U nga swele kubhabhatiswa

1. U na wuyelwa ngu txani ngako u txi bhabhatiswa?

INA awe wa m’dhunda Jehovha, awu a nga kuninga silo sotshe kupata ni wutomi? Ina wa navela ku mkomba nzila yi u m’dhundako ngu yona? Nzila ya yinene yo maha toneto, ngu ningetela wutomi wako ka Jehovha ni kubhabhatiswa. Kukhukhela koneho awe u lumba mwaya wa Jehovha. Ngu nzila yoneyo, se u lumba Jehovha ni ku ene a na ku kongomisa ni ku kukhatalela kota Tate ni Mngana wako. (Mas. 73:24; Isaya 43:1, 2) Hahanze keto, u na va ni themba yo ta hanya ngu ha ku si gumiko.—1 Pedro 3:21.

2. Hi na bhula ngu txani ka gondo yiya?

² Ina txiho a txi txi kutsivelako kubhabhatiswa? I di toneto, khu nga wekha. Vathu vo tala ti lavile ve maha kutxitxa ka nzila yi va nga txi pimisa ngu yona ni mahanyelo awe kasiku ve faneleka kubhabhatiswa. Kambe konku va thumela Jehovha ngu kuhiseka ni ku va tsakile. Eto ti humelete ka va va nga bhabhatiswa ka timbimo ta vapostoli. Se hi na gonda ngu sikarato si va nga si xula kasiku ve kota kubhabhatiswa ni kuwona ti to hi nga gonda txani ka txikombiso txawe.

VASAMARIYA VA MAHILE TXISUNGO TXO BHABHATISWA

3. Ngu sihi sikarato a si Vasamariya ti nga lava ve si xula kasiku ve bhabhatiswa?

³ Ka timbimo ta Jesu, Vasamariya i ti mtxawa wa wukhongeli awu wu nga txi hanya wuphemba ka Judheya, hafuhi ni didhoropa da Sikemi ni Samariya. Va si se kubhabhatiswa, vona va ti fanete kuva ni wuzivi wo enela ngu Dipswi da Txizimu. Vona va txi kholwa ti to ova 5 wa mabhuku o khata a Bhiblia dwe i ku ona ma nga huhutelwa ngu Txizimu, i ku Genesisi kuya ka Dhewuteronome, kutilava ni dibhuku da Joxuwa. Kambe Vasamariya va txi emela ku ta ka Mesiya ngu kuya ngu txithembiso txi ku ka Dhewuteronome 18:18, 19. (Joh. 4:25) Se kasiku ve bhabhatiswa, ti txi lava ve tumela ti to Jesu i Mesiya wu a nga thembiswa. Se “kutala ka Vasamariya” va mahile toneto. (Joh. 4:39) Hahanze keto, Vasamariya ni Vajudha va si hanyisani ngu mhaka txisawusawu. Se ti nga maha wungi wa Vasamariya ti di lavile ve leka moya wa txisawusawu.—Luka 9:52-54.

4. Ngu kuya ngu Mithumo 8:5, 6, 14, Vasamariya va angulisile kutxani mbimo yi Filipi a nga va txhumayela?

⁴ Nji txani txi nga vhuna Vasamariya ku ve bhabhatiswa? Mbimo yi Filipi ‘a nga va txhumayela mayelano ni Kristu,’ Vasamariya vamwani ‘va amukete Dipswi da Txizimu.’ (Lera Mithumo 8:5, 6, 14.) Hambiku Filipi i nga ti Mjudha, vona va engisile. Ti nga maha va di khumbute a ti mabhuku o khata a Bhiblia ma ti wombako mayelano ni Txizimu ti to txona kha txi nga ni txisawusawu. (Dhewut. 10:17-19) Ti singa ni mhaka ni ti to nji txani txi nga va maha ve tumela kutxhumayelwa, vona ‘va riyile nzeve ka ti Filipi a nga txi tiwomba’ mayelano ni Jesu ni ku va ti kholwa ti to Filipi a ti rumetwe ngu Txizimu. Filipi ati tshumela e maha sidiwukiso so tala so fana ni kuhanyisa valwati ni kuhinga madhimoni.—Mith. 8:7.

5. Hi gonda txani ka txikombiso txa Vasamariya?

⁵ Txisawusawu ni kupwata wuzivi ti di tsivete Vasamariya ku ve kula ngu didhawa da moya. Kambe vona kha va tumelela to ti maheka eto. Aku va nga kholwa ti to a ti Filipi a nga txi va gondisa i ti ditshuri, Vasamariya kha va swela kubhabhatiswa. Bhiblia yi womba ti to vona “va to kholwa mbimo yi va nga pfa Filipi a txi txhumayela mahungu a manene a Mfumo wa Txizimu ni kutxhumayela ditina da Jesu Kristu, se vavamna ni vavasikati va to bhabhatiswa.” (Mith. 8:12) Se awe ko? Ina wa kholwa ti to Dipswi da Txizimu ditshuri? Ina wa kholwa ti to Tifakazi ta Jehovha ta xula txisawusawu ni ku ti karatela kukombisa lirando ngaha Jesu a nga womba ngu kona to Makristu a ditshuri ma na kombana lirando? (Joh. 13:35) Se u nga thave kubhabhatiswa! Awe u nga tsaniseka ti to Jehovha a na kukatekisa.

6. Txikombiso txa Ruben txi hi gondisa txani?

⁶ Ruben, wa Alemanha, a wunjilwe ngu vaveleki va i ku Tifakazi ta Jehovha. Kambe mbimo yi i nga ti jovhem a si kholwi to Txizimu txaho. Nji txani txi a nga txi maha kasiku e xula kukanakana kwakwe? Ene a pfisisile ti to a ti fanete kugonda to engeteleka mayelano ni mhaka yoneyo ni ku ngu toneto a nga ti maha. Ene a womba tiya: “Ani ni mahile gondo yangu nipune kasiku ni thavisa kukanakana koneko. Ni gondile makhambi amangi mayelano ni ku ti mahekela ka silo.” Ene a gondile dibhuku adi di ku Existe um Criador Que Se Importa com Você? Dibhuku donedo di tsanisile likholo la Ruben ni ku a khatile kupimisa tiya: ‘Yah! Jehovha waho ngu ditshuri.’ Hahanze keto, Ruben a ti ya pfuxela Mzinda wa Hamafuni Kotshe wa Tifakazi ta Jehovha. Ene a xamatisilwe ngu wumwewo wu vanathu va hamafuni kotshe va ku nawo ni ku a tiwoni to eto i ti txidiwukiso. Ruben a tshumelete Alemanha ni ku a bhabhatisilwe a di ni 17 wa malembe. Ngaku awe u di ni kukanakana mayelano ni Txizimu, Bhiblia mwendo timhaka timwani, maha wuxolisisi ka mabhuku athu. Kukanana kwako ku nga xulwa ngu “wuzivi wa kuhetiseka.” (Vaef. 4:13, 14) Ngu kutsimbila ka mbimo, awe u na pfa siperiensiya sasingi mayelano ni lirando ni wumwewo awu vanathu va ku nawo hamafuni kotshe ni ku awe u na wona txikombiso txa toneto dibanzani kwako. Eto ti na engetela lirando li u ku nalo ngu mwaya wathu wa hamafuni kotshe.

SAWULE A MAHILE TXISUNGO TXO BHABHATISWA

7. Ngu kuhi kutxitxa ku Sawule a nga ti fanete ku kumaha mayelano ni mapimiselo akwe?

⁷ Wona txikombiso txa Sawule wa Tarso. Ene a ti gondile ka sikolwa so guleka sa Txijudha. (Vag. 1: 13, 14; Vaf. 3:5) Ka mbimo yile, Vajudha vavangi va txi kholwa ti to Makristu mba apostata. Ngu toneto, Sawule a txi xanisa Makristu a txi pimisa ti to a txi maha kudhunda ka Txizimu. (Mith. 8:3; 9:1, 2; 26:9-11) Se ngako Sawule a ti ko lava kukombisa likholo ka Jesu ni kubhabhatiswa kota Mkristu, ene a ti fanete kutiemisela kuxaniswa.

8. a) Nji txani txi nga vhuna Sawule ku e bhabhatiswa? b) Ngu kuya ngu Mithumo 22:12-16, Ananiya a vhunisile kutxani Sawule? (Wona ni mfota.)

⁸ Nji txani txi nga vhuna Sawule ku e bhabhatiswa? Mbimo yi Jesu a nga womba-womba ni Sawule adi nzumani, liwoningo lo ta ngu nzumani li xokarile Sawule e va dibhofu. (Mith. 9:3-9) Kudingana masiku mararu, Sawule a si dyi nem kusela txilo ni ku hi nga tsaniseka ti to ene a txi alakanyisisa ngu ti ti nga ti mmahekete. Ene a tsanisekile ti to Jesu i ti Mesiya ni ku Makristu i ti vona vakhozeli va ditshuri va Txizimu. Hi nga pimisa nzila yi Sawule a nga ti karatekile ngu yona ngu kuva a di patekile ka kudawa ka Sitefani. (Mith. 22:20) Msana ka masiku oneyo a mararu, m’gondiswa wu a dhanwaku ku i Ananiya a wombawombile ni Sawule ngu nzila ya yinene, e m’hanyisa ni ku mkuzeta ku e bhabhatiswa ngu txikuluveta. (Lera Mithumo 22:12-16.) Sawule a ti vekile hahatshi, e tumela txivhuno txa Ananiya ni ku a khatile wutomi wa wuphya kota Mkristu wu a nga bhabhatiswa.—Mith. 9:17, 18.

9. Hi nga gonda txani ka txikombiso txa Sawule?

⁹ Hi gonda txani ka txikombiso txa Sawule? Kutiguleta ni kuthava vathu ku di tsivete Sawule ku e bhabhatiswa. Kambe ene kha ti tumelela ku eto ti maheka. Sawule ati vekile hahatshi e maha kutxitxa ku ku nga txi laveka ka wutomi wakwe kasiku e va mlondeteli wa Kristu. (Mith. 26:14, 19) Ene a txi tiziva to a ndi na xaniswa, kambe a ti tiemisete kuva Mkristu. (Mith. 9:15, 16; 20:22, 23) Msana ko va a di bhabhatisilwe, Sawule a simamile e themba txivhuno txa Jehovha mbimo yi a nga ti wonisana ni siduko so hambana-hambana. (2 Vak. 4:7-10) Ti nga maha nawe u tshangana ni siduko so hambana-hambana mbimo yi u no va Fakazi ya Jehovha. Kambe u nga tsaniseka ti to Jehovha ni Jesu va na kuninga txivhuno txi u txi lavako kasiku u simama u di thembekile.—Vaf. 4:13.

10. Txikombiso txa Ana txi nga kuvhunisa kutxani?

¹⁰ Ana a kulisilwe ka mwaya wa lixaka la Txikurdha wulambwe ka Europa. Msana kova mwamwakwe a di bhabhatisilwe, Ana a tumeletwe ngu tate wakwe ku e gonda Bhiblia a di ni 9 wa malembe. Maxaka mamwani ya a nga txi zumba nawo ma m’wukete mbimo yi a nga khata kugonda Bhiblia. Vona va txi pimisa ti to o dhanisa mwaya wawe nguku a nga ti lekile wukhongeli wu a nga ti kulete ka wona. Mbimo yi a nga ti ni 12 wa malembe, Ana a kombete mtumelelo ka tate wakwe kasiku e bhabhatiswa. Ene a m’wotisile ti to, ina njisungo txakwe mwendo o sinziswa ngu m’thu mmwani. Ana a m’gete tiya: “Ani na m’dhunda Jehovha.” Koneho tate wakwe a mtumelete to e bhabhatiswa. Msana kova a di bhabhatisilwe, maxaka akwe ma simamile me mñola ngu nzila yo biha ni ku mpoyilela. Mmweyo wa dixaka dakwe a wombile tiya: “I tshuku u va digelegele mwendo u dhaha fola kupinda kuva Fakazi ya Jehovha.” Ana a wonisanisile kutxani ni txiemo txonetxo? Ene a womba tiya: “Jehovha a ni vhuni ku ni tsana ni ku mame ni tate ni vona va ni vhuni.” Ana a mahile lixta ya siemo sotshe si Jehovha a nga mvhuna ka sona ka wutomi wakwe. Mbimo yotshe Ana wa wona lixta yoneyo kasiku a si divali nzila yi Jehovha a nga mvhuna ngu yona. Se ngako nawe u txi thava kuxaniswa, khumbula ti to Jehovha a na kuvhuna.—Vaheb. 13:6.

KORNELIYO A MAHILE TXISUNGO TXO BHABHATISWA

11. Nji txani txi ndi no va txi di mahile Korneliyo e swela kubhabhatiswa?

¹¹ Bhiblia yi tshumela yi womba-womba ngu txikombiso txa Korneliyo. Ene i ti mthangeli wa mtxawa wa 100 wa masotxhwa a Varoma. (Mith. 10:1) Ngu toneto, ene a txi ziwa ngutu ngu vathu ni ngu masotxhwa o tala. Ene “a txi vhuna sisiwana.” (Mith. 10:2) Jehovha a rumete mpostoli Pedro ku e ya Txhumayela Korneliyo. Ina Korneliyo a swete kubhabhatiswa ngu mhaka ya txikhunja txi a nga ti natxo?

12. Nji txani txi nga vhuna Korneliyo ku e bhabhatiswa?

¹² Nji txani txi nga vhuna Korneliyo ku e bhabhatiswa? Bhiblia yi womba ti to Korneliyo “a txi thava Txizimu ni kutshumela e txi khozela kumweko ni va mwaya wakwe.” Ene a txi tshumela e maha mkombelo ka Txizimu. (Mith. 10:2) Mbimo yi Pedro a nga m’gela mahungu a manene, Korneliyo ni mwaya wakwe va khatile kukombisa likholo ka Jesu ni ku va bhabhatisilwe ngu txikuluveta. (Mith. 10:47, 48) Kha ti kanakanisi ti to Korneliyo ati tiemisete kumaha kutxitxa ku ku nga txi laveka kasiku ene ni mwaya wakwe ve khozela Jehovha.—Jox. 24:15; Mith. 10:24, 33.

13. Hi gonda txani ka txikombiso txa Korneliyo?

¹³ Kufana ni Sawule, txikhunja txi Korneliyo a nga ti natxo txi di mtsivete kubhabhatiswa. Kambe ene kha ti tumelela toneto. Ina awe ti lava u maha kutxitxa ka hombe kasiku u bhabhatiswa? Ti di ngeto, tsaniseka ti to Jehovha a na kuvhuna. Ngako u di tiemisete kuthumisa matsina a milayo ya mu ka Bhiblia kasi kutsakisa Jehovha, ene a na kukatekisa.

14. Txikombiso txa Tsuyoshi txi nga kuvhunisa kutxani?

¹⁴ Tsuyoshi, wa Japão ti lavile e maha kutxitxa ko kari ka mthumo wakwe kasiku e bhabhatiswa. Ene a txi thuma kota mvhuneteli wa mextre wa txikolwa txa nduma a txi txi dhanwaku ku i Ikenobo, a txi txi gondisako vathu kumaha mafilori a ya ma vekwako ka mathitha. Se mbimo yi mextre wakwe a nga ti si tikoti kuya kutshotshani ka vafi aha ku nga ti mahwa sihena sa Vabhudha, Tsuyoshi ngene a nga txi mvhaleta. Kambe mbimo yi a nga gonda ditshuri mayelano ni lifo, ene a mahile txisungo txa kwa mbi pateka kambe ka sihena soneso, kasiku e bhabhatiswa. (2 Vak. 6:15, 16) Ene a bhute ni mextre wakwe mayelano ni mhaka yoneyo. Yi vite yihi wuyelo? Tsuyoshi a simamile ka mthumo kambe a si pateki ka sihena soneso. Msana ka dilembe dimwedo a di khatile kugonda Bhiblia, ene a bhabhatisilwe.a Se ngako nawe ti txi lava u maha kutxitxa ko kari ka mthumo wako kasiku u tsakisa Jehovha, tsaniseka ti to a na kuvhuna awe ni mwaya wako to mi si pwatekelwi ngu txilo.—Mas. 127:2; Mat. 6:33.

VAKORINTO VA MAHILE TXISUNGO TXO BHABHATISWA

15. Ngu sihi sikarato a si Vakorinto ti nga lava ve si xula va si se bhabhatiswa?

¹⁵ Vathu vo tala va va nga txi hanya ka didhoropa da Korinto va ti hanya ngu nzila yi yi nga ti si tsakisi Txizimu. Vona va txi dhunda male ni ku va txi tiñola ngu nzila yo biha ngu ta mataho. Vathu va va nga txi hanya ka didhoropa dile ti txi lava ve xula sikarato sasingi kasiku ve thumela Jehovha. Hambiketo, mbimo yi Paulo a nga ya Korinto kasiku kuya txhumayela mayelano ni Kristu “vahanyi vavangi va Korinto, ava va nga ti pfite dipswi, va to kholwa ve tshumela ve bhabhatiswa.” (Mith. 18:7-11) Msana keto, Jesu a humelete ka Paulo ngu m’woniso e m’gela tiya: “Vathu vo tala va didhoropa diya va ni lumba.” Ngu toneto, Paulo a simamile e txhumayela ka didhoropa dile kudingana dilembe.

16. Nji txani txi nga vhuna Vakorinto ku ve bhabhatiswa? (2 Vakorinto 10:4, 5)

¹⁶ Nji txani txi nga vhuna Vakorinto ku ve bhabhatiswa? (Lera 2 Vakorinto 10:4, 5.) Bhiblia ni moya wo sawuleka si va vhuni ku ve maha kutxitxa ka hombe. (Vaheb. 4:12) Vathu va Korinto va va nga maha Makristu, va sikoti kuxula mikhuva yo biha yo fana ni kupa, wudevi, ku majaha me otela ni majaha kulowe ni vavasikati ve otela ni vavasikati kulowe.—1 Vak. 6:9-11.b

17. Hi gonda txani ka txikombiso txa Vakorinto?

¹⁷ Nguha hi nga tiwona ngu kona, vathu vamwani va korinto ti txi lava ve leka mikhuva yi va nga txi yi dhunda ngutu. Hambiketo, vona kha va pimisa ti to kha va nge sikoti kuleka mikhuva yoneyo. Vona va mahile mizamu yo bela ngu diphangu do songa di di yisako wutomini. (Mat. 7:13, 14) Ina awe u lava kubhabhatiswa, kambe u lwisana ni mkhuva wo kari wo biha? I di toneto, u nga godholi! Kombela Jehovha ti to e kuninga moya wakwe wo sawuleka. Eto ti na kuvhuna ku u lwisana ni kunavela kumaha to biha.

18. Txikombiso txa Monika txi nga hi vhunisa kutxani?

¹⁸ Monika, wa Geórgia, a mahile mizamu ya hombe ngutu kasiku e leka mawombawombelo a nzambwa ni kuleka kuxalela silo si si nga ti henyisa Jehovha. Ene a womba tiya: “Mbimo yi ni nga ti ngadi jovhem, ni mahile mkombelo kasiku ni maha kutxitxa ku ku nga txi laveka. Jehovha a txi tiziva to na ti lava kumaha tatinene, ngu toneto, ene a ni vhuni ni ku ni kongomisa.” Monika a bhabhatisilwe a di ni 16 wa malembe. Se awe ko? Ina ti lava u leka mkhuva wo kari wo biha kasiku u maha ti ti tsakisako Jehovha? Simama u kombela ka Jehovha mtamo wo maha kutxitxa ku ku lavekako. Jehovha a ni wuha, ngu toneto, simama u mkombela moya wakwe wo sawuleka.—Joh. 3:34.

LIKHOLO LAKO LI NGA SIKOTA KUXULA SIKARATO SA HOMBE

19. Nji txani txi no kuvhuna kuxula sikarato sa hombe? (Wona ni mfota.)

¹⁹ Tsaniseka ti to ti si nga ni mhaka ni sikarato si ti nga lavako u si xula kasiku u bhabhatiswa, Jehovha wa kuranda ni ku a lava ti to u maha txienge txa mwaya wakwe. Jesu a gete tiya vagondiswa vakwe: “Na mi gela ditshuri ku, i ti ku mo va ni likholo lo dingana ni mbewu ya txinapi, mi nga gela mmango wuwa mi txi khanu: ‘Khukha hawa u ya hale,’ se wona wu khukha, txi walo mi no txi tanda.” (Mat. 17:20) Jesu a gete mapswi yawa vathu va va nga ti si na malembe o tala va txi mlondisela, se ti txi lava ve engetela likholo lawe. Ava tsanisekisile ti to ngako va txo va ni likholo lo enela, va na sikota kuxula sikarato sa hombe kufana ni mmango. Jehovha a na kuvhuna nawe ku u maha toneto.

20. Sikombiso sa timbimo ta kale ni sa ngweno a si hi nga bhula ngu sona ka gondo yiya, si kuvhunisile kutxani?

²⁰ Ngako u txi tumbula ti to ku ni txo kari txi kutsivelako ku u bhabhatiswa, ngu txikuluveta maha totshe ti u nga ti kotako kasiku u xula txikarato txonetxo. Sikombiso sa Makristu a kale ni ya timbimo tathu si nga kutsanisa. Hi navela ti to sikombiso soneso si ku kuzeta kutiningetela ka Jehovha ni kubhabhatiswa. Etxo i na va txisungo txa lisima ngutu ka wutomi wako!