ku gee hi dya m’baba. Hambiku hi nga leka kumaha sionho sa hombe asi hi nga ti maha kale na hi si se bhabhatiswa, ti lava hi zama kuvayilela txihi ni txihi txi txi nga hi mahako hi tshumela msana hi ya maha manyala. Hi nga mahisa kutxani toneto? Paulo wa hi ninga xamulo, a khene: “Mi nga xengetelweni ngu sa ditiko diya, aniko phindukani amu ka mapimo anu.” (Var. 12:2) Se ti lava hi maha timhaka timbidi. Yo khata, ti lava hi si ‘xengetelwi,’ mwendo ku kuzetelwa ngu ditiko diya. Ya wumbidi, ti lava hi ‘phinduka’ ngu kutxitxa mialakanyo yathu.

6. Hi gonda txani ka mapswi a Jesu aya ma ku ka Matewu 12:43-45?

⁶ Kuphinduka aku Paulo a nga ti ku womba i si nga ku ko pekela titshokani. Kugwesa wotshe wuthu wathu. (Wona dibhokiso di di ku “Ina hi txitxile mwendo ho la kuwonwa?”) Ti lava hi phinduka mu ka mialakanyo yathu ti patako mapimiselo athu, matipfelo, ni minavelo yathu. Ngu toneto hotshethu ti lava hi tiwotisa tiya ‘Ina kutxitxa ku ni ku mahako to ni va Mkristu ngo womba ngu txisofu dwe mwendo ngo khukhela mbiluni?’ Jesu a wombile ti ti lavekako ku hi ti maha ka Matewu 12:43-45. (Yi lere.) Ka tindimana tiya hi wona timhaka ta lisima ngutu i ku tiya: Kha ta enela kudula mialakanyo yo biha dwe, kambe ti lava hi tata msungo wathu ngu mialakanyo ya Txizimu.

TUMELANI KUTEKA MAHANYELO A M’THU WAMPHYA

7. Hi nga ma txitxisa kutxani mahanyelo athu?

⁷ Ina ti nga koteka kutxitxa mahanyelo mwendo wuthu wathu? Bhiblia ya hi ni nga xamulo, yi khene: “Tumelani kuteka mahanyelo a m’thu wamphya moyani kwanu; mi txi londetela mahanyelo a m’thu wamphya, awu a nga vangwa e mahwa txifaniso txa Txizimu ngu wululami wa ditshuri ni wusawuleki wa ditshuri.” (Vaef. 4:23, 24) Ina, ti nga koteka kutxitxa wuthu wathu, kambe hi nga msakano. Kha ta enela kuvayilela mialakanyo ni simaho so biha. Ti lava hi txitxa “mahanyelo” athu. Eto ti pata kutxitxa minavelo yathu, a mu hi nga wekelela kona, ni sivangelo sathu so maha to kari. Kasi kumaha toneto, ti lava hi simama hi dhunuka.

8-9. Ngu kuya ngu txikombiso txa mwanathu wule, ngu kutxani ti txi lava hi txitxa ati hi ku ngu tona mbiluni?

⁸ He wone txikombiso txa mwanathu awu kale kwakwe i nga di wa tihanyi. Msana kova a di lekile kudhaha ni sibhakela, a bhabhatisilwe, eto ti ningete wufakazi wa wunene amu a nga ti zumba kona. Kambe ditshiku dimwani a di ngadi kubhabhatiswa a mananile ni txiduko a sa ti rinzela. Didevi dimwani di mu tete mtini kwakwe di lava ku mu lwisa. Makhatoni a ti ñote. Kambe mbimo yi dijaha dile di nga khata kuruketela Jehovha ti mu gwesile ngutu. A to khuka e peka dijaha dile. Ngu kutxani a di mu pekile? Hambiku Bhiblia yi nga ti m’vhunile kuhungula tihanyi ti a nga ti nato, kambe a si se kutxitxa wuthu wakwe, ti wombako ku a si se kutxitxa mbiluni kwakwe.

⁹ Hambiketo, mwanathu wuwa kha godhola. (Mav. 24:16) Ngu kuvhunwa ngu madhota a simamile e kula ngu didhawa da moya. Ngu kutsimbila ka mbimo a sawutwe ku va didhota. Se ditshiku dimwani a di Nyumbani ya Mfumo, a mananile ni txiduko txo fana. Dijaha dimwani di di nga ti levile di ti lava kupeka didhota do dimwani. A mahile txani mwanathu wule? Ngu txixonipho a zamile ku di khongotela e tshumela e di heleketa mtini. Ngu kutxani a mahisile tiya dikhambi diya? Mwanathu wuwa se a ti phindute mahanyelo akwe. Mbilu yakwe se yi ti txitile, e va ni kurula ni ku tiveka hahatshi. Eto ti dhumisile Jehovha!

10. Ti lava hi maha txani kasi kutxitxa mazumbelo a mbilu yathu?

¹⁰ Kutxitxa kuwa kha ku maheki ngu ditshiku dimwedo mwendo kumaheka kupune. Ti nga lava hi ‘khutala nga ti hi ti kotisako tona’ ngu kutsimbila ka mbimo. (2 Pedro 1:5) Kutxitxa kuwa ku na mbi maheka dwe ngu kuva i di kale hi txi thumela Jehovha. Ti lava hi maha totshe ti hi nga ti kotako kasi kutxitxa mbiluni kwathu. Ku ni ti hi nga ti mahako kasi ku hi txitxa. He xolisise timwani ta kona.

HI NGA MA TXITXISA KUTXANI MAHANYELO ATHU?

11. Mkombelo wu hi vhunisa kutxani kutxitxa mahanyelo athu?

¹¹ Mkombelo tximaha txo khata. Ti lava hi maha mkombelo ka Jehovha kufana ni mbhali wa Masalmo a nga khene: “Awe Txizimu ni he mbilu ya yinene; wuseta m’hefemulo wangu, u txi wu tsanisa.” (Mas. 51:10) Ti lava hi tumela to njilaveko kutxitxa mahanyelo athu ni ku ti lava hi kombela txivhuno ka Jehovha. Hi nga ti zivisa kutxani ti to Jehovha a na hi vhuna? Hi nga tsaniswa ngu ku khumbula txithembiso txa Jehovha ka Vaisrayeli ava i nga ti sibanga misungo ka timbimo ta Ezekhiyele, a ti khene: “Kambe ni nava ninga mbilu yimweyo, ni thela moya wa wuphya mndani kwawe . . . ni txi va ninga mbilu ya nyama, [ti wombako ku va ni mbilu yi yi engisako Txizimu].” (Ezek.11:19) Jehovha a ti ti emisete kuvhuna Vaisrayeli, ni nyamsi a nga di ti emisete ku hi vhuna.

12-13. a) Ngu kuya ngu Masalmo 119:59, ti lava hi alakanyisisa ngu txani? b) Ngu sihi siwotiso si hi fanelako ku ti wotisa?

¹² Kualakanyisisa i nzila ya wumbidi. Mbimo yi hi gondako Bhiblia ditshiku di ditshiku, ti lava hi ti ninga mbimo yo alakanyisisa ni kuzama kuwona ati hi fanelako kutxitxa. (Lera Masalmo 119:59; Vaheb. 4:12; Jak. 1:25) Ti lava hi zama kutumbula to ina kha hi nga ni mapimiselo a ditiko kani. Hi fanete hi tumela amu hi tandekako kona se hi zama kutshukwatisa.

¹³ Ngu txikombiso, ti wotise tiya: ‘Ina ni ni mabava mbiluni kwangu?’ (1 Pedro 2:1) ‘Ina ni ti wona ni txi pala vamwani ngu mhaka ya tigondo, wusikoti mwendo male yi ni ku nayo?’ (Mav. 16:5) ‘Ina ni va wonela hahatshi ava va pwatako silo asi ni ku naso mwendo ava i ku va lixaka limwani?’ (Jak. 2:2-4) ‘Ina na si tsakela silo sa mafu awa a Sathani?’ (1 Joh. 2:15-17) ‘Ina na tolovela kuxalela misakano ya nzambwa mwendo ya wugevenga?’ (Mas. 97:10; 101:3; Amosi 5:15) Tixamulo ta siwotiso soneso ti nga hi vhuna kuwona mu ti lavako hi ku lulamisa. Ngako hi txi xula yotshe mialakanyo ya “mipalavanya” hi na tsakisa Tate wathu wa nzumani Jehovha.—Mas. 19:14.

14. Ngu kutxani i di ta tinene kusawula vangana vavanene?

¹⁴ Kusawula vangana vanene i nzila ya wuraru. Ti nga maha mbimo yimwani hi si ti tumbuli, kambe hi nga kuzetelwa ngu vangana vathu. (Mav.  13:20) Phela hi randetwe ngu vathu va va si hi vhuniko kupimisa ngu nzila yi yi tsakisako Txizimu, ku nga va mthumoni mwendo txikolwani. Hambiketo hi nga mana vangana vavanene mitshanganoni. Kona hi nga kuzetwa ni kutsaniswa amu ka “lirando ni ka mithumo ya yinene.”—Vaheb. 10:24, 25.

‘TSANA AMU KA LIKHOLO’

15-16. Sathani a maha txani kasi kutxitxa mialakanyo yathu?

¹⁵ Khumbula to Sathani a lwela kutxitxa mialakanyo yathu. A thumisa tipulani takwe kasi ku hi maha hi kananaka ati hi ti gondako ka Bhiblia.

¹⁶ Sathani a nga di a txi maha txona txiwotiso txile a nga wotisa Evha a txi khene: “Ina Txizimu txi wombile ti to . . . ?” (Gen. 3:1) Ka mafu awa a Sathani, ti tolovelekile ku hi wotiswa siwotiso so nga siya: ‘Ina ditshuri to Txizimu txa tsimbisa vathu va limbewu limwelo ku ve txhadha votshe? Ina ditshuri to Txizimu kha txi lavi u dya khisimusi? Ina Txizimu txa tsimbisa kuthela mnoha? Aku Txizimu txi ku ni lirando ina txa tsaka ngako u txi vayilela ava va nga thaviswa dibanzani?’

17. Hi na maha txani ngako hi txi mahwa siwotiso ngu txikongomelo txo hi thela kukanakana? Ngu kuya ngu Vakolosa 2:6, 7 yi nga va yihi wuyelo?

¹⁷ Ti lava hi kholwa ta tinene ka ti hi ti gondako. Ngako hi txi zumba hi di ni siwotiso so mbi si ziva ku si xamula hi nga thuka hi va ni kukanakana. Kukanakana koneko ngu nga hi pengisa ni kumoxa likholo lathu. Se hi fanete hi maha txani? Bhiblia yi hi gela ku hi fanete hi phinduka amu ka mapimo athu kasi kuziva “kuranda ka Txizimu: Ati i ku ta tinene, a ti ti m’tsakisako, ni ti i ku ta kuhetiseka.” (Var. 12:2) Ngu kugonda Bhiblia ditshiku ni ditshiku hi na ziva ni ku tsaniseka ka ti hi nga gonda ka Bhiblia. Hi kholwisisa to milayo ya Jehovha nja yinene. Kufana ni mndonga wu wu ku ni mikuluti yo tiya hi na va hi di ‘zimile mikuluti’ ka likholo.—Lera Vakolosa 2:6, 7.

18. Nji txani txi no hi vhuna kuxula vhenene ya mafu awa a Sathani?

¹⁸ Awalo ni wammweyo a nga tsanisako likholo lako . Se ngu toneto, ti lava u ya masoni u va ni mahanyelo a m’thu wamphya. Maha mkombelo mbimo yotshe u kombela moya wo sawuleka. Alakanyisisa kwati, xolisisa mapimiselo ako ni sivangelo sako so maha to kari. Lava vangana va vanene, zumba hafuhi ni vathu va va no kuvhuna ti to u phindula mialakanyo yako. Ngako u txi maha toneto u na xula vhenene ya mafu awa a Sathani ni kutshumela u hasamula otshe “makungo a mipalavanya ni wotshe mtamo wa kutikulisa wu wu lwako ni kuziva ka Txizimu.”—2 Vak. 10:5.