Tiwonele ka moya wo ti alakanyela ni wo tiguleta wa mafu yawa
INA wa tiwona to vathu vavangi nyamsi va pimisa to va fanete kuñolwa ngu nzila yo sawuleka mwendo kuamukela malungelo o kari? Hambi va txi ñolwa ngu nzila yo sawuleka va nga txi lava mamwani malungelo. Vathu vo ngeto, vo tialakanyela dwe ni ku kha va kombisi kubonga ngu si va ku naso. Bhiblia yi womba ti to eyo i ndi nava mapimiselo a vathu vavangi ka masiku awa a magwito.—2 Tim. 3:2.
Ti hakubasani ti to kutiguleta ni ku tialakanyela kha ta khata nyamsi. Adhamu ni Evha va lavile ku ti mahela txisungo vapune txa ti i ku ta tinene ni to biha, se eto ti tisile sikarato so tala. Ku di pindile malembe o tala, Mkoma Uziya wa Judha, ngu kutiguleta a pimisile to a ti ni fanelo yo hisa dibaselo dithempeleni, kambe a ti ko ti kanganyisa. (2 Mak. 26:18, 19) Ngu ha kufanako, Vafarisi ni Vasadhusi va txi pimisa to vona mba lisima ka Txizimu nguku i nga ti va liveleko la Abrahamu.—Mat. 3:9.
Athu hi randetwe ngu vathu ava va ku ni moya wo tialakanyela ni wo tiguleta, ni ku moya wonewo wu nga hi tshapela. (Vag. 5:26) Hi nga khata kupimisa to hi fanetwe kunõlwa ngu nzila yo sawuleka mwendo kuamukela malungelo o kari. Hi nga maha txani kasiku hi si tshapelwi ngu mapimiselo onewo? Txo khata, hi fanete kupfisisa a ti Jehovha a ti pimisako ngu mhaka yoneyo. Matshina mambidi a mlayo a Bhiblia ma na hi vhuna.
Jehovha ngene a ku ni fanelo yo hi gemela ati ti hi fanelako. Wona sikombiso so kari.
Ha mwayani, Jehovha a wombile ti to wamsikati a fanete kuxonipha mwamna wakwe, se wamwamna a fanete kuranda msikati wakwe. (Vaef. 5:33) M’thu wu a nga txhadha a ni fanelo yo emela ti to mwamna wakwe mwendo msikati wakwe e mkomba lirando li li fanelako ene dwe. (1 Vak. 7:3) Se vaveleki va emela ti to vanana vawe ve va engisa, ni ku vanana ve emela kukombwa lirando ngu vaveleki vawe.—2 Vak. 12:14; Vaef. 6:2.
Jehovha a womba ti to madhota ma ni fanelo yo xoniphwa ngu mhaka ya mthumo wu ma wu mahako. (1 Vat. 5:12) Kambe kha va nga ni fanelo yo kontrolara totshe ati vanathu va ti mahako.—1 Pedro 5:2, 3.
Jehovha a ningile fanelo mifumo ti to yi hakelisa resa ni kuxoniphwa ngu vathu.—Var. 13:1, 6, 7.
Ngu konaha ka lirando lakwe, Jehovha a hi ninga so pinda asi si hi fanelako. Aku hi nga mbi hetiseka, atxi txi hi fanelako lifo dwe. (Var. 6:23) Hambiketo, Jehovha wa hi ninga makatekwa o tala ngu konaha ka lirando li a ku nalo ngu ngathu. (Mas. 103:10, 11) Makatekwa ni malungelo aya a hi ningako kha ma hi faneli, kambe wa hi ninga ngu mhaka ya wunene wakwe wo mbi hi fanela.—Var. 12:6-8; Vaef. 2:8.
HI NGA MAHA TXANI KASIKU HI SI TIALAKANYELI NEM KUTIPFA HI DI VA LISIMA KUPINDA VAMWANI
Tiwonele kasiku u si vi ni mapimiselo a vathu va ditiko diya da Sathani. Hi si ti pfisisi, hi nga khata kupimisa to ha fanelwa ngu malungelo kupinda vamwani. Ditshiku dimwani, Jesu a kontarete txidinganiso atxi txi kombisako to ta hehuka kupimisa ngu nzila yoneyo. Ene a wombawombile ngu vathu va va nga tumela kuthuma ditshiku dotshe kasi kuhola didhenari dimwedo. Ngu msana, mlungu wawe a thote vathu vamwani. Di di swite ditambu, votshe vathumi va amukete m’holo wo fana hambi vale va ngadi thumile diora dimwedo basi. Kambe ava va nga khata kuthuma ni mixo, va txi pimisa to va di fanete kuhola male yo tala nguku va thumile ditshiku dotshe na ku txi hisa. (Mat. 20:1-16) Ka txidinganiso txiya, Jesu a txi kombisa vagondiswa vakwe ti to va di fanete kueneliseka ngu sotshe si Txizimu txi va ningako.
Vavamna ava va nga thuma ditshiku dotshe va ti pimisa to va fanete kuhola male yo tala kupinda vamwani
Kombisa kubonga, u nga naveli sa vakwanu. (1 Vat. 5:18) Etetela txikombiso txa Paulo, awu a nga mbi kombela male ka vanathu va khe Korinto hambiku a ngadi ni fanelo yo maha toneto. (1 Vak. 9:11-14) Hi fanete kubonga otshe makatekwa aya hi ma manako, hahanze ko zumbela kunavela sa vamwani.
Paulo kha sinzisa vanathu ti to ve mninga male
Tiveke hahatshi. Ngako m’thu a txi pimisa to mbwa lisima kupinda vamwani, ene a khata kupimisa ti to wa fanelwa ngu so tala kupinda asi a ku naso. Kutiveka hahatshi mrende wa mapimiselo oneyo aya ma nga tshapelako vamwani.
Kutiveka hahatshi ka Dhaniyeli ku mmahile e va wo sawuleka ka Jehovha
Mprofeti Dhaniyeli txikombiso txa txinene ko tiveka hahatshi. Ene a kulete ka mwaya wo ganya, a ti tshurile, a ti ni wuzivi ni wusikoti wo tala. Ngu toneto, ene a ndi na pimisa to a ti fanetwe kuñolwa ngu nzila yo sawuleka mwendo e pimisa to malungelo ya a nga ti nawo ma ti mfanela. (Dhan. 1:3, 4, 19, 20) Hambiketo, Dhaniyeli a simamile e va m’thu wo tiveka hahatshi, se eto ti mmahile e va wo sawuleka ka Jehovha.—Dhan. 2:30; 10:11, 12.
Hotshethu hi fanete kutiwonela ka moya wo tialakanyela ni wo tiguleta awu wu nga toloveleka nyamsi. Hi lava kutsaka ngu otshe makatekwa aya Jehovha a hi ningako ngu mhaka ya wunene wakwe wo mbi hi fanela.