Mareferensiya a txibhukwana txa mitshangano ya Mahanyelo a Wukristu
© 2024 Watch Tower Bible and Tract Society of Pennsylvania
4-10 KA NOVEMBRO
TITHOMBA TA MU KA DIPSWI DA TXIZIMU | MASALMO 105
“Wa alakanya yotshe mbimo txitumelelano txi a nga tximaha”
He tsaniseni likholo lathu ka txithembiso txa Jehovha txo tisa mafu a maphya
Wona sithembiso si Jehovha a nga thembisa malanda akwe a kale asi si nga txi woneka nge si nge hetiseki. Ene a thembisile Abrahamu ni Sara ti to va di na va ni mwanana hambiku va nga di kute ngu tanga. (Gen. 17:15-17) A tshumete e thembisa Abrahamu ti to adi na ninga liveleko lakwe ditiko da Kanana. Mbimo yi liveleko la Abrahamu i ku Vaisrayeli va nga heta malembe o tala i di sibotxhwa a khe Egipta ti txi woneka nga txithembiso txiya txi na mbi maheka. Kambe ti mahekile. Msana keto, Jehovha a gete Izabheli wu a nga ti kute ngu tanga ti to a ndina va ni mwanana. A tshumete e gela Mariya wa mbiri ti to a ndina veleka Mwanana wa Txizimu eto ti ndi na hetisisa txithembiso txi Jehovha a ngadi txi mahile kudingana malembe o tala khe jaradhi ka Edheni!—Gen. 3:15.
Hi nga tsanisa likholo lathu ka mtamo wa Jehovha ngu kualakanyisisa ngu sotshe sithembiso si a nga si maha ni nzila yi a si hetisisako ngu yona. (Lera Joxuwa 23:14; Isaya 55:10, 11.) Eto ti na hi maha hi tiemisela kuvhuna vamwani ve pfisisa to txithembiso txa Jehovha txa mafu a maphya hi nga mloro mwendo sitoriya. Jehovha a wombile apune mayelano ni nzuma ya yiphya ni mafu a maphya atxi: “Bhala, nguko mapswi awa ngo thembeka ni a ditshuri.”—Mtu. 21:1, 5.
it-21201 ¶2
Dipswi
Siwumbwa asi si ku ni wutomi ni si si si nga ku ni wutomi sa fumwa ngu dipswi da Txizimu ni ku si nga thumiswa kasi kuhetisisa makungo a txona. (Mas 103:20; 148:8) Dipswi dakwe di thembekile; ati Txizimu txi ti thembisako txa tshumela txi khumbula ku ti hetisisa. (Dhew 9:5; Mas 105:42-45) Nga ha txi nga womba ngu kona dipswi a txona da “zumba kala kupinduka”; kha di na mbi tshumelela kwakwe di sa hetisisa txikongomelo txakwe.—Isa 40:8; 55:10, 11; 1Ped 1:25.
Tithomba ta moya
w86 1/11 19 ¶15
Majovhem, txienge txanu ka mwaya awu wu ku ni wumwewo ni kutsaka
“Va txi msunga ngu titxhini mikondoni ni dikhodha da simbi thamoni kwakwe, kala kuza ti maheka atiya Josefa a nga ti ti wombile, se dipswi da Mkoma di kombisile ti to Josefa a womba ditshuri [dipswi da Jehovha di m’gondisile, NM].” (Masalmo 105:17-19) Kudingana 13 wa malembe, Josefa a xanisekile kota txithumi ni ku va txibotxhwa kala txi hetiseka txithembiso txa Jehovha. Ene a gondile ngu ti a nga xaniseka ngu tona. Hambiku Jehovha i nga si nga ene a nga txi vanga sikarato siya, a si tumelete ngu txikongomelo txo kari. Ina Josefa a ti na xayisa themba yakwe ka “dipswi da Jehovha” hambi ku a nga txi maneka ka tixanisa ta hombe? Ina a ndi na vitusa tifanelo takwe ta tinene ni kuengetela pasiyensiya ayi yi nga txi laveka, kutiveka hahatshi, mtamo ngu didhawa da moya ni ku ti emisela kuwonisana ni txiavelo txo karata? Ngu tona, Josefa a humeletwe kwati nga ouro ayi yi humako ngu mndiloni, se a ti ni lisima ngutu masoni ka Txizimu, atxi ngu kutsimbila ka mbimo txi nga m’thumisa ngu nzila yo xamatisa.—Genesisi 41:14, 38-41, 46; 42:6, 9.
11-17 KA NOVEMBRO
TITHOMBA TA MU KA DIPSWI DA TXIZIMU | MASALMO 106
“Va divate Txizimu, Muhanyisi wawe”
I mani wu a emako ni Jehovha?
Vaisrayeli va dhukisilwe nguko Txizimu txi nga kombisa mtamo wa txona, se Mosi ngene a nga tsula e ya womba-womba ni Jehovha. (Eksodha 20:18-21) Kambe, mbimo yi txo tsula, Mosi a si wuyi wugoveloni. Ti woneka nga vathu va ti thava txiwulani ngu kwa mbi na mthangeli wawe. Va ndi na maha txani? Ti nga maha Vaisrayeli va ti themba ngutu Mosi, awu a nga ti va thangela. Vona se va si lungi, va gete Aroni va txi khona: “Hi mahele sizimu si si no thangela masoni kwathu; nguko ene Mosi wuwa, i ku wamwamna wu a nga hi humisa ditikoni ka Egipta, kha hi txi zivi atxi txi nga m’humelela.”—Eksodha 32:1, 2.
Tithomba ta moya
w06 15/7 13 ¶9
Txhamuselo ya mapswi ya ma ku ka dibhuku da wuraru ni da wumune da Masalmo
106:36, 37. Tindimana tiya ti kombisa ti to kukhozela sifananiso ta yelana ni kuhisela magandelo madhimoni. Eto ti kombisa ti to m’thu wu a thumisako sifananiso a nga thuka e va hahatshi ka mkongomiso wa madhimoni. Bhiblia yi hi kuzeta tiya: “Tshuralelani sizimu sa walo!”—1 Johani 5:21.
18-24 KA NOVEMBRO
TITHOMBA TA MU KA DIPSWI DA TXIZIMU | MASALMO 107-108
“Bongani MKOMA, nguko ene mnene”
w07 15/4 20 ¶2
Dibanza da dhumisa Jehovha
Dibanza hi nga mtxawa wa vathu va i ku vangana dwe. Hi nga wukhalo wu mtxawa wo kari mwendo vathu ava va nga kuliswa ngu nzila ayi yi fanako mwendo va dhundako misakano ayi yi fanako va tshanganako ka wona. Hahanze keto txikongomelo txa hombe txo va ku di ni dibanza njo dhumisa Jehovha. Kukhukhela kale, txikongomelo ngu txonetxo nga ha dibhuku da Masalmo di junyatisako ngu kona. Ka Masalmo 35:18 hi lera tiya: “Ni na kudhumisa masoni ka votshe vathu vako; ni na kudhumisa hagari ka msengeletano.” Ni ku Masalmo 107:31, 32 a hi kuzeta tiya: “Bongani Mkoma, ngu mhaka ya lirando lakwe ni sidiwukiso sakwe a mahelako vathu! Mu pfaliseni hagari ka msengeletano wa vathu.”
w15 15/1 9 ¶4
Bonga Jehovha u kateka
Kasiku hi sakulela ni kusimama hi va ni mbilu yo bonga, ti lava hi wona makatekwa aya hi ma amukelako ngu ka Jehovha ni kualakanyisisa ngu ona, hi wonisisa kwati nzila yi a hi ñolako ngu yona ngu lirando lo thembeka. Mbimo yi m’bhali wa masalmo a nga maha toneto, a xamate ngutu ngu sasingi asi Jehovha a nga si maha.—Lera Masalmo 40:5; 107:43.
Tithomba ta moya
it-2420 ¶4
Mowabhi
Msana keto, mbimo yi Dhavhidha a nga txi fuma ku ti ni yimbi hagari ka Israyeli ni Mowabhi. Vamowabhi va xutwe ni kusinziswa ku ve luva Dhavhidha. Mbimo yi yimbi yi nga guma ti ti komba nga ka masotxhwa mararu a Vamowabhi mambidi a wona ma ti datwe. Ti ti komba Dhavhidha a di rumile ti to ve foliswa va di otete hahatshi se e va pima kasi kumaha txisungo txa ti to ngu yahi masotxhwa mambidi mambidi ma nga di fanete kudawa ni dimwedo dimwedo di nga ti fanete kuhuluka. (2Sam 8:2, 11, 12; 1Mak 18:2, 11) Ti nga maha i di ka yimbi yoneyo Bhenaya a nga “daya. . .vanana vambidi va Ariyeli wa Mowabhi.” (2Sam 23:20, NM; 1Mak 11:22) Kuxula ka magwito ka Dhavhidha txitimwi ka Mowabhi kumahekile ngu kutatiseka ka wuprofeti wa Bhalahamu awu wu nga wombwa 400 wa malembe msana: “Nyeleti yokari yi nata ngu ka Jakobe, ni ndonga yi na huma ngu ka Israyeli, kambe yi peka mihingano ya Vamowabhi, yi txi khundumusa votshe vanana va Sete.” (Mit 24:17) Ti ti komba i di ka kuxula kona kuwa m’bhali wa masalmo a nga womba ti to Txizimu txi wona Mowabhi i di ‘mkamba wu a sambelako ka wona.’—Mas 60:8; 108:9.
25 KA NOVEMBRO KALA 1 KA DEZEMBRO
TITHOMBA TA MU KA DIPSWI DA TXIZIMU | MASALMO 109-112
Seketela Mkoma Jesu!
w06 1/9 13 ¶6
Txhamuselo ya mapswi ya ma ku ka dibhuku da wutxhanu da Masalmo
110:1, 2—Ngu tihi ti ‘Mkoma [wa Dhavhidha]” Jesu Kristu a nga txi ti maha mbimo yi a nga ti khalahatshile txineneni ka Txizimu? Jesu mbimo yi a nga wuswa, a tsute nzumani e ya emela txineneni ka Txizimu kala kuhoka 1914 kasiku e khata kufuma. Ngu mbimo yoneyo, Jesu atxi fuma txitimwi ka vasawuleki, atxi va thangela ka mthumo wo txhumayela ni kumaha vagondiswa ni ku va lulamisela ti to ve ta fuma kumweko nayo ka mfumo wakwe.—Matewu 24:14; 28:18-20; Luka 22:28-30.
w00 1/4 18 ¶3
Ava va lwako ni Txizimu kha va na mbi xula
Vathu va Jehovha va wukelwa kukhukhela ngu malembe a 1900. Ka matiko amangi vathu va ku ni txikongomelo txo biha va zama kutsivela mwendo kumalata kutxhumayelwa ka mahungu a manene a Mfumo wa Txizimu. Vona va xoxotelwa ngu mlala wathu wa hombe Dhawulosi ‘a horolokelako nga ngonyamo yi yi bhongako, yi txi lava wo m’kakatxula.’ (1 Pedro 5:8) Msana ko guma ka “timbimo ta vamatiko” ngu 1914 Txizimu txi ningete wukoma ka mwanana wa txona kota Mkoma wamphya wa mafu, ni txirumo txiya: “Fuma txitimwi ka valala vako!” (Luka 21:24; Masalmo 110:2) Ngu kuthumisa wukoma wakwe, Kristu a hingile Sathani nzumani e ta hamafuni. Ngu kuziva ti to a to sala ni mbimo ya yidotho, Dhawulosi a kusula txiviti txakwe ka Makristu a vasawuleki ni vaseketeli vawe. (Mtuletelo 12:9, 17) I ve yihi wuyelo ya kuwukela ko wuyeletela ka va va lwako ni Txizimu?
be 76 ¶2
Simama u kula ngu didhawa da moya
Txikuzeto txo thumisa tiningo tako txi pata ku u khata u maha txo kari. Ina wa tolovela ku va i di awe u thangako u ramba vamwani ku u thuma navo ka mthumo wo txhumayela? Ina wa lava mikhanjo yo vhuna ava va ku ngadi kukhata kusengemela dibanzani, majovhem ni va va lwalako? Ina wa ti ningela kasi kubasisa Nyumba ya Mfumo mwendo kuvhuneta ka makongresu ni masembleya? Ina wa thuka u pateka ka wunyaphandule wo vhuneta? Ina txiemo txako txa kutumelela kuthuma kota nyaphandule wa mbimo yotshe mwendo ka dibanza adi di ku ni txilaveko txa hombe? Ina wa maha mizamo ayi yi lavekako kasi ku u faneleka ku va dilanda da wuthumeli mwendo didhota? Ku ti emisela ka wena ko vhuneta ni kutumela wutixamuleli ti kombisa ti to wa kula ngu didhawa da moya.—Mas. 110:3.
Tithomba ta moya
it-1524 ¶2
Txitumelelano
Txitumelelano txa ku va Mphaxeli madingano ni mlayo wa Melkisedheki. Txitumelelano txiya txi maneka ka dibhuku da Masalmo 110:4, ni ku m’bhali wa Vahebheru a txi kombetela ka Kristu ka Vahebheru 7:1-3, 15-17. Atxiya txitumelelano txi Jehovha a nga txi maha ni Jesu Kristu dwe. Ti nga maha Jesu a txi womba txona mbimo yi a nga maha txitumelelano txa mfumo ni valondeteli vakwe. (Luk 22:29) Ngu kuya ngu txixambanyo txa Jehovha, Jesu Kristu, mwanana wa Txizimu wa nzumani, ati nava mphaxeli madingano ni mlayo wa Melkisedheki. Melkisedheki i ti mkoma ni mphaxeli wa Txizimu hamafuni. Jesu Kristu ati nava ni wutixamuleli wo va Mkoma ni kuva Mphaxeli wa Hombe nzumani i si nga hamafuni. Ene a ningilwe wutixamuleli wonewo ngu ha ku si gumiko msana ko va a di tsute nzumani. (Vaheb 6:20; 7:26, 28; 8:1) Txitumelelano txonetxo nja ha ku si gumiko, nguku Jesu a na va Mkoma ni Mphaxeli wa Hombe ngu ha ku si gumiko ngu kukongomiswa ngu Jehovha.—Vaheb 7:3.
2-8 KA DEZEMBRO
TITHOMBA TA MU KA DIPSWI DA TXIZIMU | MASALMO 113-118
I ngu nzila muni hi nga kombisako kubonga Jehovha?
w01 1/1 11 ¶13
Vana awu a akwako ngu lirando
Mapswi a Jesu ma ti veka hakubasani ti to kukhata hi fanete hi randa Jehovha. Hambiketo kha ha velekwa hi di ni lirando la hombe ngu Jehovha. Timhaka ati hi fanelako ku ti sakulela. Mbimo yi hi nga khata kugonda ngu Jehovha hi ndindetwe kwakwe ngu mhaka ya ti hi nga tipfa. Kudotho-kudotho hi gondile ngu ti a nga lulamiselisa tona mafu para vathu. (Genesisi 2:5-23) Hi gondile ngu nzila yi a wonisanako ngu yona ni vathu, kha nga hi tshuralela mbimo yi txionho txi nga bela ka vathu vo khata kambe a mahile txo kari kasi ku hi hulukisa. (Genesisi 3:1-5, 15) Ene a kombisile wunene ka va vo thembeka ni ku ngu magwito a ningete Mwanana wakwe wa mmweyo kasiku hi divalelwa sionho sathu. (Johani 3:16, 36) Wuzivi wu wu yako wu txi engeteleka wu hi vhuni kuengetela lirando lathu ngu Jehovha. (Isaya 25:1) Mkoma Dhavhidha a wombile ti to atxi randa Jehovha ngu mhaka yo wona kukhatalelwa ngu lirando Lakwe. (Masalmo 116:1-9) Nyamsi, Jehovha wa hi khatalela, wa kongomisa, wa hi thavelela ni ku hi tsanisa. Mbimo yi hi yako hi gonda ngu ngene, lirando lathu ngu ngene liya masoni li kula.—Masalmo 31:23; Zefaniya 3:17; Varoma 8:28.
w09 15/7 29 ¶4-5
Amukela ngu kubonga, u ningela ngu yotshe mbilu
M’bhali wa masalmo a wotisile tiya: “Ni na bongisa kutxani ka MKOMA wotshe wunene wu a nga ni mahela kani?” (Mas. 116:12) Ngu yahi makatekwa a ya a nga ti ma amukete? Jehovha atxi mxayisa ka mbimo yi a nga ti ni “kuthava ni kuxaniseka” ni ku ati ‘mponisile ka lifo.’ Se konku m’bhali wa masalmo atxi lava ‘kubonga’ Jehovha ngu nzila yo kari. A ndi na maha txani? Ene a wombile tiya: “Ni na londeta sixambanyo si ni nga si maha ka MKOMA.” (Mas. 116:3, 4, 8, 10-14) Ene a ti tiemisete kuhetisisa sotshe sithembiso sakwe so sawuleka asi a nga ti mahete Jehovha ni kuhetisisa totshe tifanelo takwe masoni ka Txizimu.
Awe u nga maha ati ti fanako. Ngu nzila muni? Ngu ku yotshe mbimo u hanya ngu kutsimbitisana ni milayo ya Txizimu. Ngu toneto, tsaniseka ti to wukhozeli wako ka Jehovha wa simama i di tximaha txa lisima ngutu ka wutomi wako ni kutumelela ti to moya wa Txizimu wu kukongomisa ka totshe ati u ti mahako. (Ekl. 12:13; Vag. 5:16-18) Kuwomba ditshuri, u na mbi gwitisa ku si kota kuhakela totshe ati Jehovha a nga ku mahela. Hambiketo, mbimo yi Jehovha a wonako ti to u maha totshe ati u nga ti koteka ka mthumo wakwe ‘u tsakisa mbilu yakwe.’ (Mav. 27:11) I lungelo ya hombe ngutu kutsakisa Jehovha ngu nzila eyo!
Tigondo ti hi nga ti manako ka dibhuku da Levhi
Gondo ya wumbidi: Hi thumela Jehovha nguko hi bongako. Ti to hi junyatisa txivangelo txathu txo thumela Jehovha, he bhuli ngu mhamba ya kubonga i nga ti tximwani txienge ka wukhozeli wa Vaisrayeli. Ka dibhuku da Levhi, hi gonda ti to Muisrayeli a ndi na ningela mhamba ya kubonga kota “miphaxo ya kubonga.” (Levhi 7:11-13, 16-18) Ene a ti maha digandelo, i si nga ngu ti to a fanete e ningela, kambe nguko a ti lavako. I ti mningelo wo tidhundela awu m’thu ni m’thu a nga txi timahela nguko a randako Jehovha Txizimu. Awu a ningelako mhamba yoneyo, mwaya wakwe kumweko ni mphaxeli va ndi na dya nyama ya txihari txile txi nga ningelwa. Kambe ku ti ni sihangu asi i nga ti sa Jehovha dwe. Ngu sihi?
Gondo ya wuraru: Ngu lirando hi mahela Jehovha totshe ati hi tikotako. Ka txihari, Jehovha a ti lava mu ko nona. Ene a tshumete e womba ngu matina, sihangu asi si nga ti ni lisima, kupata ni titsho. (Lera Levhi 3:6, 12, 14-16.) Se, Jehovha a txi tsaka ngako Muisrayeli a txi ningela sihangu so nona kwakwe ngu ku tidhundela. Awu a nga ti maha mhamba yo nga toneto, a ti kombisa ti to wa ti lava ngu mbilu yotshe kuninga Jehovha silo sa lisima ngutu. Ngu ha kufanako, Jesu a ningile Jehovha sa lisima ngutu ngu ku mthumela ngu mbilu yotshe. (Joh. 14:31) Jesu a ti tsakela kumaha kudhunda ka Jehovha; ene a ti wu randa ngutu mlayo wa Txizimu. (Mas. 40:8) Hi nga wona ati Jehovha a nga tsakisa tona a txi wona Jesu a txi mthumela ngu ku tidhunda!
Kufana ni timhamba ta kale to bonga, hi thumela Jehovha ngu ku tidhunda, hi mu komba ati hi tipfisako tona ngu ngene. Hi thumela Jehovha ngu mbilu yathu yotshe nguko ha mu randa ngutu. Alakanya nzila yi Jehovha a tsakako ngu yona a txi wona timiliyoni ta vakhozeli vakwe ti txi mthumela ngu ku tidhundela, ti tshumela ti dhunda ngutu milayo yakwe! Hi nga thaveleleka ngu kukhumbula ti to Jehovha wa wona ni kuninga lisima i si nga simaho sathu basi kambe ni minavelo yathu. Ngu txikombiso, ngako u txi tandeka kumaha ati u nga txi ti kota kale, tsaniseka ti to Jehovha wa wona to pinda kutandeka kwako. Yimwani mbimo u nga pimisa ti to u nga wona to khu nga ni txilo txo ninga Jehovha, kambe ene wa wona lirando ni txi txi kumahako u maha ati u ti kotako. Ene wa amukela ati u ti kotako ku mu ninga.
Tithomba ta moya
w12 15/5 22 ¶1-2
Tixamulo ta siwotiso sa vagondi
M’bhali wa masalmo ngu kuhuhutelwa a embelete a txi: “Li ni lisima masoni ka MKOMA lifo la vasawuleki vakwe.” (Mas. 116:15) Wutomi wa mmweyo ni mmweyo wa vakhozeli va Jehovha mbwa lisima ngutu kwakwe. Hambiketo, mapswi ya ma nga bhalwa ka Masalmo 116 kha ma kombeteli lifu la mmweyo ni mmweyo wa vakhozeli va Jehovha.
Ngu toneto, ku txi vekwa dhixkursu ya lifo la mkristu, kha ti faneli kuthumiswa Masalmo 116:15 yi txi kongomiswa ka wu a nga fa, hambi a di fite a di thembekile ka Jehovha. Ngu kutxani? Nguku mapswi a m’bhali wa masalmo kha ma wombawombi ngu m’thu mmweyo. Ma txhamusela ti to ka Txizimu kufa ka mtxawa wotshe wa vathembeki va txona ku nga txi dhulela ngutu ngu toneto kha txi na kutumelela ti to toneto ti maheka.—Wona Masalmo 72:14; 116:8.
9-15 KA DEZEMBRO
TITHOMBA TA MU KA DIPSWI DA TXIZIMU | MASALMO 119:1-56
“Di na sikotisa kutxani dijaha kululamisa nzila ya wutomi wa dona kani?”
w87 1/11 18 ¶10
Zumba u di ni mahanyelo o basa ngu totshe tinzila
Ka Vaefesu 5:5 Paulo a ningete txialakanyiso txiya: “Zivani ti to awalo m’thu wu a no mana thomba ya mfumo wa Kristu ni wa Txizimu, ngako i di m’gelezi mwendo wu a mahako mithumo ya nzambwa, mwendo mnaveli wa tithomba, awu i ku mkhozeli wa sa walo.” Hambiketo otshe malembe mazana zana a vanathu masolwa ni kuthaviswa dibanzani ngu mhaka ya ta mataho, ‘va onhela mimidi yawe.’ (1 Vakorinto 6:18) Ka makhambi amangi eto ti maheka ngaku m’thu a si ‘xayisi sileleto sa Txizimu.’ (Masalmo 119:9) Ngu txikombiso, vanathu vavangi va dheseka ko wonelela ka mahanyelo a manene mbimo yi va ku ka maferiya. Va leka ku va ni wungana ni vanathu vamwani, ve maha wungana ni vathu ava i si nga Tifakazi ta Jehovha mbimo yi va ku maferiyani. Ngu kupimisa ti to i vathu va vanene, Makristu mamwani va ti patile navo ka mithumo ayi yi kanakanisako. Ngu ha kufanako vamwani va ve va va tolovelanako ngutu ni vathumi kulowe. Didhota dimwani di tolovelanile ngutu ni mthumi wa dona wa txisikati a ha koza di leka mwaya wa dona kasi ku di ya zumba nayo. Eto ti mahile ti to e thaviswa dibanzani. Mapswi a Bhiblia ma womba ditshuri ngaku ma txi: “Vangana vo biha va onhetela mikhuwo ya yinene.”—1 Vakorinto 15:33.
w06 15/6 25 ¶1
“Milayo yako ya ni tsakisa”
JEHOVHA wa ningela sialakanyiso ka malanda akwe kasi ku ma vhuna kuwonisana ni sikarato sa timbimo tiya to karata. Simwani sa sialakanyiso soneso hi nga si mana mbimo yi hi lerako Bhiblia, ni ku simwani hi nga si mana ka madhixkursu mwendo ka tixamulo ta vanathu dibanzani. Tatingi ati hi ti lerako ni ku tipfa ka simahakalo soneso hi nga ta tiphya kwathu. Ti nga maha mbimo ayi yi nga pinda hi di gondile ngu mhaka yoneyo. Kota ku hi tolovelako kudivala, mbimo yotshe ti lava hi khumbutiswa ngu sikongomelo, milayo ni sileletelo sa Jehovha. Hi fanete kubonga sialakanyiso sa Txizimu. Sona sa hi tsakisa ni ku hi vhuna kuveka mapimo ka sivangelo asi si hi mahako hi hanya ngu nzila ayi yi tsakisako Txizimu. Ngu yona mhaka yiya m’bhali wa masalmo a nga embelela ngu yona ka Jehovha atxi: “Milayo yako ya ni tsakisa.”—Masalmo 119:24.
w10 15/4 20 ¶2
Vayilelisa maso ako ka simaha so mbi vhuna txilo
Kambe simaha si hi si wonetelako ni sona si nga thuka si hi beta txibeheni. Kuyelana aku kukuho ka maso athu ni mialakanyo yathu, nga hombe ngutu a ha ko ati hi ti wonako ti nga phaya kunavela ko kari mndani ka mbilu yathu. Ka mafu yawa o biha ma fumwako ngu Sathani Dhawulosi, hi hanya ni vathu ava va dhundako ku ti tsakisa. Ngu toneto ha wona sithombe mwendo maprograma aya ti nga hehukako ku me hi hambanisa ni ti u ku ta tinene, hambi hi txo ma wona ka kudotho. (1 Joh. 5:19) Ngu toneto, kha ti xamatisi ku va m’bhali wa masalmo a di kombete Txizimu atxi: “Vhikela maso angu ti to ma si woni wukanganyisi, se ni wuse ni tsimbila ngu nzila yako.”—Mas. 119:37.
Tithomba ta moya
w05 15/4 10 ¶2
Themba Dipswi da Jehovha
Msungo mhaka wa Masalmo 119 lisima la dipswi mwendo didungula da Txizimu. M’bhali a bhate 176 wa mavhersikulo ya ndando yiya ngu maletra aya ma londiselanako a txihebheru, ti nga maha ngu txikongomelo txo yi si divalwi. Ka txihebheru txo khata, tindimana timwani ni timwani ta 22 ti ni 8 wa milinya yi khatako ngu letra ayi yi fanako. Masalmo oneyo ma kombetela Txizimu ni dipswi da txona, mlayo, sialakanyiso, sirumo ni sileleto. Ka gondo yiya ni yi yi londiselako hi na bhula ngu Masalmo 119 ngu kuya ngu wuhunduluxeli wa Bhiblia wa ditshuri ngu txihebheru. Kualakanyisisa ngu simahakalo asi si patako malanda a Jehovha a mbimo ayi yi nga pinda ni ya konku, ti fanete ti engetela lirando lathu ngu ndando yoneyo yi nga huhutelwa ni kukombisa kubonga ngu Dipswi adi di nga bhalwa da Txizimu i ku Bhiblia.
16-22 KA DEZEMBRO
TITHOMBA TA MU KA DIPSWI DA TXIZIMU | MASALMO 119:57-120
Hi nga si tsanisela ngu nzila muni sikarato
w06 15/6 20 ¶2
“Mkoma, mlayo wako na wu randa ngutu”
Ti nga maha u ti wotisa tiya: “I ngu nzila muni mlayo wa Txizimu wu nga txi thavelela m’bhali wa masalmo?” Atxi txi nga txi m’vhuna i ti themba ayi a nga ti nayo ya ti to Jehovha wa m’khatalela. Kuziva timhaka ta lirando ati mlayo wonewo wu nga txi ti tisa ti tsakisile m’bhali wa masalmo hambiku a nga txi wonisana ni sikarato asi si nga txi vangwa ngu valala vakwe. Adi ti woni ti to Jehovha atxi m’ñola ngu nzila yo lulama. Hahanze keto kulondisela milayo ya Txizimu ti mahile ti to m’bhali wa masalmo e va ni wutxhari kupinda valala vakwe ni ku ti tshumete ti hulukisa wutomi wakwe. Kuengisa mlayo ti mningile kurula ni ku va ni livhalo lo basa.—Masalmo 119:1, 9, 65, 93, 98, 165.
w00 1/12 14 ¶3
Ina awe wa si dhunda ngu yotshe mbilu sileleto sa Jehovha?
M’bhali wa masalmo atxi si dhunda ngutu sileleto sa Txizimu aha a nga embelela atxi: “Ni kuluvetile, kha na swela kuvekisa sirumo sako. Vathu vo biha va ni riyete mlawu, aniko ani kha ni divali mlayo wako.” (Masalmo 119:60, 61) Sileleto sa Jehovha sa hi vhuna kutsanisela kuxaniswa, nguku ha themba ti to Tate wathu wa nzumani a ni wusikoti wo hi hulukisa ka valala vathu. Ngu mbimo ya kona, ene wa hi hulukisa ka sikarato, kasiku hi kota kutxhumayela mahungu a Mfumo.—Marku 13:10.
w06 1/9 14 ¶4
Txhamuselo ya mapswi ya ma ku ka dibhuku da wutxhanu da Masalmo
119:71—Kuxaniseka ku nga va ni wuyelo yihi ya yinene? Sikarato si nga hi vhuna kuthemba ngutu Jehovha, kumaha mkombelo wo tshima ni ku mbimo yotshe hi gonda Bhiblia ni kuthumisa ati hi ti gondako. Hahanze keto, nzila yi hi angulako ngu yona ngaku hi txi wonisana ni sikarato ti nga maha yi txi kombisa tiphazamo ta wuthu wathu ati hi nga ti tshukwatisako. Kuxaniseka kha ku na mbi hi maha hi karateka ngaku hi txi tumelela ti to kutshukwatisa wuthu wathu.
‘Dilani ni va va dilako’
Jehovha Tate wathu wa wuxinji ngene a kotaku ku hi thavelela kha kwati. (Lera 2 Vakorinto 1:3, 4.) Ngene a ku ni wumbilu kupinda vathu votshe, se a thembisa malanda akwe a txi khene: “Ani ngani ni mi thavelelako.”—Isaya 51:12; Masalmu 119:50, 52, 76.
Kha hi kanakani, Jehovha a na hi vhuna. Ngu toneto, kha ha fanela hi thava kukhongela kwakwe hi mu txhamuseka kupanda ku hi kupfaku ni txidilo txathu. Ta thavelela kuziva ti to Jehovha wa kuziva kupanda aku hi kupfako, ni ku ene a na hi thavelela! Kambe a hi thavelela ngu nzila yihi?
Tithomba ta moya
w06 1/9 14 ¶5
Txhamuselo ya mapswi ya ma ku ka dibhuku da wutxhanu da Masalmo
119:96—Titxhamusela txani ‘magwito a kotshe kuhetiseka’? M’bhali wa masalmo a womba-womba ngu kuhetiseka ngu kuya ngu mawonelo a vathu. Ti nga maha atxi ti alakanya ti to mawonelo a m’thu mayelano ni kuhetiseka ma gwitelwa. Kuhambana ni eto, sirumo sa Txizimu kha si nga ni magwito. Mkongomiso wakwe wa thuma ka totshe timhaka ta wutomi. Nova Versão Internacional yi womba tiya: “Ni wona ti to kotshe kuhetiseka ku ni magwito, kambe sirumo sa wena kha si nga ni magwito.”
23-29 KA DEZEMBERO
TITHOMBA TA MU KA DIPSWI DA TXIZIMU | MASALMO 119:121-176
Hi nga ku vayilelisa kutxani kupandiseka ko va ku si lavekiko
Ina u na tumela ti to milayo ya Txizimu yi gondisa livhalo lako?
Ti to hi vhunwa ngu milayo ya Txizimu, hi nga ku yi lera mwendo ku yi zivetela dwe. Ti lava hi yi randa ni ku yi xonipha. Bhiblia yi khene: “Vengani wubihi, mi randa wunene.” (Amosi 5:15) Kambe hi nga mahisa kutxani? Ti lava hi gonda kuva ni mawonelo a Jehovha. Ngu txikombiso, ngako u txi lwala, dhokodhela a txi kugela ti to ti lava u dya sakudya sa dihanyo, u txhukumisa mmidi, ni kutxitxa timwani ka wutomi wako. U txi londisela ti a nga kugela, ti na kuvhuna! Ina khu tsaki ngu sialakanyiso sa dhokodhela?
Ngu kufana, M’vangi wathu a hi ninga milayo ayi yi hi vhikelako ka wuyelo yo biha yo maha txionho yi tshumela yi tshukwatisa wutomi wathu. Ngu txikombiso, Bhiblia yi hi gondisa ti to hi si hembi, hi si kanganyisi, hi si pi, mwendo kumaneka ni txo maha atxi txi tsimbitisanako ni madhimoni. (Lera Mavingu 6:16-19; Mtuletelo 21:8) Ngako hi txi wona wuyelo ya yinene yo engisa milayo ya Jehovha, lirando lathu ngu ngene ni milayo yakwe la kula.
w93 15/4 17 ¶12
Majovhem, ngu tihi ati mi ti karatelako ka tona
Txitimwi ka totshe, u fanete kunyenya mwendo kuvengela ati i ku to biha. (Masalmo 97:10) Tinyenyiswa kutxani ati makhatoni ti wonekako nga ta tsakisa? Ngu kupimisa ngu wuyelo! Vagalatiya 6:7, 8 a womba tiya: “Mi nga ti xengeni. Txizimu kha txi sakanelwi. M’thu ni m’thu a na elula asi a phayako. Awule a phayako so tsakisa mtumbuluko wakwe wa nyama, a na elula so sina si humako ka mtumbuluko wakwe wonewo.” Ngaku u txi dukwa ngu kunavela ko biha pimisa ngu ti i ku ta lisima ngutu, i ku nzila yi Jehovha a nga gwesekako ngu yona. (Fananisa ni Masalmo 78:41.) Pimisa kambe ngu kutshuka u mana txirumbo txa kwa mbi txi emela mwendo kumana malwati o fana ni AIDS. Alakanya ngu kupanda aku u nga pfako ni kutipfa u si vhuni txilo. U nga tshumela u va ni wuyelo yo biha yi nga tekako mbimo yo lapha. Mwanathu mmwani wa txisikati a womba tiya: “Ani ni mwamna wa mina hi txi maha ta mataho ni vamwani hi si se zivana. Hambiku hotshe hi ku Makristu, wutomi wu hi nga wu hanya wu hi maha hilwa ni kuva ni txiluse ka mtxhadhu wathu.” Tximwani atxi hi si faneliko ku txi divala ngu luza malungelo mwendo kutshuka hi thaviswa dibanzani. (1 Vakorinto 5:9-13) Ina ku ti tsakisa ka mbimo nyana ti nga va ni wuyelo yo panda ngutu?
Tithomba ta moya
Tsaniseka ti to Dipswi da Txizimu “ditshuri”
Kota malanda a Jehovha, athu ha tsaniseka ti to ene “mbwo thembeka” ni ku mbimo yotshe a hi navelela ati i ku ta tinene. (Mas. 31:5; Isaya 48:17) Athu ha ti ziva ti to hi nga themba ati hi ti lerako amu ka Bhiblia ayiya “mapswi a yona ma tsaniswako ngu ditshuri.” (Lera Masalmo 119:160.) Ha tumelelana ni ti txigondi tximwani txa Bhiblia txi nga ti womba: “Ti walo ati Txizimu txi ti wombako ti no tandeka mwendo kwa mbi hetiseka. Vathu va Txizimu va themba ati ti ku mu ka Bhiblia nguko va ti ziva to Njizimu txi nga womba.”
30 KA DEZEMBRO KALA 5 KA JANEIRO
TITHOMBA TA MU KA DIPSWI DA TXIZIMU | MASALMO 120-126
Va phayile va txi dila mirongo, kambe ve elula va di tsakile
w04 1/6 16 ¶10
A katekile wule a dhumisako Txizimu
Ngaku hi txi tumela dikange da kuva vagondiswa va Jesu hi lwa ni Sathani. Jakobe 4:7 a thembisa tiya: “Lambani ku ti ningela ka Sathani, se ene a na mi thava.” Eto kha ti lavi kuwomba ti to kuhanyisa tiya ta hehuka. Kuthumela Txizimu ti lava mizamo ya hombe. (Luka 13:24) Kambe hi maha txithembiso txiya ka Masalmo 126:5: “Avale va phayako va txi dila mirongo va na elula ngu kutsaka. Kuwomba ditshuri athu kha hi khozeli Txizimu txa kwa mbi kombisa kubonga. Txona “txa ninga txhatxhazelo ka vale va txi lavako,” ni kukatekisa avale va txi dhumisako.—Vahebheru 11:6.
Ina u na ni likholo ali li lavekako?
Ngako u di kuxanisekani ngu kona ha ko felwa ngu dixaka, tihe mbimo yo tsanisa likholo lako ngu kugonda ngu matimu a Bhiblia ma womba-wombako ngu kuwuswa ka vakufa. Ni ku ngako u di kukaratekani ngu ku dixaka dako di di thavisilwe dibanzani, tihe mbimo yo gonda kasi kutsaniseka ti to nzila ayi Jehovha a hi kawukako ngu yona ngu yona ya yinene ya kona. Ti si nga ni mhaka ni sikarato asi u wonisanako naso, londola mkhanjo wonewo ti to u kulisa likholo lako. Gela Jehovha kukarateka kwako. U nga ti mahe mahamba yedwa, tihe mbimo yo va ni vanathu. (Mav. 18:1) Pateka ka mithumo ayi yi no kuvhuna ti to u timisela, hambi i di ti to mbimo yimwani wa thuka u dila u di ka mithumo yoneyo, ngu kukhumbula ati ti nga kuhumelela. (Mas. 126:5, 6) Simama ni txiemiso txako txo xalela mitshangano u si lovhi, u txhumayela ni kugonda Bhiblia. Veka mapimo ka makatekwa aya Jehovha a thembisako kukuninga. Mbimo yi u wonako nzila ayi Jehovha a kuvhunako ngu yona likholo lako li na tsana.
w01 15/7 18-19 ¶13-14
Yana masoni ni m’thumo wo elula
Atxi txi thavelako ngutu vathumi va kuelula ka Txizimu, ngutu-ngutu ava va wonisanako ni kuxaniswa, mapswi a Masalmo 126:5, 6: “Avale va phayako va txi dila mirongo va na elula ngu kutsaka. Va tsute va txi dila kuya phaya mbewu, aniko va na wuya va txi embelela ngu kutsaka, na va di rwate tinyanda tawe ta mitxelo.” Mapswi a m’bhali wa masalmo mayelano ni kuphaya ni kuelula ma kombisa nzila yi Jehovha a nga khatalela ni kukatekisa ngu yona mtxawa wo gwita awu wu nga wuya ngu wukhumbini khe Bhabhilona. Vona va tsakile ngutu ngu mhaka ya kuhumiswa wukhumbini, kambe ti nga maha va di dite ngutu mbimo yi va nga txi phaya timbewu tawe ka mafu aya ma nga zumba ma si dimwi kudingana 70 wa malembe. Hambiketo, ava va nga simama ve phaya ni kuaka va ve ni wuyelo yo tsakisa ka mthumo wawe.
Ti nga maha hi wisa mirongo mbimo yi hi tshanganako ni siduko mwendo mbimo yi athu ni vanathu hi wonisanako ni kuxaniswa ngu mhaka ya wulamuli. (1 Pedro 3:14) Makhatoni ti nga maha mthumo wathu wo elula wu txi woneka nga wa karata nguku ti ti komba hi si nga ni txilo txo txi kombisa ka mizamo ayi hi yi mahako ka m’thumo wuwa. Kambe ngaku hi txi simama hi phaya ni kuregara, Jehovha a na si kulisa ngu nzila yi hi nga mbi yi emela. (1 Vakorinto 3:6) Eto ti kombiswa kwati ngu wuyelo ya kuningelela ma Bhiblia ni mabhuku athu aya ma nga seketelwa ka Bhiblia.
Tithomba ta moya
cl 73 ¶15
Mtamo wo khatalela, “Txizimu mbuthavelo wathu”
Kukhata, alakanyisisa ngu mhaka ya kuvhikeleka kwathu ngu didhawa da nyama. Athu vakhozeli va Jehovha hi nga tsaniseka ti to ene wa hi khatalela kota mtxawa. I si nga mhaka ya eto, Sathani ti da m’hehukela ku e hi xasela. Pimisa ngu tiya: Sathani “mfumi wa mafu awa” ti di na m’tsakisa ngutu kufuviswa wukhozeli wa ditshuri. (Johani 12:31; Mtuletelo 12:17) Vamwani va vakoma va mtamo ngutu va mafu yawa va tsimbisile mthumo wathu wo txhumayela ni kuzama ku hi gumisa. Hambiketo, vathu va Jehovha va maneka va di tsani ni kusimama ve txhumayela va si emi. Ngu kutxani matiko a mtamo ma sa nga ti kota kuemisa mthumo wa mtxawa wa wudotho wa Makristu awu wu wonekako nga kha wa vhikeleka? Nguku Jehovha, ngu nzila yo fanekisela wa hi vhikela ngu mabhapi akwe a mtamo.—Masalmo 17:7, 8.