U nga sikotisa kutxani kuva mngana wa ditshuri?

INA u khala kutipfa u txi wonisana ni txikarato u pwata wo kuvhuna? Hi hanya ka timbimo to “karata” ni ku eto ti nga hi maha hi godhola mwendo kutipfa hi di hokha. (2 Tim. 3:1) Hambiketo, kha ti lavi hi wonisana ni sikarato sathu hi di hokha. Bhiblia yi kombisa ti to vangana va ditshuri mba lisima ngutu ngu “mbimo ya xomulo.”—Mav. 17:17.

MNGANA WA DITSHURI A NGA HI VHUNISA KUTXANI?

Mpostoli Paulo amukete txivhuno txa vangana vakwe ava va nga m’heleketa ka maendo akwe a wurumiwa. (Vakl. 4:7-11) Mbimo yi Paulo a nga ti khotetwe khe Roma, vangana vakwe va mvhuni kumaha timhaka ti a nga si na ku tikota kumaha apune. Ngu txikombiso, Epafrodhito a heleketete Paulo silo sa lisima asi vanathu va Filipiya va nga ti m’rumelete. (Vaf. 4:18) Tikiko a rumete mapasi a Paulo ka mabanza. (Vakl. 4:7) Ngu kuvhunwa ngu vangana vakwe, Paulo a si koti kutsanisa mabanza hambi mbimo yi va nga ti m’gete ti to a si humi mtini ni mbimo yi a nga ti jele. Se nyamsi ko, u nga sikotisa kutxani kuva mngana wa ditshuri?

Ka masiku athu, vanathu vo tala va kombisa ati vangana va ditshuri va nga ti mahako kasi kuvhunana. Wona txikombiso txa mwanathu wa txisikati awu a nga kombisa kuva mngana wa ditshuri ka Elisabet, awu i ku nyaphandule wa mbimo yotshe khe Espanha. Mbimo yi mame wa Elisabet a nga tumbulwa to a ni câncer, mwanathu wule a rumelete Elisabet mamesaji a mangi o mtsanisa aya ma nga ti seketetwe ka Bhiblia. Elisabet a womba tiya: “Mbimo yi ni nga ti wona mamesaji akwe ni txi tsaka ngutu ngu kuziva ti to ku ni wu a khatalako ngu ngani, ni ku eto ti txi ni ninga mtamo wo wonisana ni txiemo txiya.”—Mav. 18:24.

Hi nga tsanisa wungana wathu ni vanathu ngu kuva vhuna kuya mitshanganoni ni ka mthumo wo txhumayela. Ngu txikombiso, u nga ninga bholeya mwanathu awu a nga kula ngu tanga, se ewo i ngava mkhanjo wo mi tsanisana. (Var. 1:12) Kambe vamwani kha va sikoti kuhuma mtini. Hi nga va vhunisa kutxani vanathu vonevo?

VANA MNGANA WA DITSHURI KA VALE VA SI TI KOTIKO KUHUMA MTINI

Vanathu vamwani kha va sikoti kuxalela mitshangano ka Nyumba ya Mfumo ngu mhaka ya malwati mwendo sikarato simwani. Wona txikombiso txa David, awu a nga ti ni câncer. Ti txi lava e sela mirende kasi kuthuma câncer konamu ko pinda 6 wa mitxima. Kudingana mbimo yoneyo, ene ni msikati wakwe Lidia va txi xalela mitshangano va di mtini ngu kuthumisa vhidhiyo konferensiya.

Vanathu dibanzani va va vhunisile kutxani? Msana ka mitshangano, vanathu va txi va fonela ngu kuthumisa vhidhiyo kasi kubhula navo. Hahanze keto, msana ka mitshangano, vanathu va txi va rumelela mamesaji o bonga tixamulo tawe. Eto ti va vhunisile kutxani? Vona va txi tipfa va txi dhundwa ni kuva hafuhi ni vanathu.

Ti ngo txani u maha maplanu o txhumayela ni vanathu va va si ti kotiko kuhuma mtini? Ti nga lava u maha kutxitxanyana ko kari ka programa yako kasiku u kota kuthuma navo. U txi maha toneto va na ti wona to kha va divalwa. (Mav. 3:27) U nga thavisanyana mbimo kasiku u bhala navo mapasi mwendo kutxhumayela navo ngu telefone. Se madhota ma nga maha malulamiselo a ti to mtshangano wa mthumo wa thembwe wu mahwa ngu vhidhiyo konferensiya. David ni Lidia va tsakile ngutu ngu kuva dibanza dawe di di mahile toneto. David a txhamusela tiya, “Kuxalela mtshangano wa mthumo wa thembwe ngu vhidhiyo konferensiya ni grupu yathu ni kupfa mkombelo, eto ti txi hi tsanisa.” Hahanze keto, ngako ti txi koteka u nga teka txigondo txako u tsula natxo ka mwanathu wu a si ti kotiko kuhuma mtini.

Ngako hi txi thuma ni vanathu ava va si tikotiko kuhuma mtini, hi ngava ni mkhanjo wo wona tifanelo tawe ta tinene. Mbimo yi hi wonako nzila yi va gondisako ngu yona vamwani Dipswi da Txizimu ni ku va vhuna ku ve tshuketa hafuhi ni Jehovha, eto ti na hi maha hi va xonipha ngutu. Hahanze keto, u na mana vangana vavaphya mbimo yi u vhunako vamwani ti to ve pateka ka mitshangano ni ka mthumo wo txhumayela.—2 Vak. 6:13.

Mbimo yi Paulo a nga txi wonisana ni sikarato, Tito a tsute eya mpfuxela ni ku eto ti thavelete Paulo. (2 Vak. 7:5-7) Phela ndinene kuwomba mapswi ya ma no thavelela vanathu. Kambe txikombiso txa Tito txi tshumela txi kombisa ti to hi nga thavelela vanathu ngu kuheta mbimo yo tala navo ni kumaha timhaka ti ti no va vhuna.—1 Johani 3:18.

VANA MNGANA WA DITSHURI KA TIMBIMO TA XANISA

Vanathu va Russia va hi vekela txikombiso txa txinene txo vhuna vamwani. Wona ti ti nga humelela mwanathu Sergey ni msikati wakwe Tatyana. Msana kova maphoyisa ma di setxhile mtini kwawe, vona va tekilwe veya kuxuxiswani. Tatyana a txhusilwe e tshumela eya mtini. Mwanathu Sergey a womba tiya: “Mbimo yi [Tatyana] a nga hoka mtini, mwanathu wa txisikati awu a ku ni txibindi a tsute eya mpfuxela. Se vanathu vamwani ni vona va tile ve ta hi vhuna kubasisa mtini kwathu.”

Mwanathu Sergey a womba tiya: “Mbimo yotshe na di dhunda ngutu dibhuku da Mavingu 17:17, adi di wombako tiya: ‘Randa mngana wako yotshe mbimo, se ngu mbimo ya xomulo a na va mwananu.’ Mapswi yawa ma nga txi ni vhuna ka mbimo yiya ya xanisa, nguku ni si na kusikota kuwonisana ni txiemo txiya nokha. Jehovha a ni ningile vangana ava va ni vhunako ni ku ni tsanisa.”a

Ngu kutsimbila ka mbimo, hi na wonisana ni siemo so karata ngutu. Ngu toneto hi na lava vangana va hi nga va thembako. Phela vangana vonevo, hi na va lava ngutu ngu mbimo ya xanisa ya hombe. Se konku, i mbimo yo maha totshe ti hi nga tikotako kasiku hi va vangana va ditshuri!—1 Pedro 4:7, 8.