Mareferensiya ya txibhukwana txa mitshangano ya Mahanyelo a Wukristu
© 2024 Watch Tower Bible and Tract Society of Pennsylvania
2-8 KA SETEMBRO
TITHOMBA TA MU KA DIPSWI DA TXIZIMU | MASALMO 79-81
Kombisa lirando ngu ditina do guleka da Jehovha
Mterulo “i ningo yo hetiseka” yi yi tako ngu ka Tate wathu Jehovha
5 Hi kombisa ngu nzila yihi ti to ha m’dhunda Jehovha? Ngu mahanyelo athu. Jehovha a lava hi va vo sawuleka. (Lera 1 Pedro 1:15, 16.) Eto ti womba ti to athu hi khozela ene basi ni ku m’engisa ngu mbilu yotshe. Hi basisa ditina da Jehovha ngu kuhanya ngu milayo yakwe. (Mat. 5:14-16) Hi kombisa ti to milayo yakwe nja yinene ni ku Sathani a ni makuhu. Kambe kota ku hi nga mbi hetiseka, hi nga thuka hi phazama. Se ti txi thuka ti humelela, ha tisola ni kuleka kumaha tihi ni tihi ati ti nyamisako ditina da Jehovha.—Mas. 79:9.
ijwbv 3 ¶4-5
Varoma 10:13—‘A [dhanako, NM] ditina da Mkoma’
Ka Bhiblia, mapswi ya ma ku ‘a [dhanako, NM] ditina da Mkoma’ ma txhamusela to pinda kuziva ni kuthumisa ditina donedo ka wukhozeli. (Masalmo 116:12-14) Tipata ni kuthemba Txizimu ni kulava txivhuno txa txona.—Masalmo 20:7; 99:6.
Ditina da Txizimu i ti da lisima ngutu ka Jesu Kristu. Mbimo yi a nga gondisa vagondiswa vakwe kumaha mkombelo, Jesu a khatile mkombelo wakwe ngu mapswi awa: “Tate wathu u ku nzumani, ditina dako di na basiswe.” (Matewu 6:9) Jesu a tshumete e kombisa ti to kasi ku hi mana wutomi wo mbi guma ti lava hi ziva, hi engisa ni kuranda m’thu awu a ku ni ditina donedo, i ku Jehovha.—Johani 17:3, 6, 26.
Tithomba ta moya
it-2 111
Josefa
Ditina da Josefa di amukela wudhumo. Aku Josefa a nga ti gulekile hagari ka vanana va Jakobe, ti txi fanela ku mbimo yimwani ditina dakwe di thumiswa kasi ku dhana totshe tihundzu ta Israyeli (Mas 80:1) mwendo avale va nga patwa ka mfumo wa wuphemba. (Mas 78:67; Amo 5:6, 15; 6:6) Ditina dakwe di tshumela di maneka ka wuprofeti wa Bhiblia. Ka m’woniso wa Ezekhiyele, thomba ya Josefa yi ni madhawa mambidi (Eze 47:13), dimwedo da matimba a didhoropa “Mkoma Waho Hale” di ni ditina da Josefa (Eze 48:32, 35), ni ku mayelano ni kupatana ka vathu va Jehovha, kuwomba-wombwa ngu Josefa kota didhota da txienge tximwani, ni Judha kota didhota da txienge tximwani. (Eze 37:15-26) Wuprofeti wa Obhadhiya wu ti kombisa ti to “nyumba ya Josefa” yi ndi na pateka ko hoxota “nyumba ya Esawu” (Obha 18), ni ku wuprofeti wa Zakariya wu txi kombisa ti to Jehovha a ndi na hulukisa “nyumba ya Josefa.” (Zak 10:6) Makhaloni ka Efrayimi, Josefa a humelela kota limwelo la tihundzu ta Israyeli wa moya.—Mtu 7:8.
Ku va Josefa adi wombilwe ka Mtuletelo 7:8 tiwomba ti to wuprofeti wa Jakobe, awu a nga wu womba adi hafuhi ni kufa, wu ndi na thuma ka Israyeli wa moya. Ngu toneto, nda tinene kuziva ti to awu a nga txi ninga mtamo Jakobe, i ku Jehovha Txizimu, a ningete Jesu Kristu kota mdyisi wamnene awu a nga ningela wutomi wakwe ngu mhaka ya “tinvuta.” (Joh 10:11-16) Jesu Kristu a tshumela e va dirigwi da fundasawu da ha kumanekako kona dithempele da Txizimu di wumbwako ngu Vaisrayeli va moya. (Vaef 2:20-22; 1Ped 2:4-6). Mdyisi wuwa ni dirigwi ani Txizimu txa Mtamo Wotshe.—Joh 1:1-3; Mith 7:56; Vaheb 10:12; fananisa ni Gen 49:24, 25.
9-15 KA SETEMBRO
TITHOMBA TA MU KA DIPSWI DA TXIZIMU | MASALMO 82-84
Ni nga lisima malungelo aya u ku nawo
wp16.6 8 ¶2-3
Ati hi nga ti gondako ka sinyana
Ava va nga txi zumba Jerusalema va txi ti ziva kwati timbeluvelu. Tona ti txi maha sisaka makantu ka tinyumba. Dotshe dilembe, timbeluvelu ti txi maha sisaka ka dithempele da Solomoni. Ti nga maha ti txi wona dithempele kota wukhalo wo thutha ni wo vhikeleka kasi ku ti wunja vanana va tona.
Masalmo 84, awu a nga bhalwa ngu mwanana wa Kora, a womba-womba ngu sisaka sa timbeluvelu ka dithempele. Vanana va Kora va ti ni lungelo yo thuma dithempeleni divhiki dimwedo dwe mndani ka 6 wa mitxima. Kambe m’bhali wa masalmo oneyo atxi lava kufana ni mbeluvelu, ayi yi nga txi zumba mtini ka Jehovha. Ene a ti khene: “Ya tsakisa ngutu nyumba yako yo sawuleka, Mkoma wa Mabutho a Tiyimbi, moya wangu wa navela ni kuxuva siluvelo sa Mkoma; yotshe mbilu yangu ya embelela ngu kutsaka ka Txizimu txi txi hanyako! Hambi sindili sa mana ko sisala ni timbeluvelu ti ni sisaka, si nga ti akela kasi si zumba ka sona, ni vanana va sona, hafuhi ka siluvelo sako, Mkoma wa Mabutho a Tiyimbi, Mfumeli wangu ni Txizimu txangu.” (Masalmo 84:1-3) Ina nathu hi ni minavelo yoneyo yo mbimo yotshe hi tipata ni vathu va Txizimu kumweko ni vanana vathu?—Masalmo 26:8, 12.
w08 15/7 30 ¶3-4
Tivekele makungu aya u no ti kota ku ma hokelela u tshumela u pfa litsako
Kukula ngu tanga mwendo malwati si nga hi vhalela kumaha tatingi ka mthumo wa Jehovha. Ngako u di tate mwendo mame wa vanana va vadotho, ti nga maha u tipfa u si wuyelwi ngu gondo yako upune mwendo mitshangano nguko vanana vako va lava ngutu mbimo yako ni mtamo wako. Ina kuveka mapimo ka kutandeka kwako, mbimo yimwani ti nga kuvhalela kuwona ati u nga kotako ku ti hokelela?
Ka malembe amangi ya ma nga pinda, M’levhi mmwani a kombisile kunavela kumaha ati ti nga si koteki ku e ti hetisisa. Dilembe ni dilembe ati ni lungelo yo thuma mavhiki mambidi dithempeleni. Hambiketo, ene a kombisile minavelo yo zumba ngu ha ku si gumiko hafuhi ni txiluvelo. (Mas. 84:1-3) Nji txani txi nga vhuna wamwamna wuwa wo thembeka ku e eneliseka ngu ti a nga txi ti maha? Ene a woni ti to hambi kuzumba ditshiku dimwedo mthandani ka dithempele i ti lungelo ya hombe. (Mas. 84:4, 5, 10) Ngu ha kufanako, hahanze ko veka mapimu ka ti hi tandekako ka tona, hi fanete kuzama kupfisisa ni kuninga lisima ati hi kotako ku ti maha.
Awe u wa lisima masoni ka Jehovha!
12 Ngako u txi wonisana ni malwati, tsaniseka to Jehovha wa txi ziva txikarato txako. Mkombele ti to e kuvhuna kasi ku u va ni mawonelo a manene ngu ngawe upune. Ngu msana, lera mapswi aya Jehovha a nga ma bhala mu ka Bhiblia aya ma tsanisako. Veka mapimo aku amu ka tindimana ati ti kombisako nzila yi Jehovha a tipfako ngu yona ngu malanda akwe. Mbimo yi u mahako toneto, u na wona to Jehovha wa kombisa wunene ka votshe va va mthumelako va di thembekile.—Mas. 84:11.
Tithomba ta moya
it-1 816
Mwanana wo felwa ngu vaveleki
Aku ti nga si hehuki kuwona vo felwa ni va va nga si na vo va vhikela, Jehovha a thumisile mapswi ya ma ku “mwanana wo felwa ngu vaveleki” kasi kukombisa nzila yi Vaisrayeli va nga txi kombisa ngu yona wululami mwendo kwa mbi wu kombisa. Mbimo yi ditiko di nga txi hiseka ngu didhawa da moya, mwanana wo felwa ngu vaveleki atxi khatalelwa. Kambe mbimo yi ditiko di nga si kombisi wululami, ava vo felwa ngu vaveleki va si khatalelwi, etxo i di txikombiso txa ti to ditiko di si nga ha ka kunene. (Mas 82:3; 94:6; Isa 1:17, 23; Jer 7:5-7; 22:3; Eze 22:7; Zak 7:9-11; Mal 3:5) Jehovha a txi tsayisa avale va nga txi xupha vanana vo felwa ngu vaveleki. (Dhew 27:19; Isa 10:1, 2) Jehovha ati dhana apune kota Mtiruli (Mav 23:10, 11), M’vhuneteli (Mas 10:14), ni Tate (Mas 68:5) wawe. Ngene a lwelako avale vo felwa ngu vaveleki (Dhew 10:17, 18), a va kombako wumbilu (Hos 14:3) e va vhikela (Mas 146:9) ni ku va xayisa.—Jer 49:11.
Nzila yimwani yo kombisa ti to hi Makristu a ditshuri ngu kombisa kukhatala ngu va vo felwa ngu vavamna mwendo ngu vaveleki. M’gondiswa Jakobe a bhalete tiya Makristu: “Wukholwa wa ditshuri wo mbi na dikhwiti masoni ka Txizimu, Tate wathu, ngu kudingula va vo felwa ngu vaveleki, ni vale i ku tinoni, kuxanisekani kwakwe, ni ku ti vhikela kambe ka nzambwa ya ditiko.”—Jak 1:27.
16-22 KA SETEMBRO
TITHOMBA TA MU KA DIPSWI DA TXIZIMU | MASALMO 85-87
Mkombelo wa hi vhuna kutimisela
w12 15/5 25 ¶10
Ina wa kombisa wudhumo wa Jehovha?
10 Kasi ku hi kombisa wudhumo wa Txizimu hi fanete “hi simama kukhongelani.” (Var. 12:12) Ti lava hi maha mkombelo ka Jehovha hi kombela ti to e hi vhuna ku hi mthumela ngu nzila ayi yi lavekako. Kasi ku toneto ti koteka ti lava hi kombela ngu kukongoma moya wo sawuleka, likholo, mtamo kasi kutsanisela siduko ni wusikoti wo ‘gondisa dipswi da ditshuri ngu nzila yo lulama.’ (2 Tim. 2:15; Mat. 6:13; Luka 11:13; 17:5) Kufana ni mwanana a dhependerwako ngu tate wakwe, nathu ti lava hi dhependerwa ngu Jehovha, Tate wathu wa nzumani. Ngaku hi txi mkombela txivhuno kasi ku hi mthumela kwati, hi nga tsaniseka ti to a na hi ninga txivhuno txonetxo. Hi nga thuki hi pimisa ti to ho m’khulumetela. Hahanze keto, a hi maheni mkombelo kasi ku m’dhumisa, ku m’bonga, kulava mkongomiso ngutu-ngutu mbimo yi hi wonisanako ni siduko ni ku m’kombela ti to e hi vhuna kasi ku hi mthumela ngu nzila yi yi dhumisako ditina dakwe do sawuleka.—Mas. 86:12; Jak. 1:5-7.
Jehovha a xamulisa kutxani mikombelo yathu?
17 Lera Masalmo 86:6, 7. Dhavhidha a txi tsaniseka to Jehovha a engisile ni ku a xamute mikombelo yawe. Nawe u nga tsaniseka ngu nzila yi yi fanako. Sikombiso si hi nga si wona ka gondo yiya si hi tsanisekisa ti to Jehovha a nga hi ninga wutxhari ni mtamo wu hi wu lavako ti to hi tsanisela. Ene a nga thumisa mwaya wathu wa moya kupata ni va konku va si mthumeliko ti to ve hi vhuna ngu tinzila to hambana-hambana.
18 Hambiku mbimo yotshe Jehovha a si xamuliko mikombelo yathu ngu nzila yi hi ngadi yi emete ngu yona, ha ti ziva ti to ene a na yi xamula. Ene a nga hi ninga a si hi si lavako ngu mbimo ya kona. Maha mkombelo u txi tsaniseka ti to Jehovha a na ku khatalela konku, ni ku a na ta “ninga si si lavekako ka votshe” ava va no ta hanya ka mafu a maphya.—Mas. 145:16.
Tithomba ta moya
it-1 1058 ¶5
Mbilu
Ku mthumela ngu “mbilu yotshe.” Mbilu ya ditshuri yi fanete ku yi di enete kasi ku yi thuma kwati, kambe mbilu yo fanekisela yi nga thuka yi abaneka. Dhavhidha a khongete atxi: “Maha ti to mbilu yangu yi dhumisa ditina dako,” eto ti lava kuwomba ti to mbilu ya m’thu yi nga abaneka ngu kuya ngu matipfelo akwe mwendo ati a ti thavako. (Mas 86:11) Vathu vonevo va nga va ni “mbilu yo abaneka” va si hiseki ka wukhozeli wa Jehovha. (Mas 119:113; Mtu 3:16) Mmwani a nga va ni “timbilu timbidi” (ngu kukongoma: e va ni mbilu ni mbilu), e zama kuthumela vakoma vambidi, mwendo kuwomba to kari kuve a pimisa timwani. (1Mak 12:33; Mas 12:2) Jesu a wombile hakubasani wukanganyisi wonewo wa timbilu timbidi.—Mat 15:7, 8.
23-29 KA SETEMBRO
TITHOMBA TA MU KA DIPSWI DA TXIZIMU | MASALMO 88-89
Mfumo wa Jehovha ngu wona i ku wa wunene
Simama u seketela wukoma wa Jehovha!
5 Wona txivangelo tximwane txi txi mahako Jehovha e va ene basi a ku ni fanelo yo fuma. Ene a thumisa wulawuli wakwe ngu wululami wo hetiseka. Ene a hi gela tiya: “Ani ngani Jehovha, ni ku ni wumbilu, ni ningako fanelo ni kululama amu ha mafuni. Nguko ngu toneto ti ni tsakisako, kuwomba Jehovha.” (Jeremiya 9:24, Tradução do Novo Mundo.) Jehovha kha lavi milayo ya vathu ti to e kota kumaha txisungo txa ti i ku ta tinene. Milayo yakwe njo lulama. Milayo yi a nga ninga vathu yi seketetwe ka wululami wo hetiseka. M’bhali wa masalmu a wombile tiya: “Mfumo wako wu tsanisilwe ngu kululama ni ditshuri.” Yotshe milayo, matshina a milayo ni sisungo, sotshe si si tako ngu ka Jehovha nzo lulama. (Masalmu 89:14, NM; 119:128) Hambiku Sathane a nga sola wukoma wa Jehovha a txi hi nga wa wunene, kambe ene a tandekile ku tisa wululami ha mafuni.
Simama u seketela wukoma wa Jehovha!
10 Jehovha kha fumi ngu nzila ya tshofu. Kambe avale va mu engisako va tipfa va di tsakile. (2 Vakorinto 3:17) Dhavhidha a wombile tiya ngu Jehovha: “Masoni kwakwe kuna ni wuhombe ni kuphatima, mtamo ni kutsaka si mu wukhaloni kwakwe ko sawuleka.” (1 Matimu 16:7, 27) Etani a bhate atxi: “Va katekile vathu vale va zivako ku kudhumisa, MKOMA, avale va hanyako kuwonekelani ka khohe yako. Otshe masiku va tsaka ngu ngawe otshe masiku va nengela ngu mhaka ya wunene wako.”—Masalmu 89:15, 16, NM.
11 Ngako hi txi ya masoni hi alakanyisisa ngu wunene wa Jehovha, hi na engetela kukholwa kwathu ka ti to ngene basi i ku mfumi wathu wa mnene. Hi na tipfa kufana ni m’bhali wa masalmu a wu a nga khene: “Ndinene ngutu kuzumba ditshiku dimwedo nyumbani kwako, kupinda kuzumba dikhulu dimwedo da masiku hahanze!” (Masalmu 84:10, NM.) Jehovha ngene a nga hi vanga ni ku wa tiziva a ti hi ti lavako ti to hi tsaka. Ngu wuha wakwe a hi ningile sa singi so pinda si hi si lavako. Totshe a ti ene a hi gelako ti to hi maha ti vhuna athu hipune. Hambi i di ti to ti lava hi maha mizamo, mbimo yotshe hi na tsaka loko hi txi engisa Jehovha.—Lera Isaya 48:17.
w14 15/10 10 ¶14
Vana ni likholo lo tsana ka Mfumo wa Txizimu
14 Alakanya ngu ti Jehovha a nga thembisa mkoma Dhavhidha wa Israyeli wa kale ngu kuthumisa txitumelelano txa Dhavhidha. (Lera 2 Samuwele 7:12, 16.) Jehovha a mahile txitumelelano txonetxo ni Dhavhidha mbimo yi nga di mkoma khe Jerusalema, atxi m’thembisa ti to Mesiya i ndi nava wa liveleko lakwe. (Luka 1:30-33) Ngu nzila yoneyo, Jehovha a ningete didungula mayelano ni mwaya wa mu Mesiya a di no velekwa ka wona a tshumela e womba ti to txidya thomba txa Dhavhidha txi di nava ni “fanelo” yo va mkoma ka Mfumo wa Mesiya. (Eze. 21:25-27) Ngu kona ha ka Jesu, wukoma wa Dhavhidha wu na ‘tsana kala kupinduka.’ Ngu ditshuri, liveleko la Dhavhidha li na ‘fuma kala kupinduka, txikhalo txakwe txa wukoma txi na simama masoni kwakwe nga ditambo.’ (Mas. 89:34-37) Mfumo wa Mesiya wu na mbi va ni wukanganyisi, ati wu no ti maha ti na zumba ngu ha ku si gumiko.
Tithomba ta moya
w07 15/7 32 ¶2-4
“Fakazi ya kuthembeka yi ku nzumani”
Mtxima wu teka 27,3 wa masiku kasi ku wu heta kurenzeleka otshe mafu. Ngu nzila yoneyo, kuthembeka ka mtxima ti nga womba kulondisela txiemiso txa wona. Kambe ti nga maha m’bhali wa masalmo atxi pimisa ngu mhaka yo tshima ngutu. Ene a dhani mtxima ku i “Fakazi ya kuthembeka” ka ndando ya wuprofeti mayelano ni Mfumo awu Jesu a nga gondisa vagondiswa vakwe ti to ve wu kombelela.—Matewu 6:9, 10.
Kona mu ko pinda 3000 wa malembe, Jehovha Txizimu a mahile txitumelelano txa Mfumo ni mkoma Dhavhidha, wa Israyeli wa kale. (2 Samuwele 7:12-16) Txikongomelo txa txitumelelano txonetxo i di kuveka txitsanisekiso txa ha mlayoni ka Jesu Kristu, kota txidya thomba txa Dhavhidha ti to e va mkoma ngu ha ku si gumiko. (Isaya 9:7; Luka 1:32, 33) Atxi womba-womba ngu “liveleko” la txiluvelo txa Dhavhidha, m’bhali wa masalmo a embelete atxi: “Txi na zumba txi di tsani yotshe mbimo, nga mtxima, i ku fakazi ya kuthembeka yi ku nzumani.”—Masalmo 89:36, 37.
‘Txiwoningo txi fumako ni wusiku’ i ku mtxima, txi khumbutisa ti to mfumo wa Kristu wu na fuma ngu ha ku si gumiko. (Genesisi 1:16) Mayelano ni mfumo wonewo, Dhaniyeli 7:14 a womba tiya: “Kufuma kwakwe ngu fuma ka kwa mbi gwita, kha ku na mbi pinda, kambe mfumo wakwe, ngu wona wokha wa kwa mbi khundumuswa.” Mtxima i fakazi ayi yi hi khumbutisako ngu Mfumo wonewo ni makatekwa aya ma no wu tisa ka votshe vathu.
30 KA SETEMBRO KALA 6 KA OUTUBRO
TITHOMBA TA MU KA DIPSWI DA TXIZIMU | MASALMO 90-91
Themba Jehovha kasi ku u hanya wutomi wo mbi na magwito
wp19.3 5 ¶3-5
Kulava kuhanya wutomi wo mbi na magwito
Vasiyentixta vavangi va womba ti to mirende yo tala yo maha ti to vathu ve swela kukumba kha yi na kumaha ti to vathu ve hanya mbimo yo lapha kupinda ayi hi yi hanyako nyamsi. Ditshuri ti to kukhukhela ngu ma 1800 ti tshumete ti koteka ti to vathu ve hanya mbimonyana yo lapha. Kambe eto ti kotekile ngu konaha ko zumba ka wukhalo wo basa, ku ti vhikela ka malwati o tshapelana ni kuthumiswa ka makinina aya malwisanako ni sipungwani ni kuthumisa mavhasina. Vasiyentixta vamwani va pimisa ti to wutomi wa vathu wu pimetwe ngu kuya ngu mtumbuluko.
Kona mu ka 3500 wa malembe msana, Mosi, mmweyo wa vabhali va Bhiblia ati khene: “Masiku a kuhanya kwathu nga mtxhanu wa magumi ni magumi mambidi a malembe; avale va ku ni mtamo va hoka ka mtxhanu wa magumi ni magumi mararu a malembe, aniko i malembe a sikarato ni kupandiseka. Nguko ma pinda ngu kukuluveta, se athu hi mwalala.” (Masalmo 90:10) Ti si khataliseki totshe ati vathu va nga ti maha kasi kumaha ti to vathu ve hanya ngu mbimo yo lapha, wutomi wu nga di zumbisile tona tile Mosi a nga ti txhamusela.
Vathu va hanya mbimo yo koma, kambe ku ni sihari si hanyako malembe o pinda 200 ni mindonga yi hanyako malembe amangi. Ngako hi txi fananisa wutomi wathu ni wa siwumbiwa simwani asi si hanyako, hi nga thuka hi ti wotisa tiya: ‘Ina hi mahetwe kuhanya malembe ya 70 mwendo 80 dwe?’
wp19.1 5, Dibhokiso
I mani ditina da Txizimu?
Vathu vo tala va tiwotisa txiwotiso etxo. Ti nga maha nawe u txi ti wotisa. Mwendo hi nga wotisa ngu nzila yiya: A ku mtumbuluko ni sotshe silo si ngo vangwa, se i mani a nga vanga Txizimu?
Vazivi va siyensia va tumela ti to wotshe mtumbuluko wu ve ni makhato. Bhiblia ya tumelelana ni mhaka eyo, ngutoneto ndimana yo khata yi womba tiya: “Kukhatani Txizimu txi vangile nzuma ni mafu.”—Genesisi 1:1.
Mtumbuluko kha wu ngo ti vanga wupune; nem kha wa thuka wu maneka dwe. Kha ku na txilo txi ngo ti mahekela txipune. I ti ku kha ka va ni txilo na ku si se va ni mtumbuluko, wona wu si na kuvaho ni nyamsi. Ngutoneto, ti to mtumbuluko wu va ho kulavekile m’thu wu i singako txienge txa wona ti to e wu vanga. Jehovha Txizimu awu i ku moya, ngu mtamo wa hombe ngutu ni wutxhari a vangile mtumbuluko.—Johani 4:24.
Bhiblia yi womba tiya ngu Txizimu: “Na ku sinzi kuhumelela mimango, ku sinzi kumaheka mafu ni ditiko dotshe, kukhukhela kale, kala kupinduka, awe u Txizimu!” (Masalmo 90:2) Se kha ngaho wu a nga vanga Txizimu, mbimo yotshe txi ve ho. Ngu toneto, “kukhatani” txona txi vangile mtumbuluko.—Mtuletelo 4:11.
Lirando la Jehovha li nga hi vhuna kuxula kuthava
16 Sathani wa tiziva ti to wutomi mbwa lisima kwathu. Se ene a womba ti to hi nga ningela sotshe hambi ku onha wuxaka wathu ni Jehovha kasi ku ponisa wutomi wathu. (Jobe 2:4, 5) Kambe Sathani o hemba. Kambe aku “awu a fumako lifo i ku ene Sathani”, wa londola kuthava aku hi ku nako ka mtumbuluko ko thava lifo ti to e hi maha hi leka kuthumela Jehovha. (Vaheb. 2:14, 15) Makhambi mamwani Sathani a nga hi dhukisela ngu ku daya vakhozeli vamwani va Jehovha ngako va si landuli likholo lawe. Mbimo yimwani Sathani a nga londola nga ku hi di ni sikarato sa malwati a hombe kasi ku hi maha hi tumela mrende mwendo kutumela kuthumwa ngu nzila a yi yi no ndaka milayo ya Jehovha. Va dhokodhela ni maxaka athu ma nga hi sinzisa ti to hi tumela kuthela mnoha atiya i ku kundaka mlayo wa Txizimu.
17 Kha nga ho kwathu a lavako kufa, hambi keto ha ti ziva ti to Jehovha kha nambi leka ku hi randa hambi hi ti fite. (Lera Varoma 8:37-39.) Ngako vangana va Jehovha va txi fa ene wa va khumbula ni ku kwakwe kha va fa. (Luka 20:37, 38) Ene wa ti lava kutshumela eva wusa. (Jobe 14:15) Jehovha a hakete presu yo dhula kasi ku hi “mana wutomi wo mbi guma.” (Joh. 3:16) Athu ha tiziva ti to Jehovha wa hi randa ngutu ni ku wa hi khatalela. Se ngako hi txi manana ni malwati a hombe hahanze ko leka Jehovha athu hi ya kwakwe kasi ku hi ya kombela kuthavelelwa, wutxhari ni mtamo. Atiya ngu ti Valérie ni mwamna wakwe va nga ti maha.—Mas. 41:3.
Tithomba ta moya
wp17.5 5
Ina u ni ngilozi ayi yi ku wonelelako
Bhiblia kha yi gondisi ti to m’thu a ni ngilozi ayi yi mvhikelako. Dikhambi dimwani Jesu a wombile tiya: “Ngu toneto, ti woneleni ti to mi si kanyisi ni wamweyo wa va va vadotho nguko na mi gela ku khani tingilozi tawe ati ti ku nzumani, ti zumba masoni ka Tate wangu a ku nzumani.” (Matewu 18:10) Jesu atxi lava kuwomba txani ngu toneto? Atxi lava kuwomba ti to tingilozi ta khatala ngu vathu, i si nga ti to m’thu ni m’thu ani ngilozi ayi yi mu wonelelako. Ngu toneto, Makristu a ditshuri kha ma veki wutomi wa ona phangoni, ma txi pimisa ti to ma na vhikelwa ngu tingilozi.
Ina eto ti lava kuwomba ti to tingilozi kha ti vhuni vathu? Lambi. (Masalmo 91:11) Vamwani va kholwa ti to Txizimu txi thumisile tingilozi kasi ku va vhuna ni ku va kongomisa. Kenneth, awu hi nga womba-womba ngu ngene ka gondo yo khata, wa kholwa ti to a kongomisilwe ngu tingilozi. Ti nga maha atxi womba ditshuri. Tifakazi ta Jehovha makhambi a mangi ta ti wona ti to tingilozi ta va kongomisa ka mthumo wo txhumayela. Kambe aku tingilozi ti si wonekiko kha hi nge tikoti kuwomba ti to ti thumiswa kuhokela hayi ngu Txizimu kasi ku hi vhuna ka siemo so hambana-hambana. Ngu toneto, kha ta biha kubonga Txizimu ngu txivhuno tximwani ni tximwani atxi txi hi ningako.—Vakolosa 3:15; Jakobe 1:17, 18.
7-13 KA OUTUBRO
TITHOMBA TA MU KA DIPSWI DA TXIZIMU | MASALMO 92-95
Kuthumela Jehovha ti hi maha hi va ni wutomi wo tsakisa
Vaphya, vekani mapimo anu ka timhaka ta moya
5 Txivangelo txo khata txa lisima ngutu txo tivekela makungo, ngu bonga Jehovha ngu lirando lakwe ni ti a nga hi mahela. M’bhali wa Masalmo a ti khene: “Ti ni fanelo ku kubonga, awe MKOMA, . . . Mithumo yako ya hombe, MKOMA, ya hi tsakisa! Mithumo yako ya hi ninga kuembelela ngu yotshe mbilu.” (Masalmo 92:1, 4) Alakanya ngu sotshe si Jehovha a nga kuninga: wutomi, likholo, Bhiblia, dibanza ni themba yo hanya Paradhise ngu ha ku si gwitiko. Ngako u txi tivekela makungo a moya, u komba Jehovha ti to wa m’bonga ngu sotshe si a nga si maha ni ku ti kulisa wuxaka wako ni nene.
Ina wa tumela kuxengetelwa ngu ditiko diya?
8 Kufana ni vaveleki va vanene, Jehovha a lava ti to vanana vakwe ve va ni wutomi wo tsakisa ngutu. (Isaya 48:17, 18) Se a hi gondisa matshina a milayo mayelano ni mahanyelo a manene ni nzila yo ñolana ni vamwani. A lava ti to hi wona timhaka nga ti ene a ti wonisako tona ni kuhanya nga ti a ti lavisako tona. Toneto hi nga kuxuphwa. Hahanze keto, ti hi vhuna ku va hi di ni wutxhari ti to hi maha sisungo sa sinene. (Masalmo 92:5; Mavingu 2:1-5; Isaya 55:9) Hi nga simama hi sawula ati hi ti lavako, kambe ti lava hi sawula ati ti no hi tisela litsako. (Masalmo 1:2, 3) Ngako hi txi pimisa kufana ni Jehovha, hi wuyelwa ngu tinzila to tala!
Awe u wa lisima masoni ka Jehovha!
18 Hambi hi txi kumba, hi nga tsaniseka to Jehovha a nga simama e hi thumisa. (Mas. 92:12-15) Jesu a hi gondisile to ku si nga ni mhaka ni wusikoti wathu, mtamo wathu, Jehovha mbimo yotshe wa ninga lisima ati hi tikotako kumaha. (Luka 21:2-4) Veka mapimo ako ka ti u ti kotako kumaha. Ngu txikombiso, u nga womba-womba ngu Jehovha, u nga kombelela vanathu ni kutsanisa vamwani ti to ve simama va di thembekile. Jehovha a kuwona u di mthumi kulowe wakwe, i singa ngu mhaka ya ti u ti mahako, kambe ngu mhaka ya kutiemisela ku mu engisa.—1 Vak. 3:5-9.
Tithomba ta moya
cl 176 ¶18
Kutshima ka . . . Wutxhari wa Txizimu
18 Wona nzila yi Paulo a nga txhamusela ngu yona kusawuleka ka wutxhari wa Txizimu: “Oh! Kutshima ka kufuma ni wuzivi ni wutxhari wa Txizimu! Kulamula ka txona kha ku ziwi ngu m’thu, hambi tinzila ta txona ni tona kha ti ziwi ngu m’thu.” (Varoma 11:33) Ngu Txigriki, Paulo a khatile vhersikulo ngu dipswi di nga hunduluxelwako di txi “Oh” ti kombetelako kugweseka ka hombe ngutu. Dipswi da Txigriki adi a nga di thumisa para “kutshima” di tsimbitisana ni dipswi adi di ku “diphala da hombe.” Ngu toneto, mapswi akwe ma hi maha hi ti wona ngu maso a mialakanyo. Mbimo yi hi alakanyisisako ngu wutxhari wa Jehovha, ti fana ni ku hi txo xolela ngu ha ka ti kasa ta diphala da hombe, da hombe ngutu a ha ko kha ti koteki kuwona ni magwito ka dona. (Masalmo 92:5) Ina kualakanyisisa ngu tiya, kha ti hi mahi hi lava kutiveka hahatshi?
14-20 KA OUTUBRO
TITHOMBA TA MU KA DIPSWI DA TXIZIMU | MASALMO 96-99
“Txhumayela mahungu o tsakisa”
w11 1/3 6 ¶1-2
Nji txani mahungu a manene
MAKRISTU ma fanete kutxhumayela “mahungu a manene a Mfumo” ngu kuwomba-womba ni vamwani mayelano ni ona, ni kutxhamusela ti to Mfumo wonewo wu na ta fuma mafu otshe ngu kululama ka mbimo ayi yi tako. Kambe mapswi aya ma ku “mahungu a manene” ma tshumela me thumiswa ngu tinzila timwani amu ka Bhiblia. Ngu txikombiso, Bhiblia yi womba “mahungu a manene a kuhulukisa” (Masalmo 96:2, NM); “mahungu a manene a Txizimu” (Varoma 15:16); ni “mahungu a manene mayelano ni Jesu Kristu.”—Marku 1:1.
Ngu kukomisa, mahungu a manene ma pata dotshe ditshuri adi Jesu a nga di womba se vagondiswa vakwe ve bhala. A si se tsula nzumani, Jesu a gete tiya valondeteli vakwe: “Ngu toneto, tsulani mi txi ya maha vathu va matiko otshe ve va vagondiswa, mi va bhabhatisa ngu ditina da Tate, da Mwanana ni da moya wo sawuleka. Mi txi va gondisa kumaha totshe tiya ni nga mi leleta tona.” (Matewu 28:19, 20) Ngu toneto, mthumo wa Makristu hi nga kubhulela vamwani ngu Mfumo dwe, ma fanete kumaha mizamo kasi kumaha vagondiswa.
w12 1/9 16 ¶1
Ku na humelela txani ngu ditshiku da wulamuli?
Nga ha hi ti wonako ngu kona ka mfota, vathu vavangi va pimisa ti to tibhiliyoni ta vathu va na yiswa txiluveloni txa Txizimu ti to ve ya lamulwa ngu kuya ngu ti va nga ti maha kale, vamwani va na ningwa hakelo ya ku ya hanya nzumani ni ku vamwani va na ya hya nzumani. Kambe Bhiblia yi kombisa ti to txikongomelo txa ditshiku da wulamuli ngu khulula vathu ka wubihi awu wu kuho. (Masalmo 96:13) Txizimu txi sawute Jesu ti to e va Mlamuli awu a no wuyisela wululami ka vathu.—Lera Isaya 11:1-5; Mithumo 17:31.
w12 15/9 12 ¶18-19
Kurula kudingana 1000 wa malembe ni ngu ha ku si gumiko
18 Wuxaka wonewo wo rula wu tsulupetilwe mbimo yi Sathani a nga xengetela vathu ku ve wukela Jehovha. Kambe kukhukhela 1914 Mfumo wa Mesiya wu teka mazambo kasi kuwuseta wumwewo ni kurula. (Vaef. 1:9, 10) Ka Mfumo wa 1000 wa malembe, timhaka to tsakisa ati “ti si wonekiko” ti na ta maheka. Se ku na hoka “magwito,” i ku magwito ya Mfumo wa Kristu wa 1000 wa malembe. Se ku na maheka txani msana ka toneto? Hambiku Jesu a nga amukela “wotshe wuthangeli nzumani ni hamafuni” ene kha ti guleti. Ene kha lavi kutekela wukoma Jehovha. Ngu kutiveka hahatshi a na ‘ningela mfumo ka Txizimu txakwe ni Tate.’ A na thumisa txikhalo ni wuthangeli awu wu si fananiswiko ni txilo “kasi ku na dhumiswa Txizimu Tate.”—Mat. 28:18; Vaf. 2:9-11.
19 Ka mbimo yoneyo, ava va no ta va va di hamafuni hahatshi ka Mfumo wa Txizimu va na ta va va di hetisekile. Ngu kutiveka hahatshi, va na londetela txikombiso txa Jesu ve tumela kufumwa ngu Jehovha. Va nava ni mkhanjo wo kombisa toneto ngu kuwina ka txiduko txo gwita. (Mtu. 20:7-10) Msana ka toneto, sotshe sindaka-milayo, ti si khataliseki ti to tingelozi mwendo vathu si na fuviswa ngu ha ku si gumiko. Ngu ditshuri eyo i nava mbimo yo tsakisa. Mmwani ni mmwani ka mwaya wa Jehovha nzumani ni hamafuni a na dhumisa Jehovha awu a nova “sotshe ka votshelele.”—Lera Masalmo 99:1-3.
Tithomba ta moya
it-2 994
Ndando
Mapswi ya ma ku “ndando ya yiphya” kha ma maneki ka Masalmo dwe, kambe u nga ma mana ka mibhalo ya Isaya ni ya mpostoli Johani. (Mas 33:3; 40:3; 96:1; 98:1; 144:9; 149:1; Isa 42:10; Mtu 5:9; 14:3) Wuxolisisi awu wu nga mahwa ka makhalo amangi a ha mapswi ya ma ku “ndando ya yiphya” ma manekako kona, wu kombisa ti to ndando yiya yi embelelwa ngu mhaka ya timhaka ta tiphya ka wukoma wa Jehovha ka wukhalo wotshe. Ngu ha ti nga wombwa ngu kona ngu nzila yo tsakisa ka Masalmo 96:10: “Jehovha se i Mkoma, NM”. Ta tiphya ati ti mahekako ka kukuliswa ka Mfumo ngu Jehovha ni ti titxhamuselako tona ka nzuma ni mafu, ti tikomba i di tona ti embelelwako ka “ndando ya yiphya.”—Mas 96:11-13; 98:9; Isa 42:10, 13.
21-27 KA OUTUBRO
TITHOMBA TA MU KA DIPSWI DA TXIZIMU | MASALMO 100-102
Kombisa kubonga ngu lirando lo thembeka la Jehovha
U nga ti lulamisela ngu nzila yihi ti to u bhabhatiswa?
18 Phela lirando li u ku nalo ngu Jehovha i fanelo yo tshura ngutu ka totshe ti u ku nato. (Lera Mavingu 3:3-6.) Lirando lako ngu Jehovha li nga ku vhuna kuwonisana ni sikarato u di tsani. Bhiblia ya womba-womba ngu lirando lo mbi guma ali Jehovha aku nalo ngu malanda akwe. (Mas. 100:5) Khumbula to awe u mahilwe ngu txifaniso txa Txizimu. (Gen. 1:26) Se u nga li kombisisa kutxani lirando liya lo mbi guma?
19 Kukhata kombisa kubonga. (1 Vat. 5:18) Ditshiku dimwani ni dimwani ti wotise tiya, “Jehovha a li kombisisa kutxani lirando lakwe kwangu?” Ka mikombelo yako u nga divali kubonga Jehovha ni ku m’gela totshe ti a nga kumahela. Wona simaho sakwe sa lirando asi a ku mahelako awe ngu kukongoma nga ha mpostoli Paulo a nga tipfa ngu kona. (Lera Vagalatiya 2:20.) Ti wotise tiya, ‘Ni nga li kombisisa kutxani lirando langu ngu ngene?’ Lirando lako ngu Jehovha li nga vhuna to u simama u di tsani u txi wonisana ni siduko ni sikarato. Eto ti na kuvhuna kusimama ni txiemiso txako txa timhaka moya ni kusimama u kombisa lirando ka Jehovha Tate wako ditshiku ni ditshiku.
“Tipimeleni, mi txi wonelela!”
10 Tiphango timwani ti hi fanelako ku ti vayilela ti pata kusakana ngu kusihana, wudevi, mawomba-wombelo o biha, kuxalela mafilmi a mazunga, pornografiya mwendo kuxalela vathu va va ku simbwiri ni timwani to nga toneto. (Mas. 101:3) Phela Sathani mbimo yotshe a lava tinzila to daya wuxaka wathu ni Jehovha. (1 Pedro 5:8) Ngako hi si ti woneli, Sathani a nga phaya kwa mbi thembeka, mabava, txiviti, livengo, kutiguleta ni txitsikivi ka timbilu ni mialakanyo yathu. (Vag. 5:19-21) Phela matipfelo awa ma nga woneka nga kha ma nga ni mtamo makhatoni. Kambe ngako hi si teki mazambo o ma dula ngu txikuluveta, ona ma nga simama me kula kufana ni mndonga wu wu ku ni vheneno ni ku ma nga hi mahela sikarato.—Jak. 1:14, 15.
w11 15/7 16 ¶7-8
Ina u na engisa sialakanyiso so pfisiseka sa Jehovha?
7 Ngu tihi ati ti patekako ka kuvayilela vagondisi va makuhu? Kha hi va amukeli mitini kwathu mwendo ku womba-womba navo. Kha ha fanela kulera mabhuku awe, hi xalela maprograma awe ka televizawu, hi wona ati va ti bhalako ka internet mwendo kubhala mawonelo yathu ka ma redes sociais yawe. Ngu kutxani hi di tiemisete ku va vayilela? Ngu mhaka ya lirando. Athu ha txi randa “Txizimu txa ditshuri”, ngu toneto kha hi lavi kuengisa tigondo ta makuhu ati ti si tsimbitisaniko ni ditshuri da mu ka Bhiblia. (Mas. 31:5; Joh. 17:17) I si ngeto dwe, athu ha randa sengeletano ayi Jehovha a yi thumisako kasi ku hi gondisa ditshuri do xamatisa do fana ni ditina da Txizimu ni txhamuselo ya dona, makungu akwe ngu mafu, txiemo txa vakufa ni themba ya kuwuswa ka vakufa. Ina wa ti khumbula ati u nga tipfisa tona mbimo yi u nga gonda timhaka tiya ni timwani tigondo ta mu ka Bhiblia? Ngu toneto u nga leke makuhu ya vagondisi va makuhu me kumaha u wukela sengeletano ayi yi nga kugondisa timhaka tatingi to tsakisa.—Joh. 6:66-69.
8 Ti si khataliseki ati vagondisi va makuhu va ti wombako, athu kha hi na mbi va londisela. Kha hi na txivangelo txo engisa vathu vonevo va fanako ni sisima sa kwa mbi na mati. Ngu toneto, ahi tiemiseleni kuzumba hi di thembekile ka Jehovha ni ka sengeletano ayi yotshe mbimo yi hi ningako mati o tenga ya ditshuri adi di humako ka dipswi da Txizimu.—Isaya 55:1-3; Mat. 24:45-47.
Tithomba ta moya
it-2 596
Disekwa
Mbimo yi disekwa di nga khura ngu sakudya, ngu mtoloveto di puruma di ya wukhalo wa dona dokha aha di tikombako nga di to henya, di beta msungu wa dona ka makata, di si ti zinginisi, aha ko di di kule di nga fananiswa ni dirigwi. Txinyana txiya txi zumbisa tiya kudingana maora, ati ti fanako ni ti m’bhali wa Masalmo a nga tiwomba mbimo yi a nga txi kombisa ku karateka kwakwe, atxi khene: “Ni fana ni [disekwa] di ku mu txiwulani.” (Mas 102:6) “Txiwula” txi txi wombwako hawa wukhalo wa kule aha ku si zumbiko vathu, mwendo ka sitinga sa matini. Ka timbimo timwani, sitinga sa matini si ku wuphemba ka Jordhani i nga di wukhalo awu kumanekako masekwa. Ku ni tixaka tiraru ta masekwa ti manekako khe Israyeli. Aya ma tolovelako kumaneka i Pelecanus onocrotalus, aya ma nga mbi toloveleka ku ma wona i Pelecanus crispus ni Pelecanus rufescens.
Disekwa di ti komba di txi dhunda ngutu wukhalo wu ku si nga ni vathu aha di si khulumetelwiko. Di aka txisaka koneho di kulisa vanana va dona ni ku di tshumela txisakani msana ko va di di date sihaka. Aku di dhundako kuzumba ka makhalo a siwula, txinyana txiya txa thumiswa a mu ka Bhiblia kota txikombiso txa kuloviswa. Kasi kukombisa kuloviswa ka Edhomi, Isaya a wombile ti to disekwa di ndi na zumba ka ditiko dileya. (Isa 34:11) Zefaniya a profetile ti to masekwa ma ndi na zumba marumbini ka Ninivha, kasi kukombisa kuloviswa ni kupwateka ka vathu.—Zef 2:13, 14.
28 KA OUTUBRO KALA 3 KA NOVEMBRO
TITHOMBA TA MU KA DIPSWI DA TXIZIMU
Ene wa ti alakanya ti to “Athu hi lithulu”
Etetela Jehovha, ziva ku dinganisela
5 Ku ti veka hahatshi ka Jehovha ni wumbilu wakwe sa mu susumetela ku eva wo dinganisela. Ngu txikombiso, Jehovha a kombisile to wa ti veka hahatshi mbimo yi a nga txi lava ku lovisa vathu va va nga ti ni mahanyelo o biha khe Sodhoma. Ngu kuthumisa tingelozi, Jehovha a gete Loti wamwamna wo thembeka ti to e thavela kuya mimangoni. Kambe Loti a txi thava kuya konemo, se ene a to kombela ka Jehovha ti to ene ni mwaya wakwe va thavela kuya Zowari i ku didhoropa da didotho adi ni dona di ngadi fanete ku hoxotwa. Jehovha a di sinzisile Loti to a engisa ti a nga mgela, kambe hahanze keto ene a tumete txikombelo txa Loti ni ku kha lovisa didhoropa da Zowari. (Gen. 19:18-22) Ku di pindile malembe o tala Jehovha a kombisile wumbilu ka vathu va Ninivha, ene a rumete mprofeti Jona kasi ku ya gela vathu vale va nga ti ni mahanyelo o biha ti to va ndina loviswa kumweko ni didhoropa dawe, kambe mbimo yi va nga tisola Jehovha a va divalete ni ku kha lovisa didhoropa dile.—Jona 3:1, 10; 4:10, 11.
Themba Jehovha, nga ha Samsoni a nga maha ngu kona
16 Hambi ku Samsoni a nga va ni wuyelo yo panda ngu mhaka ya phazamo yakwe, kha leka kuzama kumaha kudhunda ka Jehovha. Hambi i di ti to ha maha tiphazamo ati ti no lava hi kawukwa mwendo hi luza malungelo, kha ha fanela ku godhola. Khumbula ti to, Jehovha a ti emisete ku hi divalela. (Mas. 103:8-10) Ti singa ni mhaka ni tiphazamo tathu, kufana ni Samsoni hi nga simama hi va va lisima masoni ka Jehovha.
17 Wona txikombiso txa mwanathu wa jovhem awu a dhanwako ku i Michael. Ene a ti zumba a di ñolekile ngu mithumo ya moya, a txi thuma kota m’vhuneteli wa madhota ni nyaphandule wa mbimo yotshe. Hambiketo, txo mba tsakisa, ene a mahile phazamo ayi yi nga maha to e luza malungelo akwe dibanzani. Ene a womba tiya: “Ni ti zumba ni di ñolekile ngu kuthumela Jehovha. Se, ni sa ti emela ni ti pfite nga ni na ku swa ni maha txilo ka mthumo wa Jehovha. Ni si khali kupimisa to Jehovha a nga ni leka, kambe ni ti wotisile to ina wuxaka wangu ni Jehovha wu na simamisa ti wu nga ti ngu tona kale, ni ku ina ni nga di ni txi na m’thumela ngutu dibanzani nga ti ni nga ti m’thumelisa tona.”
18 Txo tsakisa, Michael kha rereka. Ene a tshumela a womba tiya: “Ni vekile mapimo ko lulamisa wuxaka wangu ni Jehovha ngu ku mu tulela mbilu yangu ngu mkombelo mbimo yotshe, kugonda, ni kualakanyisisa.” Ngu kutsimbila ka mbimo, Michael a tshumete e ma mana malungelo akwe dibanzani. Konku a thuma kota didhota ni nyaphandule wa mbimo yotshe. Ene a womba tiya: “Kutsaniswa ni kuseketelwa aku ni nga kumana ngutu ngutu ka madhota, ku ni vhuni kuwona to Jehovha a nga di a txi ni dhunda. Ni nga tshumela ni m’thumela kambe dibanzani ni di ni livhalo lo tenga. Txiperiyensiya txiya txi ni gondisile ti to Jehovha wa divalela mmwani ni mmwani awu a ti solako ngu ditshuri.” Hi nga tsaniseka ti to Jehovha a na hi thumisa ni ku hi katekisa ti singa ni mhaka ni ti to hi mahile tiphazamo. To lava hi maha totshe ti hi nga ti kotako kasi kululamisa tinzila tathu ni kusimama hi m’themba.—Mas. 86:5; Mav. 28:13.
U nga si kota kuhokelela makungo a moya
2 Ngako u di ni makungo aya u si se ku ma hokela, u nga godholi. Hambi kuhokelela makungo o hehuka ti nga lava mbimo ni mizamo. Totshe ati u nga ti mahako kasiku u hokelela makungo aku a moya, ti kombisa to wa ninga lisima wuxaka wako ni Jehovha ni ku u lava kumaha totshe ati u nga ti kotako kasi ku mtsakisa. Jehovha wa ninga lisima mizamo yako ni ku ene kha emeli to pinda ati u nga ti kotako. (Mas. 103:14; Mika 6:8) U fanete kudinganisela ngako u txi sawula makungo, me tsimbitisana ni siemo sako. Msana ko sawula makungo aku u nga maha txani ti to u ma hokelela? A hi wone tinzila to kari ati ti nga hi vhunako.
Tithomba ta moya
cl 55 ¶18
Mtamo wo vanga—“awu a nga maha nzuma ni mafu”
18 Hi gonda txani ka mtamo wa Jehovha wo vanga? Ha xamatiswa ngu silo so hambana-hambana asi a nga si vanga. M’bhali wa Masalmo a wombile tiya: “Mkoma, awe u mahile simaha sasingi . . . Mafu ma tate ngu sivangwa sako”! (Masalmo 104:24) Ditshuri! Vasiyentixta se va tumbute kupinda konamu ka miliyoni wa tixaka ta sivangwa asi si hanyako hamafuni, kambe mawonelo awe ma hambana mayelano ni ti to kuengetelekile timiliyoni ti ngahi. M’thu awu aku ni wusikoti wo maha to kari a nga thuka e gumelwa ngu wusikoti wo maha simwani sa siphya. Kambe, kuhambana ni m’thu, wusikoti wa Jehovha wo vanga silo so hambana-hambana sa siphya kha wu gumi.